شينحۋا اگەنتتىگىنىڭ 4 - ايدىڭ 16 - كۇنى بەيجيڭنەن بەرگەن حابارى. 4 - ايدىڭ 16 - كۇنى جۇڭگو كوممۋنيستىك پارتياسى ورتالىق كوميتەتى تەلەگرامما جولداپ، كۋبا كوممۋنيستىك پارتياسى مەملەكەتتىك 8 - قۇرىلتايىنىڭ اشىلعاندىعىن قۇتتىقتادى.
قۇتتىقتاۋ تەلەگرامماسىندا بىلاي دەلىنگەن: كۋبا كوممۋنيستىك پارتياسى − كۋبا سوتسياليستىك توڭكەرىسىنىڭ جانە قۇرىلىس ىستەرىنىڭ باسشىلىق ۇيتقىسى، جۋىق جىلداردان بەرى كۋبا حالقىن باستاپ ەكونوميكانى دامىتۋ، حالىق تۇرمىسىن جاقسارتۋ، جاڭا تيپتى ايدارشا ۆيرۋس وكپە قابىنۋ ىندەتىنە ءونىمدى توتەپ بەرۋ سياقتى جاقتاردا ءبىرسىپىرا ماڭىزدى جەتىستىكتەرگە قول جەتكىزدى. ءبىز بۇعان شىن جۇرەكتەن قۋانامىز. جاڭا جاعدايدا كۋبا كوممۋنيستىك پارتياسى 8 - قۇرىلتايىن اشىپ، كەزەكتەگى جانە بۇدان كەيىنگى ءبىر مەزگىلدەگى پارتيا مەن مەملەكەت ىستەرىنىڭ دامۋىنا ستراتەگيالىق جوبا جانە ورنالاستىرۋ جاسادى، بۇل الدىڭعىلاردىڭ ءىزىن باسىپ، بولاشاققا جول اشقان كەلەلى مانگە يە. كۋبا كوممۋنيستىك پارتياسىنىڭ پارمەندى باسشىلىعىندا وسى رەتكى قۇرىلتاي كۋبالىق ەرەكشەلىككە يە سوتسياليزم ىستەرىنىڭ دامۋىن ىلگەرىلەتۋگە ماڭىزدى جەتەكشىلىك جانە العا ىلگەرىلەۋ قوزعاۋشى كۇشىن ازىرلەيتىندىگىنە سەنەمىز.
جۇڭگو پارتياسى مەن ۇكىمەتى ەكى پارتيا، ەكى ەل قارىم - قاتىناسىنا ايرىقشا ءمان بەرەدى، كۋبا جاقپەن بىرگە جۇڭگو - كۋبا دوستىق ءداستۇرىن ۇزدىكسىز ساۋلەلەندىرىپ، ءوزارا ساياسي سەنىمدىلىكتى كۇشەيتىپ، ستراتەگيالىق تىلدەسۋدى تەرەڭدەتىپ، ەكى ەلدىڭ ءوزارا پايدا جەتكىزەتىن سەلبەستىكتىڭ ءمانى مەن جەتىستىگىن ۇزدىكسىز تولىقتىرىپ جانە بايىتىپ، جۇڭگو - كۋبا سوتسياليزم ىستەرىنىڭ ۇزدىكسىز تىڭ تابىستارعا قول جەتكىزۋىن بىرگە ىلگەرىلەتۋدى قالايدى.
كۋبا كوممۋنيستىك پارتياسى مەملەكەتتىك 8 - قۇرىلتايىنىڭ تابىستى بولۋىن تىلەيمىز!
