تيانشان تورى
تيانشان تورى   ›   جاڭالىقتار   ›   شينجياڭ حابارلارى

ەنەرگيا تۇتىنۋدىڭ تيبىن جاڭالاپ، دارەجەسىن ءوسىرۋ ءار ۇلت بۇقاراسىنا تيىمدىلىك جەتكىزدى

□ انار بۇلت / شينجياڭ گازەتىنىڭ تىلشىلەرى يۇي جياڭيان، چىن چياڭۋي

  پارتيا 18 - قۇرىلتايىنان بەرى شينجياڭنىڭ ەنەرگيا ءوندىرىسى ۇزدىكسىز ارتتى. ەنەرگيامەن جەتكىلىكتى قامداۋ − شينجياڭنىڭ ەنەرگيا تۇتىنۋ قۇرىلىمىن رەتتەۋگە پارمەندى تىرەك ازىرلەپ، دامۋ جەتىستىكتەرى ارقىلى تيانشان الابىنداعى ءار ۇلت بۇقاراسىنا تيىمدىلىك جەتكىزۋگە مۇمكىندىك جاسادى.

ەنەرگيا ءوندىرىسى: قامداۋ، قامسىزداندىرۋ قابىلەتى كۇشەيدى

  6 - ايدىڭ 3 - كۇنى جوڭعار ويپاتىنا ورنالاسقان ماحۋ مۇنايلىعىندا قۇدىق سورەلەرى ءيىن تىرەسە ءتىزىلىپ، بۇرعىلاۋ ماشيناسىنىڭ داۋىسى قۇلاق تۇندىرىپ تۇر، مۇناي جۇمىسشىلارىنىڭ تولاس تاپپاي قاربالاس جۇرگەن بەينەسى اۋىق - اۋىق كوزگە تۇسەدى. بۇل ارانى كولەمدەندىرىپ اشقاننان باستاپ قۇرىلىس جۇمىسى دابىرالى جۇرگىزىلدى.

  پارتيا 18 - قۇرىلتايىنان بەرى شينجياڭ مەملەكەتتىڭ ”ءۇش بازا، ءبىر ارنا“ ستراتەگيالىق تۇراقتاندىرۋى بويىنشا مەملەكەتتىڭ ءىرى مۇناي گاز ءوندىرۋ، وڭدەۋ جانە ساقتاۋ بازاسى، ءىرى كومىر، كومىر ەلەكتر، كومىر حيميا ونەركاسىبى بازاسى، ءىرى جەل ەلەكتر جانە كۇن ەنەرگياسىمەن ەلەكتر تاراتۋ بازاسى، مەملەكەتتىڭ ەنەرگيا بايلىعىنىڭ قۇرلىقتاعى ءىرى ارناسى جانە كەشەندى ەنەرگيا بازاسى قۇرىلىسىن ارقاۋ ەتىپ، ەنەرگيا بايلىعىن اشۋ، كادەگە جاراتۋ، ”شينجياڭنىڭ ەلەكترىن سىرتقا شىعارۋ“، ”گازدى باتىستان شىعىسقا جەتكىزۋ“ سياقتى ەلەۋلى ينجەنەريالاردان ءبىر توبىن ىركەس - تىركەس اتقارىپ، ەنەرگيامەن قامداۋ، قامتاماسىز ەتۋ قابىلەتى ايتارلىقتاي جوعارىلاپ، ەنەرگيا قۇرىلىمى ۇزدىكسىز ساپالىلانىپ، مەملەكەتتىڭ ەنەرگيا حاۋىپسىزدىگىن قامتاماسىز ەتۋگە ماڭىزدى ۇلەس قوستى.

  ءبىر توپ ساناق ساندى مالىمەتتەرىنەن شينجياڭ ەنەرگيا ءوندىرىسىنىڭ ارشىنداي العا باسقان ناتيجەلەرىن كورۋگە بولادى. اۆتونوميالى رايوننىڭ حالىق شارۋاشىلىعى مەن قوعامدىق دامۋ ساناق مازمۇنداماسىندا كورسەتىلۋىنشە، 2020 - جىلى شينجياڭنىڭ شيكى مۇناي ءوندىرىس مولشەرى 29 ميلليون 147 مىڭ 500 تونناعا جەتكەن، تابيعي گاز ءوندىرىس مولشەرى 36 ميلليارد 983 ميلليون تەكشەمەتر بولعان، سۇرىپتاۋسىز كومىر ءوندىرىس مولشەرى 269 ميلليون 656 مىڭ 900 تونناعا جەتكەن، ەلەكتر تاراتۋ مولشەرى 412 ميلليارد 186 ميلليون كيلوۆات - ساعاتقا جەتكەن.

