شينحۋا اگەنتتىگىنىڭ 7 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 7 - ايدىڭ 16 - كۇنى اۋعانستاننىڭ زۇڭتۇڭى عانيمەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جۇڭگو مەن اۋعانستان ءداستۇرلى دوس كورشى، قاي - قاشان دا ءوزارا ءتۇسىنىسىپ، ءوزارا كومەكتەسىپ كەلەدى. جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، ەكى ەل حالقى قيىندىقتى بىلەك بىرىكتىرە جەڭىپ، ءوزارا قارايلاسىپ، ەكى ەلدىڭ دوستىعى مەن سەلبەستىگىن تەرەڭدەتتى. جۇڭگو جاق اۋعانستان جاقتىڭ ىندەتكە قارسى اتتانۋىنا ۇزدىكسىز قولداۋ كورسەتۋدى جانە كومەكتەسۋدى قالايدى. اۋعانستان جاقتىڭ اۋعانستانداعى جۇڭگو ازاماتتارى مەن قۇرىلىمدارىنىڭ حاۋىپسىزدىگىن قورعاۋدى كۇشەيتۋىن ءۇمىت ەتەدى.
شي جينپيڭ بىلاي دەپ باسا دارىپتەدى: جۇڭگو جاق اۋعانستان ۇكىمەتىنىڭ مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىنا باتىل قولداۋ كورسەتەدى. بۇل اۋعانستان حالقىنىڭ جانە وسى وڭىردەگى مەملەكەتتەردىڭ مۇددەسىنە ۇيلەسەدى. جۇڭگو جاق باستان - اياق بىلاي دەپ قارايدى: ساياسي تىلدەسۋ − اۋعانستاندا ۇلتتاردىڭ راقايلاسۋ جانە باياندى بەيبىتشىلىكتى جۇزەگە اسىرۋداعى ءتۇبىرلى شارا، ”اۋعانستاندىقتار جەتەكشى بولۋ، اۋعانستاندىقتار يەلىك ەتۋ“ پرينسيبىن ۇزدىكسىز قولدايدى، اۋعانستاننىڭ بەيبىت راقايلاسۋ بارىسىن قولدايدى، اۋعانستاننىڭ ەرتەرەك بەيبىت قايتا قۇرۋىن قولدايدى. جۇڭگو جاق اۋعانستان ۇكىمەتى مەن ەل ىشىندەگى ءارقايسى توپتاردىڭ جۋىق ارادا تەگەران كەڭەسىندە بەلسەندى ورتاق تانىمعا قول جەتكىزۋىن قۋانا كورگىسى كەلەدى، بەيبىتشىلىك كەلىسسوزىندەگى ەكى جاقتىڭ اۋعانستان حالقىنىڭ مۇددەسىن ماڭىزدى ورىنعا قويىپ، كەلىسسوز وتكىزۋ ارقىلى ەرتەرەك ساياسي جولمەن شەشۋ جوباسىن جاساسۋىن ءۇمىت ەتەدى. جۇڭگو جاق بۇل ءۇشىن اۋەلگىدەي سىندارلى رول اتقارادى.
عاني مىنالاردى ءبىلدىردى: جۇڭگو جاڭا تيپتى ايدارشا ۆيرۋس وكپە قابىنۋ ىندەتىنە ءساتتى توتەپ بەردى، سونداي - اق، ەڭ الدىمەن، ەكونوميكالىق ارتۋدى جۇزەگە اسىردى، مۇنىڭ دۇنيە جۇزىندەگى ءارقايسى ەلدىڭ بارلىعىنا پايداسى اسا زور. اۋعانستان جاق جۇڭگو جاقتىڭ اۋعانستان جاقتىڭ ىندەتكە قارسى اتتانۋىنا اسا قۇندى قولداۋ كورسەتكەنىنە العىس ايتادى، جۇڭگو جاقپەن ءوزارا ۇلاسۋ، تۇتاسۋ سياقتى سالالارداعى سەلبەستىكتى ۇزدىكسىز ىلگەرىلەتۋدى ءۇمىت ەتەدى. اۋعانستان ۇكىمەتى قازىرگى داعدارىستى ساياسي جولمەن شەشۋگە كۇش سالىپ، اۋعانستاننىڭ باياندى بەيبىتشىلىگىن جۇزەگە اسىرادى. جۇڭگو جاق بۇرىننان بەرى ءوڭىردىڭ حاۋىپسىزدىگىن، ورنىقتىلىعىن قورعاۋداعى ماڭىزدى بەلسەندى كۇش بولىپ كەلەدى، جۇڭگو جاقتىڭ اۋعانستان ماسەلەسىن ساياسي جولمەن شەشۋدى ىلگەرىلەتۋدە ۇزدىكسىز ماڭىزدى رول اتقارۋىن ءۇمىت ەتەمىن.
