تيانشان تورى   ›   جاڭالىقتار   ›   شينجياڭ حابارلارى

جوعارى جىلدامدىقتى تاس جول تورى جەدەل جەتكىزۋدى ونان ارى تەزدەتتى

انار بۇلت / شينجياڭ گازەتىنىڭ تىلشىلەرى چىن چياڭۋي، لۋ فىڭباۋ

  6 - ايدىڭ 12 - كۇنى جەدەل جەتكىزۋ جۇكتەرىن تاسيتىن اۆتوموبيلدەر شينجياڭ تيانيۋان جۇڭتۇڭ زات اينالىمى شەكتى سەرىكتەستىگىنەن شىعىپ بارادى. بۇل سەرىكتەستىك جۇڭتۇڭ جەدەل جەتكىزۋ سەرىكتەستىگىنىڭ شينجياڭدا بۇكىل ەلدىڭ جەر - جەرىمەن جەدەل جولدامالاردى وتكەرمەلەۋ جۇمىسىن ۇستىنە الىپ وتىر، قازىر ونىڭ جۇمىس تورى بۇكىل شينجياڭداعى %99 اۋدان دارەجەلى اۋماقتاردى قامتىعان.

□ انار بۇلت / شينجياڭ گازەتىنىڭ ءتىلشىسى جوۋ پىڭ تۇسىرگەن

  جىجياڭنان كەلگەن جولداما سانجىدا ىرىكتەلگەننەن كەيىن تاشقورعان تاجىك اۆتونوميالى اۋدانىنداعى تۇتىنۋشىنىڭ قولىنا قانشا ۋاقىتتا تيەدى؟ 6 - ايدىڭ 12 - كۇنى تۇستەن بۇرىن انار بۇلت / شينجياڭ گازەتى جالپىلىق اقپارات قۇرالدارى حابارلاۋ توبى شينجياڭ (سانجى) ازيا - ەۆروپا حالىقارالىق زات اينالىمى باقشاسىندا تىلشىلىك ىستەۋ بارىسىندا بۇل سۇراقتىڭ جاۋابىن تاپتى.

  ”بارلىق جولدامالار كوزەۋلى جەردەگى ولكە دارەجەلى جىكتەۋ ورتالىعىندا ىرىكتەلۋى قاجەت، ونان سوڭ ءبىر تۇتاس سايكەستى ايماق - وبلىستارعا جىبەرىلىپ، ونان ارى اۋداندارعا، اۋىل - قالاشىقتارعا، قىستاقتارعا جەتكىزىلىپ، الارماننىڭ قولىنا تابىستالادى “، - دەدى شينجياڭ تيانيۋان جۇڭتۇڭ زات اينالىم شەكتى سەرىكتەستىگى حاۋىپسىزدىك ءبولىمىنىڭ ديرەكتورى سۇن ليمين.

  شينجياڭ تيانيۋان جۇڭتۇڭ زات اينالىم شەكتى سەرىكتەستىگى جۇڭتۇڭ جەدەل جەتكىزۋ شينجياڭ باس ءبولىمىنىڭ جىكتەۋ ورتالىعى سانالادى، ليانيۇنگاڭ - قورعاس جوعارى جىلدامدىقتى تاس جولىنىڭ (G30) سانجى باتىس اۋزىنان ءبىر كيلومەترگە جەتپەيتىن جەردە. ول جۇڭتۇڭ جەدەل جەتكىزۋ سەرىكتەستىگىنىڭ شينجياڭ مەن بۇكىل ەلدىڭ جەر - جەرى اراسىنداعى جەدەل جولدامالاردى وتكەرمەلەۋ جۇمىسىنا جاۋاپتى.

  تىلشىلىك سۇحباتىن قابىلداعان كەزدە، چىڭدۋدان شينجياڭعا كەلەتىن جولدامالاردى تاسۋعا جاۋاپتى جۇك اۆتوموبيلىنىڭ شوفەرى زوۋ چيڭپيڭ جۇك اۆتوموبيلىندە جولدامالاردىڭ كولىككە تيەلۋىن كۇتىپ وتىر ەكەن. ”اۆتوموبيلمەن مولشەرمەن 43 ساعات جول ءجۇرۋ ارقىلى 6 - ايدىڭ 12 - كۇنى تۇنگى ساعات ءبىر شاماسىندا ءبىز چىڭدۋدان كولىككە تيەلگەن زاتتاردى الىپ سەرىكتەستىكتىڭ ىرىكتەۋ قويماسىنا جەتتىك. بارلىق جولدامالار كولىكتەن تۇسىرىلگەن سوڭ، اۆتوماتتى ىرىكتەۋ جەلىسىنە جەتكىزىلدى“، - دەيدى زوۋ چيڭپيڭ.

