شونجى اۋدانى داچۋان تاتار ۇلتتىق اۋىلى داچۋانحۋ قىستاعى:
”ءبىزدىڭ تۇرمىسىمىز ءسىزدىڭ كورگەنىڭىزدەن الدەقايدا جاقسى“
دوڭگەلەك داۋلەتتىلىككە ءبىر نيەتپەن ۇمتىلۋ
انار بۇلت / شينجياڭ گازەتىنىڭ ءتىلشىسى ۋاڭ نا
نەشە 10 مۋ جەرگە ەگىن ەگىپ، قورا - قورا سيىر، قوي باعىپ، قۇستارى سايراپ، گۇلدەرى جايناعان شاعىن اۋلاسىندا جانى جاقىن دوستارىمەن اڭگىمە شەرتىپ وتىر... 4 - ايدىڭ 17 - كۇنى شونجى اۋدانى داچۋان تاتار ۇلتتىق اۋىلى داچۋانحۋ قىستاعىنا قىزمەت بابىمەن كەلگەن جاڭ كاي سۇيىنە: ”شىنىمەن دە وسىندا قونىستانعىم كەلەدى“، - دەدى. قىستاق تۇرعىنى نۇراسىل بايمولا مۇنى ەستىگەننەن كەيىن قارقىلداي كۇلىپ: ”ءبىزدىڭ تۇرمىسىمىز ءسىزدىڭ كورگەنىڭىزدەن الدەقايدا جاقسى!“ - دەدى.
جۇبايلار قول ۇستاسا بايۋ جولىنا ءتۇستى
نۇراسىلدىڭ ءۇيى داچۋانحۋ قىستاعىنىڭ كىرە بەرىسىندە، 4 بولمەلىك جاتاعان ءۇيدىڭ 2 بولمەسى جاتىن ءۇي، بولەك اس ءۇيى، تازالىق ءۇيى بار، ءۇيدىڭ ەسىك الدى كوكونىس باعى، ءۇيدىڭ ارتى مال قورا، جالپى جەر اۋدانى 5 مۋ. مۇنداي قونىستانۋ شارت - جاعدايى داچۋانحۋ قىستاعىندا، ءتىپتى، بۇكىل داچۋان تاتار ۇلتتىق اۋىلىندا تولىق ازىرلەنگەن ەكەن.
كەشقۇرىم نۇراسىل ارتقى اۋلاعا بارىپ، سيىر - قويلارىنا جەم بەرىپ، سۋاردى. ”مەن 30 سيىر، 20 قوي باعىپ وتىرمىن، وسىنىڭ وزىنەن جىلىنا 100 مىڭ يۋاننىڭ ۇستىندە تازا كىرىس كىرگىزەم“. نۇراسىل سيىر، قوي باعىمشىلىعىمەن تاپقان اقشاسىنا ەكى ۇلىن داشۋەدە وقىتاتىندىعىن، شەتەلگە وقۋعا جىبەرەتىندىگىن ايتتى.
5 - اي تۋىپ، تاۋ جاق كوكتەگەن كەزدە نۇراسىل سيىر - قويلارىن تاۋعا شىعارىپ جىبەرىپ، 10 - ايدىڭ اياعىندا قايتا الىپ كەلىپ ساتادى ەكەن. ”شاپپالىعىمىز قىستاقتان 35 كيلومەتر جەردە اسفالتتالعان جولىمىز سايراپ جاتىر، ۋاقىتى كەلگەندە 2 ۇلكەن جۇك اۆتوكولىگىن مايعا الساق، ءشوبىمىزدى ءبىر جولدا - اق تاسىپ الامىز“، - دەيدى نۇراسىل.
باعىمشىلىقتان سىرت، نۇراسىلدىڭ وتباسىندا تاعى 50 مۋ جەر بار، نەگىزىنەن سۇرلەمدىك جۇگەرى مەن ءبيداي ەگەدى ەكەن. نۇراسىلدىڭ كەلىنشەگى شاعىن ەرەن بازار اشىپتى، تاعى تاتار ۇلتىنىڭ كەستەلى بۇيىمدارىن تىگىپ ساتادى ەكەن. ”وسىنىڭ ءبارىن قوسقاندا كوپ - كورىم تابىس تاۋىپ وتىرمىز“، - دەدى نۇراسىل تىلشىگە.
