انار بۇلت / شينجياڭ گازەتىنىڭ تىلشىلەرى سۋ لۋپيڭ، حان چين - يان 7 - ايدىڭ 26 - كۇنى ۇرىمجىدەن حابارلايدى. 7 - ايدىڭ 24 - كۇنى تۇستەن كەيىن تاشقورعان تاجىك اۆتونوميالى اۋدانى تىزناپ اۋىلى تىزناپ قىستاعىنىڭ تۇرعىنى بايەكە كەلدىبەك لاچين بايەكەنىڭ اتىندا حىنان ولكەسى جىڭجوۋ قالالىق قىزىل كرەست قوعامىنا تاسقىنعا قارسى اتتانىپ، اپاتتان قۇتقارۋ قارجىسى رەتىندە 200 مىڭ يۋان جىلۋ اتادى.
مەملەكەتتىك تاڭداۋلى كوممۋنيستىك پارتيا مۇشەسى، ”ءداۋىر ونەگەسى“ لاچين بايەكە كوزى تىرىسىندە تىزناپ قىستاعى كوميتەتىنىڭ مۇشەسى، شەكارا قورعاۋشى بولعان، تالاي رەت باسىنا تونگەن حاۋىپكە قاراماستان شەكارا شارلاۋشى جاۋىنگەرلەردى قۇتقارعان، كومەكتەسكەن، 10 نەشە جىلدان بەرى پامير ۇستىرتىندەگى شەكارا قورعانىس شەبىن تۇگەل ارالاعان. بيىل 1 - ايدىڭ 4 - كۇنى لاچين بايەكە سۋعا ءتۇسىپ كەتكەن بالانى قۇتقارۋ جولىندا نە بارى 41 جاسىندا باقىتقا قارسى قۇربان بولدى.
بىرنەشە كۇننەن بەرى حىنان سياقتى جەرلەردە ءۇرتىس قالىڭ نوسەر جاۋىپ، جىڭجوۋ سياقتى قالالاردى قالىڭ سۋ باسىپ، بۇكىل ەل حالقىنىڭ نازارىن اۋداردى. بايەكە ءار كۇنى دەرلىك تەلەۆيزوردىڭ الدىندا وتىرىپ، اپاتتان قۇتقارۋ جاعدايىنا نازار سالدى. اپاتقا ءدوپ كەلگەندە، بىلەك بىرىكتىرە جەڭۋ كەرەك، بايەكە ۇيىندەگى اماناتقا قويعان 200 مىڭ يۋان اقشانى ەسىنە الدى.
”مەن پارتيا مۇشەسىمىن، قاي - قاشان دا حالىقتىڭ قامىن ويلاۋىم كەرەك. قازىر دەنساۋلىعىم جاقسى، وسى اقشانى حىنان حالقىنا جىلۋعا اتاپ، ءوزىمنىڭ ازعانتاي كومەگىم ارقىلى اپاتقا ۇشىراعان بۇقارانىڭ قيىن وتكەلدەن وتۋىنە كومەكتەسسەم دەيمىن“. بايەكە بۇل 200 مىڭ يۋاننىڭ ىشىندە اماناتقا قويعان اقشا، وتباسىنىڭ سيىر ساتقان اقشاسى، ۇكىمەتتىڭ لاچين بايەكەگە بەرگەن قامقورلىق قاراجاتى جانە قوعامنىڭ ءار سالاسىنان اتالعان جىلۋ اقشالار بار ەكەندىگىن ايتىپ، ”مەن بۇل اقشالاردى جىلۋعا اتايىق دەگەنىمدە، وتباسىمداعىلار مەنى ەرەكشە قولدادى“، - دەدى.
7 - ايدىڭ 24 - كۇنى تاڭەرتەڭ، بايەكە تاشقورعان تاجىك اۆتونوميالى اۋداندىق قىزىل كرەست قوعامىنا بارىپ، قىزمەتكەر ءاشىراپ جۇماعا ءوزىنىڭ جىلۋ اتاۋ نيەتىن ءبىلدىردى. ”بۇل اقشانىڭ قارتتىڭ كۇتىمدەلۋىنە قاجەت ەكەنىن ەسكەرىپ، ءبىز ونىڭ قايتالاي ويلانىپ كورۋىن ءۇمىت ەتتىك“، - دەدى ءاشىراپ، - ”الايدا كاريا جىلۋعا اتايمىن دەپ كونبەدى، ءبىز كاريانىڭ تىلەگىنە قۇرمەت ەتتىك“.
سول كۇنى تۇستەن كەيىن، تاشقورعان تاجىك اۆتونوميالى اۋداندىق قىزىل كرەست قوعامى قىزمەتكەرلەرىنىڭ سەرىك بولۋىندا، بايەكە بالاسى لاچين بايەكەنىڭ اتىندا 200 مىڭ يۋان جىلۋ اقشانى جىڭجوۋ قالالىق قىزىل كرەست قوعامىنىڭ بانكە ەسەپ نومىرىنە اۋداردى. ”لاچين بايەكە قۇربان بولعاننان كەيىن، پارتيا مەن ۇكىمەت، قوعامنىڭ ءار سالاسى بىزگە توتەنشە كوڭىل ءبولىپ، تالاي رەت بىزگە امانداسا كەلىپ، بىزگە ەرەكشە مەيىر - شاپاعاتتى سەزىندىردى. ەگەر لاچين بايەكە ءتىرى بولسا، ول دا، ءسوزسىز، وسىلاي ىستەيتىن ەدى!“ - دەدى بايەكە كەسەتە سويلەپ.
