7 - ايدىڭ 5 - كۇنى كەشتە، مەملەكەت ءتوراعاسى شي جينپيڭ بەيجيڭدە فرانسيانىڭ زۇڭتۇڭى ماكرونمەن، گەرمانيانىڭ زۇڭليى مەركەلمەن بەينە ەكران باسشىلار كەڭەسىن وتكىزدى. □ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
7 - ايدىڭ 5 - كۇنى كەشتە، مەملەكەت ءتوراعاسى شي جينپيڭ بەيجيڭدە فرانسيانىڭ زۇڭتۇڭى ماكرونمەن، گەرمانيانىڭ زۇڭليى مەركەلمەن بەينە ەكران باسشىلار كەڭەسىن وتكىزدى. □ سۋرەتتى شينحۋا اگەنتتىگىنىڭ ءتىلشىسى يۋە يۋەۋي تۇسىرگەن
شينحۋا اگەنتتىگىنىڭ 7 - ايدىڭ 5 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 7 - ايدىڭ 5 - كۇنى كەشتە بەيجيڭدە فرانسيانىڭ زۇڭتۇڭى ماكرونمەن، گەرمانيانىڭ زۇڭليى مەركەلمەن بەينە ەكران باسشىلار كەڭەسىن وتكىزدى.
شي جينپيڭ بىلاي دەپ اتاپ كورسەتتى: كەزەكتە بۇكىل جەر شارىندا ىندەتتىڭ جاعدايى ءالى دە قاتاڭ، ەكونوميكانىڭ قالپىنا كەلۋىنىڭ بولاشاعى بۇلىڭعىر. دۇنيە ءجۇزى ەگەسۋگە، قاراما - قارسى كەلۋگە، نولدىك جيىنتىق ويىنىنا ەمەس، قايتا ءوزارا قۇرمەت ەتۋگە، ىزگى نيەتپەن سەلبەسۋگە بۇرىنعى ءارقانداي كەزدەگىدەن دە مۇقتاج. جۇڭگو مەن ەۆروپانىڭ ورتاق تانىمدى جانە سەلبەستىكتى كەڭەيتىپ، الەمدىك سىن - سايىسقا لايىقتى توتەپ بەرۋدە ماڭىزدى رول اتقارۋىن ءۇمىت ەتەمىن.
ءبىرىنشى، ءبىر - ءبىرىن دۇرىس تانۋعا تاباندى بولۋ. 100 جىلدان بەرى جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، جۇڭگونىڭ مەملەكەت جاعدايىنا ۇيلەسەتىن، سونداي - اق حالىقتىڭ جاپپاي قولداۋىنا بولەنگەن دامۋ جولىن اشتى. جۇڭگو جاق بەيبىتشىلىك، دامۋ، ادىلدىك، ادىلەتتىلىك، دەموكراتيا، ەركىندىك سىندى بۇكىل ادامزاتتىڭ ورتاق قۇنىنان جازبايدى. جۇڭگو مەن ەۆروپا ءوزارا قۇرمەت ەتۋ، ورتاقتىققا ۇمتىلىپ پارىقتاردى ساقتاۋ پرينسيبىن نەگىزگە الا وتىرىپ سەلبەستىك ورىستەتكەندىكتەن، ەكى جاقتىڭ جان - جاقتى ستراتەگيالىق سەرىكتەستىك قارىم - قاتىناسى ءوزارا ەڭ ۇلكەن ورتاق بولگىشتى توپتادى. ءبىز وسى رۋحتى ۇستانىپ، ءوزارا پارىققا دۇرىس مامىلە جاساپ، اراداعى الاۋىزدىقتاردى اقىلمەن ءبىر جاقتى ەتىپ، جۇڭگو - ەۆروپا قارىم - قاتىناسىنىڭ العا باسۋ باعىتىن مىقتى يگەرۋىمىز كەرەك.
