شينجياڭنىڭ ادامدىق ۇقىق ىستەرى جاڭا دامۋعا جانە العا باسۋعا ۇزدىكسىز قول جەتكىزدى

− «شينجياڭداعى ءار ۇلتتىڭ تەڭدىك ۇقىق - مۇددەسىنىڭ قامتاماسىز ەتىلۋى» اق تىستى كىتابى رايونىمىزداعى ءار ۇلت كادر - بۇقاراسى اراسىندا كۇشتى ۇندەستىك تۋدىردى

□ انار بۇلت / شينجياڭ گازەتىنىڭ تىلشىلەرى

　　«شينجياڭداعى ءار ۇلتتىڭ تەڭدىك ۇقىق - مۇددەسىنىڭ قامتاماسىز ەتىلۋى» اق تىستى كىتابى جاريالانعاننان كەيىن رايونىمىزداعى ءار ۇلت كادر - بۇقاراسى اراسىندا كۇشتى ۇندەستىك تۋدىردى. كوپشىلىك مىنانى ءبىلدىردى: اق تىستى كىتاپ شينجياڭنىڭ 70 نەشە جىلدان بەرگى دامۋ بەلەستەرىنە شىنايى ورالدى، ءار ۇلت حالقى شينجياڭنىڭ بايتاق دالاسىندا بەدەل - مارتەبەدەن، ەركىندىكتەن جانە تەڭدىكتەن تولىق يگىلىكتەندى، بۇل كوپكە ايان، شينجياڭنىڭ ادامدىق ۇقىق ىستەرى جاڭا دامۋعا جانە العا باسۋعا ۇزدىكسىز قول جەتكىزدى.

　　اۆتونوميالى رايوندىق حالىق قۇرىلتايى تۇراقتى كوميتەتى ۋاكىلدەر - كادرلار قىزمەتى كوميتەتىنىڭ مەڭگەرۋشىسى ۋي گاڭ مىنالاردى ءبىلدىردى: اۆتونوميالى رايوندىق 13 - كەزەكتى حالىق قۇرىلتايىنىڭ جيىنى 548 ۋاكىلى بار. مۇنىڭ ىشىندە از ۇلت ۋاكىلى 353، ％64.42 تى ۇستايدى. وسى ساندى مالىمەتتەر اۆتونوميالى رايوننىڭ ۇلتتىق وڭىرلىك اۆتونوميا ءتۇزىمىن باتىل دايەكتىلەندىرىپ، تياناقتاندىرىپ، حالىق قۇرىلتايى تۇزىمىنە تاباندى بولىپ جانە ونى كەمەلدەندىرىپ، ءار ۇلت حالقىنىڭ مەملەكەتتىڭ ىستەرىن باسقارۋعا تەڭ تۇرعىدا ات سالىسۋ ۇقىق - مۇددەسىن زاڭ بويىنشا قامتاماسىز ەتكەندىگىن تولىق دالەلدەيدى.

　　كوكتوعاي اۋدانى شاكۇرتى قالاشىعى شورشىباي قىستاعىندا قىستاق تۇرعىندار كوميتەتى ”ءتورتتى كەڭەسۋ، ەكىدە جاريا بولۋ“ ءتۇزىمىن قاتاڭ اتقارىپ، قىستاق ىستەرىندە جاريا، اشىق بولىپ، ”كوپشىلىك ورتاعا قويۋ، كوپشىلىك اقىلداسۋ، كوپشىلىك بەكىتۋ، كوپشىلىك بويسۇنۋ“ فورماسىندا، كونە سالت - سانانى وزگەرتۋ، قورشاعان ورتانى قورعاۋ قاتارلىلاردى قىستاق بەلگىلەمەسى، تۇرعىندار شارتىنا ەنگىزدى. ”بۇكىل قىستاق تۇرعىندارى وزدەرى اقىلداسىپ بەلگىلەگەن قىستاق بەلگىلەمەسى، تۇرعىندار شارتىنا سانالىلىقپەن بويسۇنىپ، قىستاق سالتى ىزگى، قوعامى جاراسىمدى بولدى، بۇل نەگىزگى ساتىدا دەموكراتيالىق ۇقىق - مۇددەنىڭ جۇزەگە اسقاندىعىنىڭ ارقاسى“، - دەدى شورشىباي قىستاعى قىستاق تۇرعىندار كوميتەتىنىڭ مەڭگەرۋشىسى قالىمبەك بەيسەن.

