(2021 - جىلى 7 - ايدىڭ 1 - كۇنى)
شي جينپيڭ
جولداستار، دوستار:
بۇگىن جۇڭگو كوممۋنيستىك پارتياسىنىڭ تاريحىندا، جۇڭحۋا ۇلتىنىڭ تاريحىندا توتەنشە كەلەلى ءارى سالتاناتتى ءبىر كۇن بولىپ وتىر. ءبىز وسى ارادا سالتاناتتى جينالىس وتكىزىپ، بۇكىل پارتيا، بۇكىل ەلدەگى ءار ۇلت حالقىمەن بىرگە جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن قۇتتىقتاپ، جۇڭگو كوممۋنيستىك پارتياسىنىڭ 100 جىلدىق كۇرەسىنىڭ شۇعىلالى بارىسىن ەسكە الىپ، جۇڭحۋا ۇلتىنىڭ ۇلى گۇلدەنۋىنىڭ نۇرلى بولاشاعىنا كوز جىبەرىپ وتىرمىز.
اۋەلى، مەن پارتيا ورتالىق كوميتەتى اتىنان بارلىق جۇڭگو كوممۋنيستىك پارتياسى مۇشەلەرىن مەرەكەلەرىمەن قىزۋ قۇتتىقتايمىن !
وسى ارادا مەن پارتيا مەن حالىق اتىنان سالتاناتتى تۇردە مىنانى جاريالايمىن: بۇكىل پارتيانىڭ، بۇكىل ەلدەگى ءار ۇلت حالقىنىڭ ۇزدىكسىز كۇرەس جۇرگىزۋى ارقىلى ءبىز ءبىرىنشى 100 جىلدىق كۇرەس نىساناسىن ىسكە اسىردىق، جۇڭحۋانىڭ بايتاق دالاسىندا جاپپاي دوڭگەلەك داۋلەتتى قوعام قۇرىپ شىعىپ، مۇلدەم كەدەيلىك ماسەلەسىن تاريحي سيپاتتى شەشىپ، جاپپاي سوتسياليستىك وسىزاماندانعان قۇدىرەتتى ەل قۇرۋدىڭ ەكىنشى 100 جىلدىق كۇرەس نىساناسىنا قاراي تاسقىنداعان جىگەرمەن قادام تاستاپ كەلەمىز. بۇل جۇڭحۋا ۇلتىنىڭ ۇلى داڭقى! بۇل جۇڭگو حالقىنىڭ ۇلى داڭقى! بۇل جۇڭگو كوممۋنيستىك پارتياسىنىڭ ۇلى داڭقى!
جولداستار، دوستار!
جۇڭحۋا ۇلتى دۇنيە جۇزىندەگى ۇلى ۇلت، تەرەڭنەن تامىر الىپ، ۇزاقتان جالعاسقان 5000 جىلدان استام وركەنيەت تاريحى بار، ادامزات وركەنيەتىنىڭ العا باسۋىنا وشپەس ۇلەس قوستى. 1840 - جىلعى اپيىن سوعىسىنان كەيىن جۇڭگو بىرتە - بىرتە جارتىلاي وتار، جارتىلاي فەودال قوعامعا اينالىپ، مەملەكەت قورلانىپ، حالىق كۇيزەلىپ، وركەنيەت زوبالاڭعا كىرىپتار بولىپ، جۇڭحۋا ۇلتى بۇرىن بولماعان ناۋبەتكە ۇشىرادى. سودان باستاپ جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ جۇڭگو حالقى مەن جۇڭحۋا ۇلتىنىڭ ەڭ ۇلى ارمانىنا اينالدى.
ۇلتتى جويىلۋ حاۋپىنەن قۇتقارۋ ءۇشىن جۇڭگو حالقى ەرلىكپەن قارسىلىق كورسەتتى، نامىستى ازاماتتار جان ۇشىرتا اتتان سالىپ، تايپيڭ تيانگو قوزعالىسى، ۋشۇي جىلعى زاڭ وزگەرىسى، يحىتۋان قوزعالىسى، شينحاي توڭكەرىسى ىركەس - تىركەس تۋىلىپ، وتاندى قۇتقارۋدىڭ ءار ءتۇرلى جوباسى الما - كەزەك ساحناعا كوتەرىلدى، ءبىراق بارلىعى جەڭىلىسپەن تىندى. جۇڭگو جاڭا يدەيانىڭ وتاندى جويىلۋدان قۇتقارۋ قوزعالىسىنا جەتەكشىلىك ەتۋىنە ءزارۋ ەدى، جاڭا ۇيىمنىڭ توڭكەرىستىك كۇشتەردى ۇيىستىرۋىنا ءزارۋ ەدى.
قازان توڭكەرىسىنىڭ زەڭبىرەك ءۇنى جۇڭگوعا ماركسيزم - لەنينيزمدى الا كەلدى. جۇڭگو حالقى مەن جۇڭحۋا ۇلتىنىڭ ۇلى ويانۋى بارىسىندا، ماركسيزم - لەنينيزمنىڭ جۇڭگو جۇمىسشى قوزعالىسىمەن تىعىز ۇشتاسۋى بارىسىندا، جۇڭگو كوممۋنيستىك پارتياسى زامانعا سايكەس دۇنيەگە كەلدى. جۇڭگودا كوممۋنيستىك پارتيانىڭ دۇنيەگە كەلۋى تىڭعا تۇرەن سالعان ۇلى وقيعا بولىپ، تاياۋ زاماننان كەيىنگى جۇڭحۋا ۇلتى دامۋىنىڭ بەتالىسى مەن ۇدەرىسىن تەرەڭدەي وزگەرتتى، جۇڭگو حالقى مەن جۇڭحۋا ۇلتىنىڭ بولاشاعى مەن تاعدىرىن تەرەڭدەي وزگەرتتى، دۇنيە ءجۇزى دامۋىنىڭ اۋقىمى مەن ارناسىن تەرەڭدەي وزگەرتتى.
جۇڭگو كوممۋنيستىك پارتياسى دۇنيەگە كەلىسىمەن جۇڭگو حالقىن باقىتقا كەنەلتۋدى، جۇڭحۋا ۇلتىن گۇلدەندىرۋدى ءوزىنىڭ اۋەلگى ماقساتى جانە بورىشى ەتىپ تۇراقتاندىردى. 100 جىلدان بەرى، جۇڭگو كوممۋنيستىك پارتياسىنىڭ جۇڭگو حالقىن ىنتىماقتاستىرىپ، باستاپ جۇرگىزگەن بارلىق كۇرەسىن، بارلىق قۇرباندىعىن، بارلىق جاسامپازدىعىن ءبىر نەگىزگى تاقىرىپقا: جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ دەپ جيناقتاۋعا بولادى.
− جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن، جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، قان كەشە شايقاس جۇرگىزىپ، قايتپاس قايسارلىق كورسەتىپ، جاڭا دەموكراتيالىق توڭكەرىستىڭ ۇلى تابىستارىن جاراتتى. ءبىز سولتۇستىككە جورىق سوعىسى، جەر توڭكەرىسى سوعىسى، جاپون شاپقىنشىلارىنا قارسى سوعىس، ازاتتىق سوعىس ارقىلى قارۋلى توڭكەرىسپەن قارۋلى كەرى توڭكەرىسكە قارسى تۇرىپ، يمپەرياليزم، فەوداليزم، بيۋروكرات كاپيتاليزم سىندى 3 ۇلكەن تاۋدى اۋدارىپ تاستاپ، حالىق قوجايىن بولعان جۇڭحۋا حالىق رەسپۋبليكاسىن قۇرىپ، ۇلتتىڭ تاۋەلسىزدىگىن، حالىقتىڭ ازاتتىعىن جۇزەگە اسىردىق. جاڭا دەموكراتيالىق توڭكەرىستىڭ جەڭىسى كونە جۇڭگونىڭ جارتىلاي وتار، جارتىلاي فەودال قوعامدىق تاريحىن ءۇزىلدى - كەسىلدى اياقتاتىپ، كونە جۇڭگونىڭ تارىداي شاشىراعان جاعدايىن تۇبەگەيلى اياقتاتىپ، ازۋلى ەلدەردىڭ جۇڭگوعا زورلاپ تاڭعان تەڭسىز شارتتارىن جانە يمپەرياليزمنىڭ جۇڭگوداعى بارلىق ەرەكشە ۇقىقتارىن تۇبەگەيلى كۇشىنەن قالدىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا ءتۇبىرلى قوعامدىق شارت - جاعداي ازىرلەدى. جۇڭگو كوممۋنيستىك پارتياسى مەن جۇڭگو حالقى ەرلىكپەن، قايسارلىقپەن كۇرەس جۇرگىزۋ ارقىلى دۇنيە جۇزىنە سالتاناتتى تۇردە جۇڭگو حالقى ورنىنان تۇردى، جۇڭحۋا ۇلتىنىڭ كىم كورىنگەن تالان - تاراجىعا سالعان، ابدەن قورلىق كورگەن زامانى ەندىگارى كەلمەسكە كەتتى دەپ جاريالادى!
− جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن، جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، ءوز كۇشىنە سۇيەنىپ ءومىر ءسۇرىپ، كۇشەيۋ ءۇشىن قايراتتانىپ، سوتسياليستىك توڭكەرىس پەن قۇرىلىستىڭ ۇلى تابىستارىن جاراتتى. ءبىز سوتسياليستىك توڭكەرىس جۇرگىزىپ، جۇڭگودا نەشە مىڭ جىل جالعاسقان فەودالدىق قاناۋ، ەزۋ ءتۇزىمىن جويىپ، سوتسياليستىك نەگىزگى ءتۇزىم ورناتىپ، سوتسياليستىك قۇرىلىستى ىلگەرىلەتىپ، يمپەرياليزمنىڭ، زورەكەرلىكتىڭ اۋدارىپ تاستاۋ، ءبۇلدىرۋ جانە قارۋلى ارانداتۋشىلىعىن جەڭىپ، جۇڭحۋا ۇلتىنىڭ تاريحىنداعى ەڭ كەڭ ءارى تەرەڭ قوعامدىق وزگەرىستى جۇزەگە اسىرىپ، بىرىنشىدەن كەدەي، ەكىنشىدەن اق، جان سانى كوپ شىعىستاعى ءىرى ەلدىڭ سوتسياليستىك قوعامعا ارشىندى قاداممەن كىرگەن ۇلى شارىقتاۋىن جۇزەگە اسىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا ءتۇبىرلى ساياسي العى شارت جانە تۇزىمدىك نەگىز قالادىق. جۇڭگو كوممۋنيستىك پارتياسى مەن جۇڭگو حالقى ەرلىكپەن، قايسارلىقپەن كۇرەس جۇرگىزۋ ارقىلى دۇنيە جۇزىنە سالتاناتتى تۇردە جۇڭگو حالقى ەسكى دۇنيەنى قيراتۋعا شەبەر بولىپ قانا قويماي، جاڭا دۇنيە ورناتۋعا دا شەبەر، تەك سوتسياليزم عانا جۇڭگونى قۇتقارا الادى، تەك سوتسياليزم عانا جۇڭگونى دامىتا الادى دەپ جاريالادى!
− جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن، جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ ، باستاپ، يدەيانى ازات ەتىپ، جىگەرلەنە العا ۇمتىلىپ، رەفورما جاساپ، ەسىك اشۋدىڭ جانە سوتسياليستىك وسىزاماندانۋ قۇرىلىسىنىڭ ۇلى تابىستارىن جاراتتى. ءبىز جاڭا جۇڭگو قۇرىلعاننان بەرگى پارتيا تاريحىندا تەرەڭ ماڭىز العان ۇلى بۇرىلىستى ىسكە اسىرىپ، پارتيانىڭ سوتسياليزمنىڭ العاشقى كەزەڭىندەگى نەگىزگى لۋشيانىن ورناتىپ، رەفورما جاساپ، ەسىك اشۋدى تاباندىلىقپەن ىلگەرىلەتىپ، ءار جاقتان كەلگەن حاۋىپ - قاتەر مەن سىن - سايىستاردى جەڭىپ، جۇڭگوشا سوتسياليزمنىڭ نەگىزىن قالاپ جانە وعان تاباندى بولىپ، ونى قورعاپ، دامىتىپ، بارىنشا شوعىرلانعان جوسپارلى شارۋاشىلىق تۇزىلىسىنەن ومىرشەڭدىك كۇشكە تولى سوتسياليستىك بازار شارۋاشىلىعى تۇزىلىسىنە، تۇيىقتالۋدان، جارتىلاي تۇيىقتالۋدان جان - جاقتىلى ەسىك اشۋعا دەيىنگى تاريحي بۇرىلىستى جۇزەگە اسىرىپ، وندىرگىش كۇشتەردىڭ سالىستىرمالى مەشەۋ جاعدايىنان ەكونوميكانىڭ جالپى مولشەرى دۇنيە ءجۇزى بويىنشا 2 - ورىنعا شىققان تاريحي سەرپىلىستى جۇزەگە اسىرىپ، حالىق تۇرمىسىنىڭ ىشەر اس، كيەر كيىمگە جارىماۋدان جالپى تۇلعالىق جاقتان دوڭگەلەك داۋلەتتىلىككە جەتكەن، جاپپاي دوڭگەلەك داۋلەتتىلىككە ۇمتىلعان تاريحي سەكىرىستى جۇزەگە اسىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا تىڭ ومىرشەڭدىك كۇشكە تولى تۇزىلىستىك كەپىلدىك جانە جەدەل دامۋ زاتتىق شارت - جاعدايىن ازىرلەدىك. جۇڭگو كوممۋنيستىك پارتياسى مەن جۇڭگو حالقى ەرلىكپەن، قايسارلىقپەن كۇرەس جۇرگىزۋ ارقىلى دۇنيە جۇزىنە سالتاناتتى تۇردە رەفورما جاساۋ، ەسىك اشۋ − زامانىمىزداعى جۇڭگونىڭ بولاشاعى مەن تاعدىرىن بەلگىلەيتىن شەشۋشى شارا، جۇڭگو ارشىندى قاداممەن ءداۋىر كوشىن قۋىپ جەتتى دەپ جاريالادى!
− جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن، جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، وزىنە سەنىپ، ءوزىن الۋەتتەندىرىپ، تۋراشىلدىقتى ساقتاپ، جاڭالىق اشىپ، ۇلى كۇرەستى، ۇلى ينجەنەريانى، ۇلى ءىستى، ۇلى ارماندى ءبىر تۇتاس مەڭگەرىپ، جاڭا داۋىردەگى جۇڭگوشا سوتسياليزمنىڭ ۇلى تابىستارىن جاراتتى. پارتيا 18 - قۇرىلتايىنان بەرى، جۇڭگوشا سوتسياليزم جاڭا داۋىرگە ءوتتى، ءبىز پارتيانىڭ جالپى بەتتىك باسشىلىعىنا تاباندى بولىپ جانە ونى كۇشەيتىپ، ”بەستى ءبىر تۇلعالاندىرۋ“ جالپى تۇلعالىق ورنالاستىرۋىن ءبىر تۇتاس جوسپارلاپ ىلگەرىلەتىپ، ”ءتورتتى جاپپاي ورىنداۋ“ ستراتەگيالىق ورنالاستىرۋىن سايكەستى ىلگەرىلەتىپ، جۇڭگوشا سوتسياليزم تۇزىمىنە تاباندى بولىپ جانە ونى كەمەلدەندىرىپ، مەملەكەتتى جونگە سالۋ جۇيەسى مەن جونگە سالۋ قابىلەتىن وسىزامانداندىرۋدى ىلگەرىلەتىپ، پارتيانى ەرەجەمەن جونگە سالۋعا تاباندى بولىپ، پارتيا ىشىندە ءبىرشاما كەمەلدى زاڭ ەرەجە جۇيەسىن قالىپتاستىرىپ، ءبىرسىپىرا ەلەۋلى حاۋىپ - قاتەرلەر مەن سىن - سايىستاردى جەڭىپ، ءبىرىنشى 100 جىلدىق كۇرەس نىساناسىن جۇزەگە اسىرىپ، ەكىنشى 100 جىلدىق كۇرەس نىساناسىن ىسكە اسىرۋدىڭ ستراتەگيالىق ورنالاستىرۋىن ايقىندادىق، پارتيا مەن مەملەكەت ىستەرىندە تاريحي تابىستارعا قول جەتكىزىپ، تاريحي وزگەرىستەر تۋدىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا اناعۇرلىم كەمەلدى تۇزىمدىك كەپىلدىك، اناعۇرلىم مىعىم زاتتىق نەگىز، اناعۇرلىم ىرىقتى رۋحاني كۇش ازىرلەدىك. جۇڭگو كوممۋنيستىك پارتياسى مەن جۇڭگو حالقى ەرلىكپەن، قايسارلىقپەن كۇرەس جۇرگىزۋ ارقىلى دۇنيە جۇزىنە سالتاناتتى تۇردە جۇڭحۋا ۇلتى ەڭسە كوتەرۋدەن، بايۋدان قۇدىرەتتەنۋگە دەيىنگى ۇلى شارىقتاۋدى قارسى الدى، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ بوگەۋ بەرمەس تاريحي ۇدەرىسكە قادام تاستادى دەپ جاريالادى!
