تيانشان تورى   ›   جاڭالىقتار   ›   شينجياڭ حابارلارى

قارامايلى: مۇناي قالاسىنان ”ساياحات قالاسىنا“ اينالدى

انار بۇلت / شينجياڭ گازەتىنىڭ تىلشىلەرى رىن جياڭ، ياۋ گاڭ، ۋاڭ جيڭجيڭ

  قارامايلىداعى G3014 كۇيتۇن - التاي جوعارى جىلدامدىقتى تاس جولى، G3015 كۇيتۇن - شاۋەشەك جوعارى جىلدامدىقتى تاس جولى جانە G217 مەملەكەت تاس جولىن ءوزارا تۇتاستىرعان ايقاسپالى كوپىر (سۋرەت 6 - ايدىڭ 3 - كۇنى ۇشقىش اپپاراتپەن تۇسىرىلگەن). سۋرەتتى انار بۇلت / شينجياڭ گازەتىنىڭ ءتىلشىسى ساي زىڭلى تۇسىرگەن

  كۇيتۇن قالاسىنان شىعىپ، كۇيتۇن - التاي جوعارى جىلدامدىقتى تاس جولىمەن سولتۇستىككە قاراي 100 نەشە كيلومەتر جۇرسەڭىز، الدىڭىزداعى قۇبا ءتۇز، قۋاڭ دالادان كەنەتتەن ءبىر كولەمدى نۋ ورماندى القاپ جالت ەتىپ كوزگە تۇسەدى. قالىڭ ورماننىڭ ار جاعى قارامايلى قالاسى.

       6 - ايدىڭ 3 - كۇنى ”جوعارى جىلدامدىقتى تاس جولدى بويلاپ شينجياڭعا نازار سالۋدىڭ“ 4 - كەزەڭى باستالىپ، انار بۇلت / شينجياڭ گازەتى جالپىلىق اقپارات قۇرالدارى حابارلاۋ توبى كۇيتۇن - التاي جوعارى جىلدامدىقتى تاس جولىن بويلاپ، ”رەسپۋبليكامىز مۇنايىنىڭ تۇڭعىشى“ − قارامايلى قالاسىنا جەتىپ، ”قۋاڭ دالاعا ساياحات، زاماناۋي قالانىڭ“ تارتىمدىلىعىن سەزىندى.

  قونىسقا جايلى، كاسىپكە ىڭعايلى، ساياحاتقا قولايلى

  جەڭىل مۋزيكا اۋەنى ىشىندە اقىرىن قوس قولىن جازىپ، جۇدىرىعىن باياۋ سىلتەدى... تاڭەرتەڭ ساعات 7دەن وتكەندە قارامايلى قالاسىنىڭ 68 جاستاعى تۇرعىنى باي شيانياڭ قارامايلى 1 - ءنومىرلى قۇدىق كورىنىس ءوڭىرى مۇناي ەسكەرتكىش الاڭىنا كەلىپ، جاتىق تايجي جۇدىرىعىمەن ءبىر كۇندىك تۇرمىسىن باستادى.

   1 - ءنومىرلى قۇدىق كورىنىس ءوڭىرىنىڭ مۇناي ەسكەرتكىش الاڭىندا بيىكتىگى 15 مەتر، ەڭ ۇلكەن ديامەترى 28 مەتر كەلەتىن قارامايلى ۇلكەن مۇناي كوپىرشىگى نەگىزگى تاقىرىپتىق ءمۇسىنى وسى الاڭدى ينتەرنەتتە تانىمالى، ءسوزسىز بارار جەرگە اينالدىردى. ايتسە دە 49 جىلدىڭ الدىندا باي شيانياڭ العاش رەت وسىندا كەلگەندە، اعاشتىڭ ساياسى تۇسكەن، گۇل قۇلپىرىپ، تال جايقالعان الاڭ جوق ەدى. ”بۇل ارا قۇبا ءتۇز ەدى، ەشتەڭە جوق بولاتىن!“، - دەدى ول ەسكە الىپ.

  بۇل كۇندەرى بۇل ارا قارامايلى قالاسى تۇرعىندارىنىڭ تىنىعاتىن ورنى بولىپ قالماستان، ساياحاتشىلار، ءسوزسىز، باراتىن كورىنىس تۇيىنىنە اينالدى.

  6 - اي كەلىسىمەن ۇلكەن مۇناي كوپىرشىگى مۇسىنىمەن جول كورشى جاتقان حى - يجىگى قوناق ءۇيى ساياحاتشىلاردىڭ قاۋىرت كەزىن قارسى الدى. وسى بىرنەشە كۇندە قوناق ءۇي بولمەلەرىنىڭ قوناق ءتۇسۋ سالىستىرماسى جوعارىلاي ءتۇستى. ءار كۇنى تاڭەرتەڭ ەسىكتىڭ الدىنا ءتۇرلى ساياحات اۆتوبۋزدارى كەلىپ توقتاپ، ءتۇرلى اكسەنتتەردە سويلەيتىن ساياحاتشىلار چەموداندارىن سۇيرەپ، اسىعىس كەلىپ جاتادى.

