شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ 29 - رەتكى توپتىق ۇيرەنۋىندە بىلاي دەپ باسا دارىپتەدى
ەكولوگيالىق وركەنيەت قۇرىلىسىندا ستراتەگيالىق تاباندىلىقتى ساقتاپ، ادام مەن تابيعات جاراسىمدى قاتار ءومىر سۇرەتىن وسىزاماندانۋدى قۇلشىنا تۇلعالاۋ كەرەك
شينحۋا اگەنتتىگىنىڭ 5 - ايدىڭ 1 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ ساياسي بيۋروسى 4 - ايدىڭ 30 - كۇنى تۇستەن كەيىن جاڭا جاعدايدا ەلىمىزدىڭ ەكولوگيالىق وركەنيەت قۇرىلىسىن كۇشەيتۋ جونىندە 29 - رەتكى توپتىق ۇيرەنۋىن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ۇيرەنۋدى باسقارعاندا بىلاي دەپ باسا دارىپتەدى: ەكولوگيالىق ورتانى قورعاۋ مەن ەكونوميكانى دامىتۋ ديالەكتيكالىق بىرلىككە يە، ءبىرىن - ءبىرى تولىقتاپ، ءبىرىن - ءبىرى كەمەلدەندىرىپ وتىرادى، ەكولوگيالىق وركەنيەت قۇرۋ، جاسىل، تومەن كومىرتەكتى اينالمالى دامۋدى ىلگەرىلەتۋ حالىقتىڭ كۇن سايىن ارتىپ وتىرعان تاماشا ەكولوگيالىق ورتا قاجەتىن قاناعاتتاندىرۋمەن بىرگە، اناعۇرلىم جوعارى ساپالى، اناعۇرلىم ءونىمدى، اناعۇرلىم ءادىل، اناعۇرلىم باياندى، اناعۇرلىم حاۋىپسىز دامۋدى جۇزەگە اسىرۋدى ىلگەرىلەتىپ، ءوندىرىس دامىعان، تۇرمىس باقۋاتتى، ەكولوگيا تاماشا وركەنيەتتى دامۋ جولىمەن جۇرۋگە مۇمكىندىك جاسايدى. ”14 - بەسجىلدىق“ مەزگىلىندە ەلىمىزدىڭ ەكولوگيالىق وركەنيەت قۇرىلىسى كومىر قىشقىل گازىنىڭ شىعارىلۋىن تومەندەتۋدى ماڭىزدى ستراتەگيالىق بەتالىس ەتەتىن، لاس زاتتاردىڭ شىعارىلۋىن ازايتۋ مەن كومىر قىشقىل گازىنىڭ شىعارىلۋىن تومەندەتۋدىڭ سايكەسە وتىرىپ ونىمدىلىكتى ارتتىرۋدى ىلگەرىلەتەتىن، ەكونوميكالىق، قوعامدىق دامۋدىڭ جاپپاي جاسىل تيپكە وزگەرۋىن جەبەيتىن، ەكولوگيالىق ورتا ساپاسىنىڭ جاقسارۋىنىڭ سان وزگەرىسىنەن ساپا وزگەرىسىنە ءوتۋىن جۇزەگە اسىراتىن شەشۋشى كەزەڭگە ءوتتى. جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، ستراتەگيالىق تاباندىلىقتى ساقتاپ، ادام مەن تابيعاتتىڭ جاراسىمدى قاتار ءومىر ءسۇرۋ تۇرعىسىنان ەكونوميكالىق، قوعامدىق دامۋدى جوسپارلاپ، بايلىقتى ۇنەمدەۋ مەن قورشاعان ورتانى قورعاۋ نەگىزگى مەملەكەت ساياساتىنا تاباندى بولىپ، ۇنەمشىلدىكتى الدىڭعى ورىنعا قويۋدى، قورعاۋدى الدىڭعى ورىنعا قويۋدى، تابيعي قالپىنا كەلۋدى نەگىز ەتۋ باعىتىنان جازباي، بايلىقتى ۇنەمدەيتىن جانە قورشاعان ورتانى قورعايتىن كەڭىستىك جۇيەسىن، كاسىپ سالاسى قۇرىلىمىن، ءوندىرىس ءتاسىلىن، تۇرمىس ءتاسىلىن قالىپتاستىرىپ، لاستانۋدى جونگە سالۋدى، ەكولوگيانى قورعاۋدى، كليمات وزگەرىسىنە توتەپ بەرۋدى ءبىر تۇتاس جوسپارلاپ، ەكولوگيالىق ورتانىڭ ۇزدىكسىز جاقسارۋىن جەبەپ، ادام مەن تابيعات جاراسىمدى قاتار ءومىر سۇرەتىن وسىزاماندانۋدى قۇلشىنا تۇلعالاۋ كەرەك.
