قىزىلسۋ وبلىسى:
حالىق تۇرمىسىنداعى ناقتى ىستەردى ويداعىداي ىستەپ، بۇقارانىڭ ىرىس - قۇتىن مولايتتى
□ انار بۇلت / شينجياڭ گازەتىنىڭ ءتىلشىسى سۇڭ ۋيگو، ەرىكتى ءتىلشى ياڭ پىڭ
پارتيا تاريحىن ۇيرەنۋ تاربيەسى ورىستەتىلگەننەن بەرى قىزىلسۋ قىرعىز اۆتونوميالى وبلىسى دارىندىلاردى باۋلۋدى مىقتى يگەرۋگە، ەرەكشە كاسىپ سالالارىن مىقتى يگەرۋگە، نەگىزدىك قۇرىلىستى مىقتى يگەرۋگە سۇيەنىپ، كەدەيلىكتەن ارىلتۋدان قامال الۋ جەتىستىكتەرىن ۇزدىكسىز بەكەمدەۋدى، ۇلعايتۋدى اۋىل - قىستاقتى گۇلدەندىرۋمەن ءونىمدى ۇشتاستىردى. ”ءبىز پارتيا تاريحىن ۇيرەنۋ تاربيەسىن جەتەكشى ەتۋگە تاباندى بولىپ، ’مەن بۇقارا ءۇشىن ناقتى ءىس ىستەيمىن‘ امالياتتىق قيمىلىن ارقاۋ ەتىپ، ’حالىققا ءتيىمدى 10 ينجەنەريانى‘ تىڭعىلىقتى ىلگەرىلەتىپ، ’حالىق ءۇشىن 10 ناقتى ءىستى‘ كۇش سالا ويداعىداي ىستەپ، جۇمىستاندىرۋدى كەڭەيتۋ، كىرىستى ارتتىرىپ، بايۋ جولىنا ءتۇسۋ، وقۋ - اعارتۋدىڭ دەڭگەيىن كوتەرۋ، جالپى حالىقتىڭ سالاماتتىعى سياقتى جاقتاردا ءتۇيىندى تۇردە ۇزدىكسىز كۇش سالىپ، حالىق تۇرمىسىنداعى ءبىر توپ ناقتى ىستەردى كۇشتى شوعىرلاندىرا وتىرىپ ويداعىداي ىستەپ، پارتيا تاريحىن ۇيرەنۋ تاربيەسىنىڭ جەتىستىكتەرىن بۇقارانى باقىتقا كەنەلتۋدىڭ ناقتى ونىمدىلىگىنە شىنايى اينالدىرىپ، ءار ۇلت بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن ۇزدىكسىز جوعارىلاتتىق“، - دەدى 6 - ايدىڭ 5 - كۇنى قىزىلسۋ وبلىستىق پارتكومنىڭ تۇراقتى مۇشەسى، ۇنەمىلىك ىستەرگە جاۋاپتى ورىنباسار وبلىس باستىعى ۋاڭ شينگاڭ تىلشىگە.
جاڭاشا شارۋالاردى باۋلىپ، جاڭاشا اۋىل - قىستاق قۇردى
”ءارى نەگىزگى نازاريالىق جەتەكشىلىك تە، ءارى امالياتتىق جەتەكشىلىك تە بار بۇل جولعى كۋرس مەنىڭ ءوندىرىستى ويداعىداي جۇرگىزۋىم جونىندە اسا كۇشتى جەتەكشىلىك سيپاتقا يە ەكەن“، - دەدى اتۇش قالاسى سۇنتاع اۋىلى سۇنتاع قىستاعىنىڭ ەگىنشىسى ابدۇسالام ازەز قىزىلسۋ وبلىستىق اۋىل شارۋاشىلىعى راديو - تەلەۆيزيا مەكتەبىنىڭ ەگىنشى - مالشىلار جوعارى ساپالى كۋرسىنىڭ ۇيرەنۋىنە قاتىناسقان سوڭ تەبىرەنە.