100 جىلدان بەرى، جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، ”قۇربان بەرۋ بولعانى ءۇشىن ءوستى جىگەر ۇلعايىپ، اي - كۇنگە ءامىر شاشا الامىز جاڭارتۋعا كوك ءجۇزىن“ دەيتىن تايسالماس اسقاق جىگەر ارقىلى جۇڭحۋا ۇلتىنىڭ نەشە مىڭ جىلدىق تاريحىنداعى ەڭ ايبىندى تاريحي ەپوس جازدى. وسى 100 جىلدان بەرى اشىلعان ۇلى جول، جاسالعان ۇلى ىستەر، قول جەتكەن ۇلى تابىستار، ءسوز جوق، جۇڭحۋا ۇلتىنىڭ دامۋ تاريحىنا، ادامزات وركەنيەتىنىڭ دامۋ تاريحىنا جازىلادى!
جولداستار، دوستار!
100 جىلدىڭ الدىندا، جۇڭگو كوممۋنيستىك پارتياسىنىڭ ارداگەرلەرى جۇڭگو كوممۋنيستىك پارتياسىن قۇرىپ، اقيقاتتان جازبايتىن، مۇراتتان اينىمايتىن، اۋەلگى ماقساتتى امالياتتا ايگىلەيتىن، بورىش ارقالايتىن، قۇربان بەرۋدەن قورىقپايتىن، ەرلىكپەن كۇرەس جۇرگىزەتىن، پارتياعا ادال بولاتىن، حالىقتىڭ ءۇمىتىن اقتايتىن ۇلى پارتيا قۇرۋ رۋحىن قالىپتاستىردى، بۇل − جۇڭگو كوممۋنيستىك پارتياسىنىڭ رۋحاني قاينارى.
100 جىلدان بەرى، جۇڭگو كوممۋنيستىك پارتياسى ۇلى پارتيا قۇرۋ رۋحىن ساۋلەلەندىرىپ، ۇزاق ۋاقىتتىق كۇرەس بارىسىندا جۇڭگو كوممۋنيستەرىنىڭ رۋحاني شەجىرەسىن قالىپتاستىرىپ، ايقىن ساياسي قاسيەت سومدادى. تاريح كوشى ايالسىز العا جىلجىپ، رۋح ۇرپاقتان - ۇرپاققا جالعاسىپ كەلەدى. ءبىز داڭقتى ءداستۇردى ۇزدىكسىز ساۋلەلەندىرىپ، قىزىل تامىردى ۇزدىكسىز جالعاستىرىپ، ۇلى پارتيا قۇرۋ رۋحىن ماڭگى جالعاستىرۋىمىز، اسقاقتاتۋىمىز كەرەك!
جولداستار، دوستار!
100 جىلدان بەرى، ءبىزدىڭ قول جەتكىزگەن بارلىق تابىستارىمىز جۇڭگو كوممۋنيستەرىنىڭ، جۇڭگو حالقىنىڭ، جۇڭحۋا ۇلتىنىڭ ىنتىماقتاسا كۇرەس جۇرگىزۋىنىڭ ناتيجەسى. ماۋ زىدۇڭ جولداستى، دىڭ شياۋپيڭ جولداستى، جياڭ زىمين جولداستى، حۋ جينتاۋ جولداستى باستى ۋاكىل ەتكەن جۇڭگو كوممۋنيستەرى جۇڭحۋا ۇلتىنىڭ ۇلى گۇلدەنۋى ءۇشىن تاريحتان ويىپ ورىن الاتىن ۇلى ەڭبەك ءسىڭىردى! ءبىز ولارعا اسقاق قۇرمەت بىلدىرەمىز!
ءدال وسى ساتتە، ءبىز جۇڭگو توڭكەرىسى، قۇرىلىسى، رەفورماسى ءۇشىن، جۇڭگو كوممۋنيستىك پارتياسىنىڭ قۇرىلۋى، نىعايۋى، دامۋى ءۇشىن كەلەلى ۇلەس قوسقان ماۋ زىدۇڭ، جوۋ ىنلاي، ليۋ شاۋچي، جۋ دى، دىڭ شياۋپيڭ، چىن يۇن جولداس قاتارلى اعا بۋىن توڭكەرىسشىلەردى تەرەڭ ساعىنىشپەن ەسكە الامىز، جاڭا جۇڭگونى قۇرۋ، قورعاۋ، گۇلدەندىرۋ جولىندا ەرلىكپەن قۇربان بولعان توڭكەرىستىك ارداگەر قۇربانداردى تەرەڭ ساعىنىشپەن ەسكە الامىز، رەفورما جاساپ، ەسىك اشۋعا جانە سوتسياليستىك وسىزاماندانۋ قۇرىلىسىنا ەرلىكپەن ءوزىن ارناعان توڭكەرىستىك قۇربانداردى تەرەڭ ساعىنىشپەن ەسكە الامىز، تاياۋ زاماننان بەرى ۇلتتىڭ تاۋەلسىزدىگى مەن حالىقتىڭ ازاتتىعى جولىندا قايسارلىقپەن كۇرەس جۇرگىزگەن بارلىق ەگەي ەرلەردى، ارداگەرلەردى تەرەڭ ساعىنىشپەن ەسكە الامىز. ولاردىڭ وتان ءۇشىن، ۇلت ءۇشىن سىڭىرگەن ۇشان - تەڭىز ۇلى ەڭبەگى تاريحقا ماڭگى جازىلادى! ولاردىڭ اسقاق رۋحى حالىقتىڭ جۇرەگىندە ماڭگى ساقتالادى!
