جۇڭگو حالىق ازاتتىق ارمياسى عارىشكەرلەر توبى:
وتان ءۇشىن جورىققا اتتانىپ، زەڭگىر كوكتە سامعادى
شينحۋا اگەنتتىگىنىڭ ءتىلشىسى لي گولي
جۇڭگو حالىق ازاتتىق ارمياسىنىڭ عارىشكەرلەرى. شينحۋا اگەنتتىگى تاراتقان
6 - ايدىڭ 9 - كۇنى شىنجوۋ 12 - ءنومىرلى ادام الىپ ۇشاتىن عارىش كەمەسى مەن چاڭجىڭ 2 - ءنومىرلى F تۇرپاتتى قاشىقتان بارلانىپ، شىنجوۋ 12 - ءنومىرلى ادام الىپ ۇشاتىن عارىش كەمەسىن ۇشىرۋعا پايدالانىلاتىن تاسىمال راكەتاسىنىڭ قۇراما تۇلعاسى ۇشىرۋ اۋماعىنا ۇتىلاپ جەتكىزىلدى. بۇل شىنجوۋ 12 - ءنومىرلى ادام الىپ ۇشاتىن عارىش كەمەسىنىڭ جاقىن ارادا 3 عارىشكەردى الىپ عارىشقا ۇشاتىندىعىن كورسەتەدى.
بۇل 2016 - جىلعى شىنجوۋ 11 - ءنومىرلى مىندەتىنەن كەيىن، جۇڭگو عارىشكەرلەرىنىڭ اراعا 5 جىل سالىپ تاعى دا عارىشقا اتتانۋى، سونداي - اق جۇڭگو حالىق ازاتتىق ارمياسى عارىشكەرلەر ۇلكەن اترەتى 1998 - جىلى قۇرىلعاننان كەيىن اتقارعان 7 - رەتكى عارىشقا ادام الىپ ۇشۋ مىندەتى.
1998 - جىلى 1 - ايدىڭ 5 - كۇنى وتانىمىزدىڭ جەر - جەرىنەن كەلگەن 14 تاڭداۋلى ۇشقىش بەيجيڭ عارىشقا ۇشۋ ورتالىعىنا جينالدى. بەس جۇلدىزدى نارت قىزىل تۋ الدىندا ولار ايبىندى سەرت بەردى: ”مەن ءوز ەركىممەن عارىشقا ادام الىپ ۇشۋ ىستەرىمەن شۇعىلداندىم، عارىشكەر بولۋ مەنىڭ بارىنەن جوعارى داڭقىم ...“.
تاريح وسى ءبىر كۇندى ماڭگى ەستەن شىعارمايدى، جۇڭگو حالىق ازاتتىق ارمياسىنىڭ عارىشكەرلەر ۇلكەن اترەتى رەسمي قۇرىلدى. 2010 - جىلى 5 - ايدا تاعى 7 ۇشقىش داڭقپەن وسى قوسىنعا قوسىلىپ، ەلىمىزدىڭ 2 - توپتاعى عارىشكەرىنە اينالدى. 2018 - جىلى 5 - ايدا 3 - توپتاعى كانديدات عارىشكەرلەردى تاڭداۋ قىزمەتى باستالىپ، العاشقى تاڭداۋ، قايتا تاڭداۋ، تۇراقتاندىرىپ تاڭداۋ كەزەڭدەرىنەن سوڭ، 2020 - جىلى شارتقا ۇيلەسەتىن 18 كانديدات عارىشكەر (ءبىر ايەلدى قامتيدى) ىرىكتەلدى، ولار جۇيەلى جاتتىعۋدان كەيىن، كەڭىستىك بەكەتىنىڭ جۇمىس جۇرگىزۋ كەزەڭىندەگى ءار رەتكى ۇشۋ مىندەتىنە قاتىناسادى.
