انار بۇلت / شينجياڭ گازەتىنىڭ ءتىلشىسى لۋ فىڭباۋ 4 - ايدىڭ 18 - كۇنى ۇرىمجىدەن حابارلايدى. جۇڭگو تەمىر جولى قۇرىلىسى جارنا شەكتى سەرىكتەستىگى شينجياڭ بەيجيڭ - شينجياڭ جوعارى جىلدامدىقتى تاس جولىن سالۋ شەكتى سەرىكتەستىگىنەن ۇعىسۋعا قاراعاندا، G7 بەيجيڭ - شينجياڭ جوعارى جىلدامدىقتى تاس جولىنىڭ ۋتۇڭ داچۋان - موري بولىگى اسفالت جاتقىزۋ كەزەڭىنە ءوتىپ، تاس جول قۇرىلىسشىلارى ۇستەمەلەي جۇمىس ىستەپ، 6 - ايدىڭ 30 - كۇنى تۇتاس لەنيادا كولىك قاتىناپ، ىسكە قوسىلۋدى جۇزەگە اسىرۋعا شىنايى كەپىلدىك ەتكەن.
4 - ايدىڭ 18 - كۇنى تۇستەن بۇرىن وسى نىساننىڭ باركول - موري بولىگى جۇمىس باسىندا، توسەگىش ماشينا جول بەتىنە اسفالت توسەپ، بىرنەشە جول تاپتاۋىش ماشيناسى قايتا - قايتا شىڭداپ، ءبىر بولىك تەگىس اسفالت جول قالىپتاستى.
”بيىل جۇمىستى قالپىنا كەلتىرگەننەن بەرى، ءبىز قۇرىلىس مەرزىمىن كەرى شەگەرىپ ورنالاستىرىپ، جوسپاردى اشالاپ، قاتاڭ باعالاۋ جۇرگىزدىك، سونداي - اق ادام، جابدىق كوبەيتىپ، ۇستەمەلەي جۇمىس ىستەۋ ارقىلى نىساننىڭ اياق الىسىن ىلگەرىلەتتىك، كەزەكتە باركول - موري بولىگىندە جول بەتىنە اسفالت جاتقىزۋ قىزمەتىنىڭ ％70ى ورىندالدى“، - دەدى جۇڭگو تەمىر جولى قۇرىلىسى جارنا شەكتى سەرىكتەستىگى شينجياڭ بەيجيڭ - شينجياڭ جوعارى جىلدامدىقتى تاس جولىن سالۋ شەكتى سەرىكتەستىگى قۇرىلىس باسقارۋ ءبولىمىنىڭ باستىعى تاڭ حۋا - ان.
G7 بەيجيڭ - شينجياڭ جوعارى جىلدامدىقتى تاس جولى مەملەكەتتىڭ جوعارى جىلدامدىقتى تاس جول تورىنداعى استانادان جان - جاققا تارالعان 7 - جولى، ەلىمىزدىڭ شينجياڭعا كىرەتىن - شىعاتىن ەكىنشى جوعارى جىلدامدىقتى تاس جول ۇلكەن ارناسى. ۋتۇڭ داچۋان - موري بولىگىن بەيجيڭ - شينجياڭ جوعارى جىلدامدىقتى تاس جولىنىڭ ”ەڭ سوڭعى ءبىر كيلومەترى“ دەپ اتايدى، نىسان 2017 - جىلى قۇرىلىس باستاعان، جەكە - جەكە ۋتۇڭ داچۋان - اراتۇرىك بولىگى، اراتۇرىك - باركول بولىگى، باركول - موري بولىگى سىندى 3 بولەككە ءبولىنىپ سالىنعان.
تاڭ حۋا - ان بىلاي دەدى: ۋتۇڭ داچۋان - اراتۇرىك بولىگى، اراتۇرىك - باركول بولىگىنىڭ جول توسەۋ جۇمىسىن ورىنداپ بولدىق، باركول - موري بولىگىنىڭ قۇرىلىسىن جەدەل جۇرگىزىپ جاتىرمىز. نىساندا قۇرىلىستى قاتار جۇرگىزدىك، ياعني جول قۇرىلىسى مەن سايكەستى قۇرىلعىلاردى تەڭ قاداممەن سالدىق، 5 - ايدىڭ 20 - كۇنى اينالاسىندا نىساننىڭ تۇلعالىق ينجەنەرياسىن اياقتاتىپ، تۇتاس لەنيا بىرلەسىپ رەتتەۋ، بىرلەسىپ سىناق ەتۋ كەزەڭىنە ءوتىپ، ءدال ۋاعىندا كولىك قاتىناپ، ىسكە قوسىلۋعا شىنايى كەپىلدىك ەتەمىز.
