تيانشان تورى   ›   جاڭالىقتار   ›   شينجياڭ حابارلارى

تەحنولوگيانى جاڭالاپ، شينجياڭ سامساسىن بۇكىل ەلگە ساتتى

انار بۇلت / شينجياڭ گازەتىنىڭ ءتىلشىسى دۋ جيانحۇي

  6 - ايدىڭ 2 - كۇنى بايىنعولين موڭعۇل اۆتونوميالى وبلىسى جياڭتاۋ نۇڭگى ەلەكتروندى ساۋدا ىستەرى شەكتى سەرىكتەستىگىنىڭ جاۋاپتىسى تاۋ دىڭفىڭ ينتەرنەتتە ساتۋ تەكشەسىنەن سامسانىڭ ساتىلۋ مولشەرىن كوردى، سول كۇنى تۇستەن بۇرىنعى ۋاقىتتىڭ وزىندە سەرىكتەستىك 3000نان استام سامساعا تاپسىرىس الىپتى.

  بيىل 4 - ايدان باستاپ قىسقا عانا 2 اي ۋاقىتتا، تاۋ دىڭفىڭ ينتەرنەت تەكشەسى ارقىلى 500 مىڭ سامسا ساتتى.

  ”جۇپ - جۇقا قامىرعا وراپ پىسىرىلعان سامسانى اۋىزعا سالساڭىز بولدى، قوي ەتىنىڭ حوش ءيسى مۇرىندى جارىپ قۇشىرلانا جەيسىز“. 22 جىلدىڭ الدىندا، تاۋ دىڭفىڭ شينجياڭعا العاش رەت كەلگەندە، حوش ءيىسى اڭقىعان سامسانى ۇناتىپ قالادى.

  تاۋ دىڭفىڭ قىزمەت ساپارىمەن بۇكىل ەلدىڭ جەر - جەرىنە بارىپ، سىرت وڭىرلەردەگى شينجياڭدىقتارمەن كەزدەسكەندە، ولاردىڭ توناردان قىزارا پىسىپ شىعاتىن شينجياڭ سامساسىن ۇنەمى اڭگىمەلەيتىنىن ەستيدى. ”ولاردىڭ ’تامسانعان بەينەسىن‘ كورگەندە ماعان سول كەزدە شينجياڭ سامساسىن بۇكىل ەلدىڭ جەر - جەرىنە ساتۋ ويى تۋدى“، - دەدى تاۋ دىڭفىڭ.

  2016 - جىلى تاۋ دىڭفىڭ سامسانى ەل ىشىندەگى باسقا دا ولكە، رايون، قالالارعا جالپىلاستىرۋعا كىرىسەدى. جول الىس بولعاندىقتان، سامسا شي - انعا جەتكىزىلمەي جاتىپ ورتا جولدا جەۋگە كەلمەي قالادى. ول سۋىق تىزبەكتى تاسىمالدى سىناپ كورگەننەن كەيىن، سامسانى ءساتتى تۇردە شي - انعا جەتكىزەدى.

  سامسا قوي ەتى قيماسىنان جاسالادى، قاريدارلار جىلىتقاننان كەيىن سامسانىڭ كۇلىمسى ءيىسىنىڭ وتە كۇشتى بولىپ، جاقسى بولماي قالاتىندىعىن اڭىس ەتەدى. تاۋ دىڭفىڭ تاجىريبەلى ۇستازداردان جان - جاقتان كەڭەس سۇراپ، سيىر ەتى مەن قوي مايىنان قيما جاساۋدى سىناق ەتە باستايدى. جاسالىپ بولعاننان كەيىن توڭازىتىلعان سامسانى ميكرو تولقىندى پەشكە قويىپ جىلىتتىق، ”ءوزىم الدىمەن ءدامىن تاتىپ كوردىم، كۇلىمسى ءيىس جوعالىپ، ماسەلە شەشىلدى“، - دەدى تاۋ دىڭفىڭ.

  سىناق ءساتتى بولعانىمەن، سامسانىڭ ساتىلۋ مولشەرى ارتا قويمادى. تاۋ دىڭفىڭ قاريدارلارمەن تەلەفوندا حابارلاسىپ، ماسەلەنىڭ قايدا ەكەندىگىن سۇرادى.