20 نەشە جىلدان بەرى جۇڭگو حالىق ازاتتىق ارمياسىنىڭ عارىشكەرلەر ۇلكەن اترەتىندەگى بارلىق عارىشكەرلەر مەملەكەتتى قۇدىرەتتەندىرۋ ارمانىن كوكەيدە ساقتاپ، ارميانى قۇدىرەتتەندىرۋ ارمانىن مۇرات تۇتىپ، عارىشقا ۇشۋ ارمانىنا ءوزىن ارناپ، اسپانداعى ايدى مەڭگەرۋ سىندى ۇلى مۇراتتارىمەن جانە عارىشقا جورىققا اتتانۋ سىندى وزگەشە قابىلەتتەرىمەن ىلگەرىندى - كەيىندى 14 ادام - رەت باتىلدىقپەن اسپان الەمىنە اتوي سالىپ، عارىشتى 68 كۇن ارالاپ، 46 ميلليون كيلومەتردەن استام جول باسىپ، 6 رەتكى عارىشقا ادام الىپ ۇشۋ مىندەتىنىڭ جالپى بەتتىك جەڭىسىنە باتىلدىقپەن جەتىپ، ەلىمىزدىڭ عارىشقا ادام الىپ ۇشۋ ىستەرى ءۇشىن ەرەن ۇلەس قوسىپ، مەملەكەتتى قۇدىرەتتەندىرۋدىڭ، ارميانى قۇدىرەتتەندىرۋدىڭ ۇلى ساپارىندا ۇزدىك ۇلگى بولۋدىڭ ءداۋىر ونەگەسىن ورناتتى، ىلگەرىندى - كەيىندى 3 ادام مەملەكەتتىك عىلىم - تەحنيكا العاباسارلىعى سيلىعىنىڭ ەرەكشە دارەجەلى سيلىعىن الدى، 4 ادام مەملەكەتتىك عىلىم - تەحنيكا العاباسارلىعى سيلىعىنىڭ ءبىرىنشى دارەجەلى سيلىعىن الدى، ءبىر ادام ارميانىڭ عىلىم - تەحنيكا العاباسارلىعى سيلىعىنىڭ ەرەكشە سيلىعىن الدى، ءبىر ادام ”جاڭا جۇڭگو قۇرىلعاننان بەرگى جۇڭگونى اسەرلەندىرگەن 100 ادام“ بولىپ تاڭدالدى. 11 عارىشكەرگە جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى جاعىنان ”عارىش باتىرى“، ”باتىر عارىشكەر“ داڭقتى اتاقتارى بەرىلدى، عارىشكەرلەر ۇلكەن اترەتىنە ورتالىق اسكەري ىستەر كوميتەتى جاعىنان ”باتىر عارىشكەرلەر ۇلكەن اترەتى“ داڭقتى اتاعى بەرىلدى، ءبىر عارىشكەر ”1 - تامىز وردەنىن“ الدى، عارىشكەرلەر توبى داڭقپەن ”ەڭ ارداقتى كۇرەسكەر“، ”ءداۋىر ونەگەسى“ اتاقتارىنا يە بولدى.
ول جۇڭحۋا ۇلتىنىڭ تاريحىنا جازىلعان كوز تارتار قازان ايى كەزى − 2003 - جىلى 10 - ايدىڭ 15 - كۇنى ساعات 9دا ەلىمىزدىڭ العاشقى ادام الىپ ۇشاتىن الەم كەمەسى شىنجوۋ 5 - ءنومىرلى ءساتتى ۇشىرىلدى، عارىشكەر ياڭ ليۋي شەكسىز دە شەتسىز عارىش كەڭىستىگىنىڭ العاشقى جۇڭگولىق قوناعىنا اينالدى، جۇڭحۋا ۇلتىنىڭ مىڭ جىلدىق عارىشقا ۇشۋ ارمانى ورىندالدى.
10 - ايدىڭ 16 - كۇنى ساعات 6دا عارىشتا ءبىر كۇن ۇشقاننان كەيىن، شىنجوۋ 5 - ءنومىرلى عارىش كەمەسى وتان قۇشاعىنا قايتىپ ورالىپ، جۇڭگولىقتاردىڭ العاش رەت عارىشقا ۇشۋ قيمىلى تولىق تابىستى بولىپ، ەلىمىزدىڭ دۇنيە جۇزىندە عارىشقا ادام الىپ ۇشۋ تەحنيكاسىن يگەرگەن 3 - ەلگە اينالعاندىعىن كورسەتتى.
2 جىلدان كەيىنگى تاعى ءبىر التىن كۇز − 2005 - جىلى 10 - ايدىڭ 12 - كۇنى ساعات 9دا شىنجوۋ 6 - ءنومىرلى عارىشقا ادام الىپ ۇشاتىن كەمە ءساتتى ۇشىرىلىپ، عارىشكەرلەر في جۇنلۇڭ، نيە حايشىڭ تابىسپەن عارىشقا شىعارىلدى.
تۇڭعىش رەت وربيتا بولمەسىنە كىردى، تۇڭعىش رەت عارىش مەديتسينالىق كەڭىستىك تاجىريبەسىن جاساپ، زەرتتەۋ جۇرگىزدى، تۇڭعىش رەت قىسىمدى كيىمدى شەشۋ، كيۋ سىناعىن جاسادى... شىنجوۋ 6 - ءنومىرلى جۇڭگونىڭ عارىشقا ادام الىپ ۇشۋ ينجەنەرياسىنىڭ تۇڭعىش رەتكى كوپ ادام الىپ كوپ كۇن ۇشۋ سىناعىن جۇرگىزىپ، ەلىمىزدىڭ شىن مانىندەگى ادام قاتىناسقان عارىش كەڭىستىگى عىلمي تاجىريبەسىن ورىندادى.