شينحۋا اگەنتتىگىنىڭ 7 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 7 - ايدىڭ 16 - كۇنى مالديۆتىڭ زۇڭتۇڭى سالحپەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جۇڭگو مەن مالديۆ ديپلوماتيالىق قارىم - قاتىناس ورناتقاننان بەرى، ەكى جاق ءوزارا ءتۇسىنىسىپ، ءوزارا قولداۋ كورسەتىپ، ءىرى ەل مەن شاعىن ەلدىڭ تەڭ تۇرعىدا سيلاسۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتتى. 2014 - جىلى مەن مالديۆتە مەملەكەتتىك ساپاردا بولدىم، ەكى جاق بولاشاققا بەت العان جان - جاقتى دوستىق سەلبەستىك سەرىكتەستىك قارىم - قاتىناسىن ورناتۋدى ۇيعاردى، ەكى جاقتىڭ قارىم - قاتىناسى بەكەمدەلدى جانە دامىدى. كەلەر جىلى جۇڭگو مەن مالديۆتىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، جۇڭگو جاق مالديۆ جاقپەن ءتۇرلى فورماداعى قۇتتىقتاۋ قيمىلىن ورىستەتىپ، ەكى ەل حالقىنىڭ دوستىق سۇيىسپەنشىلىگىن تەرەڭدەتۋدى، جۇڭگو مەن مالديۆ قارىم - قاتىناسىنىڭ العا قاراي دامۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، جۇڭگو مەن مالديۆ ەكى ەل قيىندىقتى بىلەك بىرىكتىرە جەڭىپ، ءوزارا قارايلاستى. جۇڭگو جاق ۇزدىكسىز تۇردە مالديۆ جاقتىڭ ىندەتكە قارسى اتتانۋىندا ۆاكسينا سياقتى جاقتان قولداۋ كورسەتىپ، مالديۆ جاقتىڭ ىندەتتى جەڭۋىنە كومەكتەسۋدى قالايدى. مالديۆ جاقتىڭ مالديۆتاعى جۇڭگو جاقتىڭ ادامدارىنىڭ حاۋىپسىزدىگى مەن دەنساۋلىعىنا كوڭىل ءبولۋىن ءۇمىت ەتەدى. جۇڭگو جاق مالديۆ جاقپەن ”ءبىر بەلدەۋ، ءبىر جولدى“ بىرگە قۇرۋ سەلبەستىگىن ۇزدىكسىز ىلگەرىلەتىپ، ەكى ەل حالقىنا اناعۇرلىم مول ىرىس - قۇت اكەلۋدى قالايدى. ەكى جاق كوپ جاقتى ورىنداردا ءوزارا قولداۋ كورسەتۋدى كۇشەيتىپ، حالىقارانىڭ ادىلدىگىن، تۋراشىلدىعىن جانە وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋى كەرەك.
سالح مىنالاردى ءبىلدىردى: جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن قىزۋ قۇتتىقتايمىن. ءتوراعا شي جينپيڭنىڭ پارمەندى باسشىلىعىندا، جۇڭگو كوممۋنيستىك پارتياسى دۇنيە جۇزىندەگى ءارقايسى ەلدەردىڭ تەڭدىگىن، كوركەيىپ - گۇلدەنۋىن، سەلبەستىگىن ىلگەرىلەتۋدەگى ماڭىزدى كۇشكە اينالدى. جۇڭگو جاق دۇنيە جۇزىلىك دەنساۋلىق ساقتاۋ ۇيىمى سياقتى كوپ جاقتى ىستەردە كوپ جاقتىلىقتى باتىل قورعاپ، حالىقارالىق ىنتماقتى جانە سەلبەستىكتى كۇشەيتۋگە ۇندەدى ءارى ءوزى باس بولىپ اتقاردى، مالديۆ جاق مۇنى بارىنشا القايدى. جۇڭگو جاقتىڭ مالديۆتىڭ ەكونوميكالىق، قوعامدىق دامۋىنا ۇزاق مەزگىلدەن بەرى قۇندى قولداۋ كورسەتكەنىنە، سونداي - اق مالديۆ جاقتىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىنا دەر كەزىندە قالتقىسىز كومەك كورسەتكەنىنە العىس ايتادى. مالديۆ جاق ءبىر جۇڭگو ساياساتىن باتىل ۇستانىپ، كەلەر جىلى ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋدى وراي ەتە وتىرىپ، مالديۆ پەن جۇڭگو ەكى جاقتىڭ دوستىق سەلبەستىگىن جيىلەتىپ، ”ءبىر بەلدەۋ، ءبىر جولدى“ بەلسەندى بىرگە قۇرىپ، كوپ جاقتى سايكەسۋدى، سەلبەسۋدى جيىلەتۋدى قالايدى.
شينحۋا اگەنتتىگىنىڭ 7 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 7 - ايدىڭ 16 - كۇنى موڭعۇليانىڭ زۇڭتۇڭى كۇرۇلسۇكپەن تەلەفوندا سويلەستى.
