انار بۇلت / شينجياڭ گازەتىنىڭ ءتىلشىسى جيا چۇنشيا
شينجياڭ داشۋەسى ارحيۆ سارايىنىڭ باستىعى يۇي فۋ - ىن كورەرمەندەرگە جۇڭگو كوممۋنيستىك پارتياسىنىڭ ىقپالى مەن قۇلشىنىسىندا مادەنيەت سالاسىنداعى ءبىر توپ العاباسار قايراتكەرلەردىڭ شينجياڭعا كەلىپ وزىق مادەنيەت تاراتقانى جايلى تۇسىنىك جاساۋدا (4 - ايدىڭ 7 - كۇنى تۇسىرىلگەن). انار بۇلت / شينجياڭ گازەتىنىڭ ءتىلشىسى شيە لۇڭ تۇسىرگەن
4 - ايدىڭ 7 - كۇنى ءۇرىمجى قالاسى تيانشان رايونى جەڭىس جولىنداعى شينجياڭ داشۋەسىنىڭ مەكتەپ تاريحى سارايىندا كوپ مەديالى قۇرىلعىدان شينجياڭ داشۋەسىنىڭ وقۋشىلارى ساحنالاعان دراما «جاستىقتىڭ وتى جالىنداتقان ءبىزدىڭ شاق» قويىلىپ جاتتى.
”ساباقتاستار، بارىڭدە دە ەل باسىنا تۇسكەن اۋىرتپالىققا تىزە قوسا قارسى اتتاناتىن وتتى جىگەر بار ەكەنى شىن، ءبىراق وتانشىلدىق تەك مايدانعا اتتانىپ جاۋعا شابۋ عانا ەمەس، جاپون شاپقىنشىلارىنا قارسى سوعىستىڭ جەڭىسىنە جەتۋ بۇكىل ەل حالقىنىڭ كۇش - قايراتىنا مۇقتاج. ەگەر سەندەر دراما دايىنداۋعا بەلسەنە ات سالىسۋ تاسىلىمەن شينجياڭداعى ءار ۇلت بۇقاراسىنا جاپون شاپقىنشىلارىنا قارسى سوعىستى ۇگىتتەپ، جىلۋ جيناۋ قيمىلدارىن بەلسەنە ۇيىمداستىرساڭدار، ءتىپتى، الدىڭعى شەپتە بولعاننان دا ۇلكەن رول اتقارعان بولاسىڭدار...“ دراماداعى شينجياڭ شۋەيۋانى (شينجياڭ داشۋەسىنىڭ توركىنى) وقۋ - وقىتۋ ىستەرىنىڭ باستىعى لين جيلۋدىڭ تەرەڭنەن تولعاعان ءتالىمى جۇرتتى ۋاقىتتىڭ وتكەن بەلەسىنە جەتەلەدى.
جاپون شاپقىنشىلارىنا قارسى سوعىس كەزىندە جۇڭگو كوممۋنيستەرى شينجياڭدا ۇلتتى فورما، جاپون شاپقىنشىلارىنا قارسى سوعىستى وزەك، يمپەرياليزمگە، فەوداليزمگە قارسى تۇرۋدى باستى مازمۇن ەتكەن جاڭا مادەنيەت قوزعالىسىن ورىستەتىپ، توڭكەرىستىك مازمۇنمەن، جاڭا اۋەنمەن، ۇلتتىق فورمامەن شينجياڭداعى ءار ۇلت حالقىن مول رۋحاني ازىقپەن قامداپ، شينجياڭداعى ءبىر ۇرپاق توڭكەرىسشىل جاس بۋىننىڭ ءوسىپ - جەتىلۋىنە ءنار سيلاپ، شينجياڭداعى ءار ۇلت حالقىنىڭ ويانۋىن جەبەدى.
ماركسيزم - لەنينيزمدى تاراتىپ، جاپون شاپقىنشىلارىنا قارسى سوعىسقا اتتانىپ، وتاندى قۇتقارۋدى ۇگىتتەدى
شينجياڭ ەجەلدەن ”ءان - ءبي مەكەنى“ دەگەن ادەمى اتقا يە، ايتسە دە مينگو داۋىرىنەن بەرى شينجياڭداعى جەرگىلىكتى ميليتاريستەر توماعا - تۇيىق، كونەشىل ساياسات جۇرگىزىپ، 4 - مامىر جاڭا مادەنيەت قوزعالىسىنىڭ كوكتەم جاڭبىرىمەن وسىناۋ وتان توپىراعىن نارلەندىرمەي، شينجياڭ مادەنيەت جاعىندا بۇكىلدەي قاڭسىپ تۇردى.
