تيانشان تورى   ›   جاڭالىقتار   ›   ساياحات

ءان - ءبي مەكەنى شينجياڭ شەكسىز باۋراۋ قۋاتىن ايگىلەدى

ءان - ءبي مەكەنى شينجياڭ شەكسىز باۋراۋ قۋاتىن ايگىلەدى

− ساياحاتتىڭ جوعارى ساپالى دامۋىن ىلگەرىلەتۋگە نازار ②

انار بۇلت / شينجياڭ گازەتىنىڭ ءتىلشىسى ۋاڭ جيڭجيڭ

  5 - ايدىڭ 16 - كۇنى ارتيستەر شينجياڭ حالىقارالىق ۇلكەن بازارى كورىنىس اۋماعىندا ساياحاتشىلارعا دولان ءبيىن بيلەپ كورسەتۋدە. سۋرەتتى جاڭ شيۋكى تۇسىرگەن

  5 - ايدىڭ 14 - كۇنى ساعات 23 مولشەرىندە ءۇرىمجى اۋدانى جىبەك جولى قار شاڭعى الاڭىنىڭ شىعىس جاعىنداعى اڭعاردا مۋزيكا ءۇنى شارىقتاپ، شىراقتار جارقىراپ، ساراي مەن قارلى تاۋ ۇندەسىپ، 600 نەشە ارتيست تۇگەلدەي ساحناعا شىقتى، بۇل 2021 - جىلعى «كۇنلۇندەگى ۋادە» كونسەرت مەزگىلى الدىنداعى ەڭ سوڭعى جاتتىعۋى ەدى. 5 - ايدىڭ 16 - كۇنىنەن باستاپ «كۇنلۇندەگى ۋادە» 5 ايعا تاياۋ كونسەرت مەزگىلىن قارسى الادى.

  بيىل شينجياڭنىڭ ساياحات بازارى كۇشتى تەبىنمەن قالپىنا كەلدى، شينجياڭنىڭ ءارقايسى كورىنىس وڭىرلەرى دە وتكەن جىلدارداعىدان جارتى اي بۇرىن كونسەرت مەزگىلىنە كىردى. مەيلى كولەمدى ناقتى كورىنىستىك تەاتر، تاڭداۋلى ساحنالىق تەاتر بولسىن، الدە شەڭبەر جانكۇيەرلەرى سان - ساناقسىز كورىنىستىك ءوڭىر مۋزيكا اترەتىنىڭ كونسەرتى بولسىن، بارلىعى شينجياڭنىڭ ايرىقشا مادەنيەتتىك باۋراۋ قۋاتىن ايگىلەيدى.

  ساياحاتتىق ويىن نومىرلەرى تۇتىنۋ دارەجەسىنىڭ جوعارىلاۋىنا دەم بەردى

  «كۇنلۇندەگى ۋادە» «شانحايجيڭ»، «مۋتيانزى حيكاياسى» سياقتى كلاسسيكالىق كىتاپ جازبالارىن ءتۇپ نۇسقا ەتىپ، باتىس جوۋ ءداۋىرىن باياندايدى، جوۋ مۋۋاڭ اتا - باباسى حۋاڭدي مەن كۇنلۇن پەريزاتى شي ۋاڭمۋدىڭ ۋادەسىن ورىنداپ، ءيت ارقاسى قياننان باتىس وڭىرگە اتتانىپ، ميحىنات شەگىپ، سوڭىندا كۇنلۇندەگى ۋادەسىن جۇزەگە اسىرادى. ”«كۇنلۇندەگى ۋادە» كورۋ تۇيىسىگىنىڭ سالتاناتى عانا ەمەس، ونان دا ماڭىزدىسى، يان - حۋاڭ ۇرپاقتارىنىڭ ءبىر - بىرىنە قول ۇشىن بەرىپ، قول ۇستاسا ەكپىندەي ىلگەرىلەگەن ايبىندى جىر - داستانى“. كورەرمەن شۇي رىنگۋاڭ بىلاي دەدى: مەن بۇل تەاتردى 3 رەت كوردىم، جاڭا كونسەرت مەزگىلىندە مەن تاعى العاشقى قويىلىم بەلەتىن ساتىپ الدىم، تاعى 5 - ايدىڭ 16 - كۇنى كەشتە شۇيشيگوۋ قالاشىعى پيڭشيلياڭ قىستاعىنداعى حالىقتىق تۇسەلحاناسىنا تاپسىرىس بەردىم.

