تيانشان تورى   ›   جاڭالىقتار   ›   شينجياڭ حابارلارى

جەڭىس ءانىن شىرقاپ شينجياڭعا شەرۋ تارتۋ

  انار بۇلت / شينجياڭ گازەتىنىڭ ءتىلشىسى لي ياڭ

  ءۇرىمجى قالالىق 2 - باستاۋىش مەكتەپتىڭ وقۋشىلارى جۇڭگو حالىق ازاتتىق ارمياسىنىڭ شينجياڭعا شەرۋ تارتۋ ەسكەرتكىشىنىڭ الدىندا وقىتۋشى ايتقان توڭكەرىستىك اڭگىمەنى تىڭداۋدا (4 - ايدىڭ 26 - كۇنى تۇسىرىلگەن). انار بۇلت / شينجياڭ گازەتىنىڭ ءتىلشىسى تاڭ يۇڭ تۇسىرگەن

  5 - ايدىڭ 1 - كۇنى ءۇرىمجى حالىق الاڭى جاپ - جاسىل اعاشتارمەن كومكەرىلىپ، قۇستار سايراۋدا. قارتتار اعاش كولەڭكەسىندە قورالانا وتىرىپ الىپ شاي ءىشىپ، اڭگىمە دۇكەن قۇرسا، جاستار كىتاپتارىن قۇشاقتاپ قۇنىعا وقۋدا. ءدال مەرەكە كۇنىنە تۋرا كەلگەندىكتەن، شينجياڭنىڭ ءىشى - سىرتىنان كوپتەگەن ساياحاتشىلار وسىندا تەك عانا الاڭداعى ”جۇڭگو حالىق ازاتتىق ارمياسىنىڭ شينجياڭعا شەرۋ تارتۋ ەسكەرتكىشىن“ ىززەت - قۇرمەتپەن كورۋگە كەلدى.

  ”شينجياڭنىڭ ازاتتىعى بولماسا، ءبىزدىڭ قازىرگى تاماشا تۇرمىسىمىز قايدان بولسىن. تاريحتى ەستە بەرىك ساقتاعاندا عانا، ءتىپتى دە ويداعىداي العا ىلگەرىلەي الامىز“، - دەدى ىلەلىك ساياحاتشى فاڭ ليڭ.

  ەسكەرتكىش حالىق الاڭىنىڭ وڭتۇستىك بۇيىرىنە ورنالاسقان، يەلەگەن جەر اۋدانى 900 شارشى مەتر، جالپى بيىكتىگى 32.6 مەتر. ەسكەرتكىشتىڭ سولتۇستىككە قاراعان بەتىنە ۋاڭ جىن جولداستىڭ: جۇڭگو حالىق ازاتتىق ارمياسىنىڭ شينجياڭعا شەرۋ تارتۋ ەسكەرتكىشى دەگەن ارناۋ ءسوزى ويىپ جازىلعان. ەسكەرتكىشتىڭ وڭتۇستىككە قاراعان بەتىنە ۋاڭ ىنماۋ جولداستىڭ: حالىق ازاتتىق ارمياسىنىڭ شينجياڭعا شەرۋ تارتۋى شينجياڭداعى ءار ۇلت حالقى ازاتتىعىنىڭ جاڭا تاريحي كەزەڭىن اشتى دەگەن ارناۋ ءسوزى ويىپ جازىلعان.

  جول بويى اۋمالى - توكپەلى كۇندەردى ارتقا تاستاپ، جەڭىس جىرىن اسقاقتاتا شىرقادى. ۋاقىت تاريحتى جاسىرا المايدى، وسىناۋ اسقاق بوي سوزىپ تۇرعان ەسكەرتكىشكە ۇڭىلسەڭىز، شينجياڭدى ازات ەتۋدىڭ قيان - كەسكى كورىنىستەرى جاندى تۇردە، اپ - انىق بولىپ كوز الدىڭىزدان تىزىلە جارقىراپ ءوتىپ جاتادى...

  شينجياڭ بەيبىت ازات بولدى

  1949 - جىلى 9 - ايدىڭ 28 - كۇنگى «شينجياڭ گازەتىن» اشساڭىز، «شينجياڭنىڭ بەيبىت ازات بولعاندىعىن قۇتتىقتايمىز» اتتى باسماقالا مەن «تۇتاس شينجياڭ حالىق دەموكراتيالىق شەبىنە بەيىمدەلدى − شينجياڭدا تۇراتىن قولباسشىلار مەن اسكەرلەر اقيقاتقا قايتاتىندىقتارىن جاريالادى» دەگەن ماقالانىڭ باس بەتتىڭ كورنەكتى ورنىنا باسىلعاندىعىن كورەسىز.