حالىق − تاريحتى جاراتۋشى، ناعىز قاھارمان. مەن پارتيا ورتالىق كوميتەتى اتىنان بۇكىل ەلدەگى قالىڭ جۇمىسشىلارعا، شارۋالارعا، زيالىلارعا، دەموكراتيالىق پارتيا - توپتارعا جانە پارتيادا، توپتا جوق قايراتكەرلەرگە، حالىقتىق ۇيىمدارعا، ءار سالاداعى وتانشىل قايراتكەرلەرگە، حالىق ازاتتىق ارمياسى كوماندير - جاۋىنگەرلەرىنە، قارۋلى ساقشى بولىمدەرى وفيتسەر - جاۋىنگەرلەرىنە، قوعام حاۋىپسىزدىگى كادر - ساقشىلارىنا جانە ءورت ءسوندىرۋ، ورتتەن ساقتانۋ - قۇتقارۋ، كومەكتەسۋ قوسىندارى كوماندير - جاۋىنگەرلەرىنە، بارلىق سوتسياليزم ەڭبەكشىلەرىنە، بىرلىكساپتىڭ قالىڭ مۇشەلەرىنە اسقاق قۇرمەت بىلدىرەمىن! شياڭگاڭ ەرەكشە اكىمشىلىك رايونىنداعى باۋىرلاستارعا، اۋمىن ەرەكشە اكىمشىلىك رايونىنداعى باۋىرلاستارعا جانە تايۋاندىق باۋىرلاستارعا، سونداي - اق قالىڭ چياۋباۋلارعا ىقىلاستى سالەم جولدايمىن! جۇڭگو حالقىمەن دوس تاتۋ وتكەن، جۇڭگونىڭ توڭكەرىس، قۇرىلىس، رەفورما ىستەرىنە كوڭىل بولگەن جانە قولداۋ كورسەتكەن ءار ەل حالقىنا جانە دوستارعا شىن جۇرەكتەن العىس ايتامىن!
جولداستار، دوستار !
اۋەلگى ماقساتتى ورناتۋ وڭاي بولعانمەن، باستان - اياق ساقتاۋ وڭاي ەمەس. تاريحتى اينا ەتكەندە گۇلدەنۋ مەن قۇلدىراۋدى بىلۋگە بولادى. ءبىز تاريحتى رەالدىققا اينا ەتىپ، بولاشاققا ۇزاقتان كوز جىبەرىپ، جۇڭگو كوممۋنيستىك پارتياسىنىڭ 100 جىلدىق كۇرەسىنەن وتكەندە نە ءۇشىن تابىسقا جەتكەندىگىمىزگە انىق كوز جىبەرىپ، بولاشاقتا قايتكەندە ۇزدىكسىز تابىسقا جەتەتىندىگىمىزدى انىق اڭعارىپ، جاڭا ساپاردا اۋەلگى ماقسات پەن بورىشتى اناعۇرلىم باتىل، اناعۇرلىم سانالى تۇردە ەستە بەرىك ساقتاپ، كوركەم بولاشاق اشۋىمىز كەرەك.
− تاريحتى اينا ەتىپ، بولاشاق اشۋدا، ءسوز جوق، جۇڭگو كوممۋنيستىك پارتياسىنىڭ پارمەندى باسشىلىعىنا تاباندى بولۋ كەرەك. جۇڭگونىڭ ىستەرىن جاقسى ىستەۋدىڭ تەتىگى پارتيادا. جۇڭحۋا ۇلتىنىڭ تاياۋ زاماننان بەرگى 180 نەشە جىلدىق تاريحى، جۇڭگو كوممۋنيستىك پارتياسى قۇرىلعاننان بەرگى 100 جىلدىق تاريح، جۇڭحۋا حالىق رەسپۋبليكاسى قۇرىلعاننان بەرگى 70 نەشە جىلدىق تاريح جۇڭگو كوممۋنيستىك پارتياسى بولماسا، جاڭا جۇڭگو بولماق ەمەستىگىن، جۇڭحۋا ۇلتىنىڭ ۇلى گۇلدەنۋى دە بولماق ەمەستىگىن تولىق دالەلدەدى. تاريح پەن حالىق جۇڭگو كوممۋنيستىك پارتياسىن تاڭدادى. جۇڭگو كوممۋنيستىك پارتياسىنىڭ باسشىلىعى جۇڭگوشا سوتسياليزمنىڭ ەڭ ماندىك ەرەكشەلىگى، جۇڭگوشا سوتسياليستىك ءتۇزىمنىڭ ەڭ ۇلكەن ابزالدىلىعى، پارتيا مەن مەملەكەتتىڭ ءتۇبىرلى تياناعى، جان تامىرى، بۇكىل ەلدەگى ءار ۇلت حالقىنىڭ مۇددەسىنىڭ دايەگى، تاعدىرىنىڭ دايەگى.
جاڭا ساپاردا، ءبىز، ءسوز جوق، پارتيانىڭ جالپى بەتتىك باسشىلىعىنا تاباندى بولۋىمىز، پارتيانىڭ باسشىلىعىن ۇزدىكسىز كەمەلدەندىرىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، ”مەملەكەتتىڭ زور ءىسىن“ ەستە بەرىك ساقتاپ، پارتيانىڭ عىلمي بيلىك جۇرگىزۋ ، دەموكراتيالى بيلىك جۇرگىزۋ، زاڭ بويىنشا بيلىك جۇرگىزۋ ورەسىن ۇزدىكسىز جوعارىلاتىپ، پارتيانىڭ جالپى جاعدايدى جالپىلاي مەڭگەرەتىن، ءار جاقتى سايكەستىرەتىن باسشىلىق ۇيتقىلىق رولىن تولىق ساۋلەلەندىرۋىمىز كەرەك!
− تاريحتى اينا ەتىپ، بولاشاق اشۋدا، ءسوز جوق، جۇڭگو حالقىن ىنتىماقتاستىرىپ ، باستاپ، تاماشا تۇرمىس ءۇشىن ۇزدىكسىز كۇرەس جۇرگىزۋ كەرەك. بيلىك دەگەنىمىز حالىق، حالىق دەگەنىمىز بيلىك، بيلىككە قول جەتكىزۋدە، بيلىكتى قورعاۋدا حالىقتىڭ تىلەگى قورعالادى. جۇڭگو كوممۋنيستىك پارتياسىنىڭ ءتۇبىرلى نەگىزى حالىقتا، قان تامىرى حالىقتا، كۇش - قۋاتى حالىقتا. جۇڭگو كوممۋنيستىك پارتياسى باستان - اياق ەڭ كەڭ حالىقتىڭ ءتۇبىرلى مۇددەسىنە ۋاكىلدىك ەتىپ، حالىقپەن بەينەت پەن زەينەتتە بىرگە بولىپ، ءولىم مەن ءومىر ارپالىسىن بىرگە وتكەردى، ءوزىنىڭ ەشقانداي ەرەكشە مۇددەسى جوق، ءارقانداي مۇددە توبىنىڭ، ءارقانداي ۇقىق توبىنىڭ، ءارقانداي ەرەكشە ۇقىقتى جىكتىڭ مۇددەسىنە ەشقاشان ۋاكىلدىك ەتكەن ەمەس. جۇڭگو كوممۋنيستىك پارتياسىن جۇڭگو حالقىنان ءبولىپ تاستاماق، قاراما - قارسى قويماق بولعان ءارقانداي دامە مۇلدە ىسكە اسپايدى! 95 ميلليوننان استام جۇڭگو كوممۋنيستەرى قوسىلمايدى! ءبىر ميلليارد 400 ميلليوننان استام جۇڭگو حالقى دا قوسىلمايدى!
جاڭا ساپاردا، ءبىز، ءسوز جوق، حالىققا تىعىز سۇيەنىپ تاريحتى جاراتۋىمىز، بۇكىل ىنتا - پەيىلمەن حالىق ءۇشىن قىزمەت ىستەۋ تۇبىرلى باس ماقساتىنا تاباندى بولىپ، حالىقتىق تۇرعىدا بەرىك تۇرىپ، پارتيانىڭ بۇقارالىق لۋشيانىن دايەكتىلەندىرىپ، حالىقتىڭ ءتول جاسامپازدىق رۋحىنا قۇرمەت ەتىپ، حالىقتى وزەك ەتكەن دامۋ يدەياسىن امالياتتا ايگىلەپ، جالپى بارىستىق حالىق دەموكراتياسىن دامىتىپ، قوعامدىق تەڭدىكتى، ادىلدىكتى قورعاپ، دامۋدىڭ بىركەلكى، تولىق بولماۋ ماسەلەسى مەن حالىق بۇقاراسىنىڭ شۇعىل، قيىن، الاڭداعان، ۋايىمداعان ماسەلەلەرىن كۇش سالا شەشىپ، ادامنىڭ جان - جاقتى دامۋىن، جالپى حالىقتىڭ بىرگە اۋقاتتانۋىن ىلگەرىلەتۋدە اناعۇرلىم كورنەكتى ماندىك ىلگەرىلەۋشىلىككە قول جەتكىزۋىمىز كەرەك!