　　2017 - جىلى كەدەيلەردى قونىس جاڭالاپ سۇيەمەلدەۋ ساياساتىنا سۇيەنىپ، اقتاۋ اۋدانى شارلۇڭ قالاشىعى مازارۇزۇ قىستاعىنىڭ تۇرعىنى ءاشىر تايىر تاۋ قويناۋىنان جاڭادان سالىنعان كۇنلۇن جيايۋان شاعىن اۋماعىنا كوشىپ كەلدى، تاس ءۇيى 80 شارشى مەترلىك عيمارات ۇيگە اۋىستى، ءۇي ەلەكتر جابدىقتارىنىڭ ءبارى تولىق. ”قازىر پارنيكتە كوكونىس ەگۋ، اشەكەيلەۋ ينجەنەرياسىن كوتەرمەگە الۋ ارقىلى جىلدىق كىرىسىم 40 مىڭ يۋاننان استى، تۇرمىسىم بارعان سايىن شالقىدى“، - دەدى ءاشىر، -”ءبىز بارلىعىمىز تىنىش ءومىر، شات - شادىمان تىرشىلىك كەشىرۋدەمىز، بۇل ءار ۇلتتىڭ تەڭدىك ۇقىق - مۇددەسى قامتاماسىز ەتىلگەندىگىنىڭ ەڭ تاماشا دالەلى“.

　　اۋات اۋداندىق ونەركاسىپ باقشاسى رايونى باسقارۋ كوميتەتىنىڭ مەڭگەرۋشىسى چىن شياڭنىڭ نازارىندا اق تىستى كىتاپتىڭ جاريالانۋى توركىنىن تۇزەپ، قاينارىن اداقتاپ، جات نيەتپەن شينجياڭنىڭ تىنىشتىعىن، ىنتىماعىن بۇلدىرۋگە ۇرىنعان جالعان سوزدەرگە شىندىق ارقىلى جاۋاپ قايتارعاندىق ەسەپتەلەدى. چىن شياڭ بىلاي دەدى: ”ونەركاسىپ باقشاسى رايونى كاسىپورىنداردى جەرگىلىكتى ورىننان قىزمەتكەر قابىلداۋعا جەتەكتەپ، كوپشىلىكتىڭ جۇمىستانۋ ارقىلى كىرىسىن ارتتىرۋىنا، بايۋىنا مۇمكىندىك جاسادى، سونداي - اق كاسىپورىنداردى قىزمەتكەرلەردى ءتۇرلى جاقتان قامتاماسىز ەتۋ قىزمەتىن جاقسى ىستەۋگە قۋزادى. ءارقايسى كاسىپورىن ارناۋلى اسحانا، جاتاق ورنالاستىرىپ، ءار ۇلت قىزمەتكەرلەرىنىڭ تۇرمىس ادەتىنە تولىق قۇرمەت ەتتى. قىزمەتكەرلەر دەر كەزىندە ەڭبەكاقىسىن الىپ، قوعامدىق قامسىزداندىرۋدان جانە دەمالۋ، دەمالىس الۋ سىندى ءتۇرلى ۇقىق - مۇددەلەردەن يگىلىكتەندى.

　　شاپشال سىبە اۆتونوميالى اۋدانى شاپشال قالاشىعى ۇزىنبۇلاق اۋىل - قىستاق الەۋمەتتىك اۋماعىنىڭ تۇرعىنى بيبىگۇل نۇرقاننىڭ قايىن اتاسى وڭەش راگىنا شالدىققان بولاتىن، اي سايىن شيپاحاناعا بارىپ حيميالىق ەم قابىلدايدى. ”ەمدەۋ قامسىزداندىرۋى بولعاندىقتان، ءبىز ەمدەۋ قاراجاتىنان الاڭدامايمىز. الەۋمەتتىك اۋماق ءبىزدىڭ ەڭ تومەنگى تۇرمىستىق قامسىزداندىرۋىمىزدى شەشىپ بەرىپ، بىزگە ءبىر جولدا قۇتقارۋ - كومەك قاراجاتىن بەرىپ، ەكونوميكالىق اۋىرتپالىعىمىزدى بارىنشا جەڭىلدەتتى“، - دەدى بيبىگۇل.

　　كەزەكتە شينجياڭ تاريحتاعى ەڭ تاماشا دامۋ مەزگىلىندە تۇر. رايونىمىزداعى ءار ۇلت كادر - بۇقاراسى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، شينجياڭنىڭ بۇكىل ەلمەن بىرگە دوڭگەلەك داۋلەتتى قوعام ورناتاتىندىعىنا ءارى جاپپاي سوتسياليستىك وسىزاماندانعان مەملەكەت قۇرۋ جاڭا ساپارىن باستايتىندىعىنا، مۇنىڭ ءار ۇلتتىڭ تەڭدىك ۇقىق - مۇددەسىن اناعۇرلىم زور دەڭگەيدە، اناعۇرلىم بيىك ورەدە قامتاماسىز ەتىپ، شينجياڭداعى ءار ۇلت حالقىنىڭ، ءسوز جوق، اناعۇرلىم باقىتتى، تاماشا بولاشاقتى قارسى الاتىندىعىنا كامىل سەنەدى.

　　(ءتىلشى جاڭ يانفاڭ، قاتىناسقان تىلشىلەر لياڭ ليحۋا، چىن چياڭۋي، جاڭ تيڭ، سۇڭ ۋيگو، جاڭ جىلي، رىن جياڭ، شيە حۇيبيان، جاڭ يۇنمەي، سۋ لۋپيڭ، يان شياۋتيان، ەرىكتى ءتىلشى لي نا)