انار بۇلت / شينجياڭ گازەتىنىڭ تىلشىلەرى جاۋ شييا، لۋ فىڭباۋ
5 - ايدىڭ 19 - كۇنى باركولدەن حابارلايدى. 5 - ايدىڭ 19 - كۇنى ”جوعارى جىلدامدىقتى تاس جولدى بويلاپ شينجياڭعا نازار سالۋدىڭ“ 3 - كەزەڭى بەيجيڭ - شينجياڭ جوعارى جىلدامدىقتى تاس جول ساپارى كورىكتى باركول قازاق اۆتونوميالى اۋدانىنا كەلدى. بۇل جەردە شينجياڭ گازەتى مەكەمەسى (شينجياڭ گازەتشىلىك تاراتۋ مەدياسى توبى) ورتاعا قويعان ”شينجياڭدى اۋەدەن سۋرەتكە ءتۇسىرۋ“ كولەمدى كەسكىن - بەينە حابارلاۋ قيمىلى رەسمي باستالدى. جەر - جەردەن كەلگەن 20دان استام ۇشقىش اپپارات ۇشىرۋشىلار باركول كولىنىڭ جاعاسىندا باس قوسىپ، جوعارى كەڭىستىكتىك تۇرعىدان شينجياڭنىڭ بايتاق دالاسىن كەسكىندەيدى.
”اۋەدەن سۋرەتكە ءتۇسىرۋدى، جۇمىر جەرگە بيىكتەن قاراعان سەزىمدى جاقسى كورەمىن، ءبىزدىڭ كورىكتى مەكەنىمىزدى كوپ ولشەمدى، تولىق كورىنىستىك تۇرعىدان اناعۇرلىم ويداعىداي تانىستىرۋدى ءۇمىت ەتەمىن“. باستالۋ سالتىنا قاتىسقان ۇشقىش اپپارات ۇشىرۋشى جوۋ شىڭگو ءوز قولىنداعى اپپارات كوزىمەن شينجياڭنىڭ گۋمانيتارلىق مادەنيەتىن، ەكولوگياسىن، جاراسىمدى كوركىن كورسەتەتىندىگىن ايتتى.
”شينجياڭدى اۋەدەن سۋرەتكە ءتۇسىرۋ“ كولەمدى كەسكىن - بەينە حابارلاۋ قيمىلىن ورىستەتۋدىڭ ماقساتى تيانشان الابىنداعى تاريحي زور وزگەرىستەردى اناعۇرلىم تىكە، جان - جاقتى ايگىلەپ، پارتيا قۇرىلعاندىعىنىڭ 100 جىلدىعىنا سي تارتۋ ەتۋ. الداعى 2 ايدا شينجياڭ گازەتى مەكەمەسى (شينجياڭ گازەتشىلىك تاراتۋ مەدياسى توبى) بۇكىل شينجياڭنىڭ جەر - جەرىندەگى ۇشقىش اپپارات ۇشىرۋشىلاردى جيناپ، كاسىبي تۇرعىدا اۋەدەن سۋرەتكە تۇسىرەتىن ۇشقىش اپپاراتتار مەن جەر بەتىندە جىلجىمالى ءتۇسىرۋدى بىرلەستىرۋ ءتاسىلىن قولدانىپ، نازاردى ءارقايسى ايماق، وبلىس، قالالاردىڭ ءار سالادا قول جەتكىزگەن تابىستارىنا، تۋىلعان وزگەرىستەرىنە شوعىرلاندىرىپ، شينجياڭنىڭ جاراتىلىستىق جاعراپيالىق - گۋمانيتارلىق كورىنىستەرىن كورسەتىپ، شينجياڭنىڭ ۇدەرە العا تارتقان قۋاتتى ومىرشەڭدىگىنە ماداق ايتىپ، جاڭا داۋىردەگى شينجياڭنىڭ بەينە - كەسكىن مۇراعاتتارىن تۇلعالايدى.
