− باس شۋجي شي جينپيڭنىڭ ”1 - شىلدە وردەنىن“ بەرۋ سالتىنداعى ماڭىزدى ءسوزىنىڭ رۋحىن ۇيرەنۋ، دايەكتىلەندىرۋ جونىندە
□ حالىق گازەتىنىڭ شولۋشىسى
ميلليارد حالىقتىڭ كوز تىگۋىندە، جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن قۇتتىقتاۋ ”1 - شىلدە وردەنىن“ بەرۋ سالتى بەيجيڭ حالىق سارايىندا سالتاناتپەن وتكىزىلىپ، پارتيا مەن حالىق ءۇشىن كورنەكتى ۇلەس قوسقان 29 كوممۋنيستىك پارتيا مۇشەسىنە پارتيا ىشىندەگى ەڭ جوعارى داڭق بەرىلدى.
باس شۋجي شي جينپيڭ وردەن بەرۋ سالتىندا ماڭىزدى ءسوز سويلەپ، ماداقتالىپ سيلانعان ”1 - شىلدە وردەنى“ يەگەرلەرىنىڭ ءارقايسى شەپتەگى پارتيا مۇشەلەرىنىڭ ۇزدىك ۋاكىلدەرى ەكەندىگىن تەرەڭ اتاپ كورسەتىپ، جۇڭگو كوممۋنيستەرىنىڭ سەنىمدى بەكەمدەپ، باس ماقساتتى امالياتتا ايگىلەپ، ايانباي ۇلەس قوسىپ، پاك، كوپشىل بولعان اسقاق قاسيەتى مەن ارداقتى رۋحىن ايرىقشا قورىتىندىلاپ، تەك مۇرات - سەنىمدى بەكەمدەپ، كۇرەسكەرلىك جىگەردى بەكەمدەپ، اينىماس قايسارلىقتى بەكەمدەپ، جايشىلىقتا كوزگە ءتۇسىپ، شەشۋشى ساتتە كەۋدە كەرە العا شىعىپ، قاتەرلى، قيىن وتكەلدە باسىن ءباي تىگە بىلسە، ءاربىر پارتيا مۇشەسىنىڭ ۇلتتى گۇلدەندىرۋ ۇلى ىسىندە پارتيا مەن حالىق ءۇشىن ەڭبەك ءسىڭىرىپ، ەسە قوسا الاتىندىعىن ايرىقشا باسا دارىپتەدى!
جۇرەكتە سەنىم بولسا، بويدا قايرات بولادى. باس شۋجي شي جينپيڭ بىلاي دەپ باسا دارىپتەدى: ”سەنىمدى بەكەمدەۋدە، اۋەلگى ماقساتى ۇمىتپاۋعا، ءوز مۇراتىنان اينىماۋعا تاباندى بولىپ، بەرىك تە تاباندى مۇرات - سەنىممەن، پارتيا مەن حالىققا دەگەن شىنايى ادال پەيىلمەن، پارتيا مەن حالىققا دەگەن ادالدىقتى جانە ىستىق سۇيىسپەنشىلىكتى كوكەيدە بەرىك ساقتاپ، ارەكەتتە تياناقتاندىرىپ، پارتيا مەن حالىق ىستەرى ءۇشىن وزىندەگى باردىڭ بارلىعىن، ءتىپتى، قىمباتتى ءومىرىن ارناپ، پارتيانىڭ مۇرات - سەنىمى ءۇشىن قايسارلىقپەن كۇرەس جۇرگىزدى، قاجىماي - تالماي كۇرەس جۇرگىزدى“. تاريحقا قايىرىلا قاراساق، پارتيامىزدىڭ قانشاما ساتسىزدىكتەرگە ۇشىراسا دا، تاعى دا جىگەرلەنە العا ۇمتىلۋىنىڭ سەبەبى، تۇپتەپ كەلگەندە، پارتيامىزدا بيىك مۇرات جانە اسقاق تالپىنىس بولعاندىعىنان ەكەندىگىن كورەمىز. 100 جىلدىق قۇلاشىن كەڭ جايعان ايبىندى تاريحي ۇردىستە، ءار ۇرپاق جۇڭگو كوممۋنيستەرى جان قيارلىقپەن ايانباي ىستەپ، قاجىماي - تالماي كۇرەس جۇرگىزىپ، اسقاق تا ايبىندى قاھارماندىق ەرلىك جىر جازدى. اماليات نانىم مەن سەنىمنىڭ قاي كەزدە دە ەرەكشە ماڭىزدى ەكەندىگىن پارمەندى دالەلدەدى.