شينجياڭعا بارامىز، جاڭا شينجياڭ قۇرامىز!
”جاپون شاپقىنشىلارىنا قارسى سوعىس كەزىندە 100دەن استام جۇڭگو كوممۋنيسى تيانشان الابىنا اتتانىپ، شينجياڭنىڭ توڭكەرىس جانە قۇرىلىس ىستەرىنە ات سالىسىپ، شينجياڭدا ءار جاقتا جالىندى ومىرشەڭدىك قاۋلاعان اۋقىمدى جارىققا شىعاردى. سول كەزدە شينجياڭ ’جۇڭگونىڭ ۇلتتى گۇلدەندىرۋىنىڭ ماڭىزدى ءبىر بازاسى‘ دەپ اتالدى“، - دەيدى شينجياڭ قوعامدىق عىلىمدار اكادەمياسى تاريح زەرتتەۋ ورنىنىڭ تەتە اعا زەرتتەۋشىسى ماي يۇيحۋا.
جۇڭگو كوممۋنيستىك پارتياسىنىڭ ىقپالى مەن قۇلشىنىسىندا دۋ چۇڭيۋان، سا كۇڭلى، شىن يانبيڭ (ماۋ دۇن)، جاۋ دان قاتارلى مادەنيەت سالاسىنىڭ ءبىر توپ العاباسار قايراتكەرلەرى ەدەل - جەدەل شينجياڭعا كەلدى، ولار 8 - ارميانىڭ شينجياڭداعى ءىس باسقارماسىنىڭ باسشىلىعىندا ماركسيزم - لەنينيزمدى، جاپون شاپقىنشىلارىنا قارسى سوعىسقا اتتانىپ، وتاندى قۇتقارۋ يدەياسىن، جاپون شاپقىنشىلارىنا قارسى ۇلتتىق بىرلىكساپ ساياساتىن جانە 4 - مامىر جاڭا مادەنيەت قوزعالىسىنىڭ جاڭا يدەيالارىن زور كۇشپەن ۇگىتتەپ، شينجياڭداعى جاڭا مادەنيەت قوزعالىسىنىڭ ارشىندى جۇرگىزىلۋىن جەبەدى.
”شينجياڭداعى جاڭا مادەنيەت قوزعالىسىنىڭ ەڭ ۇلكەن ەرەكشەلىگى − ماركسيزمنىڭ شينجياڭعا كەڭىنەن تارالۋى، مۇندا شينجياڭ شۋەيۋانى ماركسيزمدى ۇگىتتەۋدىڭ باستى شەبى بولدى“، - دەيدى شينجياڭ داشۋەسى ماركسيزم شۋەيۋانى قىزىل مادەنيەتتى زەرتتەۋ ورتالىعىنىڭ مەڭگەرۋشىسى، دوتسەنت رۋان يە، جۇڭگو كوممۋنيستەرى ءار ۇلت وقىتۋشى - وقۋشىلارىنا ماركسيزم - لەنينيزمدى جانە جاپون شاپقىنشىلارىنا قارسى تۇرىپ وتاندى قۇتقارۋ يدەياسىن تىكەلەي ۇگىتتەپ، ولاردىڭ جاپون شاپقىنشىلارىنا قارسى تۇرىپ، وتاندى جويىلۋدان قۇتقارۋ قوزعالىستارىنا بەلسەنە ارالاسۋىنا قۋزاۋشىلىق ەتىپ، شينجياڭداعى توڭكەرىسشىل جاستاردىڭ ءوسىپ - جەتىلۋىن جەبەدى.
سول كەزدە ديحۋاداعى (ءۇرىمجىنىڭ بۇرىنعى اتاۋى) كىتاپ دۇكەندەرىندە جۇڭگو تىلىندە باسىلعان «كاپيتال»، «سوتسياليزمنىڭ قيالدان عىلىمعا دامۋى»، «ماركستىڭ ءومىر بايانى» سياقتى ماركستىڭ، ەنگەلستىڭ جانە لەنيننىڭ ەڭبەكتەرى، سونداي - اق ماركسيزمدى تانىستىرعان ارناۋلى شىعارمالار اشىق ساتىلدى. ”1941 - جىلدىڭ وزىندە شينجياڭدا جۇڭگو تىلىندە باسىلعان «سوۆەت وداعى كومپارتياسىنىڭ (بولشەۆيكتەر پارتياسى) تاريحى تۋرالى قىسقاشا وقۋلىق» پەن «لەنينيزم ماسەلەلەرى» اتتى كىتاپتان 10 مىڭنان استامى ساتىلدى، ماركسيزمنىڭ شينجياڭدا تارالۋىنىڭ قانداي كەڭ بولعاندىعىن وسىدان بىلۋگە بولادى. ماركسيزم - لەنينيزم تۋرالى كىتاپتاردى وقۋ سول كەزدە ءبىر ءتۇرلى قوعامدىق سالتقا اينالدى“، - دەدى رۋان يە.