شي جينپيڭ بىلاي دەپ باسا دارىپتەدى: جۇڭگو − موڭعۇليا تاۋ - وزەنى جالعاسقان دوس كورشىلەر، ەكى ەلدىڭ قارىم - قاتىناسى تاماشا دامۋ اۋقىمىن ساقتاۋدا. جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، ەكى ەل قول ۇستاسا ىندەتكە قارسى اتتانىپ، ”قوي الىپ، شاي بەرۋ“ سىندى اسەرلى ۇلگىلى ىستەر جارىققا شىعىپ، ەكى ەل حالقىنىڭ دوستىعىن تەرەڭدەتتى. جۇڭگو جاق موڭعۇليا جاقتىڭ ىندەتكە قارسى اتتانۋىنا ۇزدىكسىز قولىنان كەلگەنىنشە قولداۋ كورسەتۋدى قالايدى. قازىرگى جاعدايدا، جۇڭگو مەن موڭعۇليانىڭ ورتاق مۇددەسى بارعان سايىن مولايدى. ەكى جاق تاۋەلسىزدىككە، يەلىك ۇقىققا، تەرريتوريا تۇتاستىعىنا ءوزارا قۇرمەت ەتىپ، ەكى ەل حالقىنىڭ دامۋ جولىن وزدەرى تاڭداۋىنا ءوزارا قۇرمەت ەتىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە ءوزارا قارايلاسىپ جانە قولداۋ كورسەتىپ، جۇڭگو مەن موڭعۇليانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ داۋىرلىك ءمانىن بايىتۋى كەرەك.
شي جينپيڭ بىلاي دەپ اتاپ كورسەتتى: ەكى جاق كورشىلىك ابزالدىلىعىن ساۋلەلەندىرىپ، ”ءبىر بەلدەۋ، ءبىر جولدى“ بىرگە قۇرۋ دارىپتەمەسىن ”ساحارا جولى“ دارىپتەمەسىمەن ۇشتاستىرۋدى تەرەڭدەتىپ، قازبا بايلىق، نەگىزدىك قۇرىلعى، ەكولوگيالىق ورتا سياقتى سالاداعى سەلبەستىكتى كۇشەيتۋ كەرەك. جۇڭگو جاق موڭعۇليا جاقتان اناعۇرلىم مول كەن ونىمدەرىن جانە ەگىن، مال شارۋاشىلىعى ونىمدەرىن يمپورت ەتۋدى قالايدى. جۇڭگو جاق موڭعۇليا جاقپەن سايكەسۋدى، سەلبەسۋدى كۇشەيتىپ، شىن مانىندەگى كوپ جاقتىلىققا تاباندى بولىپ، ءوزارا قۇرمەت ەتەتىن، ءادىل دە تۋرا، سەلبەسىپ تەڭ يگىلىككە كەنەلەتىن جاڭاشا حالىقارالىق قارىم - قاتىناس ورناتۋدى ىلگەرىلەتۋدى قالايدى.
كۇرۇلسۇك جۇڭگو كوممۋنيستىك پارتياسىنىڭ 100 جىلدىق مەرەي تويىن قىزۋ قۇتتىقتادى. ول مىنالاردى ءبىلدىردى: وتكەن 100 جىلدان بەرى، جۇڭگو كوممۋنيستىك پارتياسى جۇڭگو حالقىنا باسشىلىق ەتىپ، عالامات تابىستارعا قول جەتكىزدى، اسىرەسە، باس شۋجي شي جينپيڭنىڭ پارمەندى باسشىلىعىندا، جۇڭگو كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزىپ، جاپپاي دوڭگەلەك داۋلەتتى قوعام ورناتتى. جۇڭگونىڭ ەكىنشى 100 جىلدىق كۇرەس نىساناسىن جۇزەگە اسىرۋدىڭ جاڭا ساپارىندا، ءسوز جوق، جاڭا تابىسقا جەتەتىندىگىنە سەنەمىن. جاڭا تيپتى ايدارشا ۆيرۋس وكپە قابىنۋ ىندەتى جاعدايىندا، موڭعۇليا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسى تاماشا دامۋ اۋقىمىن ساقتادى. قيىنشىلىق كەزىندە شىنايى سۇيىسپەنشىلىك ايگىلەنەدى. موڭعۇليا جاق جۇڭگو جاقتىڭ موڭعۇليانىڭ قيىن - قىستاۋ كەزىندە كورسەتكەن قۇندى كومەگىنە شىن جۇرەكتەن العىس ايتادى. جۇڭگونىڭ دامۋى، زورايۋى موڭعۇلياعا ماڭىزدى وراي اكەلدى، دۇنيە ءجۇزىنىڭ بەيبىتشىلىگىنە، دامۋىنا ماڭىزدى ۇلەس قوستى. موڭعۇليا جاق جۇڭگو جاقپەن ءجيى بارىس - كەلىس جاساپ، ءار سالاداعى ناقتى سەلبەستىكتى ىلگەرىلەتىپ، ”ءبىر بەلدەۋ، ءبىر جولدى“ بەلسەنە بىرگە قۇرىپ، كوپ جاقتى ىستەردە سايكەسۋدى، سەلبەسۋدى كۇشەيتىپ، ادامزاتتىڭ تاعدىرلاس ورتاق تۇلعاسىن بىرگە قۇرۋدى قالايدى.