  ازات بولۋ! بۇل تاريحتىڭ تاڭداۋى، حالىقتىڭ تاڭداۋى!

  1949 - جىلى 8 - ايدىڭ 31 - كۇنى ءبىرىنشى دالالىق سوعىس ارميامىز حىشيعا جورىق جاساۋدىڭ سوعىس بۇيرىعىن جاريالادى: 1 - بيڭتۋان چيڭحايدىڭ شينيڭىنان قول باستاپ سولتۇستىككە اتتانىپ، چيليانشان تاۋىنان اسىپ جاڭيەگە شابۋىل جاسادى؛ 2 - بيڭتۋان لانجوۋ - شينجياڭ تاس جولىن بويلاپ جانە ونىڭ وڭ قاناتىمەن تارتىپ وتىرىپ باتىسقا ىلگەرىلەدى؛ 6 - ارميا وڭ باعىتپەن ۋشاۋليڭدى، تەڭگىر ءشولىنىڭ جيەگىندەگى داجيڭدى اينالىپ ءوتىپ باتىسقا ىلگەرىلەدى؛ 3 -، 4 - ارمياعا قاراستى دالالىق سوعىس ارمياسىنىڭ زەڭبىرەكشى اسكەرلەر تۋانى، سوعىس ماشينالارى يىڭى سول باعىتپەن ۋۋي، جيۋچۋانعا توتە تارتتى. 9 - ايدىڭ 21 - كۇنى ەكى بيڭتۋان جاڭيەدە كەزدەستى. 100 مىڭ قولدى ايبىندى قوسىن جيۋچۋان، انشي ءبىرىنشى شەبىنە جينالىپ، شينجياڭ قاقپاسىن قاقتى.

  اسكەري ايبىننىڭ جانە جۇڭگو كوممۋنيستىك پارتياسىنىڭ بەيبىت ساياساتىنىڭ اسەرىندە تاۋ جىيۋە، بۇرحان قاتارلىلار 9 - ايدىڭ 25 - كۇنى، 26 - كۇنى جەكە - جەكە اقيقاتقا قايتۋ تەلەگرامماسىن جولداپ: گومينداڭ گۋاڭجوۋ ۇكىمەتىمەن بايلانىسىمىزدى ءبىر جولاتا ءۇزىپ، جۇڭگو حالىق ساياسي ءماسليحات كەڭەسىنىڭ باسشىلىعىنا بويسۇنىپ، ءتوراعا ماۋ زىدۇڭ ورتاعا قويعان بەيبىتشىلىك شارتىن قابىلداپ، جەرگىلىكتى ورىننىڭ ءتارتىبىن ساقتاپ، بۇيرىق كۇتەمىز دەپ سالتاناتپەن جاريالادى. شينجياڭ بەيبىت ازات بولعاندىعىن جاريالادى!

  شينجياڭنىڭ ارميا - ۇكىمەت بيلەۋشىلەرىنىڭ اقيقاتقا قايتۋ تەلەگرامماسىن جاريالاعان حابارى تارالىسىمەن، شينجياڭنىڭ بارلىق جەرى شاتتىققا شومىپ، ”ءار ۇلت حالىق بۇقاراسىنىڭ قۋانىشقا بولەنۋى ولكە تاريحىندا بولىپ كورمەگەن دارەجەگە جەتتى“.

  9 - ايدىڭ 28 - كۇنى ماۋ زىدۇڭ، جۋ دى تاۋ جىيۋە، بۇرحاندارعا تەلەگرامما قايتارىپ: ”ءبىز سىزدەردىڭ تۇرعىلارىڭىزدى دۇرىس دەپ تانيمىز“، ”مۇنداي پوزيتسيا بۇكىل مەملەكەتتەگى حالىقتىڭ تىلەگىنە ۇيلەسەدى، ءبىز توتەنشە سۇيىندىك. سىزدەردىڭ ارميا - ۇكىمەت ادامدارىن ىنتىماقتاستىرىپ، ۇلتتار ىنتىماعىن جانە جەرگىلىكتى ورىننىڭ ءتارتىبىن ساقتاۋلارىڭىزدى، سونداي - اق قازىر يۇيمىنگۋاننان شىعۋعا دايىندالىپ جاتقان حالىق ازاتتىق ارمياسىمەن سەلبەسىپ، كونە ءتۇزىمدى كۇشىنەن قالدىرىپ، جاڭا ءتۇزىمدى اتقارىپ، جاڭا شينجياڭ قۇرۋ ءۇشىن كۇرەس جۇرگىزۋلەرىڭىزدى ءۇمىت ەتەمىز“، - دەدى.