شينجياڭ گازەتىنىڭ گازەت تاريحى سارايىنا كىرسەڭىز، ”ءبىر تامىردان جالعاسقان قىزىل گەن“ كورمە اۋماعىندا سارعايىپ كەتكەن «يمپەرياليزمگە قارسى شەپ» باسىلىمىنان دۋ چۇڭيۋان، شىن يانبيڭ، جاڭ جۇڭشى، سا كۇڭلى قاتارلى كوممۋنيستەر مەن العاباسار قايراتكەرلەر جازعان ماقالالاردان شينجياڭنىڭ ماركسيزم - لەنينيزمدى جانە جاپون شاپقىنشىلارىنا قارسى تۇرىپ وتاندى جويىلۋدان قۇتقارۋ قوزعالىسىن زور كۇشپەن ۇگىتتەگەن قىزىل ىزدەرىن كورەسىز.
”كوممۋنيستەر باسقارعان «شينجياڭ گازەتىندە»، ماۋ زىدۇڭنىڭ «ۇزاققا سوزىلاتىن سوعىس تۋرالى» سياقتى ەڭبەكتەرى، سونداي - اق جۇڭگو كوممۋنيستىك پارتياسى ورتالىق كوميتەتىنىڭ قاتىستى حۇجاتتارى مەن جاپون شاپقىنشىلارىنا قارسى سوعىس بازالارىن تانىستىرعان حابارلار جاريالاندى. شينجياڭ گازەتى مەكەمەسى 1938 - جىلى ماۋ زىدۇڭنىڭ «ۇزاققا سوزىلاتىن سوعىس تۋرالى»، «جاڭا كەزەڭ تۋرالى» دەگەن 2 ەڭبەگىنىڭ ءارقايسىسىن 8000 كىتاپشا ەتىپ، 1940 - جىلى ماۋ زىدۇڭنىڭ «جاڭا دەموكراتيزم تۋرالى» ەڭبەگىن 20 مىڭ كىتاپشا ەتىپ كوشىرىپ باسقان“، - دەيدى شينجياڭ گازەتى مەكەمەسى (شينجياڭ گازەتشىلىك - مەديا توبى شەكتى سەرىكتەستىگى) ماتەريال ورتالىعىنىڭ قىزمەتكەرى حۋاڭ لي.
توڭكەرىستىك اندەردى اسقاقتاتا شىرقاپ، جاپون شاپقىنشىلارىنا قارسى سوعىسقا بولعان ىستىق ىنتانى قاۋلاتتى
جاپون شاپقىنشىلارىنا قارسى سوعىس ورتىندەگى شينجياڭنىڭ بايتاق دالاسىندا ءان اۋەنى شارىقتاپ، جاۋىنگەرلىك جىرلار اسقاقتاتا شىرقالدى، قىزىل نوتالار ءار ۇلت بۇقاراسىنىڭ ەل باسىنا تۇسكەن اۋىرتپالىققا تىزە قوسا قارسى اتتاناتىن وتتى جىگەرىن مازداتتى؛ ايبىندى مەلوديالار جۇڭحۋا ۇلتىنىڭ جاپون شاپقىنشىلارىنا قارسى سوعىستى سوڭىنا دەيىن جۇرگىزۋ سيمفونياسىنا قوسىلىپ، سول جىلداردىڭ ەڭ ايباتتى كۇشى بولىپ ۇيىستى.
