ايگۇل يميت:
اجالدان اراشالاپ، جارالىعا مەدەت بولۋ مەنىڭ بورىشىم
انار بۇلت / شينجياڭ گازەتىنىڭ ءتىلشىسى يۇي شي
3 - ايدىڭ 17 - كۇنى ساعات 11دەن 15 مينۋت وتكەندە قۇتقارۋ اۆتوموبيلىنىڭ شۇعىل لابا ۇنىمەن ءۇرىمجى قالالىق شۇعىل قۇتقارۋ ورتالىعىنىڭ سەستراسى ايگۇل يميت تاعى دا شۇعىل قۇتقارۋعا اتتاندى.
”اپاي، جاعدايىڭىز قالاي؟ جۇرەگىڭىز جايسىزدانىپ تۇر ما؟ شيپاحاناعا تاياپ قالدىق، قازىر - اق جاقسى بولىپ كەتەسىز“. قۇتقارۋ اۆتوموبيلى ۇشقان قۇستاي زىمىراپ بارادى، 38 جاستاعى ايگۇل ناۋقاستىڭ قاسىندا وتىرىپ، ناۋقاستىڭ جاعدايىن بايسالدىلىقپەن سۇراپ ۇعىسا وتىرىپ، ونىڭ قان قىسىمىن، تامىر سوعۋىن، دەنە تەمپەراتۋراسىن، ت.ب ولشەدى.
بۇل ايگۇلدىڭ 20 جىلدىق سەسترالىق كاسىپ ومىرىندەگى ەڭ داعدىلى كورىنىس ەدى. بۇگىن ول 5 رەت ناۋقاس قۇتقارۋعا باردى. ول توتەنشە قاربالاس بولعاندىقتان تۇسكى اسىن ساعات 17دەن اسقاندا ازەر ءىشتى. بۇل ول جونىنەن قالىپتى جاعداي سانالاتىن.
”سەسترالىق كاسىپ ماعان ناۋقاس قاي جەردە بولسا، مەنىڭ سول ارادان تابىلۋىمدى ۇعىندىردى، اجالدان اراشالاپ، جارالىعا مەدەت بولۋ مەنىڭ بورىشىم!“، - دەدى ايگۇل.
2020 - جىلى تۇتقيىل تۋىلعان جاڭا تيپتى ايدارشا ۆيرۋس وكپە قابىنۋ ىندەتى الدىندا دەمالىسقا كەتكەن ايگۇل كۇنى بۇرىن مەكەمەگە ورالىپ قىزمەتكە شىعادى. ەڭ قاربالاس كەزدە كۇنىنە ءۇرتىس 20 نەشە ساعات قىزمەت ىستەپ، 10 نەشە رەت ناۋقاس قاراۋعا شىعادى. كەيىنتىننەن ىندەتتەن ساقتانۋ - تىزگىندەۋدىڭ قاجەتى ءۇشىن مەكەمەسى كەرى قىسىمدى شۇعىل قۇتقارۋ اۆتوموبيلمەن جوتكەۋ گرۋپپاسىن قۇردى، ايگۇل ەڭ الدىمەن ىرىقتىلىقپەن تىزىمدەلەدى.
ءار جولى جوتكەۋ مىندەتىن تاپسىرىپ العاندا، جۇعىمدالۋدان ساقتانۋ ءۇشىن ايگۇل مەن قىزمەتتەستەرى ءتىس - تىرناعىنا شەيىن قارۋلاناتىن. قورعانۋ كيىمىن ۇزاق ۋاقىت كيگەندىكتەن دەنەسى قاتتى جايسىزداناتىن. كەي كەزدە دەمى سىعىلىپ مۇرنىمەن تىنىس الا الماي، اۋزىن كەرە اشىپ تىنىس الاتىن. وسىلاي بولسا دا ناۋقاس قارايتىن ەمدەۋ قىزمەتكەرلەرىنىڭ قورعانۋىنان قۇتقارۋ اۆتوموبيلىن پايدالانۋدىڭ الدى - ارتىنداعى زارارسىزداندىرۋعا، شۇعىل قۇتقارۋعا پايدالانىلاتىن بۇيىمداردى زارارسىزداندىرۋعا دەيىن، ت.ب، ول بارلىعىن دەن قويا ورىندايتىن. 2 ايدان استام ۋاقىتتا ول قىزمەتتەستەرىمەن بىرگە قاتاڭ ءتارتىپ بويىنشا جوتكەۋ مىندەتىن تابىسپەن ورىندادى.