− تاريحتى اينا ەتىپ، بولاشاق اشۋدا، ءسوز جوق، ماركسيزمنىڭ جۇڭگوشالانۋىن ۇزدىكسىز ىلگەرىلەتۋ كەرەك. ماركسيزم − ءبىزدىڭ پارتيا بولىپ تۇرۋىمىزداعى، ەل بولىپ تۇرۋىمىزداعى ءتۇبىرلى جەتەكشى يدەيا، پارتيامىزدىڭ جانى جانە تۋى. جۇڭگو كوممۋنيستىك پارتياسى ماركسيزمنىڭ نەگىزگى قاعيداسىنا تاباندى بولىپ، شىندىقتى ءىس جۇزىنەن ىزدەۋگە تاباندى بولىپ، جۇڭگونىڭ ءىس جۇزىندىگىن نەگىزگە الا وتىرىپ، ءداۋىردىڭ اۋقىمىن انىق باعامداپ، تاريحي ىرىقتىلىقتى يگەرىپ، جاپالى ىزدەنىستەر جاساپ، ماركسيزمنىڭ جۇڭگوشالانۋىن، زامانالاسۋىن ۇزدىكسىز ىلگەرىلەتىپ، جۇڭگو حالقىنىڭ ۇلى قوعامدىق توڭكەرىستى ۇزدىكسىز ىلگەرىلەتۋىنە جەتەكشىلىك ەتتى. جۇڭگو كوممۋنيستىك پارتياسىنىڭ نەلىكتەن ىسكەر بولۋى، جۇڭگوشا سوتسياليزمنىڭ نە ءۇشىن جاقسى بولۋى، سايىپ كەلگەندە، ماركسيزمنىڭ جارامدى بولۋىندا!
جاڭا ساپاردا، ءبىز، ءسوز جوق، ماركسيزم - لەنينيزمگە، ماۋ زىدۇڭ يدەياسىنا، دىڭ شياۋپيڭ نازارياسىنا، ”ۇشكە ۋاكىلدىك ەتۋ“ ماڭىزدى يدەياسىنا، عىلمي دامۋ كوزقاراسىنا تاباندى بولىپ، جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ماركسيزمنىڭ نەگىزگى قاعيدالارىن جۇڭگونىڭ ناقتى امالياتىمەن ۇشتاستىرۋعا، جۇڭحۋانىڭ تاڭداۋلى ءداستۇرلى مادەنيەتىمەن ۇشتاستىرۋعا تاباندى بولىپ، ماركسيزممەن ءداۋىردى بارلاپ، ءداۋىردى يگەرىپ، داۋىرگە جەتەكشىلىك ەتىپ، زامانىمىزداعى جۇڭگو ماركسيزمىن، 21 - عاسىر ماركسيزمىن ۇزدىكسىز دامىتۋىمىز كەرەك!
− تاريحتى اينا ەتىپ، بولاشاق اشۋدا، ءسوز جوق، جۇڭگوشا سوتسياليزمگە تاباندى بولۋ جانە دامىتۋ كەرەك. ءوز جولىمەن ءجۇرۋ − پارتيانىڭ بارلىق نازارياسى مەن امالياتىنىڭ تابان تىرەر تياناعى، ونان دا ماڭىزدىسى، پارتيانىڭ 100 جىلدىق كۇرەسىنەن شىعارىلعان تاريحي قورىتىندى. جۇڭگوشا سوتسياليزم − پارتيا مەن حالىقتىڭ نە ءبىر جاپا - ماشاقاتتى باستان كەشىرىپ، وراسان زور بوداۋ بەرۋ ارقىلى قول جەتكىزگەن ءتۇبىرلى تابىسى. جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ دۇرىس جولى. ءبىز جۇڭگوشا سوتسياليزمگە تاباندى بولىپ جانە دامىتىپ، زاتتىق وركەنيەتتىڭ، ساياسي وركەنيەتتىڭ، رۋحاني وركەنيەتتىڭ، قوعامدىق وركەنيەتتىڭ، ەكولوگيالىق وركەنيەتتىڭ سايكەسە دامۋىن ىلگەرىلەتىپ، جۇڭگو ۇلگىسىندەگى وسىزاماندانۋدىڭ جاڭا جولىن اشتىق، ادامزات وركەنيەتىنىڭ جاڭا فورماتسياسىن جاراتتىق.
جاڭا ساپاردا، ءبىز، ءسوز جوق، پارتيانىڭ نەگىزگى نازارياسىنا، نەگىزگى لۋشيانىنا، نەگىزگى جالپى جوباسىنا تاباندى بولىپ، ”بەستى ءبىر تۇلعالاندىرۋ“ جالپى تۇلعالىق ورنالاستىرۋىن ءبىر تۇتاس جوسپارلاپ ىلگەرىلەتىپ، ”ءتورتتى جاپپاي ورىنداۋ“ ستراتەگيالىق ورنالاستىرۋىن سايكەستى ىلگەرىلەتىپ، رەفورما جاساۋدى، ەسىك اشۋدى جاپپاي تەرەڭدەتىپ، جاڭا دامۋ كەزەڭىن تياناق ەتىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن قالىپتاستىرىپ، جوعارى ساپالى دامۋدى ىلگەرىلەتىپ، عىلىم - تەحنيكادا ءوز كۇشىنە سۇيەنۋدى، ءوزىن الۋەتتەندىرۋدى ىلگەرىلەتىپ، حالىقتىڭ قوجايىن بولۋىنا كەپىلدىك ەتىپ، مەملەكەتتى زاڭمەن جونگە سالۋعا تاباندى بولىپ، سوتسياليستىك وزەكتى قۇن جۇيەسىنە تاباندى بولىپ، دامۋ بارىسىندا حالىق تۇرمىسىن قامتاماسىز ەتۋگە جانە جاقسارتۋعا تاباندى بولىپ، ادام مەن تابيعاتتىڭ جاراسىمدى قاتار ءومىر سۇرۋىنە تاباندى بولىپ، حالىقتىڭ بايۋىن، مەملەكەتتىڭ قۇدىرەتتەنۋىن، جۇڭگونىڭ كورىكتەنۋىن سايكەستى ىلگەرىلەتۋىمىز كەرەك.
جۇڭحۋا ۇلتى 5000 جىلدان استام تاريحي بىرتىندەپ دامۋ بارىسىندا شۇلەن شۇعىلالى وركەنيەت قالىپتاستىردى، جۇڭگو كوممۋنيستىك پارتياسىىنىڭ 100 جىلدىق كۇرەس امالياتى جانە 70 نەشە جىلدىق بيلىك جۇرگىزىپ مەملەكەتتى گۇلدەندىرۋ تاجىريبەسى بار، ءبىز ادامزات وركەنيەتىنىڭ بارلىق پايدالى جەتىستىكتەرىنەن بەلسەندىلىكپەن ۇيرەنەمىز جانە ودان ۇلگى الامىز، بارلىق پايدالى ۇسىنىستاردى جانە ىزگى نيەتتى سىنداردى قارسى الامىز، ءبىراق ءبىز استە ”اقىلمانسىپ“ ەمەۋرىنىنە باقتىرعىسى كەلەتىن ءپاتۋانى مۇلدە قابىلدامايمىز! جۇڭگو كوممۋنيستىك پارتياسى مەن جۇڭگو حالقى ءوزى تاڭداعان جولمەن اسقاق بەينەدە ارشىندى قاداممەن جۇرە بەرەدى، جۇڭگونىڭ دامۋ، العا باسۋ تاعدىرىن ءوز قولىندا مىقتاپ ۇستايدى!