”سول كەزدە شينجياڭداعى جۇڭگو كوممۋنيستەرى، باستىسى، ’يمپەرياليزمگە قارسى بىرلەستىك‘ سىندى بۇقارالىق ۇيىمعا ارقا سۇيەپ، ءتۇرلى مادەنيەت قيمىلدارىن ۇيىمداستىرۋ، وتكىزۋ ارقىلى جاپون شاپقىنشىلارىنا قارسى تۇرۋدى ۇگىتتەدى. توڭكەرىستىك اندەردى اسقاقتاتا شىرقاۋ شينجياڭنىڭ جاپون شاپقىنشىلارىنا قارسى تۇرىپ، وتاندى قۇتقارۋ يدەياسىن ۇگىتتەيتىن جانە ءار ۇلت بۇقاراسىن جاپون شاپقىنشىلارىنا قارسى سوعىسقا ات سالىسۋعا جۇمىلدىراتىن باستى ءتاسىلى بولدى“، - دەدى رۋان يە.
”ول كەزدە ءار توپتا ءوزىنىڭ ءان ۇيىرمەلەرى بولدى، يمپەرياليزمگە قارسى بىرلەستىك تە ءان ايتۋدى ۇيرەتۋ كۋرسىن وتكىزىپ، جاڭا اسكەرلەر لاگەرىندەگى مادەنيەت تاربيەشىلەرىن اپتاسىنا 3 رەت ءان ۇيرەتۋگە ۇسىنىس ەتكەن. جۇڭگو كوممۋنيستەرىنەن حۋاڭ حوچيڭ، لي يۇنياڭ، يۇي سۇن، باي دافاڭ، چىن گۋيىن قاتارلىلار نەگىزگى ساتى ورىندارىندا ۇنەمى ءان ايتۋعا جەتەكشىلىك ەتەتىن“، - دەدى ماي يۇيحۋا.
جۇڭگو كوممۋنيستەرىنىڭ دارىپتەۋى مەن قۇلشىنۋىندا ءان ۇيىرمەلەرىنىڭ دامۋى جاڭبىردان كەيىنگى جاۋقازىنداي قاۋلاپ، مەكتەپتەرگە، اسكەري لاگەرلەرگە جانە زاۆودتارعا جاپپاي تارالدى، «ەرىكتىلەر مارشى»، «قىلىش مارشى»، «بوسۋ تريللوگياسى»، «حۋاڭحى حورى» سياقتى ۇلتتىڭ جاپون شاپقىنشىلارىنا قارسى سوعىس اندەرى ديحۋا قالاسىن جاڭعىرتىپ، تيانشان الابىندا جاپون شاپقىنشىلارىنا قارسى سوعىس دابىلىن قاقتى.
بۇدان سىرت، يمپەرياليزمگە قارسى بىرلەستىك ءار جولعى ”12 - ءساۋىر“، ”7 - شىلدە“، ”18 - قىركۇيەك“ سياقتى ماڭىزدى ەسكە الۋ كۇندەرىندە، سونداي - اق جاپونيا شاپقىنشىلارىنا قارسى تۇرۋ ماقساتىندا جىلۋ جيناۋ، اقشا اتاۋ قيمىلى كەزدەرىندە دە ءان ايتۋ قيمىلدارىن جانە كونسەرت قويىلىمدارىن ۇيىمداستىرىپ، بۇكىل شينجياڭداعى ءار ۇلت حالقىنىڭ وتانشىلدىق رۋحىن قاۋلاتىپ، جاپون شاپقىنشىلارىنا قارسى سوعىستا، ءسوزسىز، جەڭىسكە جەتەتىن سەنىمدى بەكەمدەدى.
سول كەزدە ءار ۇلتتىڭ بارلىعىندا وزدەرىنىڭ جاپون شاپقىنشىلارىنا قارسى سوعىس اندەرى بولدى. شينجياڭنىڭ ايگىلى ونەر قايراتكەرى قامبارحان قاتارلى كوپتەگەن ونەر يەلەرى وزدىكتەرىنەن جاپون شاپقىنشىلارىنا قارسى سوعىس ءۇشىن مىندەتتى كونسەرت ۇيىمداستىرىپ، ءار ۇلت حالقى جاۋعا بىرگە كەكتەنىپ، جالپى جۇرت جۇدىرىقتاي جۇمىلىپ، شينجياڭنىڭ جاپون شاپقىنشىلارىنا قارسى تۇرۋ، وتاندى جويىلۋدان قۇتقارۋ قوزعالىسى ايرىقشا جوعارى ورلەۋگە كوتەرىلدى.