  اسقاق ايبىندى ۇلى شەرۋ

  بيىل 89 جاسقا كەلگەن يۋان گوشياڭ جياڭجۇن 1949 - جىلى جۇڭگو حالىق ازاتتىق ارمياسىنىڭ باتىسقا جورىق جاساعان ۇلكەن قوسىنىنا قاتىناسىپ، 2 - ارميانىڭ ساياسي بولىمىندە فوتوگراف قىزمەتىمەن شۇعىلدانعان، ايگىلى قىزىل فوتوشى. ”مىناۋ 1949 - جىلى 10 - ايدىڭ 12 - كۇنى جيۋچۋان داشياۋ الاڭىندا قوسىننىڭ اۆتوكولىككە شىعىپ، ساقاداي ساي دايىندىقپەن اتتانۋ بۇيرىعىن كۇتىپ تۇرعان ءساتى“، - دەپ يۋان گوشياڭ تىلشىگە ءوزى تۇسىرگەن سۋرەتتى كورسەتتى.

  10 - ايدىڭ 12 - كۇنى حالىق ازاتتىق ارمياسى 2 - جۇن 4 - شىسى مەن سوعىس ماشينالارى 5 - تۋانى ساۋىتتى اۆتوموبيل يىڭى شينجياڭعا كىرەتىن الدىڭعى قوسىن رەتىندە، گانسۋدىڭ يۇيمىنىنان اتتانىپ، اۆتوموبيلمەن باتىسقا شەرۋ تارتتى. كەلەسى كۇنى 2 - جۇن قولباسشىلىق شتابى، 5 - شى گانسۋدىڭ جيۋچۋانىنان شىعىپ شينجياڭعا شەرۋ تارتتى. 2 - جۇننىڭ، 6 - جۇننىڭ اتتى اسكەرلەر اترەتى دە دەرەۋ جيۋچۋاننان باتىسقا بەت الدى. ىلە - شالا، سوۆەت وداعى كومەككە جىبەرگەن تاسىمال ۇشاقتارى جيۋچۋانعا جەتىپ، شينجياڭعا كىرەتىن قوسىندى تاسۋعا كومەكتەستى. نەشە 10 مىڭداعان قول، جەر قايىسقان الىپ قوسىن قۇددى بۋىرقانعان تاسقىن سەكىلدى باتىسقا قاراي جوڭكىلىپ، شينجياڭعا قاراي اسقاق ايبىنمەن ارىنداي شەرۋ تارتتى.

  ساقا جاۋىنگەر جاڭ ميڭرۋ ەستەلىگىندە سول جىلدارداعى جورىق بەينەسىن بىلاي بەينەلەپتى: ”ول قانداي ايبىندى تاريحي عاجايىپ كورىنىس دەسەڭىزشى! − اسپاندا ۇشاقتار (سوۆەت وداعى كومەككە جىبەرگەن) قۇلاق تۇندىرا گۇرىلدەپ، جەردە اۆتوموبيلدەر دۇرىلدەي جۇيتكيدى، سايگۇلىكتەر وسقىرىنا ومىراۋلايدى، قىزىل تۋلار اسقاق جەلبىرەيدى...“.

  قوسىندى تاسىمالدايتىن اۆتوموبيل جەتىسپەگەندىكتەن، ونىڭ ۇستىنە كوبى توزىعى جەتكەن كونە بولعاندىقتان، جۇرگەن ۋاقىت ۇزارعان سايىن، ىسكە جارايتىنى ازايا بەردى. ارتقى قوسىندى تاسىمالداپ، شينجياڭعا كىرىپ قورعانىس مىندەتىن قابىلداۋدى جەدەل اياقتاتۋ ءۇشىن، 2 - جۇن قوسىنى يانچيگە جەتكەننەن كەيىن، اقسۋ، قاشقارعا قاراي جاياۋ شەرۋ تارتتى.