”شينجياڭدى اۋەدەن سۋرەتكە ءتۇسىرۋ“ كولەمدى بەينە - كەسكىن حابارلاۋ قيمىلى بارىسىندا انار بۇلت / شينجياڭ گازەتى ءارقايسى ايماق، وبلىس، قالالار مەن ءار سالا، ءار كاسىپتەگىلەرمەن بىرگە ارەكەتتەنىپ، ايماق - وبلىستاردى ارالاۋ، كاسىپ - سالالاردى ارالاۋ سياقتى ۇگىتتەۋ، تانىستىرۋ قيمىلدارىن ۇزدىكسىز ورىستەتىپ، اپپارات كوزىمەن شينجياڭنىڭ تارتىمدى ساتتەرىن كەسكىندەپ، شينجياڭنىڭ كوركىنە اۋەدەن ۇڭىلەدى.
كولەمدى حابارلاۋ قيمىلى اياقتاعان سوڭ، انار بۇلت / شينجياڭ گازەتى فوتوسۋرەت كورمەسى، ميكرو بەينەجازبا كورسەتىلىمى سياقتى تاسىلدەر ارقىلى جەر - جەردەگى ۇشقىش اپپارات ۇشىرۋشىلاردىڭ تاڭداۋلى تۋىندىلارىن كورسەتەدى.
سول كۇنگى باستالۋ سالتىن شينجياڭ گازەتى مەكەمەسى (شينجياڭ گازەتشىلىك تاراتۋ مەدياسى توبى) مەن باركول قازاق اۆتونوميالى اۋدانى بىرلەسىپ وتكىزدى. انار بۇلت / شينجياڭ گازەتى جالپىلىق اقپارات قۇرالدارى حابارلاۋ توبى ”شينجياڭدى اۋەدەن سۋرەتكە ءتۇسىرۋ“ قيمىلىنىڭ باستالۋ سالتىن تىكە تاراتتى.
باركول قازاق اۆتونوميالى اۋداندىق مادەنيەت، دەنە تاربيە، راديو - تەلەۆيزيا جانە ساياحات مەكەمەسىنىڭ باستىعى جياڭ شياۋلياڭ مىنالاردى ءبىلدىردى: سوڭعى جىلداردان بەرى باركولدىڭ دامۋى كۇن سايىن جاڭارىپ، اي سايىن وزگەرىپ، جىلىنا قابىلداعان ساياحاتشىلار 2 ميلليون ادامعا (رەت) جەتىپ، ءار ۇلت بۇقاراسىنىڭ تۇرمىس دەڭگەيى ۇزدىكسىز جوعارىلادى. كورىكتى دە جاراسىمدى، باقىتتى ءارى قونىسقا جايلى باركولدى قايتكەندە ءتىپتى ويداعىداي ۇگىتتەۋگە، كورسەتۋگە بولادى؟ ”شينجياڭدى اۋەدەن سۋرەتكە ءتۇسىرۋ“ بەينە - كەسكىن حابارلاۋ قيمىلى شىت جاڭا تۇرعى ۇسىندى. اناعۇرلىم كوپ ادامنىڭ اۋەدەن سۋرەتكە ءتۇسىرۋ ارقىلى باركولمەن تانىسۋىن، باركولگە قادام تاستاۋىن، باركولدى ءسۇيۋىن ءۇمىت ەتەمىن.
”شينجياڭدى اۋەدەن سۋرەتكە ءتۇسىرۋ“ قيمىلىن دانەكەر ەتىپ، شينجياڭ گازەتى مەكەمەسى (شينجياڭ گازەتشىلىك تاراتۋ مەدياسى توبى) تاعى ”ۇشىرۋشىلار وتاۋىن“ قۇرىپ، جەر - جەردەگى ۇشقىش اپپارات ۇشىرۋشىلاردىڭ كۇشىن ءبىر تۇتاس جوسپارلاپ، ءتۇرلى فورماداعى اۋەدەن سۋرەت ءتۇسىرۋ قيمىلدارىن ورىستەتىپ، اۋەدەن سۋرەتكە ءتۇسىرۋ تۋرالى پىكىرلەسۋ، ۇيرەنۋ، بىلىكتىلىگىن باۋلۋ تۇعىرىن ورناتىپ، ۇشىرۋشىلار قوسىنىن زورايتىپ، بۇكىل شينجياڭدا مۇشەلەرى تۇراقتى، تەحنيكادا ىسىلعان اۋدەن سۋرەت ءتۇسىرۋ توبىن قۇرۋعا نەگىز قالايدى.
