□ انار بۇلت / شينجياڭ گازەتىنىڭ ءتىلشىسى ءپاريزات ابدۇل
”بىلەگى ۇزىلگەن بالانىڭ قايتا جالعانعان وڭ بىلەگىنىڭ ىسىگى قايتتى“، ”بىلەگى ۇزىلگەن بالا ەكى ىستىك كاۋاپ جەدى“، ”بىلەگى ۇزىلگەن بالا جەرگە ءتۇسىپ ءجۇردى“... بىرنەشە كۇننەن بەرى حوتان ايماعىنداعى بىلەگى ءۇزىلىپ قايتا جالعانعان بالا جونىندەگى حابارعا اۋىلىنداعى حالىق قۇلاق ءتۇرىپ كەلەدى. ”ءومىردى بارىنەن جوعارى قويىپ، شەكسىز مەيىرىم كورسەتتى، ءبىز تالەيلى بالاقاي ءۇشىن ءاربىر ىزگى نيەتتى جاندارعا العىس ايتامىز“، - دەدى 5 - ايدىڭ 10 - كۇنى حوتان اۋدانى لايقا اۋىلدىق پارتكومنىڭ شۋجيى چي تايميڭ.
”قىستاعىمىزدا 7 جاستاعى ۇل بالا قولىن تراكتوردىڭ تاسپالى دوڭگەلەگىنە سۇعىپ الىپ، وڭ جاق بىلەگى ءبىراق ءۇزىلىپ كەتتى...“ دەگەندى 4 - ايدىڭ 30 - كۇنى قارسى جاق ايتىپ بولماستان چي تايميڭ جۇگىرە باسىپ دەرەۋ جەتەدى. ”بالانىڭ وسىنشاما جارالانعانىن كورىپ، ءىشى - باۋىرىم ەزىلىپ كەتتى“، - دەدى چي تايميڭ، ”بالانىڭ جارالانعاننان كەيىن ۇرىمجىگە جەتكىزىلىپ وپەراتسيا جاسالاتىندىعىن ەستىگەنىمىزدە ىشتەي قاتتى الاڭداپ، ءتۇنى بويى كوز ىلمەدىك. 5 - ايدىڭ 1 - كۇنى ساعات 6 مولشەرىندە بىلەگى ۇزىلگەن بالانىڭ بىلەگى جالعاندى دەگەن حاباردى ەستىپ، الاڭداعان كوڭىلىمىز سوندا عانا ورنىنا ءتۇستى“.
”كوپ ادام بىلەگى ۇزىلگەن بالانى تانىماسا دا، بالاعا ءۇي - ىشىندەگىلەردەي مەيىرىم كورسەتتى، بۇل ناعىز ەتەنە باۋىرمالدىق، ۇلت شەكاراسىن اتتاعان ومىردەگى ۇلى سۇيىسپەنشىلىك. ءبىز تالەيلى بالاقاي ءۇشىن ءاربىر ىزگى نيەتتى جاندارعا العىس ايتامىز“، - دەدى چي تايميڭ.
”50 يۋان، 100 يۋان... بالا شىرعالاڭعا ۇشىراعان كۇننىڭ ەرتەسىندە قىستاق تۇرعىندارىنىڭ مەيىر جەتكىزۋ اياق الىسى ۇزىلمەدى. قازىرگە دەيىن قىستاق تۇرعىندار كوميتەتى ۋاكىل بولىپ تابىس ەتكەن مەيىر جەتكىزۋ جىلۋ سوماسى 77 مىڭ يۋانعا جەتتى“، - دەدى قىستاق پارتيا ياچەيكاسىنىڭ شۋجيى باي چۋچۋ.
باي چۋچۋ بىلاي دەدى: ”ءبىز بىلەگى ۇزىلگەن بالانىڭ وتباسىنداعىلارمەن كۇندە تەلەفوندا حابارلاسىپ تۇرمىز، بالانىڭ دەنساۋلىعىنىڭ ءساتتى قالپىنا كەلىپ، دەنساۋلىق كورسەتكىشتەرىنىڭ ورنىقتى ەكەنىن ەستىگەنىمىزدە ءسال تىنىستاپ قالدىق. كەلەسى قادامدا قىستاق تۇرعىندار كوميتەتى بالانىڭ جاراقاتى جازىلعانشا بالانىڭ وتباسى جاعدايىنا جانە بالانىڭ سالاماتتىعىنا ۇزدىكسىز كوڭىل بولەدى“.
بىلەگى ۇزىلگەن بالانىڭ ساۋىعا باستاعانىن كورگەندە بىلەگى ۇزىلگەن بالانىڭ ناۋقاس جاعدايىنا باستان - اياق كوڭىل ءبولىپ كەلە جاتقان حوتان ايماقتىق حالىق شيپاحاناسى سۇيەك اۋرۋلارى 2 - ءبولىمى ەمدەۋ - كۇتىمدەۋ قىزمەتكەرلەرىنىڭ دە كوڭىلدەرى ەرەكشە جايلاندى. ”بىلەگى ۇزىلگەن بالانىڭ وپەراتسياسى ءساتتى جاسالعانىن ەستي سالا اسەرلەنگەندىگىمىزدەن الاقايلاپ جىبەردىك“، - دەي كەلىپ حوتان ايماقتىق حالىق شيپاحاناسى سۇيەك اۋرۋلارى 2 - ءبولىمىنىڭ تەتە اعا شيپاگەرى مامەتيمىن ماتتۇردى بىلاي دەدى: ”شينجياڭدا ءار ۇلت اعا - باۋىر، اپەكە - سىڭلىلەر ەجەلدەن ءبىر ءۇيلى جانداي، ىنتىماقتى، تاتۋ ءوتىپ كەلەدى، مەيلى قايسى ۇلتتىڭ ناۋقاسى بولسىن، ناۋقاس جاعدايى مەيلى قالاي بولسا دا، ءبىز جان اشىرىمىزداي مامىلە جاسايمىز، بۇل دا ءبىز ەمدەۋ - كۇتىمدەۋ قىزمەتكەرلەرىنىڭ ’ءومىردى قاستەرلەۋ، اجالعا اراشاشى، جارالىعا مەدەت بولۋ، ۇلەس قوسۋعا پەيىل بولۋ، شەكسىز مەيىرىم كورسەتۋ‘ سىندى كاسىپتىك رۋحىمىزدى ايگىلەيدى. ءار ۇلت اناردىڭ دانىندەي تىعىز ۇيىسساق، قيىندىقتاردى، ءسوزسىز، جەڭىپ، العان بەتتەن قايتپايمىز“.
”بەينە ەكراننان بىلەگى ۇزىلگەن بالانىڭ وپەراتسيادان كەيىنگى تۇڭعىش رەتكى قادامىن باتىلدىقپەن باسقاندىعىن كورگەنىمىزدە كوزىمىزگە جاس الدىق“، - دەدى بىلەگى ۇزىلگەن بالانىڭ كورشىسى حانسايف يدايات بۋلىعا، - ”بالانىڭ وپەراتسياسى ءساتتى بولىپ، جاعدايى كۇن سايىن جاقسارۋدا، مۇنى بالاعا كومەك كورسەتكەن ءاربىر ىزگى نيەتتى جانداردان بولە قاراۋعا بولمايدى. مەن دە شينجياڭدا جاساپ جاتقانىمدى ماقتانىش جانە داڭق سەزىنەمىن، پارتيا مەن ۇكىمەتكە شىنايى العىس ايتامىن، كوپشىلىكتىڭ قامقورلىعى مەن مەيىرىمىنە العىس ايتامىن“.
