تيانشان تورى   ›   جاڭالىقتار   ›   ەل ءىشى حابارى

ارميانى قۇدىرەتتەندىرۋ جولىندا ماڭگى اتوي سالدى

    ”مينا تازالاۋشى قاھارمان جاۋىنگەر“ − دۋ فۋگو:

    ارميانى قۇدىرەتتەندىرۋ جولىندا ماڭگى اتوي سالدى

    □ لي چيڭحۋا، گاۋ تىڭ

2020 - جىلى 1 - ايدىڭ 2 - كۇنى، ”مينا تازالاۋشى قاھارمان جاۋىنگەر“ − دۋ فۋگو (سولدا) جاۋىنگەر سەرىگىمەن بىرگە قۇرلىق ارميا اسكەري مەديتسينا داشۋەسىنىڭ جاتتىعۋ الاڭىندا جۇگىرۋدە. □ سۋرەتتى شينحۋا اگەنتتىگىنىڭ ءتىلشىسى ۋاڭ چۋانچاۋ تۇسىرگەن

  ”كەش جارىق، تىڭدارمان دوستار، بۇل نانلۋ ءۇنى باعدارلاماسى. كەشكى ساعات 8، مەن اسكەري تەڭبىل كيىم كيىنگەن سىزدەردىڭ سەرىكتەرىڭىز، جۇرگىزۋشى دۋ فۋگو بولامىن...“، راديودان قۇلاققا جاعىمدى ءۇن كوتەرىلدى. مينا تازالاۋشى قاھارمان جاۋىنگەر دۋ فۋگو اسكەري كازارماداعى اڭگىمەلەردى، مينا تازالاۋ اڭگىمەلەرىن بايانداۋدا...

  دۋ فۋگو، 1991 - جىلى 11 - ايدا گۇيجوۋ ولكەسى زۇن - ي قالاسى مەيتان اۋدانىندا دۇنيەگە كەلگەن، 2010 - جىلى 12 - ايدا قوسىنعا قاتىناسقان، شاڭشى اسكەري شەنىنە يە، وڭتۇستىك بولىك سوعىس رايونى قۇرلىق ارمياسى بەلگىلى دادۇيىنىڭ شىگۋانى، كەزىندە 1 - دارەجەلى ەڭبەك كورسەتكەن، قۇرلىق ارمياسىنىڭ تۇڭعىش كەزەكتى ”ءتورتتى ازىرلەگەن“ جاڭا داۋىردەگى توڭكەرىستىك اسكەريلەر ۇلگىسى بولىپ باعالانعان. 2015 - جىلدان باستاپ ول شەكاراداعى مينا تازالاۋ ارەكەتىنە بەلسەنە تىزىمدەلىپ، قاتىناسىپ، مينا الاڭىنا ىلگەرىندى - كەيىندى 1000 رەتتەن استام كىرىپ - شىعىپ، جالپى 2400دەن استام مينانى، جارىلعىش زاتتى تازالاپ، 20 نەشە رەت قاتەرلى جاعدايدى ءبىر جاقتى ەتكەن.

  2018 - جىلى 10 - ايدىڭ 11 - كۇنى تۇستەن كەيىن يۇننان شەكاراسىنداعى ادام كۇشىمەن مينا تازالاۋ مىندەتىن اتقارىپ جۇرگەن كەزىندە، دۋ فۋگو مەن ونىڭ جاۋىنگەر سەرىگى اي يان كەنەتتەن ءبىر شەتى كورىنىپ جاتقان جارىلعىش زاتتى بايقايدى. كۇماندى جارىلعىش زات الدىندا گرۋپپا باستىعى دۋ فۋگو جاۋىنگەر سەرىگىنە: ”سەن كەيىن تۇر، مەن ىستەيىن“، - دەيدى. ءبىر - بىرلەپ تەكسەرۋ بارىسىندا كەنەت جارىلىس تۋىلادى. ءولىم مەن ءومىر ارپالىسقان سىن ساعاتتا دۋ فۋگو ءوز دەنەسىمەن ارتىندا تۇرعان جاۋىنگەر سەرىگىن قورعاپ قالادى، ءبىراق ءوزى قوس قولى مەن قوس جانارىنان ايرىلادى...

  ءۇش كۇن، ءۇش ءتۇن، ىلگەرىندى - كەيىندى 5 رەتكى ۇلكەن وپەراتسيادان كەيىن دۋ فۋگو اقىرى اجال اۋزىنان امان قالادى. ول ەسىن جيا سالىسىمەن:

  ” اي يان قانداي؟“، - دەپ سۇرايدى.

  ونىڭ ءبىرىنشى تالابى:

  ”جاراقاتىمدى دەرەۋ ەمدەڭىزدەر، مەن تاعى مينا تازالاۋعا بارامىن!“، - دەدى.

  دۋ فۋگونىڭ قوس جانارى مەن بۇكىل دەنەسىندەگى تىرتىقتاردى ءار كۇنى تازالاپ جۋۋعا، ءدارى اۋىستىرۋعا تۋرا كەلەتىن ەدى. جان توزگىسىز اۋرۋ ازابىنا كوپ ساندى ادام توزە الماس ەدى، ءبىراق ول ءلام دەمەي شىداپ جاتا بەردى. ويتكەنى ونىڭ كوڭىلىندە ”مينا الاڭىنا ەرتەرەك ورالىپ، حالىق بۇقاراسىن مينانىڭ حاۋىپ - قاتەرىنەن اراشالاسام“ دەگەن ءبىر عانا نىسانا بار ەدى.

