تيانشان تورى
تيانشان تورى   ›   جاڭالىقتار   ›   ساياحات

كورىنىس كوركەم، ادامدار قاربالاس، كۇندەر كوڭىلدى

ماكىت اۋدانىنىڭ 1 - مامىر ورمان الاڭىندا:

كورىنىس كوركەم، ادامدار قاربالاس، كۇندەر كوڭىلدى

انار بۇلت / شينجياڭ گازەتىنىڭ ءتىلشىسى لي شيڭ

  ”قۇمدى ءشولدىڭ جيەگىنەن مىناداي ءبىر كوركەم شابدالى ورمانىن كورۋ ەرەكشە جايلى دا سۇلۋ دۇنيەگە كەلگەندەي سەزىندىرەدى ەكەن“، - دەدى ءبىر فوتوگراف تەبىرەنىسپەن. 4 - ايدىڭ 22 - كۇنى كوكتەمگى كۇننىڭ جايدارى شۋاعىندا، ماكىت اۋدانى 1 - مامىر ورمان الاڭى ”شابدالى گۇلى باقشاسى“ كورىنىس اۋماعىندا كوكتەم لەبى ەستى، شاندۇڭنان ماكىت اۋدانىنا ارنايى كەلگەن 10 فوتوگراف ءارى - ءسارى بولماستان فوتو اپپارات تيەگىن سىرت - سىرت باسىپ، كورىنىس اۋماعىنداعى كوركەم كورىنىستەردى تىنباي فوتوعا ءتۇسىردى.

  قىستاق كەلبەتى، قىستاق بەت - بەينەسى ءبىرشاما ناشار، جان باسىندىق كىرىسى جوعارى بولماعان شاعىن قىستاقتان ءبىر سەكىرىپ - اق ەكولوگياسى كوركەم، تۇرمىسى باردام اۆتونوميالى رايون دارەجەلى ”اۋىل - قىستاق ساياحاتىنان ءتۇيىندى تۇردە ۇلگى كورسەتەتىن قىستاققا“ اينالعان 1 - مامىر ورمان الاڭى ماكىت اۋدانىنىڭ مادەنيەت، ساياحات مەرەكەسىندەگى ۇلگى كورسەتۋ رولىنان پايدالانىپ، اۋىل شارۋاشىلىعى مەن ساياحاتتى توعىستىرا دامىتۋ ارقىلى ساياحات ارقىلى اۋىل شارۋاشىلىعىن جەبەۋ، كىرىستى ارتتىرىپ، بايۋ سىندى جاڭا جولدى قاراستىرىپ، بۇكىل قىستاقتاعىلار گۇلدەي قۇلپىرعان كورىنىس ىشىندە دوڭگەلەك داۋلەتتىلىككە بىرگە اتتاندى.

سەيىل - سەرۋەن قىزۋ ورلەۋگە كوتەرىلدى

  4 - اي كەلىسىمەن ”شابدالى گۇلى باقشاسى“ كورىنىس اۋماعىنداعى شابدالى گۇلدەرى جاپا - تارماعاي اشىلىپ، جارىسا قۇلپىرىپ، حوش ءيىسى شار تاراپقا تارالدى. 5 - ايدىڭ 10 - كۇنى ”دولانعا سۇيىسپەنشىلىك. كورىكتى شابدالى گۇلى“ ماكىت اۋداندىق مادەنيەت، ساياحات مەرەكەسى 1 - مامىر ورمان الاڭىندا اشىلىپ، توڭىرەكتىڭ ءتورت بۇرىشىنداعى ساياحاتشىلار بىرىنەن سوڭ ءبىرى كەلىپ، كوركەم كورىنىستى كورىپ، كونسەرت تاماشالاپ، ءدامدى تاعامنان اۋىز ءتيىپ، كوركەم كورىنىستى سۋرەتكە ءتۇسىردى ... مەرەكەنىڭ شاتتىعىنا بارىنشا شومدى.

  ”مەرەكە باستالعان كۇنى 40 − 50 مىڭ ادام كەلدى، اتاعى اسپاندادى!“، - دەدى 1 - مامىر ورمان الاڭىنىڭ باستىعى سۋ يڭچاۋ سول كەزدەگى سالتاناتتى جاعدايدى ەسكە العانىندا ەرەكشە تەبىرەنىسپەن.

