ساپا، ونىمدىلىك بىردەي جوعارىلادى، بازاردىڭ ومىرشەڭدىگى ارتتى
رايونىمىزدىڭ ونەركاسىپ ەكونوميكاسى ۇدەرە جوعارىلادى
□ انار بۇلت / شينجياڭ گازەتىنىڭ ءتىلشىسى ما ينيڭ
الدىڭعى جارتى جىلدا رايونىمىز ەكونوميكاسى ”ورنىقتى“ بولۋ نەگىزىندە جىلدام ارتىپ، ساپاسى جوعارىلادى، اۋەلى، تىڭ تىنىس بايقاتتى − كولەمنەن جوعارى ونەركاسىپ كاسىپورىندارىنىڭ ارتقان قۇنى سايكەس مەزگىلدەگىدەن ％11.4 جوعارىلاپ، 2 جىلدا ورتا ەسەپپەن ％8.7 ارتىپ، بۇكىل ەلدىڭ 2 جىلداعى ورتاشا ارتۋ جىلدامدىعىنان1.7 پايىز جوعارى بولدى. ％70تەن جوعارى ونەركاسىپ سالاسىندا ارتۋ جۇزەگە اسىپ، ونەركاسىپ كاسىپورنىنىڭ پايداسى زور مولشەردە ارتتى.
جاڭالىق اشىپ ءىس تىندىرۋداعى تاباندىلىق، بەرىك تە بەكەم سەنىم قارىشتاپ دامۋدىڭ قوزعاۋشى قۋاتىن توپتاپ، رايونىمىز ونەركاسىپ ەكونوميكاسىنىڭ جوعارى ساپالى دامۋىن ىلگەرىلەتىپ، تۇتاس رايوننىڭ ارتۋدى ورنىقتىرۋىنا، جۇمىستاندىرۋدى جەبەۋىنە، حالىق تۇرمىسىنا كەپىلدىك ەتۋگە پارمەندى تىرەك ازىرلەدى.
ورنىقتىلىق بارىسىندا جاقساردى:
ەكونوميكانىڭ نەگىزى بەكەمدەلدى
”كاسىپورىننىڭ شينجياڭداعى دامۋ كەلەشەگىنەن ءۇمىت بار“. 7 - ايدىڭ 29 - كۇنى شانشي اۆتوكولىك توبى شينجياڭ اۆتوكولىك شەكتى سەرىكتەستىگىنىڭ باس ديرەكتورى كى شيانجى بىلاي دەدى: بيىل سەرىكتەستىك جاڭا ءونىمدى جالپىلاستىرۋدى، سونداي - اق ۇساق بولشەكتەردى قاراستى جەرىنە قاراي سايكەستى ءوندىرۋدى ۇلعايتتى. الدىڭعى جارتى جىلدا، شانشي اۆتوكولىك توبى شينجياڭ اۆتوكولىك شەكتى سەرىكتەستىگى جيىنى 4485 اۆتوكولىك ءوندىردى جانە ساتتى، ءونىم قۇنى ءبىر ميلليارد 411 ميلليون يۋان بولىپ، سايكەس مەزگىلدەگىدەن ％40 ارتتى، تاپسىرعان سالىق سوماسى 16 ميلليون يۋان بولىپ، شينجياڭ ىشىندە باستاماشىلدىق ەتكەن سايكەستى ءونىم قۇنى 56 ميلليون 990 مىڭ يۋان بولىپ، سايكەس مەزگىلدەگىدەن ％118 ارتتى.
شانشي اۆتوكولىك توبى شينجياڭ اۆتوكولىك شەكتى سەرىكتەستىگىنىڭ دامۋى شينجياڭ ونەركاسىپ ءوندىرىسىنىڭ ۇدەرە دامۋىنىڭ ىقشام كورىنىسى. مەملەكەت پەن اۆتونوميالى رايوننىڭ كەلەلى نىسان قۇرىلىسى سياقتى فاكتورلاردىڭ جەبەۋىندە جابدىق ونىمدەرىنىڭ بازارداعى قاجەتى قاۋىرت ارتىپ، كاسىپورىنعا تۇسكەن تاپسىرىس مولايىپ، رايونىمىزداعى جاڭا ەنەرگيالى جابدىقتاردى، ەلەكتر جەتكىزۋ، كەرنەۋ وزگەرتۋ جابدىقتارىن، ساۋدالىق اۆتوكولىك، سونداي - اق اۋىل شارۋاشىلىق ماشينالارى جابدىقتارىن شىعاراتىن كاسىپورىندار كۇش سالا ءوندىرىس جۇرگىزدى.
