تۇرپان قالاسى گاۋچاڭ رايونى جۇزىمشىلىك قالاشىعى بالىقشىكارىز قىستاعىنداعى تازا مەيىز مانەرلەۋ سەحىندا قىستاق تۇرعىندارى مەيىز مانەرلەۋدە (4 – ايدىڭ 23 – كۇنى سۋرەتكە تۇسىرىلگەن). سۋرەتتى تۇرپان قالالىق باس جۇمىسشى ۇيىمىنىڭ بالىقشىكارىز قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتى بەرگەن
تيانشان تورى – شينجياڭ گازەتىنىڭ ٴتىلشىسى جاڭ رۇيلين. 7 – ايدىڭ 22 – كۇنى كۇن ەندى عانا كوتەرىلىپ، تۇرپان قالاسى گاۋچاڭ رايونى جۇزىمشىلىك قالاشىعى بالىقشىكارىز قىستاعىنان قاربالاستىققا تۇسكەن كورىنىس بايقالدى.
ٴبىر مەتردەن استام بيىكتىكتەگى ٴجۇزىم سورەسى شىجىعان ىستىق كۇن نۇرىن توسىپ، مول ٴونىم شاتتىعىنا شومعان ەگىنشى وتباسىلارى تىرسيعان، شىرىندى شوق – شوق جۇزىمدەردى كەسىپ الىپ، شارباققا ەپپەن سالدى؛ ٴۇش دوڭگەلەكتى اربا ٴجۇزىم اتىزى مەن جول بويىنداعى تاسىمال كولىگى ارالىعىندا ارلى-بەرلى تىنباي قاتىنادى. كوپ وتپەي، بۇل جۇزىمدەر بۇكىل ەلدىڭ جەر – جەرىندەگى بازارلارعا جەتكىزىلەدى.
”ٴبىزدىڭ بۇل ارانىڭ ٴجۇزىمىنىڭ سورتى وتە جاقسى“، - دەدى قىستاق تۇرعىنى ساتتار ابليمىت ماقتانا.
ٴجۇزىم ەگۋ — بالىقشىكارىز قىستاعىنىڭ ٴداستۇرلى جەتەكشى كاسىپ سالاسى. وسى ٴداستۇرلى كاسىپ سالاسىنا قايتكەندە جاڭا كورىك بەرىپ، قىستاق تۇرعىندارىنىڭ كىرىسىن ارتتىرۋعا بولادى، بۇل جونىندە قىستاق كادرلارى مەن تۇرپان قالالىق باس جۇمىسشى ۇيىمىنىڭ بالىقشىكارىز قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتى اقىل – ويىن سارقا جۇمسادى.
وسى ەكى جىلدا بالىقشىكارىز قىستاعى ” ەكى كوميتەتى“ قىستاق تۇرعىندارىن ۇرىقسىز اق جۇزىمەن ۇلگى كورسەتۋ بازاسىن قۇرۋعا جەتەكتەپ، ٴجۇزىم اتىزىنىڭ توپىراعىن تەكسەرىپ-ولشەپ، باعىتتامالى تۇردە رەتسەپ بويىنشا تىڭايتقىش بەرۋ قىزمەتىن ورىستەتىپ، ٴجۇزىمنىڭ سورتىن ونان ارى جوعارىلاتتى، جاس ٴجۇزىمنىڭ تاۋارلانۋ مولشەرىن كورنەكتى جوعارىلاتىپ، ٴبىر مۋ جەردىڭ كىرىسى 20 مىڭ يۋانعا جەتتى.
كەپتىرىلگەن ٴجۇزىمدى قايتكەندە تاعى دا تىڭ ساتىعا كوتەرۋگە بولادى؟ كوپ رەت تالقىلاۋ، اقىلداسۋ ارقىلى قىستاق تازا مەيىز ٴوندىرىس جەلىسىن ەنگىزىپ، مانەرلەۋ زاۆود ۇيلەرىن سالىپ، جاڭا جۇزىمدەردى مەيىز ەتىپ مانەرلەۋگە نەبارى 48 ساعات كەتتى، ونىڭ ۇستىنە تازالىق دارەجەسى ەكسپورت ولشەمىنە جەتىپ، ٴجۇزىمنىڭ ۇستەمە قۇنىن بارىنشا جوعارىلاتتى.
بالىقشىكارىز قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ باستىعى، ٴبىرىنشى شۋجي گۇلجامال ابدوللا بىلاي دەپ تانىستىردى: ”ٴبىز 12 مەيىز ٴوندىرۋ جەلىسىن قۇرىپ، جىلىنا 1200 توننادان 1500 تونناعا دەيىن تازا، دايىن مەيىز ٴوندىرۋدى جوسپارلادىق. الداعى جەردە ٴبىز جوعارى دەڭگەيلى، سارا دامۋ باعىتىن بويلاپ، ايگىلى ماركالاردى باسقارۋدى كۇشەيتىپ، ساپانى باقىلاۋ – باسقارۋ تەبىنىن ارتتىرىپ، ٴجۇزىم سورتىن جوعارىلاتىپ، قىستاق تۇرعىندارىنىڭ ٴۇي ماڭىندا كىرىستى ارتتىرۋىنا مۇمكىندىك جاسايمىز“.