  ماكىت اۋدانىنىڭ جىلىنا ءبىر كەلەتىن مادەنيەت، ساياحات مەرەكەسى 1 - مامىر ورمان الاڭىندا ءۇرتىس 7 كەزەك وتكىزىلدى، 1 - مامىر ورمان الاڭى كۇش سالا تۇلعالاعان ساياحات، سەرۋەن، جەمىس - كوكونىس ءۇزۋ، دەمالۋ ءبىر تۇلعالاندىرىلعان ”شابدالى گۇلى باقشاسى“ كورىنىس اۋماعىنىڭ اتاعى كۇن سايىن ارتا ءتۇستى. ءۇش كۇندىك مادەنيەت، ساياحات مەرەكەسى حاتكەرلىك اۋىس - كۇيىسى، تەاتر ويىندارى، شابدالى گۇلى پەريزاتى T تۇعىر شوۋى، بايىرعى ولەڭ - جىرلاردى وقۋ، كوكتەمگى ساياحاتتا دەنە شىنىقتىرىپ ۇزاققا جۇگىرۋ جارىسى سياقتى كوپتەگەن نەگىزگى تاقىرىپتىق قيمىلداردى قامتيدى، تاعى وزگەشە لاعىمان، بۇرىشپەن قۋىرىلعان قوي سيراعى، جىڭعىل كاۋاپ، دولان قاقتالعان بالىعى سياقتى وزگەشە ءدامدى تاعامدار قىرۋار ساياحاتشىلار مەن فوتوگراف اۋەسكەرلەرىن باۋرادى.

  ”ماكىت اۋدانىنا كەلىپ، كوركەم كورىنىستى كورىپ، ءدامدى تاعامداردان اۋىز ءتيىپ قانا قالماستان، تاعى ايرىقشا وزگەشەلىككە يە مۇقام اندەرىن تاماشالادىم. بۇل ارا قۇمدى ءشولدىڭ جيەگىندە بولعانىمەن، وزگەشە تارتىمدىلىعى بار ەكەن!“، - دەدى ساياحاتشى جاڭ باۋجيان تىلشىگە قۋانىشپەن.

ساياحاتتى دامىتىپ، بايي ءتۇستى

  اۋا رايىنىڭ بىرتىندەپ جىلىنۋىمەن، شابدالى ورمانى اراسىنا باقباق، جوڭىشقا ءوسىپ شىقتى، وسى جابايى كوكونىستەر تاماقتانۋشىلاردىڭ تاپتىرماس ماۋسىمدىق كوكونىسى سانالادى. 4 - ايدىڭ 23 - كۇنى تۇستەن كەيىن 1 - مامىر ورمان الاڭى ”شابدالى گۇلى باقشاسى“ شارۋالار شاتتىعى ساياجايىندا جۇمىس ىستەيتىن ورمان الاڭى تۇرعىنى پاشاگۇل روشەن مەن زورىگۇل امەت اۋلادا جابايى كوكونىس ءۇزىپ ءجۇر. پاشاگۇل مەن زورىگۇلدىڭ ۇيلەرى جاقىن ماڭدا، جۇمىسقا بارىپ - كەلۋى ەرەكشە قولايلى، اي سايىن 2000 − 2500 يۋان ەڭبەكاقى الادى. شارۋالار شاتتىعى ساياجايىندا جۇمىس ىستەۋدى ايتقاندا، زورىگۇل ەرەكشە كوڭىلدەندى: ”بۇرىن ۇيدە ءۇي شارۋاسىن ىستەپ، بالا باعۋمەن عانا بولۋشى ەدىك، ەشقانداي كىرىس جوق بولاتىن. قازىر ۇيىمىزگە قارايلاسىپ قانا قالماستان، تاعى ءبىرتالاي كىرىس كىرگىزەمىز!“.

  ورمان الاڭىنىڭ تۇرعىنى مامەتتۇرسىن روزىنىڭ ۇيىندە 12 مۋلىق جەمىس باقشاسى بار ەدى، جەمىس اعاشىنىڭ ءونىم مولشەرى جوعارى بولماعاندىقتان، ءبىر جىلدىق تۇسىمىمەن ءبىر ۇيدەگى ءتورت جان ءۇپى - تاپى تۇرمىس كەشەتىن. قىستاق ساياحاتتى دامىتقاننان كەيىن، قىستاق كادرلارىنىڭ كومەگىندە، مامەتتۇرسىن ءوز ءۇيىنىڭ 3 بولمەسىن حالىقتىق تۇسەلحاناعا وزگەرتتى، ويلاماعان جەردەن ءبىر جىلدا 20 مىڭ يۋاننان استام اقشا تاپتى.

