انار بۇلت / شينجياڭ گازەتىنىڭ ءتىلشىسى ليۋ ي 6 - ايدىڭ 25 كۇنى ۇرىمجىدەن حابارلايدى. ءتىلشىنىڭ اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىنشا، جۋىقتا رايونىمىزدىڭ دۇمبە ءبيدايعا وراق سالۋى وڭتۇستىكتەن سولتۇستىككە قاراي ىركەس - تىركەس باستالىپ، جازعى استىقتان ءونىم الۋ مەزگىلى جەتتى. تۇتاس رايوندا (جەرگىلىكتى ورىن) جالپى 5 ميلليون 256 مىڭ 600 مۋ جەردەگى ءبيدايدان ءونىم الىنىپ، بىلتىرعى ۇقساس مەزگىلدەگىدەن 658 مىڭ 300 مۋ ارتقان، وڭتۇستىك شينجياڭدا دۇمبە ءبيدايدان ءونىم الۋ سالىستىرماسى ％63كە جەتىپ، ءونىم الۋ قىزمەتىنىڭ اياق الىسى ءساتتى جۇرىلگەن.
بيىل جىل باسىنان بەرى تۇتاس رايونداعى استىق وندىرەتىن ءارقايسى نەگىزگى القاپتار ەرتە باستان جوسپار جاساپ، تىڭعىلىقتى ورنالاستىرۋ ىستەپ، جازعى استىقتى جيناۋ ماشينالارىن سايكەستىرۋ، تاسىمالداۋ، جەتكىزۋ قىزمەتتەرىن بەلسەنە ۇيىمداستىردى، اۋا رايىنىڭ جانە ءبيدايدىڭ پىسۋ جاعدايىنا مەڭزەس، پىسقاندارىن جيناپ، استىقتى تۇگەلدەي قامباعا سالۋعا شىنايى كەپىلدىك ەتىلدى. سونىمەن ءبىر ۋاقىتتا، رايونىمىزدىڭ فينانس، استىق جانە زاتتىق ماتەريالدار زاپاس قورى سياقتى تاراۋلارمەن تىعىز سايكەسىپ، جازعى استىقتى ساتىپ الۋ جونىنەن قىزمەت وتەۋىمەن قامتاماسىزداندىرۋ قىزمەتىن دەر كەزىندە ويداعىداي ورىستەتىپ، استىقتىڭ ساتىلۋىنا، زاپاس ساقتالۋىنا شىنايى كەپىلدىك ەتىپ، ”اق تالون بەرۋ“، باعانى بەتالدى ارزانداتۋ سياقتى جاعدايلاردىڭ تۋىلۋىن تۇبەگەيلى جويدى. قازىر رايونىمىزدىڭ استىقتى جانە زاتتىق ماتەريالداردى زاپاس ساقتاۋ تاراۋلارى 2 ميلليون 940 مىڭ توننادان استام استىقتى قامباعا ساقتاۋعا دايىندالدى، اۋىل شارۋاشىلىعىن دامىتۋ بانكەسىنىڭ شينجياڭ بولىمشە بانكەسى قاتىستى سەنىمدى قارىز قارجىسىنان 9 ميلليارد 600 ميلليون يۋان ورنالاستىرىپ، جازعى استىقتى ساتىپ الۋعا تولىق قامتاماسىزدىق ازىرلەدى.
اۋىل شارۋاشىلىق جاعدايى ورنالاستىرۋى جونىندەگى ەڭ جاڭا مالىمەتتە كورسەتىلۋىنشە، بيىل تۇتاس رايوندا ءبيداي ەگىلگەن جەر كولەمى بىلتىرعىدان ارتىپ، جالپى ءونىم مولشەرىنىڭ 500 مىڭ توننادان استام ارتاتىندىعى مەجەلەندى، تۇتاس رايوندا جازعى استىقتان مول ءونىم الىناتىندىعى تۇراقتاندى. كەزەكتە تۇتاس رايونداعى ءار دارەجەلى اۋىل شارۋاشىلىعى، اۋىل - قىستاق تاراۋلارى تەحنيكتەردى اتىز باستارىنا، ەگىنجايلارعا بارىپ، جازعى جيىن - تەرىن، جازعى ەگۋ، اتىز - ارىقتاردى باپتاۋ - باسقارۋ سياقتى بۋىنداردا تەحنيكالىق جەتەكشىلىك ەتۋگە ۇيىمداستىرىپ، اۋىل شارۋاشىلىعىندا ونىمدىلىكتى ارتتىرۋدى، ديقانداردىڭ كىرىسىن جوعارىلاتۋدى وزەك ەتىپ، ديقانداردىڭ ەگىس ۋاقىتىن مىقتى يگەرىپ، ەگىمشىلىك قۇرىلىمىن ۇيلەسىمدى رەتتەپ، قايتا جۇگەرى ەگۋ جانە قىسقى زاپاس كوكونىستەردى ءوندىرۋ سياقتى نىسانا - مىندەتتەردى تياناقتاندىرىپ، تۇقىم سەبۋ ساپاسىن قۇلشىنا جوعارىلاتىپ، تۇتاس جىلداعى استىقتىڭ جانە ماڭىزدى اۋىل شارۋاشىلىعى ونىمدەرىنىڭ ءونىمىن ورنىقتىرىپ، قامداۋعا كەپىلدىك ەتۋ نەگىزىن بەكەمدەدى.