− تاريحتى اينا ەتىپ، بولاشاق اشۋدا، ءسوز جوق، مەملەكەت قورعانىسى مەن ارميانى وسىزامانداندىرۋدى جەدەلدەتۋ كەرەك. مەملەكەتتى قۇدىرەتتەندىرۋ ءۇشىن، ءسوز جوق، ارميانى قۇدىرەتتەندىرۋ كەرەك، ارميا قۇدىرەتتەنگەندە عانا مەملەكەت تىنىش بولادى. پارتيانىڭ قارۋلى كۇشتەرگە قولباسشىلىق ەتۋىنە، ءوزىنىڭ حالىق ارمياسىن قۇرۋىنا تاباندى بولۋ − پارتيانىڭ قان توگىلگەن، ءورت لاۋلاعان كۇرەس بارىسىندا قول جەتكىزگەن مىزعىماس اقيقاتى. حالىق ارمياسى پارتيا مەن حالىق ءۇشىن وشپەس ەڭبەك ءسىڭىردى، قىزىل بيلىكتى قورعاۋدىڭ، ۇلتتىڭ ار - نامىسىن قورعاۋدىڭ بەرىك تىرەگى، سونداي - اق ءوڭىردىڭ جانە دۇنيە ءجۇزىنىڭ بەيبىتشىلىگىن قورعاۋدىڭ قۇدىرەتتى كۇشى.
جاڭا ساپاردا، ءبىز، ءسوز جوق، جاڭا داۋىردەگى پارتيانىڭ ارميانى قۇدىرەتتەندىرۋ يدەياسىن جالپى بەتتىك دايەكتىلەندىرىپ، جاڭا داۋىردەگى اسكەري ىستەر ستراتەگيالىق باعىتىن دايەكتىلەندىرىپ، پارتيانىڭ حالىق ارمياسىنا شارتسىز باسشىلىعىنا تاباندى بولىپ، ارميانى قۇدىرەتتەندىرۋدىڭ جۇڭگوشا جولىمەن جۇرۋگە تاباندى بولىپ، ارميانى ساياسي جاقتان قۇرۋدى، ارميانى رەفورما ارقىلى قۇدىرەتتەندىرۋدى، ارميانى عىلىم - تەحنيكا ارقىلى قۇدىرەتتەندىرۋدى، ارميانى دارىندىلار ارقىلى قۇدىرەتتەندىرۋدى، ارميانى زاڭمەن جونگە سالۋدى جالپى بەتتىك ىلگەرىلەتىپ، حالىق ارمياسىن دۇنيە جۇزىندەگى بىرەگەي ارميا ەتىپ قۇرىپ شىعىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن اناعۇرلىم كۇشتى قابىلەتپەن، اناعۇرلىم سەنىمدى تاسىلمەن قورعاۋىمىز كەرەك!
− تاريحتى اينا ەتىپ، بولاشاق اشۋدا، ءسوز جوق، ادامزاتتىڭ تاعدىرلاس ورتاق تۇلعاسىن قۇرۋدى ۇزدىكسىز ىلگەرىلەتۋ كەرەك. بەيبىتشىلىك، تاتۋلىق، جاراسىمدىلىق جۇڭحۋا ۇلتىنىڭ 5000 جىلدان استام ۋاقىتتان بەرى ۇزبەي تالپىنىپ كەلگەن، جالعاستىرىپ كەلگەن ۇستانىمى، جۇڭحۋا ۇلتىنىڭ قانىندا باسقالارعا شاپقىنشىلىق جاسايتىن، ءامىر جۇرگىزىپ، زورەكەرلىك ىستەيتىن گەن جوق. جۇڭگو كوممۋنيستىك پارتياسى ادامزاتتىڭ بولاشاعىنا، تاعدىرىنا نازار اۋدارادى، دۇنيە جۇزىندەگى بارلىق العاباسار كۇشتەرمەن قول ۇستاسا العا ىلگەرىلەيدى، جۇڭگو باستان - اياق دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەسكەرى، حالىقارالىق ءتارتىپتىڭ قورعاۋشىسى!
جاڭا ساپاردا، ءبىز، ءسوز جوق، بەيبىتشىلىك، دامۋ، سەلبەستىك، بىرگە يگىلىكتەنۋ تۋىن بيىك ۇستاپ، دەربەس، وزىنە - ءوزى قوجايىن بولعان بەيبىت ديپلوماتيالىق ساياسات اتقارىپ، بەيبىت دامۋ جولىمەن جۇرۋگە تاباندى بولىپ، جاڭاشا حالىقارالىق قارىم - قاتىناس ورناتۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتىپ، جۇڭگونىڭ جاڭا دامۋى ارقىلى دۇنيە جۇزىنە تىڭ وراي ازىرلەۋىمىز كەرەك. جۇڭگو كوممۋنيستىك پارتياسى بەيبىتشىلىكتى سۇيەتىن بارلىق ەلدەرمەن جانە حالىقتارمەن بىرگە، بەيبىتشىلىك، دامۋ، تەڭدىك، ادىلدىك، دەموكراتيا، ەركىندىك سىندى بۇكىل ادامزاتتىڭ ورتاق قۇنىن ۇزدىكسىز اسقاقتاتىپ، سەلبەسۋگە تاباندى بولادى، قارسىلاسۋمەن اينالىسپايدى، ەسىك اشۋعا تاباندى بولادى، توماعا - تۇيىقتىققا بوي ۇرمايدى، ءوزارا پايدا جەتكىزىپ، تەڭ يگىلىككە كەنەلۋگە تاباندى بولادى، نولدىك جيىنتىق ويىنىمەن اينالىسپايدى، زورەكەرلىك پەن وكتەمدىك ساياسيعا قارسى تۇرىپ، تاريح تەگەرشىگىنىڭ نۇرلى نىسانانى بەتكە الىپ العا ىلگەرىلەۋىن جەبەيدى!
جۇڭگو حالقى − ادىلەتتى قاستەرلەيتىن، زورلىق - زومبىلىقتان تايسالمايتىن حالىق، جۇڭحۋا ۇلتى − كۇشتى ۇلتتىق ماقتانىش سەزىمى جانە وزىنە سەنىمى بار ۇلت. جۇڭگو حالقى وزگە ەل حالىقتارىن ەجەلدەن باسىنىپ، ەزىپ، قۇلدانىپ كورگەن ەمەس، بۇرىن بولماعان، قازىر بولعان جوق، بولاشاقتا دا بولماق ەمەس. سونىمەن بىرگە، جۇڭگو حالقى دا ءارقانداي سىرتقى كۇش اتاۋلىنىڭ ءبىزدى باسىنۋىنا، ەزۋىنە، قۇلدانۋىنا استە جول بەرمەيدى، كىمدە - كىم وسىلاي ىستەۋ قۇر قيالىنا سالىنادى ەكەن، ءسوز جوق، ءبىر ميلليارد 400 ميلليوننان استام جۇڭگو حالقى جان - تانىمەن سومداعان قۇرىش قورعانى الدىندا قان جوسا بولىپ قالا بەرەدى!
− تاريحتى اينا ەتىپ، بولاشاق اشۋدا، ءسوز جوق، كوپتەگەن جاڭا تاريحي ەرەكشەلىكتەرگە يە ۇلى كۇرەستەر جۇرگىزۋ كەرەك. باتىلدىقپەن كۇرەس جۇرگىزۋ، باتىلدىقپەن جەڭىسكە جەتۋ − جۇڭگو كوممۋنيستىك پارتياسىنىڭ جەڭىمپاز قۇدىرەتتى رۋحاني كۇشى. ۇلى ارماندى جۇزەگە اسىرۋ ءۇشىن قايسارلىقپەن ايانباي شايقاسۋ، قاجىماي - تالماي كۇرەس جۇرگىزۋ كەرەك. بۇگىنگى تاڭدا ءبىز جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ نىساناسىنا تاريحتاعى ءارقانداي مەزگىلدەگىدەن دە اناعۇرلىم تاياي تۇستىك، مۇنى جۇزەگە اسىرۋعا سەنىمىمىز ءتىپتى دە كامىل جانە قۋاتىمىز دا جەتەدى، سونىمەن بىرگە اناعۇرلىم جاپالى، اناعۇرلىم ماشاقاتتى قۇلشىنىستار جاساۋعا، ءسوز جوق، دايىندالۋىمىز كەرەك.
