انار بۇلت/شينجياڭ گازەتىنىڭ ءتىلشىسى شىن زۋشياۋ
وتانشىلدىق اندەردى ورىنداپ، قىزىل حيكايالاردى بايانداپ، پارتيا تاريحى زەيىن سىناۋ جارىسىن ورىستەتىپ، قىزىل تاربيە بازالارىن ”بۇلتتا ەكسكۋرسيالادى“... پارتيا تاريحىن ۇيرەنۋ تاربيەسى ورىستەتىلگەننەن بەرى، بۇكىل رايونداعى ورتا، باستاۋىش مەكتەپتەر پارتيا تاريحىن وقىتۋ مازمۇنى ەتىپ، ونەگە ورناتىپ، ادام تاربيەلەۋ ءتۇبىرلى مىندەتىمەن تىعىز بايلانىستىرىپ، وتانشىلدىق رۋحتى اسقاقتاتىپ، قالىڭ جاستار مەن ورەندەردى تاريحتى ءبىلىپ پارتيانى سۇيۋگە، تاريحتى ءبىلىپ وتاندى سۇيۋگە جەتەكتەدى.
ءتۇرلى فورمادا قىزىل ءنار قابىلدادى
4 - ايدىڭ 23 - كۇنى ءۇرىمجى قالالىق 53 - باستاۋىش مەكتەپ پارتيا تاريحى بىلىمدەرىنەن زەيىن سىناۋ جارىسىن وتكىزدى. جارىسقا قاتىناسقان ساڭلاقتار قول جىلدامدىعى، ويلاۋ تەزدىگى بويىنشا جارىسقا ءتۇسىپ، بەلسەندىلىكپەن تالاسىپ جاۋاپ بەردى، جارىس الاڭى توتەنشە دۋماندى بولدى. ”جارىس ارقىلى مەن ءتىپتى دە كوپ پارتيا تاريحى بىلىمدەرىن ءبىلىپ، قازىرگى باقىتتى تۇرمىستىڭ وڭاي - وسپاق قولعا كەلمەگەندىگىن ۇعىندىم. قۇلشىنا ۇيرەنىپ، ىنتىماقتى بولىپ، تارتىپكە بويسۇنىپ، جاڭا داۋىردەگى جاقسى ورەن بولامىن“، - دەدى 6 - جىلدىق (4) كلاس وقۋشىسى نۇركامال ابىلەز.
كەيبىر مەكتەپتەر قىزىل حيكايانى اڭگىمەلەۋ جارىسى، ادال جۇرەگىمىز پارتيا دەپ سوعادى تاقىرىبىنداعى دەكلاماتسيا جارىسى سياقتىلاردى وتكىزۋ ارقىلى وقۋشىلاردىڭ قىزىل ءنار قابىلداپ، مۇرات - سەنىمىن بەكەمدەۋىنە مۇمكىندىك جاسادى.
فۋكاڭ قالالىق 1 - باستاۋىش مەكتەپ قىزىل حيكايالاردى اڭگىمەلەۋ جارىسى قيمىلىن ورىستەتتى، «جاپون شاپقىنشىلارىنا قارسى تۇرعان قاھارمان − جاۋ يمان»، «قاۋىرسىن قىستىرىلعان حات»، «بالا اسكەر جاڭگا»... ءبىر - بىرلەگەن قىزىل حيكايالاردان قاھارمانداردىڭ شۇعىلالى وبرازى ساۋلە شاشىپ، وقۋشىلاردىڭ پارتيانىڭ سوزىنە قۇلاق اسۋ، پارتياعا ىلەسۋ بەكىمىن بەكەمدەي ءتۇستى.
كوكتوعاي اۋدانى كوكتوعاي قالاشىق ورتا مەكتەپ وتانشىلدىق اندەردى اسقاقتاتا شىرقاپ، وتانعا دەگەن قىزۋ سۇيىسپەنشىلىكتى اسقاق ءان اۋەنىمەن بەينەلەدى. ”ءبىز قىزىل كلاسسيكالىق اندەردى جالعاستىرىپ ايتقىزۋ بارىسىندا بالالاردى پارتيانى ءسۇيىپ، وتاندى ءسۇيىپ، سوتسياليزمنىڭ تولىمدى ءىزباسارلارى بولىپ ەسەيۋگە تاربيەلەدىك“، - دەدى كوكتوعاي قالاشىق ورتا مەكتەپ پارتيا ياچەيكاسىنىڭ شۋجيى پەي حانشۋان.
كىشكەنتاي ۇگىت لەكسياشىلار قىزىل رۋحتى جالعاستىردى
پارتيا تاريحى − ەڭ جاقسى وقۋلىق، تيانشان الابىندا، كوپتەگەن ورتا، باستاۋىش مەكتەپ وقۋشىلارى قىزىل حيكايانىڭ ۇگىت لەكسياشىسى بولىپ، 100 جىلدىق پارتيا تاريحىن قايتالاي ەسكە الۋ بارىسىندا تانىم مەن ارەكەت بىرلىككە كەلتىرىلگەن ۇيرەنۋ تاربيەسىن قابىلدادى.