  كۇن سۋىق، كيىم جۇقا بولعانىمەن، حالىق ازاتتىق ارمياسى قيىنشىلىقتان قورىقپاي ۇدەرە العا ىلگەرىلەدى. يۋان گوشياڭ تىلشىگە ءبىر رەڭسىز سۋرەتتى كورسەتتى: ۇستىلەرىنە ماقتالى اسكەري كيىم، اياقتارىنا شۇپەرەك شاقاي كيىپ، بالتىرلارىن شاندىپ بايلاپ، ازىق دورباسىن ارقالاپ العان ءبىر توپ ايەل جاۋىنگەر جورىق جولىمەن ءجۇرىپ كەلەدى، ولاردىڭ جانارى الدىڭعى جاققا تىگىلۋلى، اجارلارىنان قاجىماس قايسارلىق مەن مۇندالايدى. ولار ءدال 2 - جۇننىڭ تاربيەشىلەر تۋانىنداعى ايەل جاۋىنگەرلەر ەكەن.

  ايەل اسكەر ياڭ جيالي ولاردىڭ اراسىنداعى بىرەۋى. دەرەكتى فيلم «مەنىڭ اكە - شەشەم: تارىم ويپاتىنداعى ارال جونىندەگى ەستەلىكتەردە» ول سول كەزدەگى كورىنىستى بىلاي سۋرەتتەيدى: كۇنىنە 50 كيلومەتر جول جۇرەتىن شۇعىل جورىقتان كۇنىنە 70 كيلومەتر جول جۇرەتىن كۇشتى جورىققا دەيىن بارلىق ادامنىڭ تابانى ويىلىپ قالدى. كۇنى بويى جول ءجۇرىپ كەلگەندە الدىندا ويىلىپ قالعان تابانىڭ جازىلماي جاتىپ تاعى دا جاڭا جاراقات قوسىلىپ، قولدىراپ كەتەدى.

  2 - جۇن وڭتۇستىك شينجياڭعا شەرۋ تارتۋمەن بىرگە، 6 - جۇن دە بىرنەشە توپقا ءبولىنىپ ىلگەرىندى - كەيىندى اۋە تاسىمالىمەن، اۆتوموبيل تاسىمالىمەن سولتۇستىك شينجياڭنىڭ، شىعىس شينجياڭنىڭ جەر - جەرىنە جەتكىزىلدى. 11 - ايدىڭ 5 - كۇنى 6 - جۇننىڭ شولعىنشىلار يىڭى ۇشاقپەن ديحۋاعا (قازىرگى ءۇرىمجى) جەتتى. 11 - ايدىڭ 6 - كۇنى 1 - بيڭتۋاننىڭ قولباسشىلىق شتابى، 6 - جۇن 17 - شىسىنىڭ 50 - تۋانى، شىعا توتە قاراستى ورگاندار مەن ارمياعا توتە قاراستى ورگاندار ديحۋاعا جەتكىزىلدى. 11 - ايدىڭ 7 - كۇنى ۋاڭ جىن قاتارلىلار ديحۋاعا ۇشىپ كەلدى. 11 - ايدىڭ 8 - كۇنى ديحۋاداعى ارميا مەن ۇكىمەت جانە قوعامنىڭ ءار سالاسىنداعىلار سالتاناتتى قارسى الۋ جينالىسىن وتكىزدى. ۋاڭ جىن ءسوز سويلەپ، جۇڭگو كوممۋنيستىك پارتياسى ورتالىق كوميتەتى شينجياڭ بولىمشە بيۋروسى قۇرىلعاندىعىن جاريالادى. وسىدان باستاپ، شينجياڭنىڭ ءتۇرلى قىزمەتتەرى جۇڭگو كوممۋنيستىك پارتياسى شينجياڭ بولىمشە بيۋروسىنىڭ ءبىر تۇتاس ورنالاستىرۋى مەن باسشىلىعىندا جاپپاي ورىستەتىلدى.