ەكىنشى، ءوزارا تيىمدىلىك جاساۋ، تەڭ يگىلىكتەنۋ سەلبەستىگىن كەڭەيتۋ. جۇڭگو جاق ەۆروپا جاقپەن 23 - رەتكى جۇڭگو - ەۆروپا باسشىلارىنىڭ ديدارلاسۋىن ەرتەرەك وتكىزىپ، ستراتەگيا، ەكونوميكا - ساۋدا، گۋمانيتارلىق، سان - سيفر، كليمات سالالارىنداعى جوعارى دارەجەلى تىلدەسۋدى ويداعىداي وتكىزىپ، جۇڭگو مەن ەۆروپانىڭ تىزىمدەگى ونىمدەردى ءوزارا تانۋدى، ءوزارا قورعاۋدى ىلگەرىلەتىپ، ەكى جاقتاعى بۇقارانىڭ كۇندەلىكتى تۇرمىسىنا اناعۇرلىم كوپ تيىمدىلىك اكەلۋدى قالايدى. جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ جاعدايىندا ادامداردىڭ بارىس - كەلىسىنىڭ جەدەل ارناسىن ۇزدىكسىز ساپالىلاندىرادى. جۇڭگونىڭ ەسىك اشۋدى كەڭەيتۋ قادامى مىزعىمايدى، ەۆروپا جاقتىڭ بازار پرينسيبى بويىنشا جۇڭگو كاسىپورىندارىنا ءادىل، جاريا، كەمسىتپەيتىن شارۋاشىلىق - ساۋدا ورتاسىن ازىرلەۋىن ءۇمىت ەتەمىن.
ءۇشىنشى، ناعىز كوپ جاقتىلىقتى قورعاۋ. بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە بىرلەسكەن مەملەكەتتەر ۇيىمىنىڭ ۋستاۆىن نەگىز ەتكەن حالىقارالىق قارىم - قاتىناستىڭ نەگىزگى ولشەمدەرىن قورعاۋ كەرەك، حالىقاراداعى ىستەر كوپشىلىكتىڭ بايسالدىلىقپەن اقىلداسىپ ءبىر جاقتى ەتۋىن قاجەت ەتەدى. جۇڭگو جاق ەۆروپا جاقپەن بىرگە كۇنميڭدە وتەتىن «ورگانيزمدەردىڭ الۋان تۇرلىلىگى شارتى» 15 - رەتكى شارت جاساۋشى جاقتار جينالىسىنىڭ، «بىرلەسكەن مەملەكەتتەر ۇيىمىنىڭ كليمات وزگەرىسى تۋرالى جۇلگەلىك شارتى» 26 - رەتكى شارت جاساۋشى جاقتار ءماجىلىسىنىڭ بەلسەندى تابىسقا قول جەتكىزۋىنە شىنايى كەپىلدىك ەتۋدى، سونداي - اق دۇنيە جۇزىلىك ساۋدا ۇيىمى رەفورماسىنىڭ دۇرىس بەتالىستا دامۋىنا بىرگە جەتەكشىلىك ەتىپ، بەيجيڭ قىسقى وليمپياداسى مەن پاريج جازعى وليمپياداسىن ويداعىداي وتكىزۋدە ءوزارا قولداۋ كورسەتۋدى قالايدى.
ءتورتىنشى، جالپى تۇلعالىق جاقتان ورنىقتى، بىركەلكى داميتىن ءىرى ەلدەر قارىم - قاتىناسىن ورناتۋعا تاباندى بولۋ. جۇڭگو باسقانىڭ ورنىن باسۋدى ەمەس، ءوزىن ويداعىداي دامىتۋدى ەڭ ءۇمىت ەتەدى. جۇڭگو جاقتىڭ ”ءبىر بەلدەۋ، ءبىر جولدى“ بىرگە قۇرۋ باستاماسىن ورتاعا قويۋى اناعۇرلىم كوپ ورتاق دامۋ ورايلارىن جاراتۋ بولىپ تابىلادى. جۇڭگو جاق ءار جاقپەن تىلدەسۋدى، سەلبەسۋدى كۇشەيتۋدى قالايدى، سونىمەن بىرگە ءوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعايدى. ەۆروپا جاقتىڭ حالىقارالىق ىستەردە اناعۇرلىم كوپ بەلسەندى رول اتقارىپ، ستراتەگيادا ءوز كۇشىنە سۇيەنۋدى شىن مانىندە ايگىلەپ، دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن بىرگە ويداعىداي قورعاۋىن ءۇمىت ەتەمىن.