”شىڭ شىساي شينجياڭدا قىزمەت ىستەگەن 160تان استام كومپارتيا مۇشەسىن تۇرمەگە جاپقاندا، كوممۋنيستىك پارتيا مۇشەسىنىڭ بالالارىن دا قوسا تۇرمەگە جاپتى... ولار وزدەرىنىڭ اكە - شەشەلەرى سياقتى باستان - اياق تۇرعىسى بەرىك، تۋى ايقىن بولىپ، ’كىشكەنتاي 8 - ارميا جاۋىنگەرلەرى‘ داڭقتى اتاعىنا لايىق بولدى“. 4 - ايدىڭ 30 - كۇنى ءۇرىمجى قالاسى قۇرباندار قابىرستاندىعىندا ەرىكتى ءتۇسىندىرۋشى ۋاڭ باۋحاننىڭ اڭگىمەسىنە ىلەسە، تىڭدارماندارعا سول كەزدەگى قان سۋداي اققان الماعايىپ زاماندى ەلەستەتتى. ۋاڭ باۋحان ءۇرىمجى قالالىق 30 - باستاۋىش مەكتەپ 6 - جىلدىعىنىڭ وقۋشىسى، ”توڭكەرىستىك ارداگەر قۇربانداردىڭ ىستىق قاندارىنىڭ بوداۋىنا ءبىز بۇگىن باقىتتى تۇرمىسقا جەتتىك، ولاردىڭ حيكاياسى ءبىزدىڭ جالعاستىرۋىمىزعا ابدەن تاتيدى“. ول بىلاي دەدى: تۇسىندىرمەشى رەتىندە، قىزىل حيكايالاردى جاقسى اڭگىمەلەۋمەن بىرگە، قۇلشىنا ۇيرەنىپ، قابىلەتىمدى ۇشتايمىن.
اتۇش قالاسى شياۋ لۋكى ورتا مەكتەبىندە ءبىر توپ ”كىشكەنتاي قىزىل ءتۇسىندىرۋشىلەر“ مەكتەپتىڭ ءىشى - سىرتىندا قاربالاستىققا ءتۇستى، 8 - جىلدىقتىڭ وقۋشىسى جانايىم مامەتجان ۇگىت لەكسيا ارقىلى ءوزىنىڭ پارتيا تاريحى جونىندە ءتىپتى دە تەرەڭ تۇسىنىككە يە بولعاندىعىن، حالىقتىڭ باقىتى، ۇلتتىڭ ازاتتىعى مەن مەملەكەتتىڭ بايىپ قۇدىرەتتەنۋى ءۇشىن، توڭكەرىستىك ارداگەر قۇربانداردىڭ ادالدىقتان اينىماعان، ءولىمدى ەلەڭ قۇرلى كورمەگەن رۋحى ءوزىن بارىنشا شابىتتاندىرعاندىعىن ايتتى.
بۇلتتىق ەكسكۋرسيالاۋ تاربيەنى جانداندىرا ءتۇستى
”پارتيا ساباعى + تىكە تاراتۋ“، ”پارتيا ساباعى +VR“ سىندى تاسىلدەرمەن اپپارات كوزىندە پارتيا تاريحىن ۇيرەنۋ، قىزىل بازالاردى بۇلتتىق ارالاۋ رايونىمىزداعى ورتا، باستاۋىش مەكتەپ وقۋشىلارىنىڭ پارتيا تاريحىن ۇيرەنۋ تاربيەسىن ءتىپتى دە جاندى، تارتىمدى ەتتى.
جۋىردا ءۇرىمجى قالاسى ميدۇڭ رايونى وقۋ - اعارتۋ جۇيەسى ”100 جىلدىق قىزىل قايىق بولاشاققا بەت الدى“ پارتيا قۇرىلعاندىعىنىڭ 100 جىلدىعىن قارسى الۋ نەگىزگى تاقىرىپتىق قيمىلىن باستادى. مەكتەپتەر دىبىس، بەينە ەكران جانە سۋرەت ماتەريالدارى ارقىلى وقۋشىلاردى باستاپ ”قىزىل قايىققا“ ”وتىرعىزىپ“، ينتەرنەتتە شاڭحاي، جياشيڭ، حانكوۋ، يان - ان قاتارلى پارتيا قۇرىلتايى اشىلعان جۇرتتاردى ارالاتىپ، قىزىل گەندى، توڭكەرىس الاۋىن ۇرپاقتارعا جالعادى.
ونسۋ اۋداندىق 2 - باستاۋىش مەكتەپ جىجياڭ، سىچۋان سىندى 2 جەردەگى وقىتۋشى - وقۋشىلارمەن بىرلەسىپ، ”قول ۇستاسىپ پارتيا تاريحىن بىرگە ۇيرەنىپ، تىلەكتەس بولىپ پارتيانىڭ قامقورلىعىن بىرگە سەزىنەيىك“ ينتەرنەت جەلىسىندە پارتيا تاريحىن ۇيرەنۋ قيمىلىن وتكىزدى. 3 جەردەگى 3 مەكتەپتىڭ وقىتۋشى - وقۋشىلارى جىجياڭ ولكەسى ي - ۋ قالاسى شياڭشان باستاۋىش مەكتەبى وقىتۋشى - وقۋشىلارىنىڭ باستاۋىندا بۇلتتىق ساباقحانا ارقىلى چىن ۋاڭداۋدىڭ كونە تۇراعىنا ”بارىپ“ ”اۋەلگى ماقساتتى ىزدەدى“. تاريحي جازبالار، قىمباتتى سۋرەتتەر، قاستەرلەپ ساقتالعان زاتتار كەڭىستىكتەگى بۇلتتىق ساباقحانا ارقىلى وقىتۋشى - وقۋشىلارعا كورسەتىلىپ، جۇڭگو كوممۋنيستىك پارتياسىنىڭ 100 جىلدىق كۇرەس تاريحىن جاستار مەن ورەندەردىڭ كوڭىل تۇكپىرىنە ۇيالاتتى.