  وتكەن عاسىردىڭ 50 - جىلدارىندا «قارامايلى ءانى» كۇللى جۇڭگوعا تارالىپ، ادامدار ءان اۋەنىنەن كەزىندەگى ”قىلتانى جوق، سۋى جوق، قۇس ۇشىپ وتپەيتىن“ جەردى ءبىلدى. بۇگىنگى تاڭداعى قارامايلى بارلىق جەرىندە باۋ - باقشاسى بار، ورتاسىنان وزەن اعىپ وتەتىن، تىنىعىپ، دەمالۋعا، سەرۋەندەپ، ساياحاتتاۋعا ۇيلەسەتىن وسىزاماندانعان سەيىل - سەرۋەن قالاسىنا اينالدى. دۇنيە جۇزىندەگى بىردەن - ءبىر ”مۇنايمەن“ اتالعان، جاڭا جۇڭگوعا العاشقى ءىرى مۇناي الابىن ارناعان وسى قالا مۇنايدىڭ ارقاسىندا دۇنيەگە كەلدى؛ بۇل كۇندەرى قارامايلى ساياحاتپەن كوركەيىپ كەلەدى. بيىل الدىڭعى 5 ايدا قارامايلىنىڭ قابىلداعان ساياحاتشىلارى 3 ميلليون 193 مىڭ 900 ادام - رەت بولىپ، سايكەس مەزگىلدەگىدەن %104.94 ارتتى؛ ساياحات كىرىسى ءبىر ميلليارد 948 ميلليون يۋان بولىپ، سايكەس مەزگىلدەگىدەن %98.83 ارتتى.

  جاڭا كاسىپ كۇيلەرى دامىدى

  6 - ايدىڭ 3 - كۇنى تۇستەن كەيىن قارامايلى قالا رايونىنىڭ تەمپەراتۋراسى وتە جوعارى بولدى. شينجياڭ شينيۇي ۇيشە اۆتوكولىك ساياحات جارنا شەكتى سەرىكتەستىگىنە كەلەتىن تەلەفون دا كوبەيە ءتۇستى. 6 - ايدىڭ ورتا شەنىندە مايتاۋ - كۇشار تاس جولىندا اۆتوكولىك قاتىنايدى، كەڭەس سۇراعان، اۆتوكولىككە تاپسىرىس بەرگەن تەلەفوندار ۇزىلمەدى. بيىل وسى سەرىكتەستىك ۇيشە اۆتوكولىكتى 30عا كوبەيتسە دە قاجەتتى تولىق قاناعاتتاندىرا المادى، 7 − 8 - ايلارداعى ۇيشە اۆتوكولىكتەرگە الدىن الا تاپسىرىس بەرىلىپ بولىپتى.

  سوڭعى جىلدارى ءوز كولىگىمەن ساياحاتتاۋ قارامايلى قالاسىنداعى ەڭ دابىرالى ساياحات كاسىپ كۇيىنىڭ بىرىنە اينالدى. قاتىناس شارت - جاعدايىنىڭ جاقسارۋى، اسىرەسە، جوعارى جىلدامدىقتى تاس جولدىڭ سالىنىپ بولىپ، اۆتوكولىك قاتىناۋى ءوز كولىگىمەن ساياحاتتاۋدىڭ دامۋىن ىلگەرىلەتكەن ماڭىزدى سەبەپ.