”جاپون شاپقىنشىلارىنا قارسى سوعىس تاقىرىبىنداعى جىگەرلەنە العا باسۋعا جەبەيتىن اندەر − جۇڭحۋا ۇلتىنىڭ وتانى جويىلعان قۇل بولعىسى كەلمەگەن قاھارلى ايقايى. مىندەتتى كونسەرت قويۋ، مىندەتتى ءان ايتۋ سياقتى قيمىلدار ادامداردىڭ رۋحاني الەمىندە ولشەۋسىز زور رول اتقاردى. ءان قاي جەردە شىرقالسا، سول جەردەن جاپون شاپقىنشىلارىنا قارسى تۇرۋدىڭ دۋماندى ورلەۋى كوتەرىلدى“، - دەدى رۋان يە.
جاپون شاپقىنشىلارىنا قارسى سوعىس تۋرالى درامالاردى قاۋىرت ساحناعا شىعارىپ، بۇقارانىڭ ويانۋىن جەبەدى
تاريحقا قايىرىلا قاراساق، دراما سىندى كوركەمونەر فورماسىن شينجياڭعا جاپون شاپقىنشىلارىنا قارسى سوعىس كەزىندە جۇڭگو كوممۋنيستەرى مەن العاباسار قايراتكەرلەر اكەلگەنىن بىلەمىز. ول وسى زامانعى ءومىردى شىنايى بەينەلەيدى، جاپون شاپقىنشىلارىنا قارسى تۇرۋدى ۇگىتتەۋدىڭ، وتانشىلدىق تاربيە جۇرگىزۋدىڭ جاقسى ءتاسىلى.
”1938 - جىلى يان - اننان كەلگەن جولداستار «قامشىڭدى تاستا»، «ساقتىق دابىلى»، «اتسىز قاھارمان»، «18 - قىركۇيەككە قاندى ازا ءبىلدىرۋ» سياقتى درامالاردى ورىندادى، توڭكەرىستىك بازالاردا داعدىلى جايتكە اينالعان بۇل ويىندار بۇرىن توڭكەرىستىك ادەبيەت - كوركەمونەردىڭ نە ەكەنىن بىلمەيتىن شينجياڭ كورەرمەندەرىنىڭ ايرىقشا ىقىلاسىن اۋدارىپ، ءار ۇلت بۇقاراسىنىڭ ۇناتۋىنا بولەندى“، - دەدى ماي يۇيحۋا.
وسىدان سوڭ شينجياڭ شۋەيۋانىنان ولكەلىك 1 - ورتا مەكتەپكە، ولكەلىك قىزدار ورتا مەكتەبىنە دەيىن، ونان يمپەرياليزمگە قارسى بىرلەستىككە جانە ونىڭ قاراستىلىعىنداعى ءار ۇلتتىڭ مادەنيەتىن جەبەۋ ۇيىمدارىنا دەيىن دراما دايىنداۋ جانە قويۋ جۇمىستارى ورىستەتىلدى.
”لين جيلۋ شينجياڭ شۋەيۋانىنىڭ وقىتۋ ىستەرى باستىعى بولعان سوڭ، ونىڭ تىكەلەي ساحنالاۋ جانە رەجيسسەرلىك ىستەۋىمەن شىققان «ۇندەۋ» دەگەن درامانىڭ شينجياڭ شۋەيۋانىنداعى قويىلىمى زور ءدۇمپۋ قوزعاپ قانا قويماي، كوشەلەرگە شىعارىلىپ، قوعامعا تەرەڭ بويلاپ، ديحۋاداعى ءارقايسى مەكتەپتەردىڭ، مەكەمە - ورىنداردىڭ كاسىپتەن سىرتقى تەاتر قيمىلدارىنا تۇرتكى بولىپ، جاڭا تەاتر ءتۇرىن ويناۋ ءبىر مەزەت سالتقا اينالدى“، -دەدى رۋان يە.
ۋاقىت قاس - قاققانشا وتە شىعىپ، دۇنيە وراسان زور وزگەردى. سول جىلداردا لين جيلۋ شينجياڭ شۋەيۋانىندا وقۋشىلاردىڭ جاپون شاپقىنشىلارىنا قارسى سوعىس تۋرالى دراما دايىنداۋىنا تىكەلەي جەتەكشىلىك ەتىپ، جاپون شاپقىنشىلارىنا قارسى تۇرىپ، وتاندى قۇتقارۋ يدەياسىن ۇگىتتەسە، بۇگىنگى تاڭدا پارتيانىڭ نۇر شۇعىلاسىنا شومعان شينجياڭ داشۋەسىنىڭ وقۋشىلارى «جاستىقتىڭ وتى جالىنداعان ءبىزدىڭ شاق» دراماسىن ساحنادا ويناپ، توڭكەرىسشىل ارداگەرلەردى ساعىنا ەسكە الۋمەن بىرگە، جاڭا ءداۋىر جاستارىنىڭ جالىندى سۇيىسپەنشىلىگىن تاريحقا توعىستىرۋدا.