ساندى مالىمەتتەر رايونىمىز ونەركاسىپ ەكونوميكاسىنىڭ بەلسەندى بەت - بەينەسىن دالەلدەدى: الدىڭعى جارتى جىلدا كەن شارۋاشىلىعىنىڭ ارتقان قۇنى سايكەس مەزگىلدەگىدەن ％5.6 ارتقان؛ جاساۋ كاسىبىنىڭ ارتقان قۇنى سايكەس مەزگىلدەگىدەن ％13.9 ارتقان؛ توقىماشىلىق، كيىم - كەشەك كاسىبىنىڭ ارتقان قۇنى سايكەس مەزگىلدەگىدەن ％28.4 ارتقان... ونەركاسىپتىڭ 40 ۇلكەن كاسىپ تۇرىندە، 30 كاسىپتىڭ ارتقان قۇنى سايكەس مەزگىلدەگىدەن ارتىپ، ％75.0ىن ۇستاعان. 1 - ايدان 5 - ايعا دەيىن كولەمنەن جوعارى ونەركاسىپ كاسىپورىندارىنىڭ تيجارات كىرىسى 535 ميلليارد 780 ميلليون يۋان بولىپ، سايكەس مەزگىلدەگىدەن ％30.6 ارتقان، 2 جىلدا ورتا ەسەپپەن ％10.9 ارتقان؛ تابىسى 71 ميلليارد 509 ميلليون يۋان بولىپ، سايكەس مەزگىلدەگىدەن 2.2 ەسە ارتىپ، 2 جىلدا ورتا ەسەپپەن ％47.1 ارتقان.
ماڭىزدى ەكونوميكالىق دامۋ كورسەتكىشى رەتىندە، قارجى قوسۋ دا جەدەل ارتۋ كۇيىن ساقتادى. الدىڭعى جارتى جىلدا تۇتاس رايوننىڭ ونەركاسىپكە قارجى قوسۋىنىڭ ارتۋ قارقىنى ％19.7كە جەتىپ، بۇكىل ەلدەگى ونەركاسىپكە قارجى قوسۋدىڭ ارتۋ قارقىنىمەن سالىستىرعاندا، 3.5 پايىز جوعارى بولعان. 50 كەلەلى ونەركاسىپ نىسانىنا جالپى 9 ميلليارد 420 ميلليون يۋان قارجى قوسىلدى. مۇنىڭ ىشىندە، مايتاۋ مۇناي حيمياسى جىلىنا 600 مىڭ توننا ەتاننان ەتيلەن جاساۋ، قۇمىل گۋاڭحۇي كومىر گازىنەن ەتيلەن گليكولىن جاساۋ سياقتى 38 نىسان جۇمىس باستاپ، قۇرىلىس اياق الىسى ءساتتى بولدى. جۇڭتاي توبىنىڭ ياركەن اۋدانىنداعى 1 - مەرزىمدىك 500 مىڭ ۇرشىقتى ءجىپ ءيىرۋ نىسانى، سانيوۋ فۋشين جارتىلاي وتكىزگىش كاسىپ تىزبەگى نىسانى، جۇڭتاي حايحۇڭ 400 مىڭ ۇرشىقتى اۋا ەكپىندى ءجىپ ءيىرۋ نىسانى سياقتى 8 نىساننىڭ ءبىر ءبولىمى وندىرىسكە قوسىلدى نەمەسە سىناق رەتىندە ءوندىرۋدى باستادى.
