ءۇرىمجى اۋەجايىن وزگەرتىپ، كەڭەيتىپ سالۋ ينجەنەرياسىنىڭ قارقىنى جەدەلدەدى

　　انار بۇلت / شينجياڭ گازەتىنىڭ تىلشىلەرى جاۋ يۋە، ۋاڭ شينحۇڭ 4 - ايدىڭ 18 - كۇنى ۇرىمجىدەن حابارلايدى. 4 - ايدىڭ 16 - كۇنى اۆتونوميالى رايون مەن ءۇرىمجى قالاسىنىڭ ءتۇيىندى نىسانى − ءۇرىمجى اۋەجايىن وزگەرتىپ، كەڭەيتىپ سالۋ ينجەنەرياسى جۇمىس باسىندا مۇناراشا كران ءيىن تىرەسىپ، قاربالاس كۇيگە ەندى.

　　سول كۇنى اۋەجايدى وزگەرتىپ، كەڭەيتىپ سالۋ نىسانى A بولەگىندە قۇرىلىس جۇرگىزۋشى جاق ءۇرىمجى لينكۇڭ جۇڭجيان اۋەجاي قۇرىلىسى جۇمىس جۇرگىزۋ شەكتى سەرىكتەستىگى نەگىزگى تاقىرىپتىق ەڭبەك باسەكەسىن باستاپ، بيىل اۋەجايدى وزگەرتىپ، كەڭەيتىپ سالۋ ينجەنەرياسىن ساپالى، جوعارى ونىممەن ىلگەرىلەتۋ اياق الىسىن جەدەلدەتتى.

　　”بىلتىر ءبىزدىڭ A بولەك نىسانى تەرمينال اۋماعىنىڭ ءبىرىنشى كەزەڭ ينجەنەرياسىن ورىنداپ توبەسىن جاپتى. بيىل 3 - ايدىڭ باسىندا ينجەنەريا جۇمىستى قالپىنا كەلتىردى، قازىر قۇرىلىسشىلار تۇگەلدەي قىزمەت ورنىنا كەلىپ، 4000نان استام جۇمىسشى قاربالاس جۇمىس ىستەۋدە. شينجياڭدا ءالى جاز بولماعانىمەن، بىزدىڭ ينجەنەريا قۇرىلىسى الدەقاشان جازعى جۇمىسىن باستاپ، ءتۇرلى جۇمىس تەز قارقىنمەن ىلگەرىلەدى“، - دەدى ءۇرىمجى لينكۇڭ جۇڭجيان اۋەجاي قۇرىلىسى جۇمىس جۇرگىزۋ شەكتى سەرىكتەستىگىنىڭ باسالقاسى شاڭ شياۋگاڭ تىلشىگە.

　　”مەجەمەن 7 - ايدىڭ 30 - كۇنىنەن بۇرىن تەرمينال عيماراتىنىڭ بەتون قۇرىلىمىنىڭ توبەسىن جابۋ ورىندالادى؛ 9 - ايدىڭ 30 - كۇنىنەن بۇرىن تەرمينال عيماراتىنىڭ ءبىرىنشى كەزەڭدەگى بولات قۇرىلىمىنىڭ توبەسىن جابۋ ورىندالىپ، ۇشۋ اۋماعىنىڭ باتىس كىرۋ الاڭىنىڭ جەر استى قۇرىلىمى تۇتاستىرىلادى؛ 12 - ايدىڭ 15 - كۇنىنەن بۇرىن تەرمينال عيماراتىنىڭ ءبىرىنشى كەزەڭدەگى مەتال ۇيلەر قابىرعالارىنىڭ جانە قالتقىلارىنىڭ ％50ى ورىندالىپ، ۇشۋ اۋماعىندا جاڭادان سالىنعان 2 -، 3 - سىرعىما جولى اۋماعىنىڭ توپىراعىن تولتىرۋ جۇمىسى بىتەدى“، - دەدى وسى سەرىكتەستىكتىڭ باس ديرەكتورى لي پەيۋي تانىستىرىپ.

　　ءۇرىمجى اۋەجايىن وزگەرتىپ، كەڭەيتىپ سالۋ ينجەنەرياسى − ەلىمىزدىڭ باتىس ءوڭىر نەگىزدىك قۇرىلعى سالاسىنداعى ولقىلىقتاردى تولىقتاۋ ءتۇيىندى قۇرىلىس ينجەنەرياسى. نىساننىڭ سالىنۋى ەلىمىزدىڭ اۋەدەگى جىبەك جولىن اشۋى، باتىس سولتۇستىك ءوڭىردىڭ ءداستۇرلى ەكونوميكالىق ىشكى الاپتان ورتا، باتىس ازيا ءوڭىرىن بەتكە العان ەكونوميكاسى دامىعان الدىڭعى لەكتەگى وڭىرگە اينالۋىن جەبەۋدە ماڭىزدى ءمان الادى.