ءۇش مەملەكەتتىڭ باسشىلارى تاعى افريكا تۋرالى كەڭەستىك تاقىرىپ اياسىندا پىكىر اۋىستىردى. شي جينپيڭ بىلاي دەپ اتاپ كورسەتتى: افريكا − وركەندەپ كەلە جاتقان مەملەكەتتەر ەڭ كوپ شوعىرلانعان، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ مەن ەكونوميكانى قالپىنا كەلتىرۋ مىندەتى ەڭ ماشاقاتتى ءوڭىر، ونان دا ماڭىزدىسى، دامۋ كومەسكى كۇشى ەڭ زور قۇرلىق. جۇڭگو جاق 40تان استام افريكا مەملەكەتىنە جانە افريكا ەلدەرى وداعى كوميتەتىنە ۆاكسينا بەردى جانە ءالى دە بەرۋ ۇستىندە، افريكانىڭ ۆاكسينانى ءوز جەرىندە ءوندىرۋ قابىلەتىن جوعارىلاتۋىنا بەلسەنە قولداۋ كورسەتۋدە. جۇڭگو جاق 19 افريكا مەملەكەتىمەن قارىزدى كەشەۋىلدەتۋ كەلىسىمىن جاساستى نەمەسە قارىزدى كەشەۋىلدەتۋ جونىندە ورتاق تانىمعا كەلدى، سونداي - اق ”افريكانىڭ جاسىل ۇلى قورعانى“ سياقتى باياندى دامۋ جوسپارىنا سىندارلى تۇردە ات سالىسۋدا. ەۆروپا جاقتىڭ افريكاعا قولداۋ كورسەتۋ مەن كومەكتى ارتتىرىپ، شۇعىل قاجەت ەتىپ وتىرعان افريكا مەملەكەتتەرىنە ءتىپتى دە كوبىرەك ۆاكسينا بەرىپ، افريكانىڭ قارىز قىسىمىنا ويداعىداي توتەپ بەرۋىنە، افريكا ەكونوميكاسىنىڭ قالپىنا كەلۋىن جانە جاسىل، تومەن كومىرتەكتى دامۋىن ەرتەرەك جۇزەگە اسىرۋىنا كومەكتەسۋىن ءۇمىت ەتەمىن. فرانسيانىڭ، گەرمانيانىڭ جۇڭگو مەن افريكا بىرگە كوتەرگەن ”افريكانىڭ دامۋىنا قولداۋ كورسەتەتىن سەرىكتەستەر باستاماسىنا“ قوسىلۋىن، ءۇش جاقتى، ءتورت جاقتى جانە كوپ جاقتى سەلبەستىكتەر ورىستەتۋىن قارسى الامىز.
ماكرون مىنالاردى ءبىلدىردى: وتكەن نەشە 10 جىلدان بەرى جۇڭگونىڭ دامۋى وراسان زور جەتىستىككە قول جەتكىزدى، فرانسيا جاق جۇڭگومەن سەلبەستىكتى شىنايى پوزيتسيامەن ۇزدىكسىز ىلگەرىلەتۋگە كۇش سالادى، ەۆروپا - جۇڭگو قارجى قوسۋ كەلىسىمىنىڭ جاسالۋىنا قولداۋ كورسەتەدى، گۋمانيتارلىق اۋىس - كۇيىستى كۇشەيتەدى، جۇڭگو كاسىپورىندارىنىڭ فرانسياعا بارىپ قارجى قوسۋىن قارسى الادى. فرانسيا جاق دۇنيە جۇزىلىك ساۋدا ۇيىمى رەفورماسى، كليمات وزگەرىسىنە توتەپ بەرۋ جانە ورگانيزمدەردىڭ الۋان تۇرلىلىگىن قورعاۋ سياقتى ماسەلەلەر جونىندە جۇڭگو جاقپەن ۇزدىكسىز تىلدەسۋدى قالايدى، كۇنميڭدە وتەتىن «ورگانيزمدەردىڭ الۋان تۇرلىلىگى شارتى» 15 - رەتكى شارت جاساۋشى جاقتار جينالىسىنىڭ جانە مارسەل 7 - كەزەكتى دۇنيە جۇزىلىك تابيعاتتى قورعاۋ جينالىسىنىڭ تابىستى بولۋىنا قولداۋ كورسەتەدى. فرانسيا جاق جۇڭگو جاقتىڭ وركەندەپ كەلە جاتقان ەلدەردىڭ ۆاكسيناعا ءادىل قول جەتكىزۋى ءۇشىن اتقارعان ماڭىزدى رولىن القايدى، جۇڭگو جاقپەن سەلبەستىكتى كۇشەيتۋدى قالايدى. فرانسيا جاق جۇڭگو جاقتىڭ 20 ەل توبىنىڭ قارىزدى ازايتۋعا، كەشەۋىلدەتۋگە قاتىستى باستامالارىن تياناقتاندىرۋ ءۇشىن جاساعان قۇلشىنىستارىن جوعارى باعالايدى، جۇڭگو جاقپەن بىرگە افريكانىڭ قارجى قۇراۋىنا، وقۋ - اعارتۋىنا كومەكتەسۋ سياقتى ماسەلەلەر جونىندە ۇزدىكسىز تۇردە سايكەسۋدى كۇشەيتۋدى قالايدى.