  ەندەشە، اۆتوماتتى ىرىكتەۋ جەلىسى قالاي جۇمىس ىستەيدى؟ ىرىكتەۋ سەحىندا جولدامالار ۇزىن U ءتارىزدى جونەلتكىش تاسپاعا شىعارىلىپ، اۆتوماتتى تۇردە كود سكانەرلەۋ، سالماق ولشەۋ، ىرىكتەۋ جۇمىستارىنان كەيىن، ”ءۇرىمجى داۋان“، ”فۋكاڭ“، ”حوتان چەريا اۋدانى“ سياقتى بەلگىلەر جاپسىرىلعان ۇياشىقتارعا دالمە - ءدال، جەدەل ”تاستالىپ“، ىلە - شالا ۇياشىقتىڭ استىنداعى اينالمالى دورباعا تۇسەدى.

  بۇل اينالمالى دوربالار تولعان سوڭ، جونەلتكىش تاسپا ارقىلى زات شىعارۋ اۋماعىنا جەتكىزىلىپ، وسى جەردە تۇرلىشە باعىتتاعى جۇك اۆتوموبيلدەرىنە ”تيەلىپ“، جولدامالار ءتيىستى رايون - اۋداندارعا اپارىلىپ، تاعى ءبىر مارتە ىرىكتەۋدەن ءوتىپ، ەڭ سوڭىندا تۇتىنۋشىنىڭ قولىنا تيەدى.

  2020 - جىلى شينجياڭ پوچتا سالاسى كاسىبىنىڭ جالپى تابىسى 5 ميلليارد يۋاننان استامعا جەتتى. مۇنىڭ ىشىندە، جەدەل جەتكىزۋدەن قىزمەت وتەيتىن كاسىپورىندار 114 ميلليون 861 مىڭ 700 جولداما جونەلتۋ جۇمىسىن ورىنداپ، سايكەس مەزگىلدەگىدەن %15.99 ارتتىردى.

  وسىنشاما مول تاپسىرىس مولشەرىن تەك ادام كۇشىنە سۇيەنىپ ورىنداۋ ارينە مۇمكىن ەمەس. زات اينالىمى كاسىپورىندارى قانداي تاسىلمەن وسىنشاما كوپ جەدەل جەتكىزۋ جولدامالارىن تەز، جوعارى ونىمدىلىكپەن جەتكىزە الادى؟

  ”مىنا اسپاپقا سۇيەنەمىز، بۇل ءبىزدىڭ ەڭبەككۇشتىڭ وزىندىك قۇنىن جارتىسىنان كوبىن تومەندەتىپ، جۇمىس ونىمدىلىگىن 4 ەسەدەن استام جوعارىلاتتى“، - دەيدى سۇن ليمين جۇمىس ۇستىندەگى اۆتوماتتى ىرىكتەۋ جەلىسىن نۇسقاپ تۇرىپ.

  سۇن ليمين تىلشىگە بىلاي دەدى: جولدامالار جۇمىس اۋماعىنا كەلىپ ىرىكتەلىپ، قويمادان شىعارىلعانعا دەيىنگى جالپى بارىسقا تەك ءبىر ساعات مولشەرىندە ۋاقىت جۇمسالادى. بۇل جەردەن تاشقورعان تاجىك اۆتونوميالى اۋدانىنا جەتكىزىلگەنشە تەك 40 نەشە ساعات كەتەدى.

  ”2019 - جىلى ءبىز 17 ميلليون يۋاننان استام قارجى قوسىپ تەحنيكالىق جاڭارتۋ جۇرگىزىپ، اۆتوماتتى ىرىكتەۋ جەلىسىن ەنگىزدىك، قازىر ءار كۇنگى جولداما جونەلتۋ قابىلەتى ميلليون داناعا تايايدى“، - دەيدى سۇن ليمين، ونىڭ ايتۋىنشا، قازىر سەرىكتەستىك ءار كۇنى 500 مىڭعا جۋىق جەدەل جولداما جونەلتەدى، بۇل 2015 - جىلداعىنىڭ 10 ەسەسىنە تەڭ كەلەدى ەكەن.

  جاقىنعى بىرنەشە جىلدا، قاۋىرت وسكەن جەدەل جولداما جەتكىزۋ سۇرانىسىن قاناعاتتاندىرۋ ءۇشىن، اتالعان سەرىكتەستىكتىڭ شينجياڭ ءىشى - سىرتىنداعى جەتكىزۋ جەلىلەرىنىڭ سانى زور مولشەردە كوبەيدى. ”2019 - جىلدان بەرى ءبىز شينجياڭنان جينحۋا، چىڭدۋ، كۇنميڭ سياقتى جەرلەرگە باراتىن 5 جەلى اشتىق، قازىر شينجياڭنان شىعاتىن جەلىلەر سانى 10عا جەتتى. شينجياڭ ىشىندەگى جەلىلەر جالپى 25كە جەتىپ، بۇكىل شينجياڭداعى بارلىق ايماق - وبلىستى قامتىپ وتىر“، - دەيدى اتالعان سەرىكتەستىكتىڭ اۆتوموبيل توبىنىڭ جاۋاپتىسى جىن شياۋ.

