جۇڭگونىڭ باتىس بولىگى، اسىرەسە، شينجياڭ مەنىڭ ويلاعانىمنان الدەقايدا دامىعان ەكەن

يتاليانىڭ ەكونوميكانى دامىتۋ مينيسترلىگىنىڭ بۇرىنعى ورىنباسار مينيسترى ميكەلە گەراسي:

جۇڭگونىڭ باتىس بولىگى، اسىرەسە، شينجياڭ مەنىڭ ويلاعانىمنان الدەقايدا دامىعان ەكەن

　　انار بۇلت / شينجياڭ گازەتىنىڭ ءتىلشىسى ۋاڭ يۇيجاۋ 5 - ايدىڭ 16 - كۇنى ۇرىمجىدەن حابارلايدى. ”مەن جۇڭگودا 12 جىل تۇرمىس كەشىردىم، ءساتى ءتۇسىپ شينجياڭعا كەلگەنىمە قاتتى قۋانىشتىمىن، 4 كۇندە كوپتەگەن جەرلەردى ارالاپ، كوپ اداممەن تانىسىپ، وتە جاقسى اسەر الدىم“، - دەدى جۋىقتا شينجياڭعا ەكسكۋرسيالاي كەلگەن يتاليانىڭ ەكونوميكانى دامىتۋ مينيسترلىگىنىڭ بۇرىنعى ورىنباسار مينيسترى ميكەلە گەراسي تىلشىگە سۇحبات بەرگەندە.

　　ميكەلە گەراسي شينجياڭنىڭ دامۋ قارقىنىنىڭ تەزدىگىنە تاڭداندى. ”مەن تاڭەرتەڭ جوعارى جىلدامدىقتى پويەزبەن شي - اننان شىعىپ، كەشتە ۇرىمجىگە جەتتىم. جايشىلىقتا ءبىز گۋاڭجوۋ، شاڭحاي، حاڭجوۋ سياقتى قالالار ءبىرشاما دامىعان دەپ ويلايمىز، ءبىراق وسى جولعى ەكسكۋرسيادا جۇڭگونىڭ باتىس بولىگىنىڭ، اسىرەسە، شينجياڭنىڭ مەنىڭ ويلاعانىمنان الدەقايدا دامىپ كەتكەنىن سەزىندىم“، - دەدى ميكەلە گەراسي.

　　شينجياڭنىڭ ساياحات بايلىق قاينارىن ءسوز ەتكەندە ميكەلە گەراسي بىلاي دەدى: ”شينجياڭدا كورىكتى ساحارا، وزەن - داريا، قارلى تاۋ بار، ەگەر ماعان شينجياڭنىڭ ساياحاتىن ۇگىتتە دەسە، وندا مەن، ءسوز جوق، ’ورتاسى كوركەم، وتە حاۋىپسىز‘، - دەر ەدىم“.

　　ميكەلە گەراسي شينجياڭدا ماقتا اتىزىن جانە اۋىل شارۋاشىلىق ماشينالارى كاسىپورىندارىن ارالاپ، ماقتا ەگۋ، مانەرلەۋدىڭ ماشينالانۋ دەڭگەيىنەن تەرەڭ اسەر الدى. ”جۇڭگو شينجياڭىنىڭ سولتۇستىگىندە ماقتا ەگۋ مەن ماقتا تەرۋدىڭ ماشينالانۋ ورەسى وتە جوعارى ەكەن، 1000 مۋدان استام ماقتا اتىزىن 2 ادام عانا باعىپ - باپتاپ، تۇقىم سەبۋ جانە جيۋ كەزىندە 2 اي عانا قىزمەت ىستەيدى ەكەن. كەيبىر شارۋالار جەردىڭ پايدالانۋ ۇقىعىن وتكەرمەلەپ بەرىپ، ءار مۋىنان 800 − 1000 يۋانعا دەيىن كىرىس كىرگىزىپ وتىر ەكەن“. ميكەلە گەراسي: ماشينالاندىرۋ شارۋالاردىڭ 1 - كاسىپتەن 2 - كاسىپكە قاراي ويىسۋىنا، ودان 3 - كاسىپكە قاراي بەتتەۋىنە مۇمكىندىك جاسادى. بۇل ءبىر تاماشا ۇلگى ەكەن، - دەدى.

　　”شينجياڭ جاقسى جەر، كومەسكى كۇشى زور“. ميكەلە گەراسي پۋتۇڭحۋانى اسا جاتىق سويلەپ قانا قويماستان، جۇڭگو ەكونوميكاسىنادا وتە قانىق ەكەن. ول بۇدان بىلاي وراي بولسا شينجياڭنىڭ مامان - وقىمىستىلارىمەن ەكونوميكالىق قۇرىلىس، ساياحات كاسىبىن دامىتۋ، ”14 - بەسجىلدىق“ جوبا سىندى جاقتاردا ىشكەرىلەي اۋىس - ءتۇيىس جاساۋدى ءۇمىت ەتەدى ەكەن. ”مەن ۇزاق ۋاقىتتان بەرى جاسىل ەكونوميكالىق دامۋعا نازار اۋدارىپ كەلەمىن، شينجياڭدا جەل ەلەكترى سىندى قايتا تۋىندايتىن بايلىق قاينارى كاسىپ سالاسىن ەكسكۋرسيالادىم. شينجياڭدا كومىر، مۇناي بايلىق قاينارى مول بولعانىمەن، جاسىل ەكونوميكانى دا بەلسەنە دامىتىپ كەلەدى ەكەن. ەۆروپا ەلدەرى دە قازىندى بايلىق قاينارىنا يەك سۇيەۋدەن جاسىل ەنەرگيانى اشۋعا قاراي ويىسۋى قاجەت“، - دەدى ميكەلە گەراسي.

　　ميكەلە گەراسي سونىمەن قاتار بىلاي دەپ قارادى: ”ءبىر بەلدەۋ، ءبىر جول“ باستاماسى جۇڭگونىڭ شينجياڭى مەن يتاليا سىندى ەۆروپا ەلدەرىن تىعىز بايلانىستىرادى. شينجياڭنىڭ جىبەك جولى ەكونوميكالىق بەلدەۋى وزەكتى رايونىن قۇرۋى ەكى جاقتى ساۋدا جانە ادامدار بارىس - كەلىسىن، سونداي - اق بۇقارانىڭ سۇيىسپەنشىلىك اۋىس - كۇيىسىن جەبەيدى.