تيانشان تورى
تيانشان تورى   ›   جاڭالىقتار   ›   ەل ءىشى حابارى

جۇڭحۋا دەنە تاربيەسىنە بار قاجىر - قايراتىن سالدى

رۇڭ گوتۋان:

جۇڭحۋا دەنە تاربيەسىنە بار قاجىر - قايراتىن سالدى

□ شينحۋا اگەنتتىگىنىڭ ءتىلشىسى ياڭ شۋشين

رۇڭ گوتۋاننىڭ سۋرەتى. □ شينحۋا اگەنتتىگى تاراتقان

  ”ومىردە قانشا سايىس بار؟“

  جۋىقتا گۋاڭجوۋ دەنە تاربيە شۋەيۋانىندا «ەرلىكپەن سايىسۋ جولى» اتتى مۋزيكالى تەاترعا دايىندالۋ ءوتىپ جاتتى، رۇڭ گوتۋاننىڭ رولىن العان وقۋشى ارتيستىڭ ”سايىس“ دەپ ايعاي سالۋىمەن، ساحنانىڭ استىنداعى وقۋشىلار تولقىپ كەتتى. ايگىلى ۇستەل دوپ سپورتشىسى رۇڭ گوتۋاننىڭ جۇڭحۋا دەنە تاربيەسى ءۇشىن ەرلىكپەن سايىسقانىن باياندايتىن تەاتر 6 - ايدىڭ سوڭىندا قويىلادى.

  گۋاڭجوۋ دەنە تاربيە شۋەيۋانىنىڭ وقىتۋشىسى سۇن پىڭپىڭ بىلاي دەدى: ءبىز وسىنداي كوركەمونەر فورماسى ارقىلى وقىتۋشى - وقۋشىلارعا رۇڭ گوتۋاننىڭ جان قيارلىقپەن سايىسۋ رۋحىن جانە وتان ءۇمىتىن اقتايتىن اينىماس نيەتىن سەزىندىرىپ، جاس بۋىندى ۇزدىكسىز ەكپىندەي ىلگەرىلەۋگە جىگەرلەندىرۋدى ءۇمىت ەتەمىز.

  رۇڭ گوتۋاننىڭ انا مەكتەبى رەتىندە، گۋاڭجوۋ دەنە تاربيە شۋەيۋانى سوڭعى جىلداردان بەرى رۇڭ گوتۋان رۋحىن بوگەناي ەتكەن مەكتەپ اۋلاسى مادەنيەتىن دەن قويا تۇلعالاپ، رۇڭ گوتۋان رۋحىن جالعاستىرۋ جەلىلەس قيمىلدارىن ورىستەتىپ، جاس وقۋشىلاردى مۇرات - سەنىمدى بەكەمدەپ، بورىش ارقالاۋدى كۇشەيتۋگە جەتەكتەدى.

  رۇڭ گوتۋان 1937 - جىلى 8 - ايدىڭ 10 - كۇنى شياڭگاڭدا ماتروس وتباسىندا دۇنيەگە كەلگەن، ەرتەرەكتە اتا مەكەنى گۋاڭدۇڭنىڭ جۋحايىنداعى ءبىر حۋاچياۋلار مەكتەبىندە وقىعان، 1948 - جىلدىڭ باسىندا شياڭگاڭداعى سىيوۋ مەكتەبىنە اۋىسىپ بارىپ وقىعان. ونىڭ اكەسى رۇڭ ميانجى العاباسار ۇيىم − جۇمىسشىلار بىرلەستىگىنىڭ قاراستىلىعىنداعى ماتروس جۇمىسشىلار ۇيىمىنىڭ مۇشەسى بولاتىن، رۇڭ گوتۋان كىشكەنە كەزىندە ۇنەمى جۇمىسشىلار بىرلەستىگىنىڭ كاڭلى سارايىنا بارىپ ۇستەل دوپ وينايتىن.

  1957 - جىلى 2 - ايدا رۇڭ گوتۋان جۇمىسشىلار بىرلەستىگىنىڭ اتىنان بۇكىل شياڭگاڭدىق ۇستەل دوپ جارىسىنا قاتىناسىپ، ساپتاستارىمەن بىرگە ەرلەردىڭ توپتىق، ەرلەردىڭ جەكە جانە ەرلەردىڭ 2 ادامدىق ويىندارىنىڭ اعا جۇلدەگەرلىگىن الىپ قايتادى. سول جىلى 9 - ايدا رۇڭ گوتۋان شياڭگاڭ، اۋمىن ۇستەل دوپ قۇراماسىنىڭ مۇشەسى رەتىندە بەيجيڭگە، شاڭحايعا، حاڭجوۋعا بارىپ، وتانىمىزدىڭ ىشكى ءوڭىرىنىڭ كوركەيىپ - گۇلدەنگەن بەينەسىن ءوز كوزىمەن كورەدى. 2 ايدان كەيىن ول باتىلدىقپەن لوحۋ كوپىرىنەن ءوتىپ گۋاڭدۇڭعا كەلىپ، گۋاڭجوۋ دەنە تاربيە شۋەيۋانىندا قىزمەت ىستەيدى جانە وقيدى.

  1958 - جىلى 4 - ايدا رۇڭ گوتۋان گۋاڭدۇڭ ولكەسى دەنە تاربيە قىزمەتكەرلەرىنىڭ قارىشتاپ ىلگەرىلەۋ سەرت بەرۋ جينالىسىندا جىگەرلەنە سويلەپ: ”3 جىل ىشىندە دۇنيە جۇزىلىك ۇستەل دوپ جۇلدەلى جارىسىندا ەرلەر جەكە ويىنىنىڭ اعا جۇلدەگەرى بولامىن“، - دەيدى.

