□ انار بۇلت / شينجياڭ گازەتىنىڭ تىلشىلەرى
7 - ايدىڭ 20 - كۇنى حوتان قالاسى تۋانچىڭ كورىنىس وڭىرىندە لوپ اۋدانىنان كەلگەن حالىق ونەرپازدارى ساياحاتشىلارمەن بىرگە ءماشىراپ ءبيىن بيلەپ، قۇربان ايت مەرەكەسىن شات مەرەيمەن قۇتتىقتادى. □ سۋرەتتى مامەتالي ءانۋار تۇسىرگەن
7 - ايدىڭ 20 - كۇنى لوپنۇر اۋدانى شيڭپيڭ قالاشىعى داشي قىستاعىنداعى ءار ۇلت بۇقاراسى تۋىستارىمەن، دوستارىمەن امانداسىپ، ءان ايتىپ، بيگە باسىپ، قۇربان ايت مەرەكەسىن بىرگە قۇتتىقتادى. □ سۋرەتتى چاڭ شۋەحۇي تۇسىرگەن
ءبىر قازاننان بىرگە تاماقتانىپ، ءبىر ءاندى قوسىلا شىرقادى، ىنتىماق، سۇيىسپەنشىلىك تۋرالى شۇيىركەلەستى، جاڭا تۇرمىستى بىرگە اڭگىمەلەدى. قۇربان ايت مەرەكەسى كەلۋىمەن تيانشان الابىندا ”ۇلتتار ىنتىماعىنىڭ بەرەكەلى شاڭىراعى“ بىرلەسكەن دوستىق قيمىلى كەڭ كولەمدە ورىستەتىلدى، قالىڭ پارتيا مۇشەلەرى مەن كادرلار جۇپ قۇراپ، تۋىس بولعان وتباسىلارىنا بارىپ باقىت تىلەپ، قۇربان ايت مەرەكەسىن بىرگە وتكىزدى.
ءجۇزىم سورەسىنىڭ استىندا شاتتىق ءانى شىرقالىپ، باقىت لەبى ەستى
7 - ايدىڭ 20 - كۇنى شايار اۋدانى تويبولدى قالاشىعى قۇمايرىق قىستاعىنىڭ تۇرعىنى ءماريام سىمايىل وتباسىنىڭ ءجۇزىم سورەسىنىڭ استى دىر - دۋمانعا بولەندى.
سول كۇنى شايار اۋداندىق قوعام حاۋىپسىزدىك مەكەمەسىندەگى 27 حالىق ساقشىسى تارتۋ - تارالعىسىن الىپ قىستاقتاعى تۋىستارىنا امانداسا باردى. وتباسىلار حالىق ساقشىلارىن ۇيلەرىندە مەيمان بولۋعا ۇسىنىس ەتتى. حالىق ساقشىلارى قىرىنان قىسىلدى: تۋىستارىن اۋرەلەمەيمىز دەپ كەلىسكەن ولار ەندى قايتۋى كەرەك؟
شايار اۋداندىق قوعام حاۋىپسىزدىك مەكەمەسىنىڭ قۇمايرىق قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتى مۇنان حابار تاپقاننان كەيىن، كوپشىلىك قىزمەت اترەتى مۇشەلەرى اقشا شىعارىپ، اۋلاسى كەڭ ءماريام وتباسىندا بىرگە تاماقتانۋدى اقىلداسادى. ءيىسى مۇرىندى جاراتىن پالاۋ پىستى، حالىق ساقشىلارى تۋىستارىمەن بىرگە ءجۇزىم سورەسى استىندا ويناقى ءماشىراپ بيىنە باستى.
ساڭزى، ءجۇزىم، پالاۋ، شاتتىق ۇندەر... 7 - ايدىڭ 19 - كۇنى تۇستەن كەيىن حىبەي ولكەسىنىڭ شينجياڭعا كومەكتەسۋشى كادرى لي كۇيشان چەرچەن اۋدانى ءناسىلدى تۇقىم فەرماسى 2 - اترەتىندەگى تۋىسى تۇرسۇنجان نۇريعا امانداسا باردى.
لي كۇيشان مەن تۇرسۇنجان جۇپ قۇراپ، تۋىس بولعان ءبىر جىلدا تەرەڭ دوستىق ورناتتى. بۇدان بۇرىن تۇرسۇنجان وتباسى ونىڭ ماقتا ەگىمشىلىگى مەن كۇندىك جۇمىسىنا سۇيەنەتىن، تۇرمىستارى تىم جۇپىنى ەدى. لي كۇيشاننىڭ كومەگىندە تۇرسۇنجاننىڭ ايەلى تۇرسۇنگۇل قاسىم ءناسىلدى تۇقىم فەرماسىنىڭ فەرما الاڭى اسحاناسىنا بارىپ قىزمەت ىستەپ، اي سايىن 4500 يۋان كىرىس كىرگىزدى.
