رايونىمىزدا بازار تۇلعالارى 2 ميلليون 95 مىڭعا جەتتى
2015 - جىلدىڭ سوڭىنداعىدان ％88.7 ارتتى
انار بۇلت / شينجياڭ گازەتىنىڭ ءتىلشىسى رىن حۋا 7 - ايدىڭ 17 - كۇنى ۇرىمجىدەن حابارلايدى. اۆتونوميالى رايوندىق بازار باقىلاۋ - باسقارۋ مەكەمەسىنەن ۇعىسۋعا قاراعاندا، بيىل 6 - ايدىڭ سوڭىنا دەيىن رايونىمىزدا تىركەلگەن ءتۇرلى بازار تۇلعالارى 2 ميلليون 95 مىڭ بولىپ، 2015 - جىلدىڭ سوڭىنداعىدان ％88.7 ارتىپ، بازار تۇلعالارى بۇكىل ەلمەن تەڭ قادامدا ارتۋداي جاقسارۋعا بەت العان.
”شينجياڭدا ورنىقتىلىقتىڭ پايداسى، ساياساتتىڭ تيىمدىلىگى، ىندەتتەن ساقتانۋ - تىزگىندەۋدىڭ پايداسى تولىق جارىققا شىعىپ، بازار تۇلعالارىنىڭ ىشكى ومىرشەڭدىك كۇشىن تاسقىنداتىپ، ەكونوميكانىڭ جوعارى ساپالى دامۋىن ىلگەرىلەتۋدىڭ جاڭا قوزعاۋشى كۇشىنە ۇزدىكسىز اينالۋدا“، - دەدى اۆتونوميالى رايوندىق بازار باقىلاۋ - باسقارۋ مەكەمەسى تىركەۋ باسقارماسىنىڭ باستىعى زو شينمين.
قازىر قاۋىن - قاربىز، جەمىس - جيدەك پىسقان مەزگىل، شينجياڭ چىنجۋ اۋىل شارۋاشىلىعىن وركەندەتۋ شەكتى سەرىكتەستىگىنىڭ اتقارۋشى القاسى جاڭ شياۋياڭ اقسۋداعى ءارقايسى اۋىل شارۋاشىلىق بازالارىندا زىر جۇگىرىپ، ءجۇزىم، قۇمىل قاۋىنى قاتارلى اۋىل شارۋاشىلىعى ونىمدەرىن ساتىپ الۋدا. ”سەرىكتەستىگىمىز 7 - ايدىڭ سوڭىندا رەسمي تيجارات جۇرگىزەدى، 100دەن استام ءتۇرلى اۋىل شارۋاشىلىق ونىمدەرى جىجياڭ ولكەسىندەگى بولىمشە سەرىكتەستىك، الەۋمەتتىك جەلى ساۋداسى، ەلەكتروندى ساۋدا قاتارلى جولدارمەن بۇكىل ەلدىڭ جەر - جەرىنە ساتىلادى“، - دەدى جاڭ شياۋياڭ.
شينجياڭ چىنجۋ اۋىل شارۋاشىلىعىن وركەندەتۋ شەكتى سەرىكتەستىگى تايۋان قارجىلاندىرعان كاسىپورىن، بيىل 4 - ايدا قۇرىلعان. ”تيجارات كۋالىگىن ءبىر كۇندە الدىم، ۇكىمەت تاراۋلارى اۋىل شارۋاشىلىق بازالارىمەن تۇيىلىسۋگە كومەكتەسىپ، اۋىل شارۋاشىلىق ونىمدەرىن ساتىپ الۋعا بايلانىس جاسادى، مەن شينجياڭدا داميتىنىما تولىق سەنىمدەمىن“، - دەدى جاڭ شياۋياڭ تەبىرەنە.