  جەتكىزۋ ونىمدىلىگىن جوعارىلاتۋ ءۇشىن، شينجياڭ تيانيۋان جۇڭتۇڭ زات اينالىم شەكتى سەرىكتەستىگى بۇكىل شينجياڭدا 1 - دارەجەلى جۇمىس تورابى تۇيىندەرىنەن مولشەرمەن 200ىن قۇرىپ، جەدەل جەتكىزۋ تورىمەن بۇكىل شينجياڭداعى بارلىق اۋدان دارەجەلى اۋماقتاردى قامتىدى. بۇل جاعىنداعى 2 - مەرزىمدىك ينجەنەريا دا قازىر قۇرىلۋ ۇستىندە، بۇل شەكارا اتتاعان ەلەكتروندى ساۋدا جولدامالارىن جەتكىزۋ جۇمىسىنا پايدالانىلادى ەكەن.

  شار تاراپپەن ۇلاسىپ جاتقان جوعارى جىلدامدىقتى تاس جول تورى جوعارى ءونىمدى، قولايلى زات اينالىم تورىن تۇلعالاپ، بۇكىل شينجياڭداعى زات اينالىم كاسىبىنىڭ جەدەل دامۋىن جەتەكتەپ قانا قويماي، جىبەك جولى ەكونوميكالىق بەلدەۋى وزەكتى رايونى ساۋدا - زات اينالىم ورتالىعى قۇرىلىسى ءۇشىن دە بەرىك نەگىز قالادى. قازىرگە دەيىن، شينجياڭ (سانجى) ازيا - ەۆروپا حالىقارالىق زات اينالىم باقشاسىنا جۇڭتۇڭ جەدەل جەتكىزۋى، يۋانتۇڭ جەدەل جەتكىزۋى، جۇڭجياڭ زات اينالىمى، كۋايليدا زات اينالىمى سياقتى 16 زات اينالىم كاسىپورنى ىرگە تەپتى، مۇنىڭ ىشىندە 4A دارەجەلى 2، 3A دارەجەلى ءبىر زات اينالىم كاسىپورنى بار، جالپىلىق زات اينالىم مولشەرى 10 ميلليون تونناعا جەتكەن بۇل باقشا بۇكىل شينجياڭعا قانات جايۋ، ورتا ازيامەن ۇلاسۋ سىندى قىزمەت وتەۋ قابىلەتىنە يە بولىپ وتىر.

جول داڭعىل، زات اينالىمى ىركىلىسسىز

6 - ايدىڭ 12 - كۇنى، سەنبى، كۇن اشىق

  تاس جولداردىڭ شار تاراپپەن تۇتاسىپ، تور قالىپتاستىرۋى قايسى كاسىپ سالاسىنا ەڭ ۇلكەن ىقپال جاسادى؟ زات اينالىمى كاسىبىنىڭ مۇنىڭ تىكەلەي يگىلىگىن كورۋشىلەردىڭ ءبىرى ەكەنى ءشۇباسىز.

  تىلشىلىك ساپارىندا انار بۇلت / شينجياڭ گازەتى جالپىلىق اقپارات قۇرالدارى حابارلاۋ توبى ەل ىشىندەگى ءبىرشاما كولەمدى ءبىرقانشا زات اينالىمى كاسىپورىندارى شينجياڭ ىرىكتەۋ ورتالىعىن نە ءۇشىن سانجى قالاسىندا قۇرىپ وتىر دەگەن ماسەلە ۇستىندە تالقى جۇرگىزدى.

  ءبىز تىلشىلىك بارىسىندا بۇعان جاۋاپ تاپتىق: شار تاراپقا ۇلاسقان جول تورى، سونداي - اق تاماشا شارۋاشىلىق - ساۋدا ورتاسى، ءتيىمدى ساياسات، مىنە بۇلاردىڭ بارلىعى وسى جەردىڭ زات اينالىم كاسىبىنىڭ دامۋىنا تىرەك بولاتىن باسىمدىعى بولىپ تابىلادى.

  ۋاقىت ونىمدىلىگى زات اينالىم كاسىپورىنداردىڭ باسەكەلىك قابىلەتىنە اسەر ەتەتىن ماڭىزدى فاكتورلاردىڭ ءبىرى. زات اينالىم كاسىپورىندارى تەحنيكانى جاڭارتۋ ارقىلى تۇتىنۋشىنىڭ ۋاقىتىن ۇنەمدەپ قانا قويماي، ءوزىنىڭ دامۋ ءورىسىن دە كەڭەيتەدى. زات اينالىم كاسىپ سالاسىنىڭ زەردەلىلەنۋ، سيفرلانۋ دەڭگەيىنىڭ جوعارىلاۋىنا مەڭزەس، زات اينالىم كاسىپورىندارى دامۋ اۋقىمىنا ءجىتى ىلەسىپ، زات اينالىمنىڭ زەردەلىلەنۋ دەڭگەيىن جەدەل كوتەرگەندە عانا جەڭىمپاز ورىندا تۇرا الادى.

  (چىن چياڭۋي)

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.