بيىل جىل باسىنان بەرى، قىزىلسۋ وبلىسى اۋىل شارۋاشىلىعىن سۇيەتىن، تەحنيكادان حابارى بار، شارۋاشىلىق جۇرگىزۋگە ەبى بار، سونداي - اق اۋىل - قىستاققا تامىر تارتىپ ءىس تىندىرىپ، ناتيجە شىعارا الاتىن جاڭاشا كاسىبي شارۋالاردى زور كۇشپەن باۋلىدى. ۇزدىكسىز ۇيرەنۋ جانە امالياتتان وتكىزۋ ارقىلى مول عىلمي ەگىنشىلىك تاجىريبەلەرىن جيناعان ولار قاراپايىم، ۇعىنىقتى سوزدەرمەن باسقا دا شارۋالارعا اقىل كورسەتىپ، تەحنيكا ۇيرەتىپ، ۇلگى بولدى.
اۋىل - قىستاقتىڭ دارىندىلار تىرەگى جۇيەسىن ۇزدىكسىز اقاۋسىزداندىرۋ، كەمەلدەندىرۋ ءۇشىن، قىزىلسۋ وبلىسى تاعى اۋىل دارىندىلارى ينفورماتسيا قامباسىن قۇرىپ، اۋىل - قىستاقتا بايۋعا باستاۋشى ادامدار مەن ۇلگى بولاتىن وتباسىلاردى جەتىلدىردى. اسىرەسە، ءىسورىندارىنداعى تەحنيك قىزمەتكەرلەرگە باعىتتالعان كاسىپتىك اتاق باعالاۋ جۇيەسىن جاڭاشا كاسىبي شارۋالارعا دەيىن كەڭەيتىپ، نەگىزگى ساتىداعى كەدەيلىكتەن ارىلعان بۇقارانىڭ جاسامپازدىق ىنتاسىن، جاڭالىق جاساۋ ىنتاسىن قاۋلاتتى. بيىل ءبىرىنشى ماۋسىمدا، قىزىلسۋ وبلىسى كەدەيلىكتەن ارىلعان بۇقارانى شەبەرلىككە باۋلۋ كۋرسىنان 1004 كەزەك وتكىزدى، وعان قاتىناسقان كۋرسانتتار 39 مىڭ 200 ادام - رەتكە جەتتى.
جاڭا كاسىپ سالالارىن جەتىلدىرىپ، جاڭا نىسانداردى دامىتتى
ەكونوميكانىڭ دامۋى كاسىپ سالاسىنا سۇيەنەدى، كاسىپ سالاسى وركەندەمەيىنشە، اۋىل - قسىتاقتىڭ گۇلدەنۋى كوزسىز بۇلاق پەن تامىرسىز اعاشقا اينالىپ قالادى.
اتۇش قالاسى جوعارعى اتۇش قالاشىعى تاقۇت قىستاعىنداعى شارۋاشىلىق قۇرۋ بازاسىنىڭ زاۆود ۇيلەرىنە كىرسەڭىز، مىڭ توننادان اساتىن جاڭعاق كەڭ زاۆود ءۇيىنىڭ ىشىندە سالماق ولشەۋدەن وتكىزىلىپ، جاشىككە سالىنىپ جاتقانىن كورەسىز. جاڭعاقتاردىڭ قوراپتالىپ جەر - جەرگە جونەلتىلىپ جاتقانىن كورگەن وسى قىستاقتىڭ تۇرعىنى اركىن ابىلەزدىڭ جۇزىنە ريزالىق كۇلكىسى ءۇيىرىلدى.
تاقۇت قىستاعى ەرەكشە جەمىس ورمانى كاسىبىنىڭ ساپاسىن كوتەرىپ، ونىمدىلىگىن ارتتىرۋ نىساندارىن كۇش سالا اتقارىپ، جاڭعاقتىڭ ساپاسىن ۇزدىكسىز ءوسىردى، ناتيجەسىندە جاڭعاققا سۇيەنىپ بايۋ جولىنا تۇسكەن بۇقارانىڭ قاتارى بارعان سايىن كوبەيدى. تاقۇت قىستاعى تاعى جۇڭگو حۋاديان توبى شەكتى سەرىكتەستىگىمەن جاڭعاق ساتۋ تاپسىرىسىن جاساسىپ، تاپسىرىس بويىنشا ساتىپ الۋدى، دارەجەلەر بويىنشا ساتۋدى، جىنتىكتەي مانەرلەۋدى ءبىر تۇلعالاندىرعان كاسىپ سالاسى تىزبەگىن قالىپتاستىردى.