  1959 - جىلى 25 - كەزەكتى دۇنيە جۇزىلىك ۇستەل دوپ جۇلدەلى جارىسى فەدەراتسيالىق گەرمانيانىڭ دورتمۇند قالاسىندا وتكىزىلەدى. رۇڭ گوتۋان ءبىر جولدا ەرلەر جەكە ويىنىنىڭ شەشۋشى جارىسىنا كىرىپ، دۇنيە جۇزىلىك اعا جۇلدەگەر بولعان ۆەنگريالىق ساقا شەبەر شيدومەن سايىسقا تۇسەدى. شەشۋشى جارىستىڭ العاشقى اينالىمىندا جولى بولمادى، سوڭىنان رۇڭ گوتۋان ءۇرتىس 3 رەت جەڭىپ، اعا جۇلدەگەرلىككە يە بولادى. سەنت - برايد لوڭقاسىنا العاش رەت جۇڭگولىقتىڭ اتىن جازىپ قايتادى.

  ەلگە قايتقان سوڭ، ءتوراعا ماۋ زىدۇڭ، جوۋ ىنلاي زۇڭلي قاتارلى پارتيا مەن مەملەكەت باسشىلارى ۇستەل دوپ قۇراماسىنىڭ مۇشەلەرىن قابىلدايدى. بۇكىل ەلدە تەز ارادا ۇستەل دوپ ورلەۋى كوتەرىلەدى.

  1961 - جىلى 26 - كەزەكتى دۇنيە جۇزىلىك ۇستەل دوپ جۇلدەلى جارىسى بەيجيڭدە وتكىزىلەدى، جۇڭگو، جاپونيا قۇرامالارى ەرلەردىڭ توپتىق ويىنىنىڭ شەشۋشى جارىسىندا كەزدەسەدى. كوپتىڭ شابۋىل نىساناسى بولعان رۇڭ گوتۋان ىلگەرىندى - كەيىندى ديسۇن مەن مۋسۇننان جەڭىلىپ قالادى. ”كەلەسى جولى قايتپەكسىڭ“، - دەيدى ساپتاسى. ”ومىردە قانشا سايىس بار؟“ دەپ رۇڭ گوتۋان 2 جۇدىرىعىن ءتۇيىپ، شالقايىپ تۇرىپ قاتتى داۋىستايدى − ”قازىر سايىسپاساق، قاشانعى كۇتەمىز؟“. رۇڭ گوتۋان ەڭ سوڭىندا شيڭيە جانميدى جەڭەدى، جۇڭگو قۇراماسى العاش رەت ەرلەر توپتىق ويىنىنىڭ دۇنيە جۇزىلىك اعا جۇلدەگەرى بولادى.

  1965 - جىلى 28 - كەزەكتى دۇنيە جۇزىلىك ۇستەل دوپ جۇلدەلى جارىسى يۋگوسلاۆيانىڭ ليۋبليانيىندە اشىلادى، ايەلدەر قۇراماسىنىڭ باس جاتتىقتىرۋشىسى بولعانىنا 4 اي عانا بولعان رۇڭ گوتۋان جۇڭگو ايەلدەر قۇراماسىن باستاپ بارىپ، جاپونيا ايەلدەر قۇراماسىن جەڭىپ، كوربيللون لوڭقاسىن تۇڭعىش رەت الىپ قايتتى.

  ”مادەنيەت زور توڭكەرىسى“ الاساپىرانىندا رۇڭ گوتۋان جازىقسىز جابىرلەنىپ، زيانكەستىككە ۇشىرايدى. 1968 - جىلى 6 - ايدىڭ 20 - كۇنى ول ءوز تاسىلىمەن ءومىرىن اياقتاتادى. 1978 - جىلى مەملەكەتتىك دەنە تاربيە كوميتەتى رۇڭ گوتۋاندى اقتاپ، اتاق - ابىرويىن قالپىنا كەلتىردى. 2009 - جىلى رۇڭ گوتۋان ”جاڭا جۇڭگو قۇرىلعاننان بەرى جۇڭگونى اسەرلەندىرگەن 100 تۇلعانىڭ“ ءبىرى بولىپ باعالاندى. 2019 - جىلى 9 - ايدىڭ 25 - كۇنى رۇڭ گوتۋانعا ”ەڭ ارداقتى كۇرەسكەر“ داڭق اتاعى بەرىلدى.

  رۇڭ گوتۋاننىڭ ءومىرى ەرلىكپەن سايىسۋمەن قاتىستى، جۇڭحۋانىڭ دەنە تاربيەسىندە قول جەتكەن كوپتەگەن بىرىنشىلىكپەن تىعىز بايلانىستى بولدى. بۇل كۇندەرى رۇڭ گوتۋاننىڭ اعا جۇلدەگەر بولعانى بەينەلەنگەن ءمىس ءمۇسىنى گۋاڭجوۋ دەنە تاربيە شۋەيۋانىنىڭ ورتالىق الاڭىندا قاسقايىپ تۇر؛ شۋەيۋاننىڭ ۇستەل دوپ سارايىنىڭ ىشىنە رۇڭ گوتۋاننىڭ ەرلىكپەن سايىسقان سۋرەتتەرى ىلىنگەن. رۇڭ گوتۋان ايعايلاپ ايتقان ”ومىردە قانشا سايىس بار“ سان ۇرپاق جۇڭحۋا ۇلاندارىن وتان ءۇشىن ەرلىكپەن سايىسىپ، قايسارلىقپەن كۇرەس جاساۋعا جىگەرلەندىرىپ كەلەدى.

  (شينحۋا اگەنتتىگىنىڭ 6 - ايدىڭ 1 - كۇنى گۋاڭجوۋدان بەرگەن حابارى)

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.