  ”وسى 2 كۇندە كوپتەگەن كونە قاريدارلار مەنىمەن حابارلاستى، ولار كونسەرتتى كورىپ بولعاننان كەيىن جاتاقتا جاتادى ەكەن. مەن تاۋ قويناۋى ءالى سالقىن، بىرنەشە كۇن وتكەن سوڭ كەلسەڭىزدەر دە بولادى دەگەن ەدىم، ولار تاعاتى تاۋسىلىپ وتىرعاندىعىن ايتتى“، - دەدى شۇيشيگوۋ قالاشىعى دۇڭلياڭ قىستاعى مالشىلار شاتتىعى ساياجايىنىڭ قوجايىنى رايىمبەك سەرىكقان، «كۇنلۇندەگى ۋادە» كونسەرت مەزگىلىنىڭ كەلۋىنە ىلەسە، مەيلى ءۇرىمجى اۋدانىنىڭ ماڭىنداعى شارۋالار شاتتىعى ساياجايى، مالشىلار شاتتىعى ساياجايى، الدە قوناقجاي، حالىقتىق تۇسەلحانا بولسىن، كەشكى تاماق پەن جاتىن ورىنعا الدىن الا تاپسىرىس بەرگەن قوناقتار مولايا ءتۇستى.

  تاياۋ جىلداردان بەرى رايونىمىز مادەنيەت پەن ساياحاتتى توعىستىرۋ اياق الىسىن بەلسەنە ىلگەرىلەتىپ، ساياحاتتىق ويىن نومىرلەرىن كورىنىس ءوڭىرىنىڭ دەڭگەيىن كوتەرىپ، دارەجەسىن ءوسىرۋدىڭ ماڭىزدى تۇتقاسى ەتتى. بۇگىنگى كۇندەرى بايىرعى كرورانمەن ۋاقىت - كەڭىستىك اتتاعان تىلدەسۋدى ويلاساڭىز، قۇمتاع قۇمى كورىنىس وڭىرىنە بارىپ «ءتۇن. كروران» ناقتى كورىنىستىك تەاترىن تاماشالاۋىڭىزعا بولادى؛ قاناس كولىندەگى قۇبىجىقپەن ءبىر رەتكى كوڭىل ۋاعداسىن ويلاساڭىز، بۋىرشىنعا بارىپ «قاناس سالتاناتىن» كورۋىڭىزگە بولادى؛ تىڭ يگەرگەن، شەكارا قورعاعان قورعاۋشىلاردى ءتۇسىنۋدى ويلاساڭىز، شىحىزىعا بارىپ «الاۋلاعان جىلداردى» كورۋىڭىزگە بولادى... قالىپتى قويىلاتىن وسى ساياحاتتىق ويىن نومىرلەرى مادەنيەت - ساياحات تۇتىنۋىنىڭ دارەجەسىن ءوسىرۋدى پارمەندى جەبەدى.

  باۋزاڭ مۋزيكا اترەتى شينجياڭدى بارىنشا ايگىلەيدى

  شينجياڭدا ناقتى كورىنىستىك تەاتردى، ساحنالىق تەاتردى كورۋدەن سىرت، باسقالاردىڭ ساياحات ەستەلىگىندەگى، ءسوزسىز، باراتىن شينجياڭ كورىنىستىك ءوڭىرىنىڭ ىشىندەگى باۋزاڭ مۋزيكا اترەتى ”90 - جىلداردىڭ تۇلەگى“، ”2000 - جىلداردىڭ تۇلەگى“ ساياحاتشىلارىنىڭ شينجياڭدى ساياحاتتاۋىنداعى اۋقىمىنا بىرتىندەپ اينالدى.

