شينحۋا اگەنتتىگىنىڭ 4 - ايدىڭ 20 - كۇنى بەيجيڭنەن بەرگەن حابارى. 4 - ايدىڭ 19 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ دياز - كانەلگە تەلەگرامما جولداپ، ونىڭ كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى بولىپ سايلانعاندىعىن قۇتتىقتادى.
شي جينپيڭ قۇتتىقتاۋ تەلەگرامماسىندا بىلاي دەدى: ءسىزدىڭ كۋبا كوممۋنيستىك پارتياسى مەملەكەتتىك 8 - قۇرىلتايىندا كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى بولىپ سايلانعاندىعىڭىزدان قۋانا حابار تاپتىم، مەن جۇڭگو كوممۋنيستىك پارتياسى ورتالىق كوميتەتى اتىنان ءارى ءوز اتىمنان ءسىزدى ءارى ءسىز ارقىلى كۋبا كوممۋنيستىك پارتياسىنىڭ جاڭا ءبىر كەزەكتى ورتالىق كوميتەتى باسشىلىق كوللەكتيۆىن قىزۋ قۇتتىقتايتىندىعىمدى بىلدىرەمىن.
كۋبا كوممۋنيستىك پارتياسىنىڭ 8 - قۇرىلتايى كۋبا سوتسياليزم ىستەرىنە جوبا كەسكىندەدى. ءسىزدىڭ كۋبا كوممۋنيستىك پارتياسىنىڭ ءبىرىنشى شۋجيى بولىپ سايلانعاندىعىڭىز كۋبا كوممۋنيستىك پارتياسىنىڭ بارلىق پارتيا مۇشەلەرى مەن كۋبا حالقىنىڭ سىزگە دەگەن سەنىمى مەن ءۇمىتىن ايگىلەيدى. ءسىزدىڭ باسشىلىعىڭىزدا كۋبا پارتياسى مەن ۇكىمەتىنىڭ كۋبا حالقىن باستاپ ىنتىماقتاسا كۇرەس جاساپ، ءورىس اشا العا ىلگەرىلەپ، كۋبا ەرەكشەلىگىندەگى سوتسياليزم ىستەرىنىڭ ۇزدىكسىز تىڭ تابىستارعا قول جەتكىزۋىن ىلگەرىلەتەتىندىگىنە سەنەمىن.
ەكى پارتيانىڭ، ەكى ەلدىڭ بۇرىنعى باسشىلارىنىڭ دەن قويا جەتىلدىرۋى مەن زور كۇشپەن ىلگەرىلەتۋىندە، جۇڭگو - كۋبا قارىم - قاتىناسى ۋاقىت وتكەن سايىن جاڭارىپ، ۇزدىكسىز دامىدى. سوڭعى جىلدارى ءسىز ەكەۋىمىز جاڭا داۋىردە جۇڭگو - كۋبا قارىم - قاتىناسىن دامىتۋ جونىندە كوپتەگەن ورتاق تانىمعا كەلدىك. جاڭا جاعدايدا مەن سىزبەن بىرگە ەكى پارتيا، ەكى ەل قارىم - قاتىناسىن ساياسي جاقتان جەتەكتەۋدى كۇشەيتىپ، ءداستۇرلى دوستىقتى اسقاقتاتىپ، اۋىس - كۇيىس پەن سەلبەستىكتى تەرەڭدەتىپ، جۇڭگو - كۋبا سوتسياليزم ىستەرىنىڭ ۇزدىكسىز العا قاراي دامۋىن قول ۇستاسا ىلگەرىلەتۋدى قالايمىن.
ءسىزدىڭ جاڭا باسشىلىق ورنىندا اناعۇرلىم زور تابىستارعا قول جەتكىزۋىڭىزدى تىلەيمىن!