  ”سامسانىڭ ءدامى تىل ۇيىرگەنىمەن، ءتۇرى ادامدى تارتپايدى، ۇلكەن - كىشىلىگى دە بىردەي ەمەس، قاراپ وتىرىپ تابەتىڭ تارتپاي قالادى“. قاريدارلاردىڭ ءسوزىن تىڭداپ، تاۋ دىڭفىڭ سامسالاردى كوشە جايمالارىنداعى ۇستازداردان تاپسىرىس بەرىپ ساتىپ العاندىعىن، ءدامى، ۇلكەن - كىشىلىگى بىردەي ەمەس ەكەندىگىن اڭعارادى.

  ماسەلەنىڭ قايدا ەكەندىگى تابىلدى، تاۋ دىڭفىڭ لوپنۇر اۋدانى حولييۋان ازىق - تۇلىك شەكتى سەرىكتەستىگىمەن سەلبەسىپ، ولشەمدەنگەن ءوندىرىس جابدىعىن ساتىپ الدى، سامسا جاساۋعا قاجەتتى شيكىزات، سالماعى بىردەي بولىپ، ءاربىر سامسانىڭ ۇلكەن - كىشىلىگىنىڭ، ءدامىنىڭ بىردەي بولۋىنا كەپىلدىك ەتتى. سونىمەن بىرگە ول سامسانىڭ ءتىپتى دە ءدامدى بولۋى جونىندە باس قاتىردى − ءبىرىڭعاي سارى مايدان پايدالانىپ ۇن يلەپ، پىسىرۋدىڭ الدىندا ءبىر قابات جۇمىرتقا اعىن جاعىپ، جىلىتقاننان كەيىن سامسانىڭ اۋەلگى ءدامىن ساقتاۋىنا كەپىلدىك ەتتى.

  5 جىل تاباندىلىق كورسەتۋدىڭ ارقاسىندا، بيىل 4 - ايدىڭ 1 - كۇنى تاۋ دىڭفىڭ زەرتتەپ جاساعان ”لوبۋ شىكى“ جەلىلەس ازىق - تۇلىگى − شينجياڭ سامساسى رەسمي ينتەرنەت جەلىسىندە ساتىلدى، ءاربىر سامسا ايىرىم قوراپتالىپ، تۇتاس جەلىدە سۋىق تىزبەكتە شي - انداعى وتكەرمە قويماعا تاسىمالدانىپ، ونان كەيىن بۇكىل ەلدىڭ جەر - جەرىنە جەتكىزىلەدى.

  ”سامسا شىعارىلا سالىسىمەن ساتىلۋ جاعدايى وتە جاقسى بولدى. ساتۋ تەكشەسىندەگى توراپتاستاردىڭ قالدىرعان لەبىزى مەنى تابىس سەزىمىنە كەنەلتتى“، - دەدى تاۋ دىڭفىڭ. چىڭدۋداعى گو بيكە بىلاي دەپ ءسوز قالدىرىپتى: مەن ىلگەرى شينجياڭدا تۇرمىس كەشىرگەم، تاياۋدا ينتەرنەت ارقىلى سامسا ساتىپ الىپ، شينجياڭنىڭ ءدامىن شىنايى سەزىندىم. شاندۇڭداعى فىڭ مىرزا تالاي رەت سامسا ساتىپ الدى ءارى بىلاي دەپ ءسوز قالدىرىپتى: شينجياڭ سامساسىنىڭ وتە ءدامدى ەكەندىگىن دوستارىمنان ەستيتىنمىن، اقىرى ءدامىن تاتتىم.

  ”مەن قىزىل بۇرىش سامساسىن، قوي قابىرعاسى سامساسىن زەرتتەپ جاساپ، شينجياڭ سامساسى ماركاسىن زورايتۋعا دايىندالىپ جاتىرمىن. مەنىڭ بيىلعى نىسانام 5 ميلليون سامسا ساتىپ، ءدامدى تاعام ارقىلى شينجياڭدى ۇگىتتەۋ، تانىستىرۋ“، - دەدى تاۋ دىڭفىڭ.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.