ماكىت اۋدانى:
ماقتا ەگىلەتىن جەر اۋدانى ازايعانىمەن، ءونىم مولشەرى ارتتى
انار بۇلت / شينجياڭ گازەتىنىڭ ءتىلشىسى حان چينيان
”ءبىزدىڭ ماقتا ەگەتىن جەر اۋدانىمىز ازايعانىمەن، ءونىم مولشەرى ارتتى“، - دەدى 4 - ايدىڭ 13 - كۇنى ماكىت اۋداندىق اۋىل شارۋاشىلىق، اۋىل - قىستاق مەكەمەسىنىڭ باستىعى ءانۋار يمىن قۋانىشپەن، - ”2019 - جىلى تۇتاس اۋداننىڭ ماقتا ەگىلگەن جەر اۋدانى 565 مىڭ 700 مۋ، جالپى ءونىم مولشەرى 190 مىڭ 900 توننا؛ 2020 - جىلى تۇتاس اۋداننىڭ ماقتا ەگىلگەن جەر اۋدانى 542 مىڭ 700 مۋ، جالپى ءونىم مولشەرى 201 مىڭ 300 توننا بولدى“.
ماكىت اۋدانىنىڭ ماقتا ەگىلەتىن جەر اۋدانى ازايسا دا قالايشا ءونىم مولشەرى جوعارىلادى؟ بۇل ماكىت اۋدانىنىڭ اۋىل شارۋاشىلىعىنىڭ وسىزاماندانۋ، زەردەلىلەنۋ، ينفورماتسيالانۋ دەڭگەيىنىڭ جوعارىلاۋىنىڭ ارقاسىندا ماقتا كاسىپ سالاسى دامۋىنىڭ قارىشتاپ العا باسۋىنان بولىپ وتىر.
تاكلاماكان ءشولىنىڭ باتىس وڭتۇستىك جيەگىنە ورنالاسقان ماكىت اۋدانىندا كۇن نۇرىنىڭ ءتۇسۋى جەتكىلىكتى، كۇندىزگى، تۇنگى اۋا تەمپەراتۋراسىنىڭ پارقى زور، بۋلانۋ كۇشتى، قىراۋسىز مەزگىلى ۇزاق بولۋ سياقتى وزگەشە شارت - جاعداي بولعاندىقتان ماقتا ەرەكشە اپپاق، سورتى جوعارى، ساپاسى جاقسى بولادى.
ماقتا تۇقىمىن سەبۋ كەزىندە ءتىلشى ماكىت اۋدانى قىزىلاۋات اۋىلى سارىقول قىستاعىنىڭ جوعارى ولشەمدى ماقتا ەگۋ بازاسىنان بىرنەشە جوعارى ات كۇشىندىك شوفەرسىز تراكتوردىڭ دالدەپ تۇقىم سەۋىپ جۇرگەندىگىن، كورىنىسى اسا ايبىندى ەكەندىگىن كوردى.
”ماقتادان جاقسى ءونىم الۋ ءۇشىن تۇقىم سەبۋ بۋىنىن جاقسى يگەرۋ كەرەك. ءبىز ءىرى تۇرپاتتى ماشينامەن تۇقىم سەبەمىز، وزىق ۇيالاپ سەبۋ اسپابى تۇقىمدى ءبىر تالدان دالدەپ سەبەدى، ءبىر مۋ جەردەن 1.5 كيلوگرامداي ماقتا تۇقىمىن ۇنەمدەپ قانا قويماي، كۇز كەزىندەگى جيناپ الۋعا دا قولايلى بولادى“، - دەدى سارىقول قىستاعىنىڭ تۇرعىنى ابدۇراحمان تۇرسۇن.
ماقتا ەگەتىن ءىرى اۋدان رەتىندە، سوڭعى جىلدارى ماكىت اۋدانى اۋىل شارۋاشىلىعىنىڭ وسىزاماندانۋ، زەردەلىلەنۋ، ينفورماتسيالانۋ دەڭگەيىن ۇزدىكسىز جوعارىلاتىپ، شوفەرسىز تراكتور سياقتىلاردى ەنگىزىپ، شارۋالاردىڭ جەر تەگىستەۋى، تۇقىم سەبۋى، وسىمدىك قورعاۋى، جيناۋى ءۇشىن تولىق ماشينالاسقان تەحنيكالىق قىزمەت كورسەتۋ ازىرلەدى. كوپتەگەن جوعارى، جاڭا تەحنيكالاردىڭ قولدانىلۋى ماكىت ماقتا كاسىپ سالاسىنىڭ جوعارى ساپالى دامۋىنا دەم بەردى.
”بىلتىر 580 مۋ جەرگە ماقتا ەگىپ، ءبىر ميلليون 600 مىڭ يۋان كىرىس كىرگىزدىم“. ابدۇراحمان ءماز - ءمايرام بولا بىلاي دەدى: ”وسىمدىك قورعاۋ ۇشقىش اپپاراتى، تايلاپ ماقتا تەرۋ ماشيناسى، قالدىق ەگىس جارعاعىن جيناپ الۋ ماشيناسى، زەردەلى توپىراقتى تەرەڭ اۋدارعىش... وسى زەردەلى ماشينالار بىزگە كوپ كومەك كورسەتتى“.
ماكىت اۋدانىنىڭ بيىلعى ماقتا ەگىلەتىن جەر اۋدانى 2020 - جىلعا قاراعاندا رەتتەلىپ، 12 مىڭ مۋ ازايتىلدى، بۇرىنعى جىلدارداعى بىتىراندى ەگىمشىلىكتىڭ ورنىن 5 نەگىزگى ماقتا القابى باستى.