جاڭا ساپاردا ءبىز، ءسوز جوق، تاۋقىمەت تانىمىن كۇشەيتىپ، زەينەتتى كۇن دە بەينەتتى كۇننىڭ بولارىن قاي - قاشان دا ويلاپ، جالپى تۇلعالىق مەملەكەت حاۋىپسىزدىگى كوزقاراسىن دايەكتىلەندىرىپ، دامۋ مەن حاۋىپسىزدىكتى ءبىر تۇتاس جوسپارلاپ، جۇڭحۋا ۇلتىنىڭ ۇلى گۇلدەنۋى ستراتەگياسى جالپى جاعدايى مەن دۇنيە جۇزىندە 100 جىلدا بولماعان زور وزگەرىستى ءبىر تۇتاس جوسپارلاپ، ەلىمىز قوعامىنداعى باستى قايشىلىقتىڭ وزگەرۋى الا كەلگەن جاڭا ەرەكشەلىكتەردى، جاڭا تالاپتاردى جەتە تانىپ، قىم - قۋىت، كۇردەلى حالىقارالىق ورتا الا كەلگەن جاڭا قايشىلىقتاردى، جاڭا سىن - سايىستاردى جەتە تانىپ، باتىلدىقپەن كۇرەس جۇرگىزىپ، شەبەرلىكپەن كۇرەس جۇرگىزىپ، تاۋ كەزىكسە جول اشىپ، سۋ جولىقسا كوپىر سالىپ، حاۋىپ - قاتەر مەن سىن - سايىس اتاۋلىنى باتىلدىقپەن جەڭۋىمىز كەرەك!
− تاريحتى اينا ەتىپ، بولاشاق اشۋدا، ءسوز جوق، جۇڭحۋا ۇلاندارىنىڭ ۇلى ىنتىماعىن كۇشەيتۋ كەرەك. 100 جىلدىق كۇرەس بارىسىندا، جۇڭگو كوممۋنيستىك پارتياسى بىرلىكساپتى باستان - اياق ماڭىزدى ورىنعا قويىپ، ەڭ كەڭ كولەمدى بىرلىكساپتى ۇزدىكسىز بەكەمدەپ جانە دامىتىپ، ىنتىماقتاسۋعا بولاتىن بارلىق كۇشتەرمەن ىنتىماقتاسىپ، جۇمىلدىرۋعا بولاتىن بارلىق بەلسەندى فاكتورلاردى جۇمىلدىرىپ، تىزە قوسا كۇرەس جۇرگىزەتىن كۇشتى ەڭ جوعارى شەكتە ۇيىستىردى. وتانشىل بىرلىكساپ − جۇڭگو كوممۋنيستىك پارتياسىنىڭ ەل ءىشى - سىرتىنداعى بارلىق جۇڭحۋا ۇلاندارىن ىنتىماقتاستىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋداعى ماڭىزدى اسىلى.
جاڭا ساپاردا ءبىز، ءسوز جوق، ۇلى ىنتىماققا، ۇلى بىرلىككە تاباندى بولىپ، بىركەلكىلىك پەن الۋان تۇرلىلىكتىڭ بىرلىگىنە تاباندى بولىپ، يدەيالىق - ساياسي جەتەكشىلىكتى كۇشەيتىپ، كەڭ كولەمدە ورتاق تانىم ۇيىستىرىپ، الەمدەگى دارىندىلاردى كەڭ كولەمدە توپتاپ، ەڭ زور ورتاق بولگىش تابۋعا، ەڭ ۇلكەن سەنترلەس شەڭبەر سالۋعا قۇلشىنىپ، ەل ءىشى - سىرتىنداعى بارلىق جۇڭحۋا ۇلاندارى ءبىر باعىتتا ويلايتىن، ءبىر باعىتتا كۇش سالاتىن جالىندى جاعداي قالىپتاستىرىپ، ۇلتتىڭ گۇلدەنۋىن جۇزەگە اسىرۋدىڭ تەلەگەي كۇشىن ۇيىستىرۋىمىز كەرەك!
− تاريحتى اينا ەتىپ، بولاشاق اشۋدا، ءسوز جوق، پارتيا قۇرىلىسىنىڭ جاڭا ۇلى ينجەنەرياسىن ۇزدىكسىز ىلگەرىلەتۋ كەرەك. وزىنە توڭكەرىس جاساۋعا باتىل بولۋ − جۇڭگو كوممۋنيستىك پارتياسىنىڭ باسقا ساياسي پارتيالاردان پارىقتالاتىن كورنەكتى بەلگىسى. پارتيامىزدىڭ سان رەتكى شىڭدالۋدان ءوتىپ، ارىندى دا الىمدى بولىپ تۇرا الۋىنداعى اسا ماڭىزدى ءبىر سەبەپ − ءبىز باستان - اياق پارتيانى پارتيا باسقارۋعا، پارتيانى جاپپاي قاتاڭ جونگە سالۋعا تاباندى بولىپ، ءوزىمىز ءارقايسى تاريحي كەزەڭدەردە ءدوپ كەلگەن حاۋىپ - قاتەرلەر مەن سىندارعا ۇزدىكسىز ويداعىداي توتەپ بەرىپ، پارتيامىزدىڭ دۇنيە ءجۇزى جاعدايىندا تەرەڭ وزگەرىستەر تۋىلعان تاريحي ۇردىستە باستان - اياق ءداۋىردىڭ الدىڭعى لەگىندە جۇرۋىنە، ەل ءىشى - سىرتىنداعى ءتۇرلى حاۋىپ - قاتەرلەر مەن سىندارعا توتەپ بەرۋدىڭ تاريحي ۇردىسىندە باستان - اياق بۇكىل ەل حالقىنىڭ تىرەگى بولۋىنا شىنايى كەپىلدىك ەتكەندىگىمىزدەن!
جاڭا ساپاردا ءبىز تەمىر سوقساڭ قۇرىش بول دەگەن قاعيدانى ەستە بەرىك ساقتاپ، پارتيانى جاپپاي قاتاڭ جونگە سالۋدى ماڭگى جالعاستىرۋ ساياسي سانالىلىعىن كۇشەيتىپ، پارتيانىڭ ساياسي قۇرىلىسىن ءبىر تۇتاس باسشىلىققا الىپ، جاڭا داۋىردەگى پارتيا قۇرىلىسىنىڭ جاڭا ۇلى ينجەنەرياسىن ۇزدىكسىز ىلگەرىلەتىپ، پارتيانىڭ ۇيىمدىق جۇيەسىن ۇزدىكسىز قاتايتىپ، ءمورالدى دا قابىلەتتى جوعارى ساپالى كادرلار قوسىنىن كۇش سالا قۇرىپ، پارتيا ستيلى، پاكتىك قۇرىلىسىن جانە شىرىكتەسۋگە قارسى تۇرۋ كۇرەسىن تاباندىلىقپەن ىلگەرىلەتىپ، پارتيانىڭ العاباسارلىعى مەن كىرشىكسىزدىگىنە زيان جەتكىزەتىن بارلىق فاكتورلاردى باتىل الاستاپ، پارتيانىڭ اقاۋسىزدىعىن بۇلدىرەتىن بارلىق ۆيرۋستاردى الاستاپ، پارتيانىڭ ساپاسىنىڭ وزگەرمەۋىنە، سيپاتىنىڭ وزگەرمەۋىنە، قاسيەتىنىڭ وزگەرمەۋىنە شىنايى كەپىلدىك ەتۋىمىز، پارتيانىڭ جاڭا داۋىردە جۇڭگوشا سوتسياليزمگە تاباندى بولۋ جانە ونى دامىتۋ تاريحي ۇردىسىندە باستان - اياق پارمەندى باسشىلىق ۇيتقى بولۋىنا شىنايى كەپىلدىك ەتۋىمىز كەرەك!
جولداستار، دوستار!