ەكولوگيا جانە قورشاعان ورتا مينيسترلىگى قورشاعان ورتانى جوسپارلاۋ ورنىنىڭ باستىعى ۋاڭ جيننان جولداس وسى ماسەلە جونىندە تۇسىنىك جاساپ، قىزمەت ۇسىنىسىن ورتاعا قويدى. ورتالىق كوميتەت ساياسي بيۋروسىنداعى جولداستار ونىڭ تۇسىندىرمەسىن مۇقيات تىڭدادى ءارى تالقى جۇرگىزدى.
شي جينپيڭ ۇيرەنۋدى باسقارعاندا ءسوز سويلەدى. ول بىلاي دەپ اتاپ كورسەتتى: پارتيا 18 - قۇرىلتايىنان بەرى ءبىز پارتيانىڭ ەكولوگيالىق وركەنيەت قۇرىلىسىنا جالپى بەتتىك باسشىلىعىن كۇشەيتىپ، ەكولوگيالىق وركەنيەت قۇرىلىسىن جالپى جاعداي قىزمەتىندە كورنەكتى ورىنعا قويىپ، ەكولوگيالىق وركەنيەت قۇرىلىسىن جاپپاي كۇشەيتتىك، تاۋ، سۋ، ورمان، ەگىنجاي، كول، جايلىم، قۇمدى شولدەردى ءبىر تۇلعالاندىرا جونگە سالىپ، ءتۇبىرلى، باستامالىلىق، ۇزاق بولاشاقتىق سيپات الاتىن ءبىرسىپىرا قىزمەت ورىستەتتىك، بەكىمنىڭ كۇشتىلىگى، سەرپىننىڭ ۇلكەندىگى، ناتيجەنىڭ ۇلكەندىگى بۇرىن بولماعان دەڭگەيدە بولىپ، ەكولوگيالىق وركەنيەت قۇرىلىسىندا تانىمنان امالياتقا دەيىن تۇگەلدەي تاريحي سيپاتتى، بۇرىلىس سيپاتتى، جالپى جاعداي سيپاتتى وزگەرىس تۋىلدى، سونىمەن بىرگە، ەلىمىزدىڭ ەكولوگيالىق وركەنيەت قۇرىلىسى ءالى دە ءبىرتالاي قايشىلىقتار مەن سىن - سايىستارعا ءدوپ كەلىپ وتىر. ەكولوگيالىق ورتانى قالپىنا كەلتىرۋ جانە جاقسارتۋ ۇزاق ۋاقىت قاجىرلى قۇلشىنىستى قاجەت ەتەتىن بارىس، وپ - وڭاي ورىنداي سالۋ مۇمكىن ەمەس، ءسوز جوق، قاجىماي - تالماي تاباندى بولىپ، قايراتتانا ىسكەرلىك كورسەتۋ كەرەك.