  ”ءىرى تيپتى ناقتى كورىنىستىك تەاتر كورۋ بەينە مول تاعام جەگەندەي، كورىنىستىك ءوڭىر مۋزيكا اترەتىنىڭ كونسەرتىن تىڭداعاندا بەينە كوفە ءىشىپ وتىرعانداي بولاسىز“. شاڭحايلىق ساياحاتشى سى مىرزا بىلاي دەدى: نارات مۋزيكا اترەتىنىڭ «داحى» ءانىن تىڭداعاننان كەيىن، ۇشاق بەلەتىن وزگەرتىپ، نارات كورىنىس وڭىرىندەگى ءبىر كۇندىك ساپارىمدى 3 كۇنگە ۇزارتتىم. ”بۇل اندە قاريانىڭ جاستاردى كوڭىلى دارياداي كەڭ بولۋعا تاربيەلەۋى باياندالعان، سى مىرزانى ءان ريتىمى مەن ءبىزدىڭ ەرەكشە ورىنداۋ ءتاسىلىمىز باۋراپ، كورىنىس وڭىرىندە 3 كۇن مۇقيات تىڭدادى“. ءتىپتى دە كوپ جاس ساياحاتشىلار اتىن ەستىپ، مۋزيكا اترەتىنىڭ ناق مايدان كونسەرتىن تىڭداۋ ءۇشىن كەلۋدە، - دەدى نارات مۋزيكا اترەتىنىڭ باستىعى ۋان حايتاۋ.

  قۇرىلعان 3 جىلدان بەرى نارات مۋزيكا اترەتىنىڭ مۇشەلەرى باستان - اياق 10 ادام اينالاسىندا بولىپ كەلدى، ولار جەرگىلىكتى ۇلتتىق ەرەكشەلىككە يە مۋزيكا مەن وسى زامانعى مۋزيكا اسپاپتارىن توعىستىرىپ، نارات كورىنىس وڭىرىندە نەشە 100 رەت كونسەرت وتكىزدى ءارى 10 نەشە ءتول جاسامپازدىق ءانىن جازدى، كوپتەگەن جان كۇيەرلەرى بار. ”بيىل مۋزيكا اترەتى تاعى بۇكىل ەلدى ارالاپ كونسەرت قويىپ، ءبىزدىڭ كورىكتى شينجياڭدى ۇگىتتەيدى“، - دەدى ۋان حايتاۋ.

  بىلتىر قىستا بۇكىل ەلدە كەڭ تارالعان «كوكتوعايداعى شوپان» مەن «ناراتتاعى ومارتاشى قىز» نارات كورىنىس وڭىرىنە ءان اكەلگەن ساياحاتشىلار مولشەرىن شىنايى سەزىندىردى. ورايدى قالت جىبەرمەگەن كورىنىس ءوڭىرى ”1 - مامىر“ كەزىندە نارات مۋزيكا اترەتىن قوسالقى ارتيست ەتىپ، ەل ىشىندەگى كوپتەگەن مۋزيكانتتاردى ۇسىنىس ەتىپ، نارات ساحاراسى مۋزيكا مەرەكەسى جانە قىر ءلالاسى مۋزيكا مەرەكەسىن وتكىزىپ، 5 كۇندە 270 مىڭ ادام - رەت ساياحاتشى باۋرادى.