مەركەل مىنالاردى ءبىلدىردى: جۇڭگو جاقتىڭ ىندەتتىڭ ىقپالىن جەڭىپ، ەكونوميكانىڭ قالپىنا كەلۋىن، دامۋىن جۇزەگە اسىرعاندىعىن قۇتتىقتايمىن. گەرمانيا، فرانسيا، جۇڭگو باسشىلارىنىڭ ءوزارا پىكىرلەسۋدى ساقتاۋى ايرىقشا ماڭىزدى. گەرمانيا جاق جۇڭگو جاقپەن بىرگە ۆاكسينانىڭ ءادىل ءوندىرىسىن، ءبولىسىن جەبەۋ، ادامداردىڭ بارىس - كەلىسى مەن ساۋدالىق بارىس - كەلىستى قالپىنا كەلتىرۋ جونىندە سايكەسۋدى، سەلبەسۋدى كۇشەيتۋدى قالايدى. ەۆروپا - جۇڭگو قارىم - قاتىناسى ايرىقشا ماڭىزدى، ەكى جاقتىڭ ورتاق تانىمدارى وتە كوپ، سەلبەسۋگە بولاتىن سالالارى وتە كوپ، ءبىر - بىرىنە قۇرمەت ەتۋ، تىلدەسۋدى كۇشەيتۋ ارقىلى الاۋىزدىقتى ازايتقانى ءجون. گەرمانيا جاق 23 - رەتكى ەۆروپا وداعى - جۇڭگو باسشىلار ديدارلاسۋىن جەدەل وتكىزۋدى قولدايدى، ەۆروپا - جۇڭگو قارجى قوسۋ كەلىسىمىنىڭ ەرتەرەك ماقۇلدانۋىن ءۇمىت ەتەدى. گەرمانيا جاق جۇڭگو جاقپەن حالىقارالىق ىستەردەگى سەلبەستىكتى كۇشەيتۋدى ءۇمىت ەتەدى، جۇڭگو جاقپەن بىرگە كليمات وزگەرىسى، ورگانيزمدەردىڭ الۋان تۇرلىلىگى، افريكانىڭ ىندەتكە توتەپ بەرۋى سياقتى ماسەلەلەر جونىندە تىلدەسۋدى ساقتاۋدى قالايدى، جۇڭگو مەن افريكا ورتاعا قويعان ”افريكانىڭ دامۋىنا قولداۋ كورسەتەتىن سەرىكتەستەر باستاماسىنا“ قوسىلۋدى بەلسەنە اقىلداسۋدى قالايدى.
ءۇش مەملەكەتتىڭ باسشىلارى تاعى يراننىڭ يادرو ماسەلەسى، اۋعانستان، بيرما سياقتى ماسەلەلەر جونىندە پىكىر اۋىستىردى.
ياڭ جيەچى، ۋاڭ ي، حى ليفىڭ قاتارلىلار باسشىلار كەڭەسىنە قاتىناستى.