شي جينپيڭ بىلاي دەپ اتاپ كورسەتتى: ەلىمىز قۇراتىن سوتسياليستىك وسىزاماندانۋ كوپتەگەن ماڭىزدى ەرەكشەلىكتەرگە يە، سولاردىڭ ءبىرى − ەلىمىزدىڭ وسىزاماندانۋى ادام مەن تابيعات جاراسىمدى قاتار ءومىر سۇرەتىن وسىزاماندانۋ، وندا زاتتىق وركەنيەت قۇرىلىسى مەن ەكولوگيالىق وركەنيەت قۇرىلىسىن قاتار ىلگەرىلەتۋگە باسا ءمان بەرىلەدى. جاسىل، تومەن كومىرتەكتى دامۋدى قاجىماس تاباندىلىقپەن ىلگەرىلەتىپ، جاسىل، تومەن كومىرتەكتى اينالمالى داميتىن ەكونوميكالىق جۇيە ورناتىپ جانە ونى اقاۋسىزداندىرىپ، ەكونوميكالىق، قوعامدىق دامۋدىڭ جاپپاي جاسىل تيپكە قاراي ويىسۋىن جەبەۋ كەرەك. لاس زاتتاردىڭ شىعارىلۋىن ازايتۋ مەن كومىر قىشقىل گازىنىڭ شىعارىلۋىن تومەندەتۋدىڭ سايكەسە وتىرىپ ونىمدىلىكتى ارتتىرۋىن جۇزەگە اسىرۋدى ەكونوميكالىق، قوعامدىق دامۋدىڭ جاپپاي جاسىل تيپكە قاراي ويىسۋىن جەبەۋدىڭ باس تۇتقاسى ەتىپ، كاسىپ سالاسى قۇرىلىمىن، ەنەرگيا قۇرىلىمىن، قاتىناس - تاسىمال قۇرىلىمىن، جەردەن پايدالانۋ قۇرىلىمىن رەتتەۋدى جەدەل ىلگەرىلەتۋ كەرەك. مەملەكەت جەرى كەڭىستىگىن جوسپارلاۋدى جانە پايدالانىلۋ ماقساتىن مەڭگەرۋدى كۇشەيتىپ، ەكولوگيانى قورعاۋ، نەگىزگى ەگىنجايلار، قالا - قالاشىقتى دامىتۋ سياقتى كەڭىستىكتەردى مەڭگەرۋدىڭ شەكاراسىن تياناقتاندىرىپ، نەگىزگى فۋنكتسيالىق وڭىرلەر ستراتەگياسىن اتقارىپ، ەكولوگيانى قورعاۋدىڭ قىزىل سىزىعىن بەلگىلەۋ جانە قاتاڭ ساقتاۋ كەرەك. بايلىقتان پايدالانۋ سىندى قاينار كوزدى مىقتى ۇستاپ، بايلىقتىڭ جالپى مولشەرىن باسقارۋدى، عىلمي سەپتەۋدى، جاپپاي ۇنەمدەۋدى، اينالمالى پايدالانۋدى ىلگەرىلەتىپ، بايلىقتان پايدالانۋدىڭ تيىمدىلىگىن جاپپاي جوعارىلاتۋ كەرەك. كاسىپ سالاسى قۇرىلىمىن رەتتەۋ سىندى شەشۋشى تەتىكتى مىقتاپ ۇستاپ، ستراتەگيالىق جاڭادان وركەندەگەن كاسىپ سالالارىنىڭ، جوعارى تەحنيكالىق كاسىپ سالالارىنىڭ، وسى زامانعى قىزمەت وتەۋ كاسىبىنىڭ جەدەل دامۋىن ىلگەرىلەتىپ، بايلىقتان تازا، تومەن كومىرتەكتى جولمەن، حاۋىپسىز، جوعارى ونىمدىلىكپەن پايدالانۋدى ىلگەرىلەتىپ، كومىر قىشقىل گازىنىڭ شىعارىلۋ كۇشەمەلىلىگىن ۇزدىكسىز تومەندەتۋ كەرەك. جاسىل، تومەن كومىرتەكتى تەحنيكالىق جاڭالىق اشۋ جەتىستىكتەرىن كادەگە جاراتۋعا قولداۋ كورسەتۋ، جاسىل تەحنيكالاردا جاڭالىق اشۋعا قولداۋ كورسەتۋ كەرەك. كومىر قىشقىل گازىنىڭ شىعارىلۋىن ەڭ جوعارعى ماننەن اسىرماۋدى، كومىرتەگىن بەيتاراپتاندىرۋدى جۇزەگە اسىرۋ − ەلىمىزدىڭ دۇنيە جۇزىنە بەرگەن ايبىندى ۋادەسى، سونداي - اق كەڭ اۋقىمدى ءارى تەرەڭ ەكونوميكالىق، قوعامدىق وزگەرىس، ول استە وڭاي - وسپاق جۇزەگە اسا قالمايدى. ءار دارەجەلى پارتكومدار مەن ۇكىمەتتەر تەمىردە تاپ، تاسقا ءىز قالدىراتىن ارىن كورسەتىپ، ۋاقىت كەستەسىن، جول كارتاسىن، جۇمىس كەستەسىن ايقىنداپ، ەكونوميكالىق، قوعامدىق دامۋدىڭ بايلىقتان جوعارى ونىمدىلىكپەن پايدالانۋ جانە جاسىل، تومەن كومىرتەكتى دامۋ نەگىزىندە ورناۋىن ىلگەرىلەتۋ كەرەك. ەنەرگيا جۇمسالىمى جوعارى، لاس زاتتار شىعارۋى كوپ، تالاپقا ساي كەلمەيتىن نىسانداردى باتىلدىقپەن قاتاردان قالدىرۋ كەرەك.
