□ انار بۇلت / شينجياڭ گازەتىنىڭ ءتىلشىسى لۋ فىڭباۋ، جاۋ شييا
5 - ايدىڭ 21 - كۇنى ينجەنەريا قىزمەتكەرلەرى G7 بەيجيڭ - شينجياڭ جوعارى جىلدامدىقتى تاس جولىنىڭ باركول شيالاۋبا بولىگىندەگى كوپىردە قوزعالىسسىز كۇيدەگى كوتەرىمدىلىك سىناعىن جاساۋدا. سۋرەتتى انار بۇلت / شينجياڭ گازەتىنىڭ ءتىلشىسى ساي زىڭلى تۇسىرگەن
5 - ايدىڭ 17 - كۇنىنەن 25 - كۇنىنە دەيىن ”جوعارى جىلدامدىقتى تاس جولدى بويلاپ شينجياڭعا نازار سالۋ“ انار بۇلت / شينجياڭ گازەتى جالپىلىق اقپارات قۇرالدارى حابارلاۋ توبى بەيجيڭ - شينجياڭ جوعارى جىلدامدىقتى تاس جولى (G7) شينجياڭ بولىگىنىڭ العاشقى بەكەتىنەن جولعا شىعىپ، اراتۇرىك، باركول، موري، شونجى، جەمسارىنى باسىپ، ۇرىمجىگە جەتتى. جول بويى حابارلاۋ توبى مۇشەلەرى جول قۇرىلىسىنىڭ اياق الىسى مەن جوعارى جىلدامدىقتى تاس جولدىڭ جەلى بويىنداعى وڭىرلەردىڭ دامۋىنا كورسەتكەن ماڭىزدى رولى جونىندە تىلشىلىك جاساپ، مىنانى شىنايى سەزىندى: ءبىر جوعارى جىلدامدىقتى تاس جول سالۋ جول بويىنداعى بۇقارانىڭ ءجۇرىس - تۇرىسىنا قولايلىلىق جاساپ قالماستان، ونان دا ماڭىزدىسى، جەرگىلىكتى ورىننىڭ دامۋىنا جاڭا وراي جانە ءۇمىت اكەلگەن.
قولايلى جول
5 - ايدىڭ 20 - كۇنى تۇستەن بۇرىن بەيجيڭ - شينجياڭ جوعارى جىلدامدىقتى تاس جولى ۋتۇڭداچۋان - موري بولىگى جولى بەتى ينجەنەرياسىنىڭ تولىعىمەن اياقتالۋى بەيجيڭ - شينجياڭ جوعارى جىلدامدىقتى تاس جولى شينجياڭ بولىگىنىڭ تولىعىمەن تۇتاستىرىلعاندىعىن اڭعارتىپ قالماستان، جالپى ۇزىندىعى مولشەرمەن 2768 كيلومەتر كەلەتىن بەيجيڭ - شينجياڭ جوعارى جىلدامدىقتى تاس جولىنىڭ تۇتاس جەلىسىنىڭ دە تۇتاستىرىلعاندىعىن اڭعارتادى.
”ۋتۇڭداچۋان - موري بولىگىندە 6 - ايدىڭ سوڭىندا اۆتوكولىك قاتىنايدى، سول كەزدە كەز كەلگەن جاعدايدا بىردەي بولعان شينجياڭعا كىرىپ - شىعاتىن ۇلكەن ارنا قالىپتاسىپ، جىبەك جولى ەكونوميكالىق بەلدەۋىنىڭ سولتۇستىك ارناسى جالپى بەتتىك سالىنىپ بولادى“، - دەدى جۇڭگو تەمىر جول قۇرىلىسى قارجى قوسۋ توبى شەكتى سەرىكتەستىگى بەيجيڭ - شينجياڭ جوعارى جىلدامدىقتى تاس جولى نىسانىنىڭ جاۋاپتىسى دا ۋىنبين.
شونجى اۋدانى حۇيتۇڭ تاسىمال شەكتى جاۋاپكەرشىلىك سەرىكتەستىگىنىڭ باس ديرەكتورى دۋان شييان بەيجيڭ - شينجياڭ جوعارى جىلدامدىقتى تاس جولىندا اۆتوكولىك قاتىناۋىن كۇن سايىن تاعاتى تاۋسىلا كۇتۋدە: ”اۆتوكولىك قاتىناعاننان كەيىن ءبىزدىڭ جۇك اۆتوكولىكتەرىمىز وسى جولمەن شينجياڭنان جىلدام شىعادى“. حۇيتۇڭ تاسىمال سەرىكتەستىگىندە 1000نان استام جۇك اۆتوكولىگى بار، تاسىمال بازارى شينجياڭ جانە ىشكى وڭىرلەردىڭ باستى قالالارىن قامتيدى، ءار جىلى شونجى اۋدانىنان قىرۋار تاس ماتەريالدارى، ۇن سياقتى زاتتاردى تاسىمالداپ شىعادى.