تاقۇت قىستاعى كاسىپ سالاسىنىڭ دامۋى ارقىلى كەدەيلىكتەن ارىلتۋدىڭ جەتىستىكتەرىن بەكەمدەۋگە تاباندى بولىپ، اناعۇرلىم كوپ قىستاق تۇرعىنىنىڭ ۇيلەرىنىڭ جانىندا كىرىستەرىن ارتتىرۋىن، بايۋىن جۇزەگە اسىردى. تاقۇت قىستاعىندا 2019 - جىلى 9 - ايدا قۇرىلعان جۇمىستاندىرۋ، شارۋاشىلىق قۇرۋ بازاسىنا قازىرگە دەيىن 3 كاسىپورىن ىرگە تەۋىپ ۇلگىردى.
”قازىر مەن اي سايىن 2500 يۋان ەڭبەكاقى الامىن“، - دەدى وسى بازاداعى بو - ي تەرى قولعاپ وڭدەۋ زاۆودىنىڭ قىزمەتشىسى ساياتگۇل كەرىم قولعاپتىڭ شەتىن جورمەپ جاتىپ.
تاقۇت قىستاعىنداعى كاسىپ سالاسىنىڭ دامۋى قىزىلسۋ وبلىسىنىڭ كاسىپ سالاسىنىڭ جەتەكتەۋ قۋاتىن كوتەرۋ ارقىلى جالپى كاسىپ سالاسى تىزبەگىن دامۋعا باستاپ، بۇقارانىڭ ورنىقتى جۇمىستانۋىنا، كىرىستى ارتتىرۋىنا مۇمكىندىك تۋدىرعاندىعىن كورسەتەدى.
جاڭا شاعىن اۋماق قۇرىپ، جاڭا ءومىردىڭ راقاتىن كوردى
اتۇش قالاسى قاراجول اۋىلى ورتا قاراجول قىستاعىنىڭ وتىرىقتاندىرۋ اۋماعىنداعى شوعىرلى، تۇتاسقان تۇيىندە، جاڭادان بوي كوتەرگەن بەيقۇت ۇيلەر قاز - قاتار ءتىزىلىپ، ايرىقشا كوز تارتادى.
6 - ايدىڭ 5 - كۇنى تاڭ سارىدە، شاكىر كەرىماحۇننىڭ ايەلى ءۇيدىڭ ءىشىن تازالاي باستادى، بۇل ونىڭ ءار كۇنگى تاڭەرتەڭگى تاماقتان كەيىن قولعا الاتىن ءبىرىنشى جۇمىسى. ”پارتيا مەن ۇكىمەتتىڭ قامقورلىعى مەن كومەگىندە، ءبىز جاقسى تۇرمىس كەشىردىك، باقىتتى ىستەر ساناپ تاۋىسقىسىز. سونىڭ ىشىندە ەڭ ءبىر قۋانىشتى ءىسىمىز وتباسىمىزدىڭ عيمارات ۇيگە كوشىپ كىرگەندىگى بولدى“، - دەيدى قازىرگى تۇرمىسىنا ءدان ريزا بولعان شاكىر.
”قىزىلسۋ وبلىسى قونىس ورتاسىنىڭ، نەگىزدىك قۇرىلعىلاردىڭ جانە الەۋمەتتىك قىزمەت وتەۋدىڭ ساپاسىن ۇزدىكسىز جوعارىلاتىپ، كورىكتى، قونىستانۋعا جايلى اۋىل - قىستاق، شارۋا ۇيلەرى قۇرىلىسى، اۋىل - قىستاقتاعى تۇرمىستىق قوقىر - قوقسىقتاردى ءبىر جاقتى ەتۋ سياقتى قىزمەتتەردى ورىستەتۋ ارقىلى قىزىلسۋ وبلىسىنىڭ ەرەكشەلىگىنە يە، ۇلگى بولۋ، جەتەكتەۋ اسەرى كورنەكتى اۋىل - قىستاقتى گۇلدەندىرۋدىڭ ۇلگىلى قىستاق - قالاشىقتارىنان ءبىر توبىن قۇرادى“، - دەدى قىزىلسۋ وبلىستىق تۇرعىن ءۇي جانە قالا، اۋىل قۇرىلىسى مەكەمەسى قىستاق - قالاشىق ءبولىمىنىڭ باستىعى اۋ شين.