ەنەرگيا تۇتىنۋى: قۇرىلىمدى رەتتەۋ جۇرەكتەردى جىلىتىپ، حالىققا تيىمدىلىك جەتكىزدى

  كىشكەنە كەزىمىزدە وتىنمەن تاماق جاسايتىنبىز، ەرجەتكەندە كومىرمەن تاماق جاسايتىن بولدىق، ال قازىر تابيعي گازبەن تاماق جاسايمىز. پوسكام اۋدانى كۇيباع قالاشىعىنىڭ تۇرعىنى امەر امەت 2013 - جىلدىڭ باسىندا جاڭا ۇيىنە كوشىپ كىرە سالىسىمەن تابيعي گازدان پايدالاندى.

  بۇل تارىم مۇناي الابىنىڭ ”وڭتۇستىك شينجياڭدا گاز جالپىلاستىرۋ“ ينجەنەرياسىن اتقارۋىنىڭ ارقاسى. 2012 - جىلى 12 - ايدىڭ سوڭىنا دەيىن قاشقار ايماعىنداعى، حوتان ايماعىنداعى جانە قىزىلسۋ قىرعىز اۆتونوميالى وبلىسىنداعى 260 مىڭ وتباسى تۇرعىندارى تابيعي گازدان پايدالاندى. پارتيا 18 - قۇرىلتايىنان بەرى تارىم مۇناي الابى ”وڭتۇستىك شينجياڭدا گاز جالپىلاستىرۋ“ كولەمىن ۇزدىكسىز كەڭەيتتى، بۇگىنگى تاڭدا وڭتۇستىك شينجياڭداعى 6 ميلليوننان استام بۇقارا تازا تابيعي گازدان پايدالانۋدا.

  ەنەرگيا تۇتىنۋ قۇرىلىمىن رەتتەپ، دامۋدىڭ حالىق تۇرمىسىنا تيىمدىلىك جەتكىزۋىنە مۇمكىندىك جاسادى. پارتيا 18 - قۇرىلتايىنان بەرى وڭتۇستىك شينجياڭداعى اۋىل - قىستاقتار كومىرمەن تاماق ىستەۋ، كومىرمەن جىلىنۋ تاريحىنا بىرتىندەپ قوش ايتىپ كەلەدى.

  2019 - جىلى شينجياڭ وڭتۇستىك شينجياڭدا كومىردى ەلەكترگە وزگەرتۋ (1 - مەرزىمدىك) ينجەنەرياسىن اتقارۋدى باستاپ، 3 جىلعا ءبولىپ اتقارىپ، قاشقار ايماعى، حوتان ايماعى، قىزىلسۋ وبلىسى سىندى 3 ايماقتاعى (وبلىس) شامامەن جيىنى 926 مىڭ وتباسىنداعى (بيڭتۋانداعى 34 مىڭ وتباسىن قامتيدى) تۇرعىندارعا تيىمدىلىك جەتكىزدى.

  اقتاۋ اۋدانى پىلال اۋىلى ھويلا الدى قىستاعىنىڭ تۇرعىنى چىمانگۇل ءاشىم شاتتانا: ”ەلەكترمەن جىلىنۋ جاقسى! ءۇيىمىز تازا بولدى، كوڭىل كۇيىمىز دە جادىراڭقى“، - دەدى.

  2020 - جىلى 11 - ايدىڭ سوڭىنا دەيىن وڭتۇستىك شينجياڭدا كومىردى ەلەكترگە وزگەرتۋ (1 - مەرزىمدىك) ينجەنەرياسى وڭتۇستىك شينجياڭداعى 3 ايماق - وبلىستاعى 604 مىڭ 800 وتباسىنداعى وزگەرتۋ مىندەتىن ورىندادى.