  يۋان گوشياڭ تۇسىرگەن تاعى ءبىر توپ سۋرەتتە: ءار ۇلت بۇقاراسىنىڭ ازاتتىق ارميانى شاتتانا قارسى الىپ، ىقىلاسپەن اس الىپ الدارىنان شىققان، ءان ايتىپ، بيگە باسقان كورىنىسى ايشىقتالا كوزگە تۇسەدى. يۋان گوشياڭ ەسىنە الىپ: ”1949 - جىلى 12 - ايدىڭ 1 - كۇنى قاشقار ازات بولدى، قوسىن ءبىر قىستاقتان وتكەن كەزدە اۋىلداستاردىڭ قىزۋ قارسى الۋىنا بولەندى. اقساقالدى اتالار جاڭعاق، جيدە سياقتىلاردى اۆتوموبيلدىڭ ۇستىنە قاراي شاشسا، اق سامايلى اپالار جۇمىرتقالاردى اسكەرلەردىڭ قالتاسىنا سالىپ جاتىر، جاستار بيگە باسىپ، بالالار ءان شىرقايدى، جول بويى بارابان ءۇنى جاڭعىرىپ، مۋزيكا ءۇنى تولاستامادى. سول كورىنىستى قازىر ويلاسام تەبىرەنىپ كەتەمىن!“، - دەدى.

  كورىكتى شينجياڭدى بىرگە قۇردى

  ”ول قىستىگۇنى عوي، كۇن قاتتى سۋىق بولاتىن، ءبىراق ءبىزدىڭ جۇرەكتەرىمىز جالىنداپ تۇردى. كوپشىلىك تۇگەلدەي كوك ءتۇستى، ماقتالى وقۋشىلار كيىمىن كيىپ، ونىڭ سىرتىنان وزدەرى ەڭ جاقسى كورەتىن سىرت كيىمدەرىن كيىپ العان، اسقاق ۇنمەن ’ماۋجۋشي جاساسىن!‘، ’كوممۋنيستىك پارتيا جاساسىن!‘ دەپ ۇرانداپ، پارات مىنبەسىنىڭ الدىنان رەت بويىنشا ءجۇرىپ وتتىك“. اۆتونوميالى رايوندىق اۋىل شارۋاشىلىعى مەڭگەرمەسىنىڭ بۇرىنعى ورىنباسار باستىعى، 91 جاستاعى شان شاڭجىنىڭ ساناسىندا سول ءبىر كورىنىستەر كۇنى بۇگىن ۇمىتىلماي كەلەدى.

  1949 - جىلى 12 - ايدىڭ 17 - كۇنى شينجياڭ ولكەلىك حالىق ۇكىمەتى، شينجياڭ اسكەري رايونى قۇرىلعاندىعى جاريالاندى. ىلە - شالا، ديحۋادا اسكەري پارات وتكىزىلدى. سول كەزدە ورتا مەكتەپتە وقىپ جاتقان شان شاڭجى بۇقارالىق شەرۋگە قاتىناسقان بولاتىن.

  ۋاقىتتى سول ءبىر قىس كۇنىنە قايتارالىق.

  1949 - جىلى 11 - ايدىڭ 27 - كۇنى پىڭ دىحۋاي جانە جاڭ جىجۇڭ قاتارلىلار جيۋچۋاننان ۇشىپ ديحۋاعا كەلدى. ىلە - شالا، ءار ۇلتتىڭ، ءار جىكتىڭ، شينجياڭدا تۇرعان ءارقايسى ارميانىڭ ۋاكىلدەرى، سونداي - اق ديحۋاداعى ءار سالاداعى دەموكرات قايراتكەرلەر ۋاكىلدەرى قاتىناسقان كەڭەس ءماجىلىسىن اشىپ، شينجياڭ ولكەلىك ۇكىمەتتى وزگەرتىپ قۇرۋ، اسكەري قوسىندى رەتتەۋ جانە قازىنا - ەكونوميكا قيىنشىلىعىن شەشۋ سياقتى ماسەلەلەردى اقىلداستى. 12 - ايدىڭ 17 - كۇنى ورتالىق حالىق ۇكىمەتىنىڭ بەكىتۋىمەن، بۇرحان ءتوراعا بولعان شينجياڭ ولكەلىك حالىق ۇكىمەتى قۇرىلعاندىعى رەسمي جاريالاندى. سول كۇنى پىڭ دىحۋاي سىليڭيۋان، قوسىمشا جىڭۋي بولعان، ۋاڭ جىن، تاۋ جىيۋە، سايپيدەن ازەز ورىنباسار سىليڭيۋان بولعان شينجياڭ اسكەري رايونىنىڭ دا قۇرىلعاندىعى جاريالاندى. سول كۇنى حالىق ازاتتىق ارمياسىنىڭ 1 - بيڭتۋان قوسىنى جەرگىلىكتى قوسىنمەن كەزدەسۋ سالتىن وتكىزدى، پىڭ دىحۋاي، جاڭ جىجۇڭ، ۋاڭ جىن قاتارلىلار پاراتتى كوردى.وسىدان باستاپ، شينجياڭداعى ءار ۇلت حالقى ساياسي جاقتان ەڭسە كوتەرىپ، ازات بولىپ، مەملەكەتتىڭ قوجايىنىنا اينالدى.