  قارامايلى قالالىق ءوز كولىگىمەن ساياحاتتاۋ جانە ۇيشە اۆتوكولىك لاگەرى قوعامىنىڭ ورىنباسار باس حاتشىسى دۋان چياڭ ارنايى ساياحاتتىڭ توسەلگەن شەبەرى. ونىڭ تۇسىنىگىندە قارامايلى قالاسىنداعى ءوز كولىگىمەن ساياحاتتاۋدىڭ دابىرالى بولۋى 2015 - جىلدىڭ الدى - ارتىندا باستالعان، ال 2014 - جىلى كۇيتۇن - التاي جوعارى جىلدامدىقتى تاس جولىندا، كۇيتۇن - شاۋەشەك جوعارى جىلدامدىقتى تاس جولىندا كولىك قاتىناعان ەدى. سول كەزدەن باستاپ قارامايلىدان كولىك جۇرگىزىپ التايعا بارۋ 5 − 6 ساعاتتان 3 ساعات اينالاسىنا قىسقاردى، شاۋەشەككە باراتىن ۋاقىت بارىنشا قىسقاردى. باستالا سالىسىمەن قارامايلىنىڭ ءىشىنارا قالا تۇرعىندارى ءوز كولىگىمەن ساياحاتتاۋشىلاردىڭ قاتارىنا قوسىلدى. كەيىن كەلە جول - قاتىناس شارت - جاعدايى ۇزدىكسىز جاقسارعان قارامايلى قالاسى بىرتىندەپ سولتۇستىك شينجياڭداعى ءوز كولىگىمەن ساياحاتتاۋدىڭ تۇيىنىنە اينالدى. ”التايعا، شاۋەشەككە، ىلەگە باراتىن قاتىناس قولايلى بولعاندىقتان، ءبىز قارامايلىنى سولتۇستىك شينجياڭداعى ءوز كولىگىمەن ساياحاتتاۋدىڭ جيناۋ - جونەلتۋ ورتالىعى ەتىپ تۇلعالاماقپىز“، - دەدى قارامايلى قالالىق مادەنيەت، دەنە تاربيە، راديو - تەلەۆيزيا جانە ساياحات مەكەمەسىنىڭ ورىنباسار باستىعى گى لەي.

  ”قازىر قارامايلى قالاسىنىڭ اۋە لەنياسى 26عا، اۋە ءتۇيىنى 25كە جەتىپ، بەيجيڭ، شاڭحاي، گۋاڭجوۋ سياقتى ءبىرىنشى ساناتتاعى قالالارعا توتە ۇشۋدى جۇزەگە اسىردى“. گى لەي بىلاي دەدى: اۋەدەگى قاتىناستىڭ قولايلىلانۋى قارامايلىنىڭ ”جىلدام ىلگەرىلەۋىن“ جۇزەگە اسىرىپ، توڭىرەكتىڭ ءتورت بۇرىشىنا تۇتاسقان تاس جولدار قارامايلىنىڭ ”سولتۇستىك شينجياڭداعى ءوز كولىگىمەن ساياحاتتاۋدىڭ جيناۋ - جونەلتۋ ورتالىعى“ يقۋاتىن تولىق ساۋلەلەندىرىپ، تۇسكەن جەرىندە ءوزى كولىك جۇرگىزۋ، وزگە جەردە كولىكتى قايتارۋ سىندى ءبىر قىدىرۋ ءوز كولىگىمەن ساياحاتتاۋ بويىنشا قىزمەت وتەۋ نىساندارى ساياحاتشىلاردىڭ ”اسىقپاي ساياحاتتاۋىنا“ مۇمكىندىك بەردى.

  ساياحاتتى دامىتۋعا قايرات جەتەدى

  ۇيشە اۆتوكولىك شەتىنە اس ۇستەل قويىپ، ۇيشە اۆتوكولىكتىڭ وزىندەگى اسپازدىق تۇعىرىندا كەرەمەتىن كورسەتتى، كوپ وتپەي پاميدور ارالاستىرىپ قۋىرىلعان جۇمىرتقا، بالدىركوك ارالاستىرىپ قۋىرىلعان ەتتىڭ حوش ءيىسى اڭقىدى. 6 - ايدىڭ 3 - كۇنى بەيجيڭنەن كەلگەن ءوز كولىگىمەن ساياحاتتاۋشى لي پىڭ مەن دوستارى بىرگە وتىرىپ، قازاننان جاڭا شىققان ءۇي تاعامدارىنان ءدام تاتتى. وسى ساتتە باتار كۇننىڭ الاۋى ورقى حالىقارالىق ۇيشە اۆتوكولىك لاگەرى باقشاسىن التىن تۇسكە بولەدى.

  ”بۇل ارا سۋمەن، توكپەن تەگىن قامدايدى، قالا رايونىنىڭ قامداۋى دا وتە قولايلى، اينالاداعى ورتا دا تاماشا“. لي پىڭ لاگەر باقشاسى كورسەتكەن قىزمەتكە ءدان ريزا.

  ورقى حالىقارالىق ۇيشە اۆتوكولىك لاگەرى باقشاسىن قارامايلى قالاسى ”سولتۇستىك شينجياڭنىڭ ءوز كولىگىمەن ساياحاتتاۋدىڭ جيناۋ - جونەلتۋ ورتالىعىن“ تۇلعالاۋ ءۇشىن سالعان، بيىل 5 - ايدىڭ 1 - كۇنىنەن باستاپ الەۋمەتكە رەسمي اشىلدى. ”قارامايلى قالاسى جەر تۇزىلىسىنەن قاراعاندا، ۇزىنشاقتاۋ جەر، وڭتۇستىك جاقتاعى ورقى رايونىندا ورقى حالىقارالىق ۇيشە اۆتوكولىك لاگەرى باقشاسىن تۇلعالادىق، سولتۇستىك جاقتاعى مايتاۋ رايونىندا مايتاۋ - كۇشار ايالجايىن تۇلعالادىق“، - دەدى گى لەي.

