شينحۋا اگەنتتىگىنىڭ 6 - ايدىڭ 8 - كۇنى بەيجيڭنەن بەرگەن حابارى. 6 - ايدىڭ 8 - كۇنى مەملەكەت ءتوراعاسى شي جينپيڭ 2 - كەزەكتى جۇڭگو − ورتا، شىعىس ەۆروپا ەلدەرى كورمەسىنە قۇتتىقتاۋ حات جولدادى.
شي جينپيڭ بىلاي دەپ اتاپ كورسەتتى: جۇڭگو − ورتا، شىعىس ەۆروپا ەلدەرى سەلبەستىك مەحانيزمى − جۇڭگو مەن ورتا، شىعىس ەۆروپا ەلدەرىنىڭ دوستىقتى تەرەڭدەتۋ، سەلبەستىكتى كەڭەيتۋ، دامۋ جولىن بىرگە قاراستىرۋداعى ماڭىزدى تۇعىر. بيىل 2 - ايدا جۇڭگو − ورتا، شىعىس ەۆروپا ەلدەرى باسشىلارىنىڭ باس قوسۋى ءساتتى وتكىزىلدى، مەن جاڭا جاعدايدا جۇڭگو − ورتا، شىعىس ەۆروپا ەلدەرىنىڭ سەلبەستىگىندە ناقتى ىستەردى ىستەۋدى باعدار ەتۋگە تاباندى بولىپ، ءوزارا تيىمدىلىك جاساپ، ءبىر - بىرىنە پايدا جەتكىزۋ سەلبەستىك جەتىستىكتەرىن كەڭەيتۋدى باسا دارىپتەدىم، بۇدان بىلايعى 5 جىلدا ورتا، شىعىس ەۆروپا ەلدەرىنەن جالپى قۇنى 170 ميلليارد دوللاردان استام تاۋار يمپورت ەتۋدى جوسپارلاپ، الداعى 5 جىلدا ورتا، شىعىس ەۆروپا ەلدەرىنەن الاتىن اۋىل شارۋاشىلىق ونىمدەرى يمپورت سوماسىن ەسەلەپ ارتتىرۋعا ۇمتىلىپ، نيڭبو سياقتى جەرلەردەگى جۇڭگو − ورتا، شىعىس ەۆروپا ەلدەرى ەكونوميكا - ساۋدا سەلبەستىگى ۇلگى كورسەتۋ رايونى قۇرىلىسىن ۇزدىكسىز ىلگەرىلەتۋ كەرەكتىگىن العا قويدىم. قاتىستى تاراپتاردىڭ ورتاق قۇلشىنۋىندا باسشىلار باس قوسۋىنىڭ ءتۇرلى جەتىستىكتەرى تياناقتانۋدا.
شي جينپيڭ بىلاي دەپ باسا دارىپتەدى: وسى كەزەكتى جۇڭگو − ورتا، شىعىس ەۆروپا ەلدەرى كورمەسىنىڭ وتكىزىلۋى جۇڭگو بازارىنىڭ ورتا، شىعىس ەۆروپا تاۋارلارىنا بولعان تۇسىنىگىن ارتتىرىپ، ورتا، شىعىس ەۆروپا ەلدەرىنىڭ جۇڭگوعا تاۋار ەكسپورت ەتۋىن كەڭەيتۋىنە ءتيىمدى، تاراپتاردىڭ جاڭا تيپتى ايدارشا ۆيرۋس وكپە قابىنۋ ىندەتى الا كەلگەن سايىستاردى جەڭۋىنە، ەكونوميكانىڭ قالپىنا كەلۋىن جەبەۋىنە ءتيىمدى. تاراپتاردىڭ وسىنى وراي ەتىپ، سەلبەستىك كومەسكى كۇشىن ۇزدىكسىز اشىپ، اناعۇرلىم كەڭ سەلبەستىك ءورىسىن تىزە قوسا وتىرىپ اشۋىن ءۇمىت ەتەمىن.
2 - كەزەكتى جۇڭگو − ورتا، شىعىس ەۆروپا ەلدەرى كورمەسى سول كۇنى جىجياڭ ولكەسىنىڭ نيڭبو قالاسىندا اشىلدى، نەگىزگى تاقىرىبى ”جاڭا ارنا قالىپتاستىرىپ، جاڭا ورايدان بىرگە يگىلىكتەنەيىك“. كورمەنى ساۋدا مينيسترلىگى مەن جىجياڭ ولكەلىك حالىق ۇكىمەتى بىرگە وتكىزدى، جۇڭگودان جانە ورتا، شىعىس ەۆروپا ەلدەرىنەن سيلى قوناقتار جانە كاسىپورىندار كورمەگە قاتىناستى.