دۋان شييان ءبىر ەسەپ جاساپ كورسەتتى، شونجى اۋدانىنان تاس ماتەريالىن باسىپ شي - ان قالاسىنا جەتكىزۋدى مىسال ەتسەك، قازىر جۇك اۆتوكولىكتەرى شونجى اۋدانىنان شىعىپ، 200 نەشە كيلومەترلىك ولكە تاس جولىن باسىپ، قۇمىل قالاسىنىڭ يجوۋ رايونىنا كىرگەن سوڭ ليانيۇنگاڭ - قورعاس جوعارى جىلدامدىقتى تاس جولىنا (G30) شىعىپ، شي - انعا تارتادى، ءبىر بارعانداعى تاسىمال قاراجاتى 12 مىڭ يۋان بولادى. ال شونجى اۋدانىنان بەيجيڭ - شينجياڭ جوعارى جىلدامدىقتى تاس جولى ارقىلى ميڭشۇيدەن شينجياڭنان شىعىپ شي - انعا بارسا جول قىسقارادى، ءبىر بارعانداعى تاسىمال قاراجاتى 2000 يۋان تومەندەۋى مۇمكىن.
جۇك اۆتوكولىگى شوفەرى جاڭ لۇڭ دە بەيجيڭ - شينجياڭ جوعارى جىلدامدىقتى تاس جولىندا اۆتوكولىك قاتىناۋىن اڭسايدى. ونىڭ تانىستىرۋىنشا، قازىر شونجى اۋدانىنان يجوۋ رايونىنا زات جەتكىزۋدىڭ جالپى ارالىعى 460 كيلومەتر اينالاسىندا، ونىڭ ۇستىنە جوعارى جىلدامدىقتى تاس جول از، ولكە تاس جولى كوپ، جولدا جۇك اۆتوكولىكتەرى كوپ بولاتىندىقتان وڭاي كەپتەلىس تۋىلادى. ”ەڭ كوپ بولعاندا مەن جولدا ءبىر كۇن، ءبىر ءتۇن بوگەلدىم. بەيجيڭ - شينجياڭ جوعارى جىلدامدىقتى تاس جولىندا اۆتوكولىك قاتىناعاننان كەيىن مەن اۆتوكولىك كەپتەلىسىنەن الاڭدامايمىن“، - دەدى ول.
بايۋ جولى
5 - ايدىڭ 21 - كۇنى تۇستەن بۇرىن، كۇن اشىق، موري قازاق اۆتونوميالى اۋدانى يگەنبۇلاق اۋىلى يۋەلياڭدي قىستاعى ۋاڭشۋيۋان حالىقتىق تۇسەلحاناسىنىڭ جاۋاپتىسى ليۋ شۋچين ۇيلەردى تازالاپ بولعاننان كەيىن، قوناق قابىلداۋعا دايىندالدى.
يۋەلياڭدي قىستاعى 2018 - جىلى 3 - توپتاعى ”جۇڭگونىڭ ءداستۇرلى قىستاعى“ تىزىمىنە ەنگىزىلدى. سوڭعى جىلدارى قاتىناستىڭ ءجۇرىس - تۇرىستىڭ قولايلى بولۋىنا ىلەسە، بارعان سايىن كوپ ساياحاتشى وسى بايىرعى قىستاققا ات باسىن بۇرىپ، اۋىل مادەنيەتىنىڭ تارتىمدىلىعىن سەزىنەتىن بولدى.
بىلتىر ليۋ شۋچين ءوز اۋلاسىن حالىقتىق تۇسەلحانا ەتىپ وزگەرتىپ، بيىل 5 - ايدان باستاپ تيجاراتىن باستادى. ”بەيجيڭ - شينجياڭ جوعارى جىلدامدىقتى تاس جولى اشىلعاننان كەيىن، اناعۇرلىم كوپ ءوز اۆتوكولىگىمەن ساياحاتتايتىن ساياحاتشىلار جوعارى جىلدامدىقتى تاس جولمەن موريعا توتە كەلەدى، يۋەلياڭدي قىستاعىنا كەلەتىن ساياحاتشىلار دا بارعان سايىن كوبەيەدى، كىرىسىمىز، ءسوزسىز، كوبەيەدى“، - دەدى ول.
شونجى اۋدانى جەبەكۋ قالاشىعىنىڭ جاڭبا قىستاعى بەيجيڭ - شينجياڭ جوعارى جىلدامدىقتى تاس جولىنا 10 كيلومەترگە جەتپەيتىن جەردە، قاتىناسى قولايلى، ونىڭ ۇستىنە جانبۇلاق كورىنىس اۋماعىمەن ىرگەلەس. قازىر بۇكىل قىستاقتا 26 حالىقتىق تۇسەلحانا، 14 شارۋالار شاتتىعى ساياجايى بار.