بيىل بالىقشىكارىز قىستاعىنىڭ تۇرعىندارىندا تاعى ٴبىر قۋانىشتى ٴىس بار: قىستاق بۇرىنعى سۋ كوزىنە سۇيەنىپ، سەيىل – سەرۋەن ساياحات كورىنىس ءوڭىرىن قۇرۋدا. كورىنىس ءوڭىرى سالىنىپ بولعاننان كەيىن، ساۋدا رايونىن جوبالاپ، قىستاق تۇرعىندارىنىڭ جاس ٴجۇزىم جانە مەيىز سياقتىلاردى ساتۋىنا قولايلىلىق جاراتادى. قىستاق كادرلارى قىستاق تۇرعىندارىن بايلىقتان ويداعىداي پايدالانىپ، حالىقتىق تۇسەلحانا، شارۋالار شاتتىعى ساياجايى، سەيىل -سەرۋەن جەمىس ٴۇزۋ باقشاسى سياقتى تيجارات ۇلگىسى جونىندە ىزدەنىس جاساۋعا شابىتتاندىردى جانە جەتەكتەدى.
قىستاق تۇرعىنى ابدوللا ابلىز بىلاي دەدى: ”مەن بيىل ٴجۇزىم اتىزىن ويداعىداي باپتاپ، سەيىل – سەرۋەن، جەمىس ٴۇزۋ باعىتىنا قاراي دامىتپاقشىمىن“.
”14 - بەسجىلدىق“ مەزگىلىنە قادام تاستاعاندا، ٴجۇزىم سىندى وسى ەرەكشە بايلىقتان ويداعىداي پايدالانىپ، اۋىل - قىستاقتاردىڭ 1-، 2-، 3- كاسىپ سالالارىنىڭ توعىسپالى دامۋىن ىلگەرىلەتۋ دە تۇرپان قالاسىنىڭ ٴتۇيىندى قىزمەتتەرىنىڭ ٴبىرى.
جاقىنعى جىلداردان بەرى، تۇرپان قالاسى ٴجۇزىمنىڭ تۇتاس كاسىپ سالاسى جەلىسىن دامىتۋدى كۇش سالا ىلگەرىلەتىپ، جاس جانە كەپتىرىلگەن ٴجۇزىمنىڭ ساپاسىن جوعارىلاتۋمەن بىرگە، مەيىزدى جىنتىكتەي مانەرلەۋ كاسىپ سالاسى تىزبەگىن ۇزدىكسىز ۇزارتتى، جەرگىلىكتى كاسىپورىنداردىڭ مەيىزدى شيكىزات ەتىپ، ٴجۇزىم بالكۇلشەسى، ساعىز كامپيتى، QQ كامپيتى سياقتى جىنتىكتەي مانەرلەنگەن ونىمدەردى زەرتتەپ اشۋدى ورىستەتۋىنە بار كۇشپەن قولداۋ كورسەتتى. سونىمەن بىرگە، بازا قۇرىلىسى، ٴوندىرىس رايونىن جەتىلدىرۋ، ەرەكشە ونىمدەردى ىسكە قوسۋ، ايگىلى ماركا جاراتۋ، ونىمدەردى ساتۋ سياقتى جاقتارعا كۇش سالىپ، ٴجۇزىم شارابى كاسىبىن دامىتۋدى جەدەلدەتتى، قاتىناس، ٴوڭىر جانە ساياحات بايلىعى باسىمدىعىنان تولىق پايدالانىپ، ەرەكشە شاراپ قورجاسى ساياحاتىن قۇرىپ، ٴجۇزىم باقشاسىن تاماشالاۋ، ٴجۇزىم شارابىن سورتىن باعالاۋ، ساياحات تۇسەلحاناسى، ەرەكشە اس – سۋ سياقتى فاكتورلاردى ٴبىر تۇلعالاندىرىپ، اۋىل شارۋاشىلىعى ونىمدەرىنىڭ ۇستەمە قۇنىن ارتتىرۋمەن بىرگە، تۇرپاننىڭ ساياحات كاسىپ كۇيىن ٴتىپتى دە بايىتتى.
بۇگىنگى تاڭداعى تۇرپان ٴجۇزىمى ٴداستۇرلى جالپىلاي سىرتقا ساتۋدان ماركالاندىرۋ بەتالىسىنا قاراي نىق قاداممەن ىلگەرىلەۋدە.
اۋدارعان: قادىر ماقان
