انار بۇلت / شينجياڭ گازەتىنىڭ ءتىلشىسى سۇڭ يا - ۋىن
كۇننىڭ جىلۋىنا ىلەسە ۇيقىدا جاتقان بايتاق جەر دۋمانعا بولەندى، شارۋالار دا قاربالاس بولىپ كەتتى.
بۇراتالا قالاسى بىلىنحارمودون اۋىلى شارلجىن قىستاعى وزگەشە ءبىر كورىنىسكە ەنگەن: شەت - شەگىنە كوز جەتپەيتىن ماقتا اتىزىندا ەڭبەك ىستەپ جاتقان شارۋالار كەزدەسپەيدى، تەك بىرنەشە تۇقىم سەبۋ ماشيناسى عانا جۇمىس ىستەپ جاتىر.
جۋىق جىلداردان بەرى شارلجىن قىستاعى جەردى بىرىكتىرۋ ارقىلى ەگىستىك جەردى ءبىر تۇتاس باسقارۋدى جولعا قويىپ، تۇگەلدەي ماشينالانعان تاسىلمەن ماقتا ەكتى. قىستاقتا تاعى اۋىل - قىستاق ساياحاتىن اشىپ، قىستاق تۇرعىندارى گۇلدەي قۇلپىرعان جاڭا تۇرمىس كەشىردى.
”قازىر وتباسىمىز ماقتا ەكپەيتىن بولدى، ۋاقىت شىعارىپ بار پەيىلىمىزبەن شارۋالار شاتتىعى ساياجايى تيجاراتىمەن شۇعىلدانامىز، ونىمدىلىگى ايتالىقتاي جاقسى. جەردەن كىرگەن كىرىستى قوسقاندا، وتباسىمىزدىڭ ءبىر جىلدىق كىرىسى 100 مىڭ يۋاننان اسادى“. 4 - ايدىڭ 20 - كۇنى شارلجىن قىستاعىنىڭ تۇرعىنى جۋ يۇيتيڭ تىلشىگە قۋانىشتى تۇردە بىلاي دەدى: ”وتباسىمىزداعى 100 نەشە مۋ جەردى تۇگەلدەي سەلبەستىك كووپەراتيۆكە اينالىمعا بەردىك. قام جەمەيمىز، كۇش تە جۇمسامايمىز، سەلبەستىك كووپەراتيۆى جەردى بىزدەن ارتىق تىڭعىلىقتى ەگەدى“.
شارلجىن قىستاعى ماقتا ەگۋدى نەگىز ەتەدى، الايدا ۇزاق ۋاقىتتان بەرى بىتىراڭقى شارۋاشىلىق جۇرگىزگەندىكتەن، اۋىل شارۋاشىلىعىن ماشينالاندىرۋ دەڭگەيى تومەن، ماقتا تۇقىمى ءار قيلى بولعاندىقتان، ماقتانىڭ ءونىم مولشەرى مەن ساپاسى تۇگەلدەي تومەن بولعان.
”شوعىرلاندىرۋ، كولەمدەندىرۋ جولىمەن ءجۇرۋ عانا شىعار جول“، - دەدى شارلجىن قىستاعى پارتيا ياچەيكاسىنىڭ شۋجيى، قىستاق تۇرعىندار كوميتەتىنىڭ مەڭگەرۋشىسى لۋ جيانجۇن، - 2019 - جىلى قىستاق ”ەكى كوميتەتىنىڭ“ ىلگەرىلەتۋىندە قىستاقتا شۇنمين ەگىنشىلىك كاسىپتىك سەلبەستىك كووپەراتيۆى قۇرىلدى.