”مۇرات بولماسا، الەمدە ەشقانداي ىستە تابىسقا جەتە المايسىڭ“. پارتيامىزدىڭ مىعىم، پارمەندى بولۋ - بولماۋىندا، بۇكىل پارتيانىڭ مۇرات - سەنىمگە مىزعىماي تاباندى بولعان - بولماعاندىعىنا قاراۋمەن بىرگە، ونان دا ماڭىزدىسى، ءاربىر پارتيا مۇشەسىنىڭ مۇرات - سەنىمگە مىزعىماي تاباندى بولعان - بولماعاندىعىنا قاراۋ كەرەك. تەك مۇرات - سەنىمدە بەرىك بولىپ، پارتيانى كوكەيدە ساقتاپ، پارتياعا ادال بولعاندا عانا، بەرىك يدەيالىق نەگىزگە يە بولۋعا بولادى. تەك مۇرات - سەنىمى بەرىك ادام عانا، ءارقاشان العان بەتىنەن قايتپاي، قانداي ءبىر قيىندىقتارعا مويىماي، بوران - شاشىنعا قاراماي، ءارقانداي قيىندىقتان، قاتەردەن قورىقپاي، بەلگىلەنگەن نىسانانى جۇزەگە اسىرۋ ءۇشىن مىزعىماس تاباندىلىقپەن كۇرەس جۇرگىزە الادى. كوممۋنيزمگە سەنىم، جۇڭگوشا سوتسياليزمگە سەنىم كوممۋنيستەردىڭ ساياسي جانى، كوممۋنيستەردىڭ ءارقانداي سىناقتان سۇرىنبەي ءوتۋىنىڭ رۋحاني تىرەگى. نانىمدى، ۇستانىمدى، سەنىمدى بەكەمدەۋ ءبىزدىڭ بارلىق كۇشتى جاۋدى جەڭىپ، بارلىق قيىندىقتى ەڭسەرىپ، بارلىق جەڭىسكە قول جەتكىزۋدەگى قۋاتتى رۋحاني كۇشىمىز.
جۇڭگو كوممۋنيستەرىنىڭ مۇرات - سەنىمى ماركسيزم تۋرالى تەرەڭ تۇسىنىك نەگىزىندە ورناعان، تاريحي زاڭدىلىقتى تەرەڭ يگەرۋ نەگىزىندە ورناعان. باس شۋجي شي جينپيڭ بىلاي دەپ باسا دارىپتەدى: ”بۇكىل پارتياداعى جولداستار ماركسيزمگە سەنىمدى، جۇڭگوشا سوتسياليزمگە سەنىمدى ومىرلىك تالپىنىسى ەتىپ، ماڭگى پارتياعا سەنىپ، پارتيانى ءسۇيىپ، پارتيا ءۇشىن ىستەپ، ءوز قىزمەت ورىندارىندا قايسارلىقپەن ايانباي ىستەپ، اسقاق مۇرات ءۇشىن كۇرەسۋدىڭ امالياتىن ۇزدىكسىز العا ىلگەرىلەتۋ كەرەك“. قازىر دۇنيە ءجۇزى 100 جىلدا بولماعان ۇلكەن وزگەرىستى باستان كەشىرۋدە، ەلىمىز جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ شەشۋشى كەزەڭىندە تۇر. ”كەمە اعىن ورتاسىنا، ادام شىڭنىڭ بەل ورتاسىنا كەلگەن“ وسى ساتتە، سەنىمدى، ۇستانىمدى بەكەمدەۋدە، ەڭ ماڭىزدىسى، جۇڭگوشا سوتسياليزمنىڭ جول سەنىمىن، نازاريا سەنىمىن، ءتۇزىم سەنىمىن، مادەنيەت سەنىمىن بەكەمدەۋ كەرەك. ادالدىق پەن سەنىم ناقتىلىقتان، امالياتتان كەلەدى. پارتيا ۋستاۆىمەن، پارتيا ەرەجەسىمەن، پارتيا تارتىبىمەن ۇنەمى سالىستىرىپ، ءوزىنىڭ مۇرات - سەنىمىن جانە يدەياسىن، ءسوز - ارەكەتىن تەكسەرىپ، يدەياداعى شاڭ - توزاڭدى ۇنەمى تازالاپ، ساياسي قاسيەتتى ماڭگى ساقتاۋ كەرەك.
مۇراتتىڭ ساۋلەسى كۇرەس جولىن نۇرلاندىرىپ، سەنىمنىڭ كۇشى جارقىن بولاشاققا جول اشادى. جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىندا ەرلىكپەن العا باسۋدا، قالىڭ پارتيا مۇشەلەرى، كادرلار ۇزدىكسىز تۇردە سەنىم نەگىزىن بەكەمدەپ، رۋحاني كالتسيدى تولىقتاپ، يدەيانىڭ تۇتقاسىن مىقتى ۇستاپ، مىزعىماس مۇرات - سەنىممەن پارتياعا شىنايى ادالدىقتى شىڭداۋ كەرەك. جاڭا ۇلى ساپاردا، شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، ”1 - شىلدە وردەنى“ يەگەرلەرىن ۇلگى تۇتىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، كوممۋنيستەردىڭ رۋحاني قان تامىرىن ۇزدىكسىز جالعاستىرىپ، اۋەلگى ماقساتتى ۇمىتپاي، بورىشتى ەستە بەرىك ساقتاپ، ماڭگى بوساڭسىماي، ۇدەرە العا تارتساق، ءبىز، ءسوز جوق، قات - قابات قيىندىقتى جەڭىپ، جەڭىستەن جەڭىسكە قول جەتكىزىپ، پارتيانىڭ قالاۋىنان شىعاتىن، حالىقتىڭ قالاۋىنان شىعاتىن، ءداۋىردىڭ قالاۋىنان شىعاتىن ناتيجە جاراتا الامىز.
(شينحۋا اگەنتتىگىنىڭ 6 - ايدىڭ 30 - كۇنى بەيجيڭنەن بەرگەن حابارى)