  ”ورمان الاڭىمىز بارعان سايىن كورىكتەندى، كەلەتىن ساياحاتشىلار دا بارعان سايىن كوبەيدى، وتباسىمىزدىڭ تۇسەلحانا ساۋداسى، ءسوزسىز، بارعان سايىن جاقسارادى!“، - دەدى مامەتتۇرسىن روزى بۇدان كەيىنگى تۇرمىسىنا تولىق سەنىم ارتىپ.

ساياحاتتىڭ زور ىستەرىن ويداعىداي ىستەدى

  1 - مامىر ورمان الاڭىنىڭ ساياحاتتى دامىتۋ باسىمدىعى ءسوز بولعاندا، ورمان الاڭى پارتكومىنىڭ شۋجيى لي شياڭجۇن بەس ساۋساعىنداي بىلەتىندىگىن ايتتى: 1 - مامىر ورمان الاڭىنىڭ جاعراپيالىق ورنى تاماشا، قاتىناسى قولايلى، اۋدان قالاشىعىنا دەيىن نەبارى 4 كيلومەتر عانا، ءاسىلى بار 100 مۋدان استام جەردەگى شابدالى باقشاسى مەن الما باعى − ماكىت اۋدانى قالاشىعىنىڭ ماڭىنداعى بىردەن - ءبىر اۋىل - قىستاق ساياحاتى جانە سەرۋەندەپ كوكونىس ءۇزۋ باقشاسى، اۋىل - قىستاق ساياحاتىن دامىتۋدا ايرىقشا باسىمدىعى بار. 2019 - جىلى 1 - مامىر ورمان الاڭى پارتكومى كورىكتى اۋىل - قىستاق قۇرىلىسىن تۇتقا ەتىپ، ”ساياحاتتىق كورىنىس اۋماعىن قۇرىپ، ءبىر جەردىڭ بۇقاراسىن باقىتقا كەنەلتۋ“ سىندى جالپى تۇلعالىق جوبا بويىنشا، تۇرعىنداردىڭ كىرىسىن ارتتىرۋ مەن كورىكتى اۋىل - قىستاق قۇرىلىسىن ءوزارا ۇشتاستىرۋعا تاباندى بولىپ، 5 ميلليون يۋان قارجى قوسىپ، ”شابدالى گۇلى باقشاسى“ كورىنىس اۋماعىن دەن قويا تۇلعالادى.

  ”1 - مامىر ورمان الاڭى بارعان سايىن كورىكتەندى، شىعا قالساق اسفالت جول بار. جولدىڭ ەكى جاعىندا اعاش رەشەتكا مەن كوگال، تاعى شابدالى ورمانى ورمان الاڭىن سۋرەتتەگىدەي كوركەم كورىنىسكە اينالدىردى“. ورمان الاڭىنىڭ سوڭعى بىرنەشە جىلداعى وزگەرىسىن تىلگە تيەك ەتكەندە، وسى ارادا ەرجەتكەن نۇر مامەت مۇسا قۋانىشتى كوڭىل كۇيىن جاسىرا المادى.

  ”ەندىگى جەردە، ’N39دا كوڭىل اشىپ، شابدالى گۇلى باقشاسىندا تاماقتانۋدى‘ الىس جاقىنعا تانىستىرامىز“. لي شياڭجۇننىڭ ايتۋىنشا، N39 ماكىت اۋدانىنداعى وزگەشەلىككە باي قۇمدى ءشول ەكسپەدەتسيالىق ساياحات كورىنىس اۋماعى، ەكەۋىن تۇتاستىرۋ ارقىلى ”شابدالى گۇلى باقشاسى“ كورىنىس اۋماعى مەن ماكىت اۋدانىنىڭ باسقا ساياحات كورىنىس تۇيىندەرىن تەڭ قادامدا دامىتىپ، 1 - مامىر ورمان الاڭى اۋىل - قىستاق ساياحاتى كاسىپ سالاسىن ساپالىلاندىرىپ، الۋەتتەندىرىپ، كەيىن تاعى قاشقار ايماعىنداعى ءتۇرلى سارا ساياحات جەلىسىمەن تۇتاستىرادى ەكەن. لي شياڭجۇن 1 - مامىر ورمان الاڭىنىڭ دامۋىنا تولىق سەنىم ارتىپ وتىر.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.