ورنىقتىلىق بارىسىندا ساپانى جوعارىلاتتى:
بەلسەندى فاكتورلار سەنىمدى كۇشەيتتى
رايونىمىز ەكونوميكاسى جاقسارۋ فاكتورلارىنىڭ ۇزدىكسىز جيناقتالۋىمەن ”ورنىقتى“ بولدى ءارى جاڭا ومىرشەڭدىگىن قاۋلاتتى. سوڭعى جىلدارى رايونىمىز باسىمدىققا يە كاسىپ سالالارىندا شەشۋشى، وزەكتى جابدىقتار مەن تەحنيكادا قامال الۋدى كۇشەيتىپ، القىمداپ وتىرعان قيىن ماسەلەلەردى شەشتى. كاسىپورىندار ىرىقتىلىقپەن جاڭالىق اشىپ، جاڭا ونىمدەردى زەرتتەۋ - اشۋ جانە بازاردى كەڭەيتۋ - اشۋ جاعىندا ۇزدىكسىز كۇش سالىپ، كاسىپورىننىڭ وزەكتى باسەكەلىك قۋاتىن ۇزدىكسىز جوعارىلاتتى.
7 - ايدىڭ 29 - كۇنى قۇمىل جوعارى، جاڭا تەحنيكالىق كاسىپ سالالارىن اشۋ رايونىندا، قۇمىلداعى جەل ەلەكتر جابدىقتارىن وندىرەتىن ءتۇيىندى كاسىپورىن − قۇمىل جۇڭچى جاڭا ەنەرگيالى گەنەراتور شەكتى سەرىكتەستىگىندە 3 مەگاۆاتتىق جەل ەلەكتر گەنەراتورى وسى ارادا ءوندىرىس جەلىسىنەن شىقتى.
بيىل قۇمىل جۇڭچى جاڭا ەنەرگيالى گەنەراتور شەكتى سەرىكتەستىگى جاڭا ونىمدەردى زەرتتەۋ - اشۋدى كۇشەيتىپ، 6 ميلليون يۋاننان استام قارجى قوسىپ، تۇڭعىش 3 مەگاۆاتتىق جەل ەلەكتر گەنەراتورى ءوندىرىس جەلىسىن جاڭارتۋدى ورىندادى. جۋىردا عانا سەرىكتەستىك مەملەكەتتىك 3 - توپتاعى ارنايىلانعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان شاعىن قۋاتتى كاسىپورىندار قاتارىنا قوسىلدى. وسى سەرىكتەستىكتىڭ باس ديرەكتورى ۋاڭ شياۋشياڭ بىلاي دەدى: ”ءبىز عىلىم - تەحنيكادا جاڭالىق اشۋعا، زەردەلى جاساۋعا سۇيەنىپ، 6 مەگاۆاتتىق، 8 مەگاۆاتتىق گەنەراتور تيبى سياقتى ءوندىرىس قۋاتىن ورنالاستىرۋدى ونان ارى كەڭەيتىپ، بازاردىڭ قاجەتىنە ءونىمدى تۇردە سايكەسەتىن بولامىز“.
الدىڭعى جارتى جىلدا بۇكىل رايوننىڭ 14 ايماعىنداعى (وبلىس، قالا) كولەمنەن جوعارى كاسىپورىنداردىڭ ءوندىرىسى تۇگەلدەي ارتىپ، 7 ايماق - وبلىستىڭ ءوندىرىسىنىڭ ارتۋ قارقىنى بۇكىل رايوننىڭ ورەسىنەن جوعارى بولدى. مۇنىڭ ىشىندە، بۇراتالا موڭعۇل اۆتونوميالى وبلىسىنداعى كولەمنەن جوعارى ونەركاسىپ ەكونوميكاسىندا ونەركاسىپتىڭ ارتقان قۇنى 2 ميلليارد 367 ميلليون يۋان بولىپ، سايكەس مەزگىلدەگىدەن ％30.9 ارتىپ، بۇكىل شينجياڭنىڭ ارتۋ قارقىنىنان 20 پايىز جوعارى بولعان.