شي جينپيڭ بىلاي دەپ باسا دارىپتەدى: لاستانۋدان ساقتانۋدان جانە ونى تىزگىندەۋدەن قامال الۋ شايقاسىن ىشكەرىلەي، ويداعىداي جۇرگىزىپ، بۇقارانىڭ ماڭايىنداعى كورنەكتى ەكولوگيالىق ورتا ماسەلەلەرىنەن شوعىرلى تۇردە قامال الىپ، بۇقاراعا ەكولوگيالىق ورتا ساپاسىنىڭ جاقسارۋىن شىنايى سەزىندىرۋ كەرەك. لاستانۋدى دالمە - ءدال جونگە سالۋعا، لاستانۋدى عىلمي جولمەن جونگە سالۋعا، لاستانۋدى زاڭ بويىنشا جونگە سالۋعا تاباندى بولىپ، سەرپىندى ساقتاپ، تەرەڭدىككە بويلاپ، كەڭدىككە قانات جايىپ، اشىق اسپاندى، تۇنىق سۋدى، تازا توپىراقتى قورعاۋ شايقاسىن ۇزدىكسىز ويداعىداي جۇرگىزۋ كەرەك. كوپ ءتۇرلى لاستاۋشى زاتتاردى سايكەستىرە مەڭگەرۋدى جانە وڭىرلەر ارا سايكەسە جونگە سالۋدى كۇشەيتىپ، ۇساق توزاڭ زاتتار مەن وزوندى سايكەستىرە مەڭگەرۋدى كۇشەيتىپ، اۋىر لاستانعان اۋا رايىن نەگىزىنەن جويۋ كەرەك. سۋ بايلىعىن، سۋ ورتاسىن، سۋ ەكولوگياسىن جونگە سالۋدى ءبىر تۇتاس جوسپارلاپ، تۇرعىنداردىڭ اۋىز سۋ حاۋىپسىزدىگىن ءونىمدى قورعاپ، قالالارداعى قارا - ساسىق سۋلاردى باتىل جونگە سالۋ كەرەك. توپىراقتىڭ لاستانۋىنان ساقتانۋدى جانە ونى جونگە سالۋدى ىلگەرىلەتىپ، اۋىل شارۋاشىلىعىنا پايدالانىلاتىن جەرلەر مەن قۇرىلىسقا پايدالانىلاتىن جەرلەردەگى توپىراقتىڭ لاستانۋ قاتەرىن ءونىمدى مەڭگەرۋ كەرەك. قوقىستاردى تۇرگە ءبولۋ جانە مولشەرىن ازايتۋ، بايلىققا اينالدىرۋ جۇمىسىن اتقارىپ، جاڭا لاستاۋشى زاتتاردى جونگە سالۋعا ءمان بەرۋ كەرەك. لاستانۋدى جونگە سالۋدىڭ اۋىل - قالاشىققا، اۋىل - قىستاققا قاراي كەڭەيۋىن ىلگەرىلەتىپ، اۋىل شارۋاشىلىعىندا اۋماقتىق لاستانۋ قاينارىن جونگە سالۋدى كۇشەيتىپ، اۋىل - قىستاق قونىس ورتاسىن كورنەكتى جاقسارتۋ كەرەك.