2018 - جىلى جاڭبا قىستاعىنىڭ تۇرعىنى ۋاڭ شياۋجۇن حالىقتىق تۇسەلحانا اشىپ، ساياحاتتىڭ يگىلىگىن كوردى. بيىل ول ەرتە باستان اۋلاسىنا كوكونىس ەگىپ، قوناق قابىلداۋدىڭ دايىندىعىن جاسادى. ”جوعارى جىلدامدىقتى تاس جول بارعان سايىن قولايلى بولدى، ساياحاتشىلار، ءسوزسىز، كوبەيەدى، مەن بيىل جاقسىراق ىستەپ، كوبىرەك اقشا تابامىن“، - دەدى ول.
جەبەكۋ قالاشىعى پارتكومىنىڭ شۋجيى باي شىڭچۇننىڭ تانىستىرۋىنشا، جاڭبا قىستاعى بيىل تاعى ۇيشە اۆتوكولىك تۇراعى سياقتىلاردى سالىپ، ”جانبۇلاقتى ساياحاتتاۋ، جاڭبادا قاقتاما جەۋ، جاڭبا حالىقتىق تۇسەلحاناسىنا تۇنەۋ“ سىندى ساياحات سارا ماركاسىن تۇلعالاپ، بيىلعى جان باسىندىق تازا كىرىستى 30 مىڭ يۋاننان اسىرۋعا كۇش سالادى.
ءۇمىت جولى
”ءبىز بەيجيڭ - شينجياڭ جوعارى جىلدامدىقتى تاس جولىندا اۆتوكولىك قاتىناۋىن اڭساپ ءجۇرمىز، اۆتوكولىك قاتىناعاننان كەيىن باركولدا جوعارى جىلدامدىقتى تاس جول بولماۋ تاريحى اياقتالادى، جەرگىلىكتى بۇقارانىڭ ءجۇرىس - تۇرىسى قولايلى بولىپ قالماستان، ساياحات، زات اينالىمى سياقتى كاسىپ سالالارى دا اناعۇرلىم مول دامۋ ورايىن قارسى الادى“، - دەدى باركول قازاق اۆتونوميالى اۋاندىق قاتىناس - تاسىمال مەكەمەسىنىڭ باستىعى جەڭىسبەك توقشەكە.
ءبىر جوعارى جىلدامدىقتى تاس جول، قالىڭ ادام، قالىڭ اۆتوكولىك الا كەلىپ قانا قالماستان، تاعى ءۇمىت جانە بۇرىلىس تا اكەلەدى.
بەيجيڭ - شينجياڭ جوعارى جىلدامدىقتى تاس جولى اراتۇرك اۋدانىنىڭ باي اۋىلىن كەسىپ وتەدى، باي اۋىلى كەزىندەگى قاتىناستىڭ ”قالتارىسىنان“، لەزدە شينجياڭعا كىرىپ - شىعاتىن ۇلكەن ارنانىڭ الدىڭعى شەبىنە اينالدى.
”بەيجيڭ - شينجياڭ جوعارى جىلدامدىقتى تاس جولى بىزگە اناعۇرلىم كوپ دامۋ ورايى مەن ءۇمىتىن الا كەلدى“، - دەدى باي اۋىلدىق پارتكومنىڭ شۋجيى ليڭ يۇنجى.
ءىرى تيپتى زات اينالىمى كاسىپورنى باي اۋىلىنا قارجى قوسىپ، قامبا زات اينالىمىن دامىتۋدى جوسپارلادى، باي اۋىلى وسى ءۇشىن جوعارى جىلدامدىقتى تاس جول بويىنان 230 مۋ جەردى يەلەيتىن زات اينالىمى باقشا رايونىن سالۋدى جوسپارعا الىپ، اناعۇرلىم كوپ كاسىپورىنداردى كەلىپ ىرگە تەبۋگە باۋرادى.
بۇل باي اۋىلىنداعى ديقان دۋان شيياعا ساۋدا ورايىن اكەلدى، ول اۆتوكولىك جوندەۋ دۇكەنىن اشۋدى جوسپارلاپ وتىر ەكەن: ”جوعارى جىلدامدىقتى تاس جولدا اۆتوكولىك قاتىناي سالا، ارى - بەرى وتكەن اۆتوكولىكتەر كوبەيەدى، مەنىڭ ساۋدام، ءسوزسىز، جاقسى بولادى“.
دامۋ ورايى كوبەيدى، باي اۋىلىنىڭ ەگىنشى - مالشىلارىنىڭ كوزقاراسىندا بىرتە - بىرتە وزگەرىستەر تۋىلدى. نەشە ونداعان جىل جەر سالعان ءراشيدام تۇرعۇن بيىل ءوز ءۇيىنىڭ اۋلاسى مەن ۇيلەرىن جاڭالاپ، حالىقتىق تۇسەلحانا اشىپ الدى، ەڭ كوپ بولعاندا 20 ادامنىڭ تۇنەۋىن، تاماقتانۋىن قاناعاتتاندىرا الادى. ”جوعارى جىلدامدىقتى تاس جولدا كوپ وتپەي اۆتوكولىك قاتىنايدى، مەن دە ’ساياحاتتان اقشا‘ تابامىن“، - دەدى ول.