سوڭعى جىلدارى رايونىمىز ۇكىمەت قۇرىلىمدارىن ىقشامداپ، ۇقىقتى تومەنگە بەرۋدى، ۇقىقتى تومەنگە بەرۋ مەن باسقارۋدى ۇشتاستىرۋدى، قىزمەت وتەۋدى ساپالىلاندىرۋدى بار كۇشپەن ىلگەرىلەتىپ، ”الدىمەن جۇمىس كۋالىگىن، ونان سوڭ تيجارات كۋالىگىن بەرۋدى“، ”كوپ كۋالىكتى بىرىكتىرۋدى“ تياناقتاندىرىپ، ”ءبىر سايتتا تەكسەرىپ بەكىتۋدى“، ”ءبىر ەسىكتە ءبىتىرۋدى“ جۇزەگە اسىرىپ، 100 تۇردەگى ”رۇقسات كۋالىگى مەن تيجارات كۋالىگىن ءبولۋ“ رەفورما مىندەتىن ورىندادى؛ 50 تۇردەگى ونەركاسىپ ونىمدەرىن ءوندىرۋ رۇقسات كۋالىگىن كۇشىنەن قالدىردى؛ ادەتتەگى كاسىپورىنداردى تىركەۋ ۋاقىتىن ءبىر قىزمەت كۇنىنە قىسقارتتى. بازار تۇلعالارىنىڭ شەگىنىپ شىعۋ ارناسى ۇزدىكسىز ىركىلىسسىزدەنىپ، شارۋاشىلىق - ساۋدا ورتاسى ۇزدىكسىز ساپالىلاندى.
بىلتىر جىل باسىنان بەرى ىندەت ىقپالى الدىندا اۆتونوميالى رايون سالىقتى ازايتىپ، اقىنى تومەندەتۋگە قاتىستى ءبىر سىپىرا تيىمدىلىك ساياساتتارىن شىعارىپ، كاسىپورىنداردىڭ قيىنشىلىقتان قۇتىلۋىنا دەم بەرۋ مەن ومىرشەڭدىك كۇشىن قاۋلاتۋدى قاتار جۇرگىزىپ، بازار تۇلعالارىنىڭ ومىرشەڭدىك كۇشىن ءونىمدى قاۋلاتىپ، ەكونوميكانىڭ تەزىرەك قالپىنا كەلىپ، دامۋىن جەبەدى.
بيىل ”مەن بۇقارا ءۇشىن ناقتى ءىس ىستەيمىن“ امالياتتىق قيمىلىمەن ۇشتاستىرىپ، اۆتونوميالى رايوننىڭ بازار باقىلاۋ - باسقارۋ تاراۋلارى ينتەرنەتتە تىركەۋ جۇيەسىن ۇزدىكسىز ساپالىلاندىرىپ، ۇكىمەت - بانكە سەلبەستىگىن، ۇكىمەت - پوچتا سەلبەستىگىن بەلسەنە ىلگەرىلەتىپ، بازار تۇلعالارىنا بار كۇشپەن ناقتى ىستەر ىستەپ، قيىن ماسەلەلەرىن شەشتى. اۆتونوميالى رايوننىڭ سالىق ىستەرى تاراۋلارى سالىق - اقى ساياساتىن دالمە - ءدال كورسەتۋ ينفورماتسيا ورتالىعى، بۇكىل رايوننىڭ ءتۇيىندى قۇرىلىس نىسانى بويىنشا ”سالىق باسقارۋشى“ قىزمەت وتەۋى سياقتى نىسانداردى جاسامپازدىقپەن العا قويىپ، ”كوكتەم جاڭبىرىمەن مايسالاردى نارلەندىرۋ“ ارناۋلى ارەكەتى سياقتى ءبىرسىپىرا شارالاردى ورىستەتىپ، بازار تۇلعالارىنىڭ ومىرشەڭدىك كۇشىن پارمەندى قاۋلاتتى.
زو شينمين بىلاي دەپ تانىستىردى: نازار اۋدارۋعا تاتيتىنى، 2016 - جىلدان بەرى وڭتۇستىك شينجياڭنىڭ 4 ايماق - وبلىسىندا بازار تۇلعالارى سانىنىڭ ارتۋى كورنەكتى بولىپ، بازار تۇلعالارىنىڭ سانى 2015 - جىلعى تۇتاس شينجياڭنىڭ ％19.7ىن يەلەۋدەن قازىرگى ％32.4ىن يەلەۋگە ارتىپ، تيانشاننىڭ سولتۇستىك بوكتەرى ەكونوميكالىق بەلدەۋىندەگى بازار تۇلعالارى سانىمەن پارقى بىرتىندەپ ازايدى.
”اۆتونوميالى رايوندا ورنىقتىلىقتىڭ پايداسىنىڭ ۇزدىكسىز جارىققا شىعۋى، شينجياڭعا كومەكتەسەتىن ولكە، قالالاردىڭ ۇزدىكسىز دەم بەرۋى، ت. ب قارجىگەرلەردىڭ دامۋ سەنىمىن قاۋلاتتى، وڭتۇستىك شينجياڭدا قارجى قوسىپ، شارۋاشىلىعىن شالقىتۋدى تاڭداعان قارجىگەرلەردىڭ قاتارى بارعان سايىن كوبەيدى“، - دەدى زو شينمين.