شي جينپيڭ بىلاي دەپ اتاپ كورسەتتى: ەكولوگيالىق جۇيەنىڭ ساپاسى مەن تۇراقتىلىعىن كوتەرىپ، جۇيە كوزقاراسىنا تاباندى بولىپ، ەكولوگيالىق جۇيەنىڭ جالپى تۇلعالىق سيپاتىن نەگىزگە الا وتىرىپ، تاۋ، سۋ، ورمان، ەگىنجاي، كول، جايلىم، قۇمدى شولدەردى ءبىر تۇلعالاندىرىپ قورعاۋدى جانە قالپىنا كەلتىرۋدى ىلگەرىلەتىپ، كەشەندى جونگە سالۋعا، جۇيەلى جونگە سالۋعا، قاينار كوزىنەن جونگە سالۋعا اناعۇرلىم ءمان بەرۋ كەرەك. مەملەكەتتىك باقشانى نەگىزگى تۇلعا ەتكەن جاراتىلىستىق قورىق جۇيەسىن جەدەل ورناتىپ، جاراتىلىستىق قورىقتىڭ، ەكولوگيانى قورعاۋدىڭ قىزىل سىزىعىن باقىلاۋ - باسقارۋ ءتۇزىمىن كەمەلدەندىرۋ كەرەك. ەكولوگيالىق ونىمدەردىڭ قۇنىن جۇزەگە اسىرۋ مەحانيزمىن ورناتىپ، اقاۋسىزداندىرىپ، ەكولوگيالىق ورتانى قورعاۋعا، قالپىنا كەلتىرۋگە ۇيلەسىمدى قارىمجى بەرۋ، ەكولوگيالىق ورتانى بۇلدىرگەندەرگە ءتيىستى بوداۋ بەرگىزۋ كەرەك. شولەيتتەنۋدى، تاستاقتانۋدى، سۋ مەن توپىراقتىڭ زايا كەتۋىن كەشەندى جونگە سالۋدى عىلمي جولمەن ىلگەرىلەتىپ، مەملەكەت جەرىن كەڭ كولەمدە جاسىلداندىرۋ ارەكەتىن ورىستەتۋ كەرەك. جايلىم، ورمان، وزەن، كولدەردىڭ تىنىعىپ - تىڭايۋىن ىلگەرىلەتىپ، چاڭجياڭ وزەنىندە 10 جىل بالىق اۋلاۋعا تيىم سالۋدى ويداعىداي اتقارىپ، ەگىستىك جەرلەردى تىنىقتىرۋ، كەزەكپەن ەگۋ ءتۇزىمىن اقاۋسىزداندىرۋ كەرەك. ورگانيزمدەردىڭ الۋان تۇرلىلىگىن قورعاۋ ەلەۋلى ينجەنەرياسىن اتقارىپ، سىرتتان كەلگەن تۇرلەردى باسقارۋ - مەڭگەرۋدى كۇشەيتىپ، «ورگانيزمدەردىڭ الۋان تۇرلىلىگى شارتىنىڭ» 15 - رەتكى كەلىسىم جاساسۋشى جاقتار جينالىسىن ويداعىداي وتكىزۋ كەرەك.
شي جينپيڭ بىلاي دەپ باسا دارىپتەدى: بۇكىل الەمنىڭ باياندى دامۋىن بەلسەنە ىلگەرىلەتىپ، ادامزات تاعدىرلاس ورتاق تۇلعا ۇستانىمىن ۇستانىپ، بۇكىل الەمنىڭ قورشاعان ورتاسىن جونگە سالۋعا بەلسەنە ات سالىسىپ، بۇكىل الەمگە اناعۇرلىم كوپ الەۋمەتتىك ءونىم ۇسىنىپ، ەلىمىزدىڭ جاۋاپكەرشىلىك ارقالايتىن ءىرى ەلدىك وبرازىن ايگىلەۋ كەرەك. تۇستىك ەلدەرمەن سەلبەستىكتى، سونداي - اق توڭىرەكتەگى ەلدەرمەن سەلبەستىكتى كۇشەيتىپ، وركەندەپ كەلە جاتقان ەلدەرگە قولدان كەلگەنشە قارجىلىق، تەحنيكالىق قولداۋ كورسەتىپ، ولاردىڭ قورشاعان ورتانى جونگە سالۋ قابىلەتىن جوعارىلاتۋىنا كومەكتەسىپ، جاسىل ”ءبىر بەلدەۋ، ءبىر جولدى“ بىرگە تۇلعالاۋ كەرەك. پارىقتى تۇردە ورتاق جاۋاپكەرشىلىك ارقالاۋ پرينسيبىنە، ادىلدىك پرينسيبىنە جانە ءاركىم ءوز قۋاتىنا قاراۋ پرينسيبىنە تاباندى بولىپ، كوپ جاقتىلىقتى باتىل قورعاۋ، ەلىمىزدىڭ دامۋ مۇددەسىن باتىل قورعاۋ كەرەك.