سەلبەستىك كووپەراتيۆى قۇرىلعان سوڭ، قىستاق تاعى جاڭا ماسەلەگە جولىقتى: جەر تىلكىمدەنگەن ءارى بىتىراڭقى بولعاندىقتان، ءىرى تۇرپاتتى ماشينا كىرىپ جۇمىس ىستەي المايدى، جەر جىرتۋعا، تۇقىم سەبۋگە، باپتاۋعا ۋاقىت كوپ جۇمسالادى، ءبىر تۇتاس سۋارۋ، تىڭايتقىش بەرۋ قيىن، ەڭبەك قۇنى جوعارى. شارلجىن قىستاعى اتىز قىرىن تەگىستەۋ، بوس تۇرعان توعاندار مەن بۇرىش جەرلەردى تولتىرۋ ارقىلى قىستاقتاعى بىتىراڭقى جەرلەردى بىرىكتىردى. ”بۇكىل قىستاق جەرىن سەلبەستىك كووپەراتيۆكە اينالىمعا بەرىپ، ءبىر تۇتاس تۇقىم تاڭداۋ، ءبىر تۇتاس ەگۋ، ءبىر تۇتاس باپتاۋ، ءبىر تۇتاس ساتۋدى اتقارىپ، قىستاق تۇرعىندارىنىڭ جەردى باسقارۋىنىڭ بىتىراڭقى بولۋ جانە ەگىنشىلىك وزىندىك قۇنىنىڭ جوعارى بولۋ، كىرىستىڭ تومەن بولۋ ماسەلەسىن شەشتى“، - دەدى لۋ جيانجۇن.
شارلجىن قىستاعىنداعى ەگىنشى ءىرى وتباسى كۇڭ ياحۇي كيىمىن رەتتى دە تازا كيىپ، باتىنكەسىن جارقىراتىپ، جەڭىل كولىگىمەن اتىز باسىنا كەلدى. 4 - ايدىڭ 20 - كۇنى ماقتا ەگەتىن قاربالاس كەزدە كۇڭ ياحۇي ەمىن - ەركىن ءجۇر.
بيىل كۇڭ ياحۇي 2000 مۋدان استام جەرگە ماقتا ەكتى. ارعى شەتىنە كوز جەتپەيتىن ماقتا اتىزىندا قاتار - قاتار سۋلياۋ جارعاق رەتتى توسەلىپ، بەيدوۋ جول نۇسقاۋ جۇيەسىن ورناتقان شوفەرسىز تراكتور كوپ يقۋاتتى ءبىر تۇلعالاندىرعان دالدەپ سەبۋ ماشيناسىن سۇيرەپ جۇمىس جۇرگىزۋدە.
”مەن ءومىر بويى ماقتا ەكتىم، قازىر بارعان سايىن ’جالقاۋ‘ بولىپ بارامىن. عىلىم - تەحنيكا بارعان سايىن تەز دامىپ، بارلىعىن ماشينا ىستەيتىن بولدى، شارۋالاردىڭ ەگىن ەگۋى بارعان سايىن وڭايلاستى، ءۇش - اق كۇندە ماقتانى ەگىپ بولدىم“، - دەدى ماقتا اتىزىنىڭ شەتىندە كۇڭ ياحۇي ميىعىنان كۇلىپ.
”كوپشىلىك تۇگەلدەي بەيدوۋ جول نۇسقاۋ تۇقىم سەبۋ تەحنيكاسىنان پايدالانۋدا، تۇقىم سەبۋ ءتىپتى دە ءدال، كوكتەۋ سالىستىرماسى ءتىپتى دە جوعارى بولىپ، تىڭايتقىش بەرۋ، تۇقىم سەبۋ، سۋلياۋ جارعاق جاتقىزۋدى ءبىر جولدا تىندىرىپ، ەڭبەككۇشتىڭ وزىندىك قۇنىن كوپ مولشەردە ۇنەمدەدى“، - دەدى لۋ جيانجۇن، - عىلميلانعان باسقارۋ مەن جوعارى دەڭگەيدەگى ماشينالانۋدىڭ ارقاسىندا بىلتىر سەلبەستىك كووپەراتيۆ ماقتانىڭ ورتاشا بىرلىك ءونىمى 420 كيلوگرام بولۋداي تاماشا ناتيجەگە قول جەتكىزدى.