  ساياحات بلوگ ەسسەلەرىندە، تانىمال تۇلعالاردىڭ ساياحات ەستەلىكتەرىندە كوپ اۋىزعا الىناتىن شينجياڭ باۋزاڭ مۋزيكا اترەتتەرى تاعى وتە كوپ: قاناس كورىنىس وڭىرىندەگى حاندىگا مۋزيكا اترەتى، ماتي مۋزيكا اترەتى، حانتا مۋزيكا اترەتى، قۇلجا قالاسى ليۋشيڭجيە كورىنىس وڭىرىندەگى ليۋشيڭجيە ۇلتتار ىنتىماعى اككوردەون مۋزيكا اترەتى... وسى مۋزيكا اترەتتەرى مۋزيكا مەن جەرگىلىكتى ەرەكشە مادەنيەتتى، بەيزاتتىق مادەنيەت مۇرا ەلەمەنتتەرىن ۇشتاستىرىپ، ساياحاتشىلاردىڭ تىڭ تىنىس بايقاتقان وزگەشە شينجياڭدى سەزىنۋىنە مۇمكىندىك جاسادى، بۇل دا مادەنيەت پەن ساياحاتتىڭ تەرەڭ توعىسۋىنىڭ ساياحاتشىلارعا الا كەلگەن تاڭدانىسى بولىپ تابىلادى.

  سيفرلى ساعىم تەاترى تانىمدى جاڭالادى

  ”بيىل «تۇرپان سالتاناتى» جانە «قاناس سالتاناتىنان» سىرت، ءبىز تاعى ەكى سيفرلى ساعىم ساياحاتتىق ويىن ءنومىرى تەاترى «شاتتىققا شومعان ۇلكەن بازار» جانە «ناراتتى كۇزەتۋدى» جاسادىق، سول كەزدە ساياحاتشىلارعا شىت جاڭا سەزىنۋ اسەرىن الا كەلەدى“، - دەدى تۇرپان حۋانلى شىڭديان ساياحات، مادەنيەت شەكتى سەرىكتەستىگىنىڭ باسالقاسى لين جۇڭ - ي.

  «شاتتىققا شومعان ۇلكەن بازار» شينجياڭ حالىقارالىق ۇلكەن بازارىنىڭ بەلگى سيپاتتى قۇرىلىسى − كورىنىس مۇناراسىن ارتقى كورىنىس ەتىپ، كوركەمونەرشىلەر داۋاز بەن سەرىك ويىنىن كورسەتكەندە دىبىس، جارىق، ەلەكتر ارقىلى كوز جاۋىن الدى، بۇل ساۋلەلى سەرىك ويىنى تەاترى ادامداردىڭ شينجياڭنىڭ ساياحاتتىق ويىن ءنومىرى جونىندەگى تانىمىن جاڭالادى. نارات كورىنىس وڭىرىندە قويىلعان «ناراتتى كۇزەتۋ» تەاترحانادا ورىنداۋ مەن سىرتقى كورىنىستىك كەشكى ساياحاتتاۋدى ۇشتاستىرىپ، 8 سيفرلى كيىز ءۇي ورنالاستىردى، ساياحاتشىلار جيەيوۋ حانىشانىڭ ءومىرىن سەزىنە الادى، سونداي - اق سيفرلى تەحنيكامەن اڭگىمە جەلىسىنىڭ دامۋ بەتالىسىن ۇيعارا الادى.

  ”جاڭا تەحنيكا مەن ساياحاتتىق كونسەرت ويىنىنىڭ توعىسۋى كورەرمەندەردىڭ ارەكەتىنە تەرەڭ ىقپال جاساپ، تاماشالاۋ مەن كونسەرت قويۋ قاتىناسىنىڭ وزگەرىسىن الا كەلىپ، ساياحاتتىق كونسەرت ويىنىنىڭ ساحنالىق كوركەمونەرىنە شەكسىز مۇمكىندىك ازىرلەپ، وسى ارقىلى شينجياڭنىڭ ساياحاتتىق ويىن ءنومىرى ىستەرىنىڭ دامۋىن اناعۇرلىم ىلگەرىلەتەدى“، - دەدى اۆتونوميالى رايوندىق مادەنيەت جانە ساياحات مەڭگەرمەسىنىڭ قاتىستى قىزمەتكەرى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.