شي جينپيڭ بىلاي دەپ اتاپ كورسەتتى: ەكولوگيالىق ورتانى جونگە سالۋ جۇيەسى مەن جونگە سالۋ قابىلەتىن وسىزامانداندىرۋ دەڭگەيىن جوعارىلاتىپ، پارتكوم باسشىلىق ەتەتىن، ۇكىمەت جەتەكشى، كاسىپورىندار نەگىزگى تۇلعا بولاتىن، قوعامدىق ۇيىمدار مەن الەۋمەت بىرگە ات سالىساتىن قورشاعان ورتانى جونگە سالۋ جۇيەسىن اقاۋسىزداندىرىپ، ءبىر تۇلعادا جوسپارلايتىن، ءبىر تۇلعادا ورنالاستىراتىن، ءبىر تۇلعادا ىلگەرىلەتەتىن، ءبىر تۇلعادا باعالاۋ جۇرگىزەتىن ءتۇزىم مەحانيزم ورناتۋ كەرەك. ەكولوگيالىق وركەنيەت ءتۇزىلىسى رەفورماسىن ىشكەرىلەي ىلگەرىلەتىپ، جاسىل دامۋدىڭ زاڭدىق جانە ساياساتتىق قامتاماسىزدىعىن كۇشەيتۋ كەرەك. قورشاعان ورتانى قورعاۋدى، ەنەرگيا ۇنەمدەۋدى، لاس زاتتاردىڭ شىعارىلۋىن ازايتۋدى تەجەمەلى كورسەتكىشپەن باسقارۋدى كەمەلدەندىرىپ، تۇراقتى قازىنالىق قارجى ۇسىنىلىمى مەحانيزمىن ورناتۋ، اقاۋسىزداندىرۋ كەرەك. لاس زات شىعارۋعا رۇقسات الۋ ءتۇزىمىن جاپپاي اتقارىپ، لاس زات شىعارۋ ۇقىعىن، ەنەرگيا ىستەتۋ ۇقىعىن، سۋ ىستەتۋ ۇقىعىن، كومىر قىشقىل گازىن شىعارۋ ۇقىعىن بازار تاسىلىمەن ايىرباستاۋدى ىلگەرىلەتىپ، حاۋىپ - قاتەرلەردى مەڭگەرۋ مەحانيزمىن ورناتۋ، اقاۋسىزداندىرۋ كەرەك. جالپى حالىقتىڭ ۇنەمشىلدىك تانىمىن، قورشاعان ورتا تانىمىن، ەكولوگيا تانىمىن كۇشەيتىپ، ۇنەمدى دە لايىقتى، جاسىل، تومەن كومىرتەكتى تۇرمىس ءتاسىلىن دارىپتەپ، كورىكتى جۇڭگو قۇرۋدى جالپى حالىقتىڭ سانالى ارەكەتىنە اينالدىرۋ كەرەك. ءار دارەجەلى پارتكومدار مەن ۇكىمەتتەر ەكولوگيالىق وركەنيەت قۇرىلىسىنىڭ ساياسي جاۋاپكەرشىلىگىن ارقالاپ، بۇيرىق - تيىمداردى باتىلدىقپەن بۇلجىتپاي ورىنداپ، پارتيا ورتالىق كوميتەتىنىڭ ەكولوگيالىق وركەنيەت قۇرىلىسى جونىندەگى ءتۇرلى شەشىمدەرىنىڭ، ورنالاستىرۋلارىنىڭ تىڭعىلىقتى تياناقتانۋىنا، ناتيجە بەرۋىنە شىنايى كەپىلدىك ەتۋ كەرەك.