”تۋىسىمنىڭ تۇرمىسى جاقساردى، الاڭسىز بولدىم. تۋىسىمنىڭ جۇمىسى مەنىڭ جۇمىسىم“، - دەدى لي كۇيشان.
ءجۇزىم سورەسى استىندا تۇرسۇنجان راۋابىن شالدى، بالالار شاتتىق ءانىن شىرقادى.
ەڭ قىمباتتى مەرەكەلىك تارتۋ
7 - ايدىڭ 19 - كۇنى قىزىلسۋ قىرعىز اۆتونوميالى وبلىسىنداعى پارتيا مۇشەلەرى مەن كادرلار تۇس - تۇستان اۋىل - قىستاقتارعا، الەۋمەتتىك اۋماقتارعا بارىپ تۋىستارىنا امانداستى.
اتۇش قالاسى كاتتايلاق اۋىلى قۇدىق قىستاعىندا قىزىلسۋ وبلىستىق پارتكوم ساياسات زەرتتەۋ كەڭسەسىنىڭ كادرى ۋي چاۋ تۋىسى ايتاحۇن قادىردىڭ وتباسىنداعىلارمەن بىرگە قاربالاستىققا ءتۇسىپ، اۋلا مەن ءۇيدى مونتازداي ەتىپ تازالادى.
باس قوسۋ تاماعىن جەپ بولعاننان كەيىن ۋي چاۋ مەن ايتاحۇن وتباسىنداعىلار اۋلادا وتىرىپ جاقىنعى بىرنەشە جىلداعى تۇرمىستاعى جاڭا وزگەرىستەردى تىلگە تيەك ەتتى.
”قىستاق كادرلارىنىڭ كومەگىندە وتباسىم ەگىمشىلىك، باعىمشىلىق، تۇرمىس ءوڭىرى سىندى ’3 ءوڭىردى ءبولدى‘. قازىر جاڭا قوي قورا سالىپ الدىق، كوكونىس ەگەتىن جەرىمىز دە بار، تەحنيكتەر ەگىن ەگۋىمىزگە جەتەكشىلىك ەتەدى. كىرىسىم جىلدان - جىلعا ارتتى“، - دەدى ايتاحۇن.
”جاپپاي دوڭگەلەك داۋلەتتىلىك جۇزەگە استى، اۋىل - قىستاقتى گۇلدەندىرۋدىڭ بولاشاعى اناعۇرلىم نۇرلى. پارتيانىڭ ابزال ساياساتى، ءسوز جوق، ءاربىر ادامنىڭ تۇرمىسىن بارعان سايىن جاقسارتادى“، - دەدى ۋي چاۋ ايتاحۇنعا.
”بۇل مەن قۇربان ايت مەرەكەسىندە تاپسىرىپ العان ەڭ قىمباتتى تارتۋ بولدى“. ۋي چاۋ ايتقان شارۋالارعا تيىمدىلىك جاساۋ ساياساتتارىن ەستىگەن ايتاحۇن قۋانىشپەن وسىلاي دەدى.
7 - ايدىڭ 20 - كۇنى حوتان اۋدانىنىڭ بوزاق اۋىلىندا حوتان اۋداندىق ءتارتىپ تەكسەرۋ، باقىلاۋ - تەكسەرۋ كوميتەتىنىڭ كادرى ليۋ يۇڭشيڭ تاڭ بوزىنان تارتۋ - تارالعىسىن كوتەرىپ تۋىسى نۇر ءاشىمنىڭ ۇيىنە كەلدى.
نۇر بيىل 66 جاستا. تاياۋدا ليۋ يۇڭشيڭ وعان امانداسا كەلگەندە ونىڭ شاعىن دۇكەن اشۋ ويى بارلىعىن، ءبىراق تيجارات كۋالىگىن قالاي ءبىتىرۋدى بىلمەي جۇرگەندىگىن ۇعىسادى.