”الدىڭعى جارتى جىلدا بۇراتالا وبلىسىنىڭ ونەركاسىپ ەكونوميكاسىنىڭ دامۋ بەتالىسىنىڭ ۇزدىكسىز جاقسارۋى شارۋاشىلىق - ساۋدا ورتاسىنىڭ ونان ارى ساپالىلانىپ، كاسىپ قۇرىلىمىنىڭ ۇزدىكسىز رەتتەلىپ، جەتەكشى سالالاردىڭ جەتەكتەۋ رولىنىڭ كۇشەيۋىنەن باستالدى. سونىمەن بىرگە، فورمانى جاڭالاپ، ساۋداگەر شاقىرۋ كومەسكى كۇشىن اشۋدىڭ ونىمدىلىگى كورنەكتى بولدى“. بۇراتالا وبلىستىق ونەركاسىپ جانە ينفورماتسيالاندىرۋ مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى يە جياچياڭ مىنانى ءبىلدىردى: ”بۇراتالا وبلىسى 3 تە 5 جىل ىشىندە تاس ماتەريالدارى، مىس قورىتپاسى سياقتى 100 ميلليارد دارەجەلى 2 كاسىپ سالاسى شوعىرىن تۇلعالايدى، توقىماشىلىق جانە كيىم - كەشەك، اۋىل شارۋاشىلىق قوسىمشا ونىمدەرىن وڭدەۋ، ەلەكتروندى ونىمدەر جاساۋ، جاڭا ەنەرگيا سياقتى 10 ميلليارد دارەجەلى 4 كاسىپ سالاسى شوعىرىن تۇلعالايدى“.
ورنىقتىلىق بارىسىندا جاڭالارىن جەتىلدىردى:
دامۋدىڭ جاڭا مۇمكىندىگىن توپتادى
”ورنىقتى“ بولۋمەن بىرگە، رايونىمىز ەكونوميكاسىنىڭ دامۋىندا جاڭا جارقىن تۇيىندەر، جاڭا باسىمدىقتار جارىققا شىعىپ، ەكونوميكانىڭ جوعارى ساپالى دامۋىنىڭ جاڭا مۇمكىندىگىن ونان ارى قاۋلاتتى.
جاڭاشا نەگىزدىك قۇرىلعى قۇرىلىسى ەكونوميكانىڭ دامۋىنىڭ جاڭا موتورى دەپ اتالدى. كاسىپ سالاسىنىڭ سيفرلانۋىنان، سيفردىڭ كاسىپ سالالانۋىنان تۋعان ورايدى مىقتى يگەرىپ، رايونىمىز جاڭاشا نەگىزدىك قۇرىلعى قۇرىلىسىن جىلدام ورنالاستىرۋدا.
ەرەكشە ترانسفورماتور شينجياڭ تيانچى ەنەرگيا شەكتى جاۋاپكەرشىلىك سەرىكتەستىگى ”5G+ونەركاسىپ ينتەرنەتى“ كاسىپ سالاسى باقشاسى اۋماعىندا، 5G ۆيرتۋالدى كاسىپورىن ارناۋلى جەلىسى مەن زەردەلى كەن اشۋ بۇلتتىق تۇعىرىن قولدانۋ ارقىلى، ”ينتەرنەت + ساندى مالىمەت + ەسەپتەۋ امالى + ەسەپتەۋ قۋاتى“ سىندى كومىر - ەلەكتر ءبىر تۇلعالاندىرىلعان زەردەلى قىزمەت وتەۋ جاڭا جۇيەسىن تۇلعالاپ، ءداستۇرلى كومىر - ەلەكتر كاسىپ سالاسى باقشاسىنىڭ زەردەلىلەنۋىن، سايكەستى بولۋىن، بۇلتقا شىعۋىن جالپى بەتتىك دەمەدى. سونىمەن بىرگە ”شينجياڭ ونەركاسىپ ينتەرنەتى حاۋىپسىزدىك جاعدايىن اڭعارۋ تۇعىرى“، ەرەكشە ترانسفورماتور ەلەكتر جارنا شەكتى سەرىكتەستىگىنىڭ ”ونەركاسىپ كاسىپورىندارىنىڭ ينتەرنەت حاۋىپسىزدىگى كەشەندى ساقتانۋ - قورعانۋ تۇعىرى“، قارامايلى حىجۇڭ بۇلت - جەلى تەحنيكانى دامىتۋ شەكتى سەرىكتەستىگىنىڭ ”كولىك ينتەرنەتى حاۋىپسىزدىگىن شيفرلاۋ، كۋالاندىرۋ تەحنيكاسى مەن ونىمدەرى“ جانە ”جوعارى كۇشەمەلىلىكتەگى ساۋدالىق قۇپيا سيفر نەگىزىندەگى ونەركاسىپ ينتەرنەتى بويىنشا كۋالاندىرۋ جەلى ارالىق تورابى“ سياقتى نىسان قۇرىلىسىن ۇزدىكسىز ىلگەرىلەتتى.
