انار بۇلت/ شينجياڭ گازەتىنىڭ ءتىلشىسى جاڭ جىلي، ەرىكتى ءتىلشى يە شيتيڭ 5 - ايدىڭ 29 - كۇنى اقسۋدان حابارلايدى. ”بۇرىن كوپ نارسەلەردىڭ ساتىلماي قالۋىنان الاڭداپ، ەگۋگە باتىلدىق ەتە الماۋشى ەدىك. قازىر’10 قالادا 100 دۇكەن‘ ينجەنەرياسى ءبىزدىڭ اۋىل شارۋاشىلىق ونىمدەرىمىزدىڭ بۇكىل ەلدىڭ جەر - جەرىندە ساتىلۋىنا جاردەمدەستى، مەن ەككەن نارسەلەرىمىزدىڭ ساتىلماي قالۋىنان ەندىگارى الاڭدامايتىن بولدىم“، - دەدى 5 - ايدىڭ 27 - كۇنى شايار اۋدانى تويبولدى قالاشىعىنداعى ءبىر شايحانادا ەگىنشى ازەز سالا تىلشىگە.
تويبولدى قالاشىعىن مىسالعا الار بولساق، وسى بىرنەشە جىلدا ساتقان ەرەكشە اۋىل شارۋاشىلىق ونىمدەرىنىڭ، قولونەر بۇيىمدارىنىڭ ءتۇرى بارعان سايىن كوبەيدى، الما، المۇرت، ۇن، قوي - سيىر ەتىنەن كەستە، اعاش ويماعا دەيىن ءونىمى 20 نەشە تۇردەن كەم بولمادى.
”’10 قالادا 100 دۇكەن‘ ءبىر تۇلعالانعان ساتۋ تورابى ارقىلى ءبىز شاياردىڭ ەرەكشە اۋىل شارۋاشىلىق ونىمدەرىن ساتىپ قانا قالماستان، تاعى دا ۋاكىلدىك ساتۋ كولەمىن اقسۋ ايماعىنا جانە باسقا ايماق، وبلىس، قالاعا كەڭەيتتىك. قازىر ءبىزدىڭ سەرىكتەستىگىمىزدىڭ چاڭجياڭ اتىراۋىنا ساتقان شينجياڭنىڭ ەرەكشە اۋىل شارۋاشىلىق ونىمدەرى 200 تۇرگە جەتتى“، - دەدى شينجياڭ جياڭجى اۋىل شارۋاشىلىعى عىلىم - تەحنيكاسى شەكتى جاۋاپكەرشىلىك سەرىكتەستىگىنىڭ باس ديرەكتورى جياڭ نايجۇن، - 2018 - جىلى سەرىكتەستىك قۇرىلعان العاشقى مەزگىلدە ءبىر جىلدا ساتىلعان اۋىل شارۋاشىلىق ونىمدەرى 4 ميلليون يۋاننان اسقان ەدى. بيىل ساۋدا ءبىرشاما سايابىر كەزدە 4 - ايداعى ساتىلۋ سوماسىنىڭ ءوزى 7 ميلليون يۋاننان استى.
ءتىلشىنىڭ جىجياڭ ولكەسىنىڭ شينجياڭعا كومەكتەسۋ قولباسشىلىق شتابىنان ۇعىسۋىنا قاراعاندا، بيىل الدىڭعى 4 ايدا ”10 قالادا 100 دۇكەن“ ينجەنەرياسى بويىنشا ساتىلعان شينجياڭنىڭ اۋىل شارۋاشىلىق ونىمدەرى جيىنى ءبىر ميلليارد 330 ميلليون يۋان بولعان. مۇنىڭ ىشىندە ينتەرنەت جەلىسىندەگى توراپ دۇكەندەرىنىڭ ساتىلىمى 220 ميلليون يۋان، ينتەرنەت جەلىسىنەن تىس دۇكەندەر مەن تولايىم ساتۋ ارنالارى ارقىلى ساتىلعانى ءبىر ميلليارد 110 ميلليون يۋان بولعان.
اقسۋ ايماقتىق اكىمشىلىك مەكەمەسىنىڭ ورىنباسار ءۋاليى، جىجياڭ ولكەسىنىڭ شينجياڭعا كومەكتەسۋ قولباسشىلىق شتابىنىڭ ورىنباسار باستىعى چىن حايتاۋ بىلاي دەپ تانىستىردى: 2017 - جىلى 8 - ايدا شينجياڭ مەن جىجياڭ بىرلەسىپ تۇلعالاعان ”10 قالادا 100 دۇكەن“ ينجەنەرياسى جۇمىس باستادى. بۇل كوپ ءتۇرلى سەلبەستىك فورماسى ارقىلى جىجياڭ ولكەسىنىڭ 10 ايماق، قالاسىندا اقسۋدىڭ ەرەكشە اۋىل شارۋاشىلىق ونىمدەرىنىڭ الەۋمەتتىك قامباسىن قۇرىپ، 100دەن استام بازاردا ساتۋ دۇكەندەرىن قالىپتاستىرۋدى كوزدەگەن. بىلتىر 8 - ايدا جىجياڭ ولكەسىنىڭ شينجياڭعا كومەكتەسۋ قولباسشىلىق شتابى، اقسۋ ايماقتىق اكىمشىلىك مەكەمەسى، بيڭتۋان 1 - شى ارال قالالىق ۇكىمەتى بىرلەسىپ «”10 قالادا 100 دۇكەن“ ينجەنەرياسىنىڭ دارەجەسىن ءوسىرۋ 3 جىلدىق ارەكەت جوسپارىن جاساپ»، ”10 قالادا 100 دۇكەن“ 2.0 نۇسقاسىن قالىپتاستىرۋ نىسانا مىندەتىن ورتاعا قويدى.
دەڭگەيى ءوسىرىلىپ، دارەجەسى جوعارىلاتىلعاننان كەيىن، ”10 قالادا 100 دۇكەن“ ينجەنەرياسى ”ينتەرنەت جەلىسىندە 10عا كىرۋ“ مەن ”ينتەرنەت جەلىسىنەن تىس 10عا كىرۋ“ قوس جەلى بىرلەسكەن تاسىلىنەن پايدالانىپ، ”شينجياڭنىڭ جەمىس - جيدەكتەرىن شىعىسقا جەتكىزۋ“ تەبىنىن اناعۇرلىم ارتتىردى. ”ءبىز كومەككە يە بولعان جەرلەردىڭ اۋىل شارۋاشىلىق ونىمدەرىن وتكەرمەلەۋ جۇيەسىنىڭ ’ەڭ الدىڭعى ءبىر كيلومەتر‘ مەن ’ەڭ سوڭعى ءبىر كيلومەترىن‘ ءتۇيىندى تۇردە اشىپ، ينتەرنەت جەلىسىنەن تىس توراپ تۇيىندەرىن كەڭەيتۋگە، ەلەكتروندى ساۋدا تۇلعالارىن جەتىلدىرۋگە، ەلەكتروندى ساۋدا دارىندىلارىن باۋلۋعا، زات اينالىمى جۇيەسىن كەمەلدەندىرۋگە، ’جىجياڭ ونىمدەرىن باتىسقا جەتكىزۋگە‘ كۇش سالىپ، كومەككە يە بولعان جەرلەردىڭ اۋىل شارۋاشىلىق قوسىمشا ونىمدەرىنىڭ ’جىجياڭدا ساتىلۋدى‘ نەگىز ەتۋدەن ’بۇكىل ەلدە‘ ساتىلۋعا قاراي ويىسۋىنا مۇمكىندىك جاسايمىز“، - دەدى چىن حايتاۋ.