ليۋ يۇڭشيڭ نۇردى ەرتىپ اۋىلداعى اكىمشىلىك ىستەر زالىنا كەلىپ، ءتۇرلى راسىمياتتاردى ءساتتى بىتىرەدى. الايدا سول كەزدە ۋاقىتشا جۇمىسى شىعىپ قالعان نۇر سول جەردىڭ وزىندە تۇرىپ تيجارات كۋالىگىن الا الماي قالعان ەدى.
”بۇل تيجارات كۋالىگى، سىزگە الا كەلدىم“. نۇردى كورە سالا ليۋ يۇڭشيڭ سومكاسىنان تيجارات كۋالىگىن الىپ شىقتى. نۇر ليۋ يۇڭشيڭنىڭ قولىن ۇستاپ تۇرىپ قۋانعانىنان كۇلە بەردى.
تۋىستىق سۇيىسپەنشىلىك بارعان سايىن تەرەڭدەدى
7 - ايدىڭ 20 - كۇنى تاڭەرتەڭ التاي ايماعى قابا اۋدانى كولباي قالاشىعى جانجۇرەك قىستاعىنىڭ تۇرعىنى زاۋكەن نۇراش تۋىسى گۇلجازيرا سارسەنبەكتى قارسى الدى.
گۇلجازيرا قابا اۋداندىق ايەلدەر بىرلەستىگىنىڭ كادرى، 2 جىلدىڭ الدىندا زاۋكەنمەن جۇپ قۇراپ، تۋىس بولعان. گۇلجازيرانى كورگەن زاۋكەن ايرىقشا قۋاندى. ول گۇلجازيرانى قۋانا قارسى الىپ ۇيىنە باستادى، باۋىرساق، ساڭزى، بالكۇلشە، جەمىس - جيدەگىن الىپ شىعىپ گۇلجازيرانىڭ الدىنا قويدى.
زاۋكەن بيىل 48 جاستا، 2 جىلدىڭ الدىندا سالماقتى ناۋقاسقا شالدىققان. بۇل حاباردى ەستىگەننەن كەيىن گۇلجازيرا وعان كومەكتەسىپ قۇتقارۋ قاراجاتىن ءوتىنىش ەتەدى، سونداي - اق ۇنەمى ۋاقىت شىعارىپ وعان امانداسىپ، تۇرمىسىنداعى قيىنشىلىعىن شەشۋگە كومەك قولىن سوزادى. وسىلايشا ەكەۋى تەرەڭ دوستىق ورناتادى.
”گۇلجازيرا مەنىڭ تۋعان اپەكەم“، - دەيدى زاۋكەن.
7 - ايدىڭ 20 - كۇنى ىلە قازاق اۆتونوميالى وبلىستىق ورمان شارۋاشىلىعى عىلىم اكادەمياسىنداعى پارتيا مۇشەلەرى مەن كادرلار جۇپ قۇراپ، تۋىس بولعان تۋىسىنىڭ وتباسىنا كەلىپ مەرەكەلىك تىلەك تىلەدى.
”بۇل بالالارعا ساتىپ العان كيىم - كەشەكتەرىم، جاراسا ما ەكەن، كورشى“. ورمان شارۋاشىلىعى عىلىم اكادەمياسىنىڭ كادرى ۋاڭ جين قۇلجا قالاسى داردامتى قالاشىعى شينلۋ قىستاعىنداعى تۋىسى ماۋلەن يالقۇننىڭ ۇيىنە كەلىسىمەن ءبىر ۇلكەن تۇيىنشەكتى شەشىپ، جاپ - جاڭا كيىم - كەشەكتەردى ءبىر - بىردەن الىپ شىعىپ، بالالاردى شەتىنەن كيىندىردى.
ماۋلەن وتباسىندا 3 بالا بار. ايەلى ەكەۋى ەگىن ەگىپ، ۋاقىتتىق جۇمىس ىستەپ، بالالارىنا قارايلاي الماي قالعان كەزدەرىندە، ۋاڭ جيننىڭ ۇيىنە اپارىپ، ۋاڭ جينگە تابىستايدى.
”تۋىستىق بايلانىسىمىز قويۋلاسا ءتۇستى، سۇيىسپەنشىلىگىمىز بارعان سايىن تەرەڭدەدى. قازىر 2 وتباسى ءبىر ءۇيلى جاندارداي بولىپ كەتتىك“، - دەدى ۋاڭ جين.
(ءتىلشى ۋي يۇڭگۇي، قاتىناسقان تىلشىلەر جاڭ جىلي، سۇڭ ۋيگو، جاڭ تيڭ، دۋ جيانحۇي، جازيرا نەسىپبەك، ەرىكتى ءتىلشى لي ۋىنتيڭ)