كۇن ۇياسىنا ەڭكەيدى، نۇراسىلدىڭ بىرنەشە كورشىسى قىدىرا كەلدى، كوپشىلىك ەسىك الدىنداعى قالتقىنىڭ استىنا وتىرىپ الىپ اڭگىمەنىڭ كورىگىن قىزدىردى، ەسىك الدىنداعى كوكونىس باقشاسىنداعى بىرنەشە ءتۇپ ورىك اعاشى جارىسا گۇلدەپ كەلەدى.
اعايىندىلار بەرەكە - بىرلىكپەن دوڭگەلەك داۋلەتتىلىككە ۇمتىلدى
نۇراسىل كورشىلەرىمەن اڭگىمە دۇكەنىن قۇرىپ جاتقان كەزدە قىستاق تۇرعىنى ءىلياس كەنجەباي تۇيەلەرىنە جەم بەرىپ، ءسۇت ساۋىپ ءبىر كۇندىك ەڭ قاربالاس كەزدە ەدى، سونان سوڭ جاڭا ساۋعان تۇيە ءسۇتىن ءوز قالپىندا ساقتاۋ ساندىعىنا قويىپ، الارماندارىنىڭ ەرتەسى كەلىپ اكەتۋىن كۇتەدى. ءىلياس اعاسى سىماعۇل كەنجەبايمەن بىرلەسىپ تۇيە باعىمشىلىق فەرماسىن قۇرىپتى، قازىر 100 تۇيەسى بار ەكەن.
ءىلياس تىلشىگە مىناداي ەسەپ كورسەتتى: ءاربىر ىنگەن كۇنىنە 3 كيلوگرام مولشەرىندە ءسۇت بەرەدى، باعىمشىلىق فەرمامىزدا كۇنىنە 60 كيلوگرام ءسۇت ساۋىلادى، قازىر تۇيە ءسۇتىنىڭ كيلوگرامى 30 يۋان، ”وسى تۇيە باعىمشىلىعى فەرمامىزدىڭ جىلدىق كىرىسى 600 مىڭ يۋاننىڭ اينالاسىندا بولادى“.
ءىلياس بىلاي دەدى: سوناۋ وتكەن عاسىردىڭ 80 - جىلدارىندا اعام ەكەۋىمىز تاۋدان ءتۇسىپ وتىرىقتاندىق. پارتيا مەن ۇكىمەتتىڭ ساياسات، تەحنيكا، قارجى سياقتى جاقتان سۇيەمەلدەۋىندە، اعايىندى ەكەۋىمىز كاسىپتەنگەن، كولەمدەندىرىلگەن تۇيە باعىمشىلىعىمەن شۇعىلداندىق. ”تۇيە باعۋدا ازىقپەن قامداپ، قالىپتى تويىندىرساڭ بولعانى، تۇيە ءسۇتىنىڭ، تۇيە ءجۇنىنىڭ، تۇيە ءتۇبىتىنىڭ ەكونوميكالىق قۇنى ءبىرشاما جوعارى بولادى“، - دەيدى ءىلياس.
ءىلياس پەن اعاسىنىڭ تۇيە باققانىنا 15 جىل بولىپتى. ولار ەندى ءبىر توپ ەلەكترلى ءسۇت ساۋۋ ماشيناسىن ساتىپ العالى جاتىر ەكەن، باعىمشىلىق كولەمىن ۇلعايتىپ، تۇيە باعىمشىلىعى سەلبەستىك كووپەراتيۆىن قۇرىپ، اۋىلداستارىن باستاپ تۇيە ءسۇتىن، تۇيە ەتىن، تۇيە ءتۇبىتىن ساتۋدى ءبىر تۇلعالاندىرعان كاسىپ تىزبەگىن ورناتپاقشى ەكەن.