مۇنان تىس، وزىق ەلەكتروندى ونىمدەردى ءوندىرۋ، ساپالى ماتەريالدار سياقتى ەلەكتروندى ينفورماتسيالىق جاساۋ كاسىپورىندارى دامۋداعى ومىرشەڭدىگىن ايگىلەدى. الدىڭعى جارتى جىلدا شينجياڭ ەلەكتروندى ينفورماتسيا جاساۋ كاسىپورىندارىنىڭ ونەركاسىپ جالپى ءونىم قۇنى 17 ميلليارد يۋان بولىپ، الدىڭعى جىلداعى ۇقساس مەزگىلدەگىدەن ％69 ارتقان؛ 6 ميلليارد 800 ميلليون يۋان پايدا ءتۇسىرىپ، سايكەس مەزگىلدەگىدەن 14 ەسە ارتقان.
بىلتىردان باستاپ رايونىمىز ”10 ءىرى كاسىپ سالاسىن“ ءتۇيىندى تۇردە دامىتتى. اۆتونوميالى رايوننىڭ زور كۇشپەن ىلگەرىلەتۋىندە نان كاسىپ سالاسىنىڭ دامۋ بەتالىسى تاماشا بولدى. الدىڭعى جارتى جىلدا بۇكىل رايوندا ءار دارەجەلى، ءار ءتۇرلى 63 نان كاسىپ سالاسى باقشاسى، 460تان استام كولەمدى نان جابۋ سەلبەستىك كووپەراتيۆى، 510نان استام كاسىپتىك ءوندىرىس كاسىپورنى، 10 مىڭنان استام جەكە تيجارات ورنى قۇرىلىپ، 100 مىڭنان استام وتباسى نان جابۋ ارقىلى كەدەيلىكتەن ارىلىپ، بايۋدى جۇزەگە اسىردى. سونىمەن بىرگە، ءجۇزىم شارابى كاسىپ سالاسىنىڭ دامۋى العاشقى ادىمدا كولەم قالىپتاستىردى. بيىل بۇكىل رايونداعى شاراپ اشىتۋعا جۇمسالاتىن ءجۇزىمنىڭ ەگىلگەن جەر اۋدانى 300 مىڭ مۋ بولدى، 134 ءجۇزىم شارابى كاسىپورنى بار، مۇنىڭ ىشىندە، 18 كولەمنەن جوعارى كاسىپورىن بار، ءجۇزىم شارابىن ءوندىرۋ قۋاتى 550 مىڭ كيلوليترگە جەتەدى.
سوڭعى جارتى جىلدا رايونىمىز اۆتونوميالى رايوننىڭ ”10 ءىرى كاسىپ سالاسىنداعى“ مۇناي جانە حيميا ونەركاسىبى، كومىر جانە كومىر - حيميا ونەركاسىبى، توقىماشىلىق جانە كيىم - كەشەك، ەلەكتروندى ونىمدەر، نان، ءجۇزىم شارابى سياقتى كاسىپ سالالارىنىڭ جوعارى ساپالى دامۋىن ىلگەرىلەتىپ، سيفرلى ەكونوميكانىڭ دەڭگەيىن ءوسىرىپ، قارقىنىن ارتتىرۋدى زور كۇشپەن ىلگەرىلەتىپ، كەلەلى نىسان قۇرىلىسىن ىلگەرىلەتىپ، كەلەلى نىسانداردى ورنالاستىرۋ قىزمەت مەحانيزمىن تياناقتاندىرىپ، 50 كەلەلى نىساندى ۇزدىكسىز قاداعالاپ، سايكەستىرىپ، كەلەلى نىسانداردىڭ جاپپاي قۇرىلىس باستاپ سالىنۋىنا شىنايى كەپىلدىك ەتىپ، ونەركاسىپتىڭ دامۋ نەگىزىن ۇزدىكسىز كۇشەيتە تۇسەدى.