  ءوزىنىڭ قوس جانارى مەن قوس قولىنان ايرىلعان قاتىگەز رەالدىقتى بىلگەننەن كەيىن انتەك ءۇنسىز قالعان ول باسشىلارى مەن شيپاگەرلەردىڭ كوڭىلىن اۋلاپ: ”مينا تازالاي الماعانىممەن، كوپشىلىككە مينا تازالاۋ حيكايالارىن ايتىپ بەرە الامىن“، - دەيدى.

  ورنىنان تۇرۋ سيگنالى، تاماقتانۋ سيگنالى، شام ءسوندىرۋ سيگنالى... ەمحانادا ساۋىقتىرۋ مەزگىلىندە ماڭىنداعى اسكەري كازارمانىڭ ءار كۇنگى اسقاق اسكەري سيگنال ءۇنى ونىڭ ۋاقىتتى سەزەتىن، تۇرمىسىن ورنالاستىراتىن ۋاقىت كەستەسىنە اينالدى.

  دۋ فۋگو تاڭ سارىدەگى اسكەري سيگنال ۇنىمەن بىرگە ورنىنان تۇرادى، كيىمىن كيەدى، بەتىن جۋادى، ءتىس پاراشوگىن سىعىمداپ ءتىسىن جۋادى... ول بىرتە - بىرتە تۇرمىسىن ءوزى ىڭعايلايتىن بولدى، ءتىپتى، كورپەسىن اسكەري قوسىننىڭ ولشەمى بويىنشا ءتورتبۇرىشتاپ جينايتىن بولدى.

  ول تۇستەن بۇرىنعى 9دان 11 جارىمعا دەيىن زەردەلى جاساندى قولمەن ءارىپ جازۋعا جاتتىعا باستايدى، ”ماڭگى العا باسۋ“ دەگەن ارىپتەردى ول ۇنەمى جازادى. ”ءارىپ قاعازعا تۇسكەندە داۋىس شىعادى، ءاربىر ءارىپ سىزىعىنىڭ قاعاز بەتىنە جازىلعانداعى ۇيكەلىس داۋىسىنان ءارىپتىڭ ورنىن تۇراقتاندىرۋعا بولادى“. ەستۋ قابىلەتىنە نۇقسان جەتكەن ول وسىلايشا قولىنا قالام الدى. قازىر دۋ فۋگو ارىپتەردى سونداي ەرشىمدى جازادى، ادامعا سونداي ءبىر ءۇمىت سيلايدى.

  دۋ فۋگونىڭ ەرلىك ىستەرى اقپارات قۇرالدارى ارقىلى حابارلانعاننان كەيىن اۋىزدان - اۋىزعا تارالادى. ول ”ءوزىن الۋەتتەندىرۋدىڭ مەملەكەتتىك وزاتى“، ”جۇڭگونى اسەرلەندىرگەن 2018 - جىلعى جىل ادامى“، 7 - كەزەكتى ”كاسىپتى ءسۇيىپ، ءوزىن ارناۋدىڭ مەملەكەتتىك ءمورال وزاتى“ بولىپ باعالانادى جانە ورتالىق اسكەري ىستەر كوميتەتى جاعىنان ”مينا تازالاۋشى قاھارمان جاۋىنگەر“ داڭقتى اتاققا يە بولادى، ”ەڭ ارداقتى كۇرەسكەر“ جانە ”ءداۋىر ونەگەسى“ اتاعىنا يە بولادى.

  دۋ فۋگونىڭ ”مەن ىستەيىن!“ دەگەن ءسوزى قىرۋار ادامنىڭ ەسىندە ساقتالىپ قالدى، بۇل ونىڭ ءوز ومىرىمەن اۋەلەتكەن ءداۋىردىڭ اسقاق ءۇنى، ”ءومىرى ارقىلى بورىش ارقالاۋدىڭ“ توڭكەرىستىك قاھارماندىق جىگەرى، جاڭا ءداۋىردىڭ ۇلى ساپارىندا سوعىلعان اتوي دابىلى ەدى.

  بۇگىنگى تاڭدا كازارمانىڭ حيكايالارىن، مينا تازالاۋ حيكايالارىن بايانداۋ دۋ فۋگونىڭ قالاۋلى قىزمەتىنە اينالدى. وسى ءۇشىن ول پۋتۇڭحۋاعا بەلسەنە جاتتىقتى. وقۋ، دىبىستاۋ، ءبىر ءارىپ، ءبىر سويلەمنەن، العاشىندا ۇيرەنۋدە قينالعانىمەن قايتا - قايتا جاتتىعۋ ارقىلى ونىڭ دىبىستاۋى جاقسارىپ، سەنىمى ارتا ءتۇستى.

  دىبىس ەنەرگيا تاراتادى، رۋح شار تاراپتى شابىتتاندىردى. ”ديكتور دۋ فۋگونىڭ“ جەلىلەس باعدارلاماسىن قىرۋار كوپ مەديالى تۇعىرلار وقىتۋ ساباقحاناسىنا ەنگىزىپ، يدەيا - ساياسي تاربيە ورىستەتۋدىڭ جاندى ماتەريالى ەتتى. اسكەري قوسىنداعى كوماندير - جاۋىنگەرلەر بىلاي دەدى: دۋ فۋگو ”مەن ىستەيىن!“ دەيتىن قۇربان بولۋدان قورىقپايتىن، قاجىرلىلىقپەن شايقاساتىن كۇرەسكەرلىك رۋحتى ءىس جۇزىندىك ارەكەتىمەن ءتۇسىندىردى، ول ءبىزدى العا باسۋعا جىگەرلەندىرەتىن ۇلگى.

  دۋ فۋگو ءبىر جاۋىنگەر رەتىندە، ارميانى قۇدىرەتتەندىرۋ جولىندا ماڭگى اتوي سالادى.

  (شينحۋا اگەنتتىگىنىڭ 6 - ايدىڭ 17 كۇنى كۇنميڭنەن بەرگەن حابارى)

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.