  لاگەر باقشاسىنا جالپى 280 ميلليون يۋان قارجى قوسىلعان، ىشىندە 298 قونالقى بار، ينتەرنەتتە تانىمالى ساپالى اعاش ءۇي قونالقى، ايتۋلى ۇيشە اۆتوكولىك قونالقى، دالالىق شاتىر قونالقى، جۇك قورابى قونالقى بار، سونىمەن بىرگە تاعى جاياۋ ساياحاتشى شاتىر قونالقىلار ساياحاتشىلاردىڭ كوپ ءتۇرلى قاجەتىن قاناعاتتاندىرادى.

  سوڭعى جىلدارى مۇناي قالاسى قارامايلىنىڭ ”ساياحات كوركى“ بارعان سايىن ارتتى: 2004 - جىلى قارامايلى مۇناي الابىنا العاشقى توپتاعى ”مەملەكەتتىك ونەركاسىپ ساياحاتىنان ۇلگى كورسەتۋ ءتۇيىنى“ اتى بەرىلدى؛ 2020 - جىلى ورقى دۇنيە جۇزىلىك سايتان كەرىش كورىنىس ءوڭىرى مەملەكەتتىك 5A دارەجەلى كورىنىس ءوڭىرى قاتارىنا ءوتتى؛ وسىنىڭ الدىندا عانا جاريالانعان «2021 - جىلعى جۇڭگونىڭ سەيىل - سەرۋەن قالالارىنىڭ دامۋ بايانداماسىندا» قارامايلى قالاسى جۇڭگو قالالارى سەيىل - سەرۋەن كورسەتكىشى جالپى ءتىزىمىنىڭ الدىڭعى 100ىنىڭ (قالا) ىشىندە 10 - ورىندى يەلەدى.

  ۋاڭ گۇيشۋان كاريا بيىل 91 جاستا، 1956 - جىلى قارامايلى قالاسىنا كەلگەن، ءومىر بويى مۇناي ىستەرى ءۇشىن كۇرەس جاسادى. ءومىر بويى ۇلەس قوستى، كاريا قارامايلىدان كەتكىسى كەلمەيدى. سىرت جەرلەردەن كەلگەن ساياحاتشىلارعا جولىقسا، شاتتانا ءتۇسىپ، ۇنەمى باسقالارمەن ىرىقتىلىقپەن اڭگمەلەسە كەتەدى، ىلعي: ”بۇل جەر جاقسى ما ەكەن؟ سەندەردىڭ ول ارادا بار ما؟“، - دەپ بالاشا ماساتتانادى.

  ساپار ەستەلىگى

  جول تابان استىندا، ونان دا ماڭىزدىسى جۇرەكتە

  6 - ايدىڭ 3 - كۇنى، بەيسەنبى، كۇن اشىق

  قارامايلىعا كەلگەن كەزدە كەڭ جولداردى، رەتتى كوشەلەردى، قالانى كەسىپ اعىپ جاتقان وزەندى كورىپ، وسى زامانعى وركەنيەتتى ءنان قالادان كوپتەن بەرى اتى ايگىلى مۇنايلى قالانىڭ دامۋ وزگەرىسىن سەزىندىك.

  اسقاق سەزىم الاۋلاعان جىلداردا جاپان تۇزدەن بوي كوتەرگەن وسى مۇنايلى قالا كەزىندە ادامدارعا كوپتەگەن ماقتانىش سەزىمىن، قايراتتانۋ كۇشىن سيلاپ، نەگىزى ءالسىز جەردەن دامۋدىڭ كەرەمەتىن جاراتۋعا سەنىم بەردى. جوعارى ساپالى دامۋدىڭ جورىق كۇيىندە قارامايلى باتىلدىقپەن ارىن بايقاتىپ، جاڭا ءداۋىردىڭ «قارامايلى ءانىن» شىرقادى.

  قارامايلى قالاسىنىڭ جوعارى ساپالى دامۋى ۇلكەن حور ىسپەتتى، ءتۇرلى جاقتاردى قامتىعان، ساياحات كاسىبىن زور كۇشپەن دامىتۋ سولاردىڭ ءبىرى. مەيلى قانداي دامۋ وي جەلىسى بولسىن، ەڭ ءتۇبىرلىسى ادامدى نەگىز ەتۋگە تاباندى بولىپ، حالىق بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن دامۋدى باعالاۋدىڭ ەڭ ماڭىزدى ولشەمى ەتۋ كەرەك. جۇرەكتەگى جول حالىقتى وزەك ەتكەندە، باقىت جولى جۇرگەن سايىن داڭعىلدانا تۇسەدى. (رىن جياڭ)

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.