شينجياڭ كۇرەسى تاريح جاراتتى
انار بۇلت / شينجياڭ گازەتىنىڭ ءتىلشىسى دۇڭ لياڭ 8 - ايدىڭ 2 - كۇنى ۇرىمجىدەن حابارلايدى. بەيجيڭ ۋاقىتى 8 - ايدىڭ 2 - كۇنى ساعات 18دەن 46 مينۋت وتكەن مولشەردە، توكيو وليمپيادا سپورت جارىسى ەرلەر كلاسسيكالىق كۇرەسىنىڭ 60 كيلوگرامدىق سالماقتاعىلار بويىنشا قولا مەدالعا تالاسۋ جارىسىندا، جۇڭگو قۇراماسىنداعى شينجياڭدىق ساڭلاق ءۋاليقان سەرىك ۋكراينالىق شەبەر تيموروۆتى جەڭىپ، قىمباتتى قولا مەدالدى جۇڭگو ۋاكىلدەر ۇيىرمەسىنىڭ قورجىنىنا سالدى. بۇل 2008 - جىلعى بەيجيڭ وليمپيادا سپورت جارىسىندا چاڭ يۇڭشياڭنىڭ ەرلەر كلاسسيكالىق كۇرەسىنىڭ 74 كيلوگرامدىق سالماقتاعىلار جارىسىندا كۇمىس مەدال العاننان كەيىنگى جۇڭگو ەرلەر كۇرەس شەبەرلەرىنىڭ اراعا 13 جىل سالىپ تاعى ءبىر مارتە وليمپيادا سپورت جارىسىنىڭ سيلىق ساحناسىنا كوتەرىلۋى. بۇل مەدال شينجياڭ دەنە تاربيەسىندە جاڭا ءبىر تاريح جاراتتى − بۇكىلدەي رايونىمىز تاربيەلەگەن سپورتشىنىڭ وليمپيادا كۇرەس تۇرىنەن تۇڭعىش مەدال الۋى.
وليمپيادا سپورت جارىسىنىڭ ەرلەر كلاسسيكالىق كۇرەسىنىڭ 60 كيلوگرام سالماقتاعىلار كۇرەسى 8 - ايدىڭ 1 - كۇنى باستالدى، ءۋاليقان سەگىزدەن ءبىر شەشۋشى جارىستا تەحنيكالىق ۇپاي باسىمدىعى ارقىلى (ەكى جاق تەڭ تۇسكەن جاعدايدا، سوڭىنان ءنومىر العان شەبەر ۇتادى) گەرمانيالىق شەبەردى ارەڭ جەڭىپ كەلەسى اينالىمعا وتكەن. قولا مەدالعا تالاسۋ بارىسىندا، ءۋاليقان بەلسەنە شابۋىل جاساپ، سوڭىندا تەحنيكالىق ۇپاي باسىمدىعى ارقىلى جەڭىسكە قول جەتكىزدى.
”بۇل شينجياڭ كۇرەس ساڭلاقتارىنىڭ مەملەكەت قۇراماسى اتىنان وليمپيادا سپورت جارىسىنىڭ تاريحىندا قول جەتكىزگەن ەڭ جاقسى ناتيجەسى“. تىكە تاراتۋ ارقىلى ءۋاليقاننىڭ وليمپيادا قولا مەدال العانىن كورگەن سوڭ، اۆتونوميالى رايوندىق دەنە تاربيە مەكەمەسى كۇرەس، دزيۋ - دو سپورتىن باسقارۋ ورتالىعى پارتكومىنىڭ شۋجيى ادىل بارات تىلشىگە اسەرلەنە بىلاي دەدى: ”بۇگىنگى جارىس وتە قيان - كەسكى بولدى، الايدا ءۋاليقان ەڭ سوڭىنا دەيىن تىرەسىپ جەڭىسكە قول جەتكىزدى، مەن ونى ماقتانىش ەتەمىن، سونداي - اق شينجياڭدىق دەنە تاربيەشىلەر اتىنان ونى قۇتتىقتايمىن“.