ءبىز ”ءبىر ەل، ەكى ءتۇزىم“، ”شياڭگاڭدى شياڭگاڭدىقتار باسقارۋ“، ”اۋمىندى اۋمىندىقتار باسقارۋ“، وسكەلەڭ اۆتونوميا باعىتىن جالپى بەتتىك، دالمە - ءدال دايەكتىلەندىرىپ، ورتالىقتىڭ شياڭگاڭ، اۋمىن ەرەكشە اكىمشىلىك رايوندارىن جاپپاي باسقارۋ، جونگە سالۋ ۇقىعىن تياناقتاندىرىپ، ەرەكشە اكىمشىلىك رايوننىڭ مەملەكەت حاۋىپسىزدىگىن قورعاۋ زاڭ - تۇزىمدەرىن جانە اتقارۋ مەحانيزمىن تياناقتاندىرىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاپ، ەرەكشە اكىمشىلىك رايوننىڭ قوعامدىق كەلەلى جاعدايىنىڭ ورنىقتىلىعىن قورعاپ، شياڭگاڭنىڭ، اۋمىننىڭ ۇزاق ۋاقىت گۇلدەنىپ - كوركەيۋىن، ورنىقتىلىعىن ساقتاۋىمىز كەرەك.
تايۋان ماسەلەسىن شەشىپ، وتاننىڭ بۇكىلدەي بىرلىككە كەلۋىن جۇزەگە اسىرۋ − جۇڭگو كوممۋنيستىك پارتياسىنىڭ بۇلجىماس مۇرات ەتكەن تاريحي مىندەتى، بۇكىل جۇڭحۋا ۇلاندارىنىڭ ورتاق ارمان - تىلەگى. ءبىر جۇڭگو پرينسيبىنە جانە ”92 - جىلعى ورتاق تانىمعا“ تاباندى بولىپ، وتاننىڭ بەيبىت جولمەن بىرلىككە كەلۋ اياق الىسىن ىلگەرىلەتۋ كەرەك. ەكى جاعالاۋداعى باۋىرلاستاردى قامتىعان بارلىق جۇڭحۋا ۇلاندارى ءبىر جاعادان باس، ءبىر جەڭنەن قول شىعارىپ، ىنتىماقتاسا العا ىلگەرىلەپ، ءارقانداي ”تايۋان دەربەستىگى“ قاسكۇنەمدىگىن باتىل تالقانداپ، ۇلتتىڭ گۇلدەنۋ تاماشا بولاشاعىن بىرگە اشۋ كەرەك. ءارقانداي ادام جۇڭگو حالقىنىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋ بەرىك بەكىمىن، مىزعىماس ەرىك جىگەرىن، قۇدىرەتتى قۋاتىن تومەن شامالاماسىن!
جولداستار، دوستار !
بولاشاق جاستاردىكى، ءۇمىت جاستاردا. 100 جىلدىڭ الدىندا، ءبىر توپ جاڭا جاس ماركسيزم يدەياسى الاۋىن بيىك ۇستاپ، تۇنەك تورلاپ اۋمالى - توكپەلى جاعدايدا تۇرعان جۇڭگودا ۇلتتىڭ گۇلدەنۋ بولاشاعىن ماشاقاتپەن تىنباي قاراستىردى. 100 جىلدان بەرى، جۇڭگو كوممۋنيستىك پارتياسىنىڭ تۋى استىندا، سان ۇرپاق جۇڭگو جاستارى جاستىق كوكتەمدەگى كۇرەستەرىن پارتيا مەن حالىق ىستەرىنە ءسىڭىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋداعى اۆانگارد كۇشكە اينالدى. جاڭا داۋىردەگى جۇڭگو جاستارى جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدى ءوز مىندەتى ەتىپ، جۇڭگولىق بولۋ جىگەرىن، جالىنىن، سەنىمىن كۇشەيتىپ، ءداۋىردىڭ ءۇمىتىن اقتاۋ، ەسىل شاقتاردىڭ ءۇمىتىن اقتاۋ، پارتيا مەن حالىقتىڭ ىقىلاستى ءۇمىتىن اقتاۋ كەرەك!
جولداستار، دوستار!
100 جىلدىڭ الدىندا، جۇڭگو كوممۋنيستىك پارتياسى قۇرىلعان كەزدە نەبارى 50 نەشە پارتيا مۇشەسى عانا بار ەدى، بۇگىن 95 ميلليوننان استام پارتيا مۇشەسى بار، ءبىر ميلليارد 400 ميلليوننان استام حالقى بار ءىرى ەلگە باسشىلىق ەتكەن، الەمدە ماڭىزدى ىقپالعا يە دۇنيە جۇزىندەگى ءبىرىنشى ءىرى بيلىك باسىنداعى پارتياعا اينالدى.
100 جىلدىڭ الدىندا، جۇڭحۋا ۇلتى دۇنيە ءجۇزىنىڭ الدىندا توقىراعان، تۇرالاعان بەينەدە كورىنىس بەرگەن ەدى. بۇگىنگى تاڭدا جۇڭحۋا ۇلتى دۇنيە جۇزىنە گۇلدەنىپ - كوركەيگەن بەينەمەن كورىنىپ، بوگەۋ بەرمەس ارىنمەن ۇلى گۇلدەنۋگە قادام تاستاۋدا.
وتكەن 100 جىلدا، جۇڭگو كوممۋنيستىك پارتياسى حالىققا، تاريحقا ۇزدىك جاۋاپناما تاپسىردى. قازىر جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، ەكىنشى 100 جىلدىق كۇرەس نىساناسىن جۇزەگە اسىرۋدىڭ جاڭا ەمتيحان تاپسىرۋ جولىنا تاعى قادام تاستادى.
بارلىق جۇڭگو كوممۋنيستىك پارتيا مۇشەلەرى! پارتيا ورتالىق كوميتەتى سىزدەردى اۋەلگى ماقساتتى، بورىشتى ەستە بەرىك ساقتاپ، مۇرات - سەنىمدى بەكەمدەپ، پارتيانىڭ باس ماقساتىن امالياتتا ايگىلەپ، حالىق بۇقاراسىمەن ەتەنە بايلانىستى ماڭگى ساقتاپ، قاي - قاشان دا حالىقپەن بىرگە ويلاپ، بىرگە ىستەپ، قيىن - قىستاۋدى بىلەك بىرىكتىرە جەڭىپ، زەينەت پەن بەينەتتە بىرگە بولىپ، حالىقتىڭ تاماشا تۇرمىسقا دەگەن تالپىنىسىن جۇزەگە اسىرۋ ءۇشىن ۇزدىكسىز قاجىماي - تالماي قۇلشىنۋعا، پارتيا مەن حالىققا اناعۇرلىم زور داڭق اپەرۋگە قۇلشىنۋعا شاقىرادى!
جولداستار، دوستار!
جۇڭگو كوممۋنيستىك پارتياسى جۇڭحۋا ۇلتىنىڭ ماڭگىلىك ۇلى ءىسىن مۇرات ەتىپ، 100 جىلدىق كەمەل شاعىنا كەلدى! وتكەنگە قايىرىلا قاراپ، بولاشاققا كوز جىبەرسەك، جۇڭگو كوممۋنيستىك پارتياسىنىڭ پارمەندى باسشىلىعىندا، بۇكىل ەلدەگى ءار ۇلت حالقى تىعىز ىنتىماقتاسىپ، جاپپاي سوتسياليستىك وسىزاماندانعان قۇدىرەتتى مەملەكەت قۇرۋ نىساناسىن، ءسوز جوق، جۇزەگە اسىرادى، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن، ءسوز جوق، جۇزەگە اسىرادى!
ۇلى، داڭقتى، دۇرىس جۇڭگو كوممۋنيستىك پارتياسى جاساسىن!
ۇلى، داڭقتى، قاھارمان جۇڭگو حالقى جاساسىن!
(شينحۋا اگەنتتىگىنىڭ 7 - ايدىڭ 1 - كۇنى بەيجيڭنەن بەرگەن حابارى)