”سول كۇندەردە دەنە جاعىنداعى ازاپقا شىدادىق، ەڭ قيىن تيگەنى پسيحيكالىق قىسىمنىڭ اۋىرلىعى بولدى. ناۋقاستاردى ۇرەي باساتىن، ەمدەۋ - كۇتىمدەۋ قىزمەتكەرلەرىندە دە بەلگىلى الاڭداۋشىلىق بولاتىن، ءبىراق مۇنى تيتتەي دە سەزدىرۋىمىزگە بولمايدى“، - دەدى ايگۇل. ونىڭ ايتۋىنشا سول كەزدە ول جانە كاسىپتەستەرى وزدەرىنىڭ باسىنداعى حاۋىپتى جاعدايعا قاراماستان، كوڭىلدەرىندە تەك عانا ەڭ زور قۇلشىنىس جاساپ، ناۋقاستاردى جۇباتىپ، قۇتقارىپ، ساۋىقتىرىپ ەرتەرەك ۇيلەرىنە قايتارساق دەگەن عانا وي بولىپتى.
ءوز كاسىبىن ءسۇيىپ، ءوز كاسىبىنە شوگەل، تىندىرىمدى بولعان ايگۇل وسى جىلداردا ءوزىنىڭ قىزمەت ءادىسىن قالىپتاستىرىپ ۇلگىرگەن: قۇتقارۋ ورنىنا جەتەردىڭ الدى - ارتىندا، سونداي - اق ناۋقاستاردى جوتكەۋ كەزىندە ايگۇل ناۋقاستارمەن جانە ولاردىڭ وتباسىنداعىلارمەن جىلى سويلەسىپ، ناۋقاستاردى جۇباتىپ، كوڭىلىن ساباسىنا تۇسىرەدى.
ناۋقاستاردى قۇتقارۋعا بارعاندا كەيدە كوڭىل كۇيى ناشار ناۋقاستارعا نەمەسە وتباسى ادامدارىنا كەزدەسىپ قالاتىن كەزدەرى دە بولادى. ”ناۋقاستار مەن ولاردىڭ وتباسىنداعىلار دەگبىرسىزدەنىپ، شىدامسىزدىق تانىتسا، ولاردىڭ مۇنىسىن تۇسىنەمىز“، - دەيدى ايگۇل اقتارىلا.
قىزمەتكە قاتىناسقان 20 جىلدان بەرى ايگۇل شۇعىل قۇتقارۋ ورتالىعىنىڭ سەستراسى بولۋ وڭاي ەمەس ەكەنىن شىن مانىندە سەزىندى: بۇل قىزمەتتىڭ كەزدەيسوقتىعى كۇشتى، ناۋقاستىڭ اۋرۋى كۇردەلى، قاتەرلى، اۋىر بولىپ، توسىن جاعدايلار ۇنەمى تۋىلىپ تۇرادى. قىزمەت كۇشەمەلىلىگى زور بولعاندىقتان، ايگۇل كاسىپتىك ناۋقاسقا شالدىققان. سويتە تۇرا ناۋقاستاردىڭ سەنىمىن اقتاۋ ءۇشىن، ول ءوز قىزمەت ورنىندا بۇرىنعىداي تاباندىلىق كورسەتىپ كەلەدى.
”اكەم پارتيا مۇشەسى، مەن دە پارتيا مۇشەسىمىن، ءسىڭلىم دە پارتيا مۇشەسى. ۇنەمى ويلايمىن: ءبىر ۇرپاق ادامنىڭ ءبىر ۇرپاق ادامعا ءتان بورىشى بولادى، ءبىر ۇرپاق ادامنىڭ ءبىر ۇرپاق ادامعا ءتان جاۋاپكەرشىلىك ارقالاۋى بولادى، مەن سەسترالىق كاسىپتى ومىرلىك ءىس ەتكەندە عانا اكەممەن تۇستاس ادامداردىڭ ءۇمىتىن اقتاپ، كەيىنگى ۇرپاققا ۇلگى بولا الامىن“، - دەدى ايگۇل.