وتىرىقتانىپ، مال شارۋاشىلىعىن شالقىتىپ، جاڭاشا تۇرمىس كەشىردى
نۇراسىل، ءىلياس اعايىندىلاردىڭ شالقىعان تۇرمىسى داچۋان تاتار ۇلتتىق اۋىلىنداعى تۇرعىندار تۇرمىسىنىڭ شىنايى كورىنىسى.
تانىستىرۋعا قاراعاندا، داچۋان تاتار ۇلتتىق اۋىلىندا جيىنى 1337 تۇرعىن بار ەكەن، 2020 - جىلعى جان باسىندىق تازا كىرىسى 18 مىڭ 596 يۋان بولىپ، الدىنداعى جىلداعىمەن سالىستىرعاندا 905 يۋان ارتقان. قىستاق تۇرعىندارىنىڭ تۇرمىس ورەسى بارعان سايىن گۇلدەي قۇلپىردى، وسى اۋىلدىڭ كادرى بايدوللا احىمەت مۇنىڭ كۋاگەرى.
بايدوللا داچۋان تاتار ۇلتتىق اۋىلىنىڭ تۋماسى، قازىر اۋىلدىق ۇكىمەتتە قىزمەت ىستەيدى. ”بۇرىن اۋىلداستارىمىز وتباسىنداعى وشارلى جانمەن بىرگە تاۋدا ءشوپتىڭ سونىسىن، سۋدىڭ تۇنىعىن قۋالاپ كوشىپ - كونىپ جۇرەتىن، كىرىستەرى تومەن ءارى تۇراقسىز بولاتىن، تۇرمىس ورتاسى جاپالى، ەمدەۋ، وقۋ - اعارتۋ شارت - جاعدايى جەتەرسىز ەدى“، - دەيدى بايدوللا.
بايدوللا تەحنيكۋم ءبىتىرىپ اۋىلىنا قايتىپ قىزمەت ىستەگەن كەز ءدال شينجياڭدا مالشىلاردى وتىرىقتاندىرۋ ينجەنەريا قۇرىلىسى باستالعان كەزگە تۋرا كەلىپ، سۋ قاينارى، جول، تۇرعىن ءۇي، قورا - قالتقى، ەگىستىك جەر، مەكتەپ، ەمدەۋ پۋنكتى بار بولۋ سياقتى ”ون بولۋدى“ ولشەم ەتىپ، مالشىلاردى وتىرىقتانۋعا جىگەرلەندىرەدى.
بايدوللا وتىرىقتاندىرۋ ءتۇيىنى مەن تاۋلى وڭىردەگى مال فەرمالارى اراسىندا شاپقىلاپ ءجۇرىپ، مالشىلارعا وتىرىقتانۋدىڭ پايداسى مەن مەملەكەتتىڭ سۇيەمەلدەۋ ساياساتىن ۇگىتتەپ، لەكسيا جاسايدى، مالشىلارعا كومەكتەسىپ قۇدىق قازىپ، ءۇيدىڭ ورنىن ءبولىپ، ەلەكتر سىمىن تارتىپ، سۋ قۇبىرىن جالعاپ بەرەدى... ”اسىرەسە، پارتيا 18 - قۇرىلتايىنان بەرى پارتيا مەن ۇكىمەتتىڭ حالىققا تيىمدىلىك جاساۋ ساياساتى بارعان سايىن كوبەيدى، مالشىلار استىق قوسىمشا قاراجاتى، جايلىم ەكولوگياسىن قورعاۋ كومەك قاراجاتى، سيلىق اقشاسى سياقتى كوپتەگەن حالىققا تيىمدىلىك جاساۋ ساياساتتارىنان يگىلىكتەنىپ، وسىزاماندانعان تۇرمىس كەشىرىپ، نىق قاداممەن دوڭگەلەك داۋلەتتىلىككە قادام قويدى“، - دەيدى بايدوللا.