1938 - جىلى 10 - ايدا شينجياڭنىڭ 3 - رەتكى حالىق ۋاكىلدەرى جينالىسى اشىلعان كەزدە، يمپەرياليزمگە قارسى بىرلەستىكتىڭ ۇيىمداستىرۋىمەن شينجياڭ شۋەيۋانى «اجال اۋزىنان تىرشىلىككە تالپىنۋدى»، قىزدار ورتا مەكتەبى «جارالى پارتيزاندى» ، ولكەلىك 1 - ورتا مەكتەپ «قۇربان بەرۋدى»، قازاق مادەنيەتىن جەبەۋ ۇيىمى «قارا كوزىمدى» ساحناعا شىعارىپ، جينالىسقا قاتىسقان ۋاكىلدەردىڭ ايرىقشا قارسى الۋى مەن جاقسى باعاسىن الدى، سونداي - اق ۋاكىلدەر ارقىلى توڭكەرىستىك ادەبيەت - كوركەمونەردىڭ ۇشقىنىن بۇكىل شينجياڭعا تاراتتى.
1939 - جىلى 8 - ايدا ايگىلى كوركەمونەرشى جاۋ دان قاتارلى 9 ادام ديحۋاعا كەلگەن سوڭ شينجياڭنىڭ دراما قيمىلى شارىقتاۋ شىڭىنا شىقتى. جاۋ دان تىكەلەي رەجيسسەرلىك ەتكەن دراما «شايقاس» بۇكىل ديحۋا قالاسىن ءدۇر سىلكىندىردى. بۇل دراما 10 نەشە كۇن قويىلعاندا ءار جولى الاڭ ادامعا لىق تولدى. تۇڭعىش قويىلىمنان ءبىر كۇن ىلگەرى، «شينجياڭ گازەتى» «شايقاس» قويىلىمىن تانىستىرۋ - باعالاۋ تۋرالى ارنايى سان شىعارۋمەن بىرگە، باسماقالا دا جاريالادى. باسماقالادا «جاۋ دان قاتارلىلاردىڭ شينجياڭعا كەلۋى، دراما قيمىلى كوميتەتىنىڭ قۇرىلۋى شينجياڭ دراماسىنىڭ جاڭا كەزەڭگە وتۋىنە مۇمكىندىك جاساپ، شينجياڭنىڭ جالپى مادەنيەتىنىڭ دامۋىنا اسا ۇلكەن دەمەۋشى كۇش بەرەدى“، - دەلىندى.
سونىمەن بىرگە ءارقايسى از ۇلتتاردىڭ مادەنيەت جەبەۋ ۇيىمدارى دا ىركەس - تىركەس ويىن - ساۋىق اترەتتەرىن نەمەسە تەاتر ۇيىرمەلەرىن، ءان - ءبي ۇيىرمەلەرىن قۇردى. دراما، تەاتر، ۇلتتىق ءان - بيلەر ءبىرىنىڭ كوركىن ءبىرى اسىرىپ، شينجياڭنىڭ ادەبيەت - كوركەمونەر ساحناسىندا بۇرىن بولماعان جاڭا جاعداي اشتى.
”جۇڭگو كوممۋنيستەرىنىڭ باسشىلىعىندا جۇرگىزىلگەن جاڭا مادەنيەت قوزعالىسى بولعاندىقتان عانا، سول كەزدەگى شينجياڭ ’تەرەزەنى اشىپ، دۇنيەگە نازار سالۋعا‘ مۇمكىندىك الدى، شينجياڭداعى ءار ۇلت حالقىنىڭ يدەياسى مەن مادەنيەتىندە جاڭا ويانۋ بولدى، شينجياڭنىڭ جاپون شاپقىنشىلارىنا قارسى تۇرۋ، وتاندى جويىلۋدان قۇتقارۋ قوزعالىسىنىڭ زور تاسقىنى قالىپتاستى، شينجياڭنىڭ مادەنيەتى، وقۋ - اعارتۋى سياقتى ءتۇرلى ىستەرى جاڭا دامۋشىلىققا قول جەتكىزدى“، - دەدى ماي يۇيحۋا.