ەلەكتر تورىن جاڭالاۋ: اۋىل - قىستاقتىڭ تاماشا تۇرمىسىنا دەم بەردى

  ”13 - بەسجىلدىق“ مەزگىلىندە شينجياڭ اۋىل - قىستاق ەلەكتر تورىن جاڭالاۋدى، دارەجەسىن جوعارىلاتۋدى جەدەلدەتىپ، اۋىل - قىستاق وڭىرلەرىنىڭ ەلەكتردەن پايدالانا الۋدان ەلەكتردەن ورنىقتى پايدالانۋعا، ەلەكتردەن جاقسى پايدالانۋعا ويىسۋىنا مۇمكىندىك جاسادى.

  2020 - جىلى 6 - ايدىڭ 29 - كۇنى شينجياڭداعى ەڭ سوڭعى ەلەكتر تورى وقشاۋ تور اينالىمى جەتكىزىلەتىن اۋىل − تاشقورعان تاجىك اۆتونوميالى اۋدانى داتۇڭ اۋىلى ۇلكەن ەلەكتر تورىمەن تۇتاستىرىلدى. سونىمەن اۆتونوميالى رايوننىڭ ءتۇيىندى ينجەنەرياسى − فوتوۆولتتىق 11 اكىمشىلىك قىستاقتى ۇلكەن ەلەكتر تورىمەن تۇتاستىرۋ ينجەنەرياسى بۇكىلدەي اتقارىلىپ ىسكە قوسىلدى.

  ۇلكەن ەلەكتر تورىمەن تۇتاستىرىلعاننان كەيىن داتۇڭ اۋىلىندا ۇزدىكسىز ورنىقتى ەلەكتر قاينارى بارلىققا كەلىپ، ديقاندار وسىدان باستاپ توڭازىتقىش، كىر جۋۋ ماشيناسى سياقتى باستى وتباسى ەلەكتر جابدىقتارىنان الاڭسىز پايدالانا الاتىن بولدى، اۋىلدىق ەمحاناداعى رەنتكەن اسپابى سياقتى ەمدەۋ اسپاپتارىن، جابدىقتارىن دا حاۋىپسىز پايدالانۋعا مۇمكىندىك جاسالدى.

  2019 - جىلى اۆتونوميالى رايون فوتوۆولتتىق 11 اكىمشىلىك قىستاقتى ۇلكەن ەلەكتر تورىمەن تۇتاستىرۋ ينجەنەرياسى قۇرىلىسىن باستادى، 2019 - جىلدان 2020 - جىلعا دەيىن اۆتونوميالى رايون جانە مەملەكەت ەلەكتر تورى شەكتى سەرىكتەستىگى شامامەن 592 ميلليون يۋان ارناۋلى قارجى قوسىپ، ۇلكەن ەلەكتر تورىن كەڭەيتۋ تاسىلىمەن شالعاي تاۋلى قىستاقتارداعى ەلەكتر جەتىسپەۋ ماسەلەسىن جالپى بەتتىك شەشىپ، ءار وتباسىنا ورتا ەسەپپەن قوسىلعان قارجى 386 مىڭ يۋانعا جەتتى. فوتوۆولتتىق اكىمشىلىك قىستاقتار ۇلكەن ەلەكتر تورىمەن تۇتاستىرىلعاننان كەيىن قىستاق تۇرعىندارىنىڭ بايۋ ارناسى دا كەڭەيە ءتۇستى، كەي قىستاقتاردا كيىم - كەشەك وڭدەۋ زاۆودى، حالىقتىق تۇسەلحانا، شارۋالار شاتتىعى ساياجايى سياقتىلار قۇرىلا باستادى.

  ”13 - بەسجىلدىق“ مەزگىلىندە شينجياڭ ەلەكتر تورى جالپى 31 ميلليارد 200 ميلليون يۋان قارجى قوسىپ اۋىل - قىستاق ەلەكتر تورىن جاڭالاپ، دارەجەسىن كوتەردى، 748 شاعىن قالا - قالاشىقتىڭ (سەنترلى قىستاق) ەلەكتر تورىن جاڭالاپ، دارەجەسىن جوعارىلاتۋ جانە 992 تابيعي قىستاققا قوزعاۋشى كۇش ەلەكترىن تۇتاستىرۋدى ورىندادى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.