  شينجياڭ بەيبىت ازات بولۋ بارىسىندا شينجياڭعا شەرۋ تارتقان ارميا زاتتىق ماتەريالدار سالىستىرمالى كەمشىل، جول الىس، جەر - كوكتى اياز قۇرساپ تۇرعان شارت - جاعدايدا ءتۇرلى - ءتۇستى قيىنشىلىقتاردى، حاۋىپ - قاتەرلەردى، كەدەرگىلەردى جەڭىپ، ەرلىكپەن شايقاس جۇرگىزۋ، قۇربان بەرۋدەن قورىقپاۋ جانە ۇزدىكسىز شايقاس جۇرگىزۋ ستيلىن ساۋلەلەندىرىپ، قىزىل تۋدى تيانشان الابىنىڭ بارلىق جەرىنە قادادى.

  اۆتونوميالى رايوندىق پارتكوم پارتيا تاريحىن جانە حۇجات زەرتتەۋ ورنى زەرتتەۋ 1 - باسقارماسىنىڭ ورىنباسار باستىعى ۋي يۇڭلۇڭ بىلاي دەدى: شينجياڭنىڭ بەيبىت ازات بولۋ تاريحى بىزگە تەرەڭ وي سالدى: قامال الىپ قيىندىقتاردى جەڭۋ، باتىل شايقاس جۇرگىزۋ − بارلىق قيىنشىلىقتاردى، حاۋىپ - قاتەرلەردى، كەدەرگىلەردى جەڭۋدەگى يدەيالىق قارۋ ءارى جاڭا داۋىردەگى پارتيانىڭ شينجياڭدى جونگە سالۋ جالپى جوباسىن تولىق، دالمە - ءدال دايەكتىلەندىرۋدەگى، تياناقتاندىرۋداعى رۋحاني قانجار. ”ءداۋىر وزگەرگەنىمەن، وسىنداي رۋحتى جالعاستىرۋ جانە ساۋلەلەندىرۋ وزگەرمەيدى. شينجياڭنىڭ قوعام ورنىقتىلىعى مەن باياندى تىنىشتىعىن ىلگەرىلەتۋ، ءبىزدىڭ سەنىمدى بەكەمدەپ، اي - كۇنگە ءامىر شاشا الامىز جاڭارتۋعا كوك ءجۇزىن دەگەندەي ەرلىك جىگەرمەن ۇزدىكسىز العا باسۋىمىزدى قاجەت ەتەدى“.

  وسى ”1 - مامىر“ دەمالىسىندا قارۋلى ساقشى شينجياڭ باس اترەتى بەلگىلى تارماق اترەتىنىڭ وفيتسەر - جاۋىنگەرلەرى جۇپ قۇراپ تۋىستاسقان تۋىستارىنىڭ ۇيىنە بارىپ اڭگىمە دۇكەن قۇرىپ، سىر شەرتىستى. وسى تارماق اترەتتىڭ شىگۋانى تان ليجيە بىلاي دەدى: شينجياڭ بەيبىت ازات بولعان شىندىق حالىق بۇقاراسىمەن ەتەنە بايلانىستى جانە شىن ىقىلاستى ىنتىماقتى كۇشەيتۋدىڭ توڭكەرىس جەڭىسىنە قول جەتكىزۋدىڭ اسىلى ەكەندىگىن دالەلدەدى. ءبىز ارميا مەن حالىقتىڭ بالىق پەن سۋداي ەتەنە بايلانىسىن جالعاستىرىپ، ءار ۇلتتىڭ ۇلى ىنتىماعىن كۇشەيتىپ، كورىكتى شينجياڭدى بىرگە گۇلدەندىرىپ، وتان ارمانىن بىرگە ورىنداۋىمىز كەرەك.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.