2008 - جىلى 9 - ايدىڭ 25 - كۇنى ساعات 21دەن 10 مينۋت وتكەندە شىنجوۋ 7 - ءنومىرلى عارىشقا ادام الىپ ۇشاتىن كەمە عارىشكەرلەر جاي جىگاڭ، ليۋ بوميڭ، جين حايپىڭداردى الىپ عارىشقا ۇشتى. 9 - ايدىڭ 27 - كۇنى ساعات 16دان 43 مينۋت وتكەندە جاي جىگاڭ ەلىمىزدىڭ ءوز كۇشىنە سۇيەنىپ زەرتتەپ جاساعان ”عارىشقا ۇشۋ“ بولمە سىرتى عارىش كيىمىن كيىپ، ليۋ بوميڭنىڭ سەلبەسۋىمەن بولمە ەسىگىن اشىپ، جۇڭگولىقتاردىڭ شەكسىز دە شەتسىز الەمدەگى العاشقى قادامىن باستى، ەلىمىز وسىلايشا دۇنيە جۇزىندەگى بولمەدەن شىعۋ تەحنيكاسىن يگەرگەن 3 - ەلگە اينالدى.
2012 - جىلى 6 - ايدىڭ 16 - كۇنى ساعات 18دەن 37 مينۋت وتكەندە شىنجوۋ 9 - ءنومىرلى عارىشقا ادام الىپ ۇشاتىن كەمە جين حايپىڭ، ليۋ ۋاڭ جانە ەلىمىزدىڭ تۇڭعىش ايەل عارىشكەرى ليۋ ياڭدى الىپ عارىشقا ۇشتى. 6 - ايدىڭ 24 - كۇنى ليۋ ۋاڭ عارىش كەمەسىن مەڭگەرىپ 140 مەتر ارالىقتان تيانگۇڭ 1 - نومىرلىگە جاقىنداپ، تۇڭعىش رەت ءساتتى تۇردە قولمەن تىزگىندەپ ءتۇيىلىستىرىپ جالعادى، بۇل ەلىمىزدىڭ دۇنيە جۇزىندە بۇكىلدەي ءوز كۇشىنە سۇيەنىپ ءتۇيىلىستىرىپ جالعاۋ تەحنيكاسىن يگەرگەن 3 - ەلگە اينالعاندىعىن كورسەتتى.
2013 - جىلى 6 - ايدىڭ 11 - كۇنى ساعات 17دەن 38 مينۋت وتكەندە شىنجوۋ 10 - ءنومىرلى عارىش كەمەسى نيە حايشىڭ، جاڭ شياۋگۋاڭ، ۋاڭ ياپيڭ − 3 عارىشكەردى الىپ عارىشقا ۇشتى. وربيتادا ۇشۋ كەزىندە، عارىشكەرلەر بۇكىل ەلدەگى جاستار مەن ورەندەرگە جۇڭگونىڭ العاشقى عارىشتا ساباق ءوتۋ قيمىلىن جۇرگىزدى.
2016 - جىلى 10 - ايدىڭ 17 - كۇنى ساعات 7دەن 30 مينۋت وتكەندە چاڭجىڭ 2 - ءنومىرلى F تاسىمال راكەتاسىنىڭ دەمەۋىمەن، عارىشكەرلەر جين حايپىڭ، چىن دۇڭ شىنجوۋ 11 - ءنومىرلى عارىش كەمەسىنە وتىرىپ، جيۋچۋان جاساندى سەرىك ۇشىرۋ ورتالىعىنان عارىشقا ۇشتى ءارى تيانگۇڭ 2 - ءنومىرلى عارىش كەڭىستىگى تاجىريبەحاناسىمەن اۆتوماتتى ءتۇيىلىستىرىپ جالعاۋدى ءساتتى جۇرگىزدى. 2 عارىشكەر تيانگۇڭ 2 - ءنومىرلى مەن شىنجوۋ 11 - ءنومىرلىنىڭ قۇراما تۇلعاسىندا 30 كۇن تۇرىپ، ءبىر قىدىرۋ عارىش كەڭىستىگى عىلمي تاجىريبەلەرىن جانە تەحنيكالىق سىناقتارىن جاساپ، جۇڭگو عارىشكەرلەرىنىڭ عارىشتا تۇرۋ ۋاقىتىنىڭ جاڭا رەكوردىن جاراتتى...
جۇڭحۋا ۇلتىنىڭ ەكپىندەي ىلگەرىلەۋ تاريحىندا عارىشقا ۇشقان باتىرلاردىڭ الەم كەڭىستىگىنە شەرۋ تارتۋى، ءسوز جوق، ەڭ تارتىمدى پاراقتاردىڭ ءبىرى سانالادى. بۇگىندە ولار جاڭا ءداۋىردىڭ جاڭا داستانىن توقتاۋسىز جازۋدا.
(شينحۋا اگەنتتىگىنىڭ 6 - ايدىڭ 13 - كۇنى بەيجيڭنەن بەرگەن حابارى)
