قارجى قوسۋدىڭ ارتۋى تەزدەدى، كوپ نىساندار باستالدى
الدىڭعى 6 ايدا ءتۇيىندى قاتىناس نىساندارىنا جيىنى 31 ميلليارد 390 ميلليون يۋان قارجى قوسىلدى
8 - ايدىڭ 3 - كۇنى قۇرىلىسشىلار G575 جەلىسى قۇمىلدان باركولگە دەيىنگى تاس جول قۇرىلىسى نىسان جۇمىس باسىندا اسفالت توسەۋدە (ۇشقىش اپپاراتپەن تۇسىرىلگەن). سول كۇنى G575 جەلىسى قۇمىلدان باركولگە دەيىنگى تاس جول قۇرىلىسى نىسانى توپىراق قۇرىلىسى 1 - بەلگى بولىگىنە اسفالت توسەۋ اياقتالدى. □ سۋرەتتى تيان تىڭشان تۇسىرگەن
انار بۇلت / شينجياڭ گازەتىنىڭ ءتىلشىسى لۋ فىڭباۋ، پراكتيكانت اينيگار ءانۋار 8 - ايدىڭ 6 - كۇنى ۇرىمجىدەن حابارلايدى. بيىل الدىڭعى جارتى جىلدا اۆتونوميالى رايوندا ءتۇيىندى قاتىناس نىساندارىنىڭ قۇرىلىسى جەدەلدەپ، جيىنى 31 ميلليارد 390 ميلليون يۋان قارجى قوسىلىپ، وتكەن جىلعى سايكەس مەزگىلدەگىدەن 6 ميلليارد 670 ميلليون يۋان ارتتى.
8 - ايدىڭ 3 - كۇنى تۇستەن كەيىن ۇرىمجدەن 900 نەشە كيلومەتر شالعايداعى چارقىلىقتان نيەگە دەيىنگى جوعارى جىلدامدىقتى تاس جول قۇرىلىسى جۇمىس باسىندا تاس جول قۇرىلىسشىلارى اسفالتتىڭ ورتاڭعى بەت قاباتى مەن جوعارعى بەت قاباتىن جاتقىزۋدا. 9 - ايدىڭ سوڭىندا بۇل جوعارى جىلدامدىقتى تاس جولدىڭ بەتى تۇتاسىپ، جىل سوڭىندا ساتىمەن ىسكە قوسىلۋىنا شىنايى كەپىلدىك ەتىلەدى.
”بيىل 3 - ايدا جۇمىستى قالپىنا كەلتىرگەننەن بەرى، ءبىز قىزمەتكەر، جابدىق، قارجى ۇسىنىلىمىن ارتتىرىپ، قۇرىلىس قارقىنىن ۇزدىكسىز تەزدەتتىك“، - دەدى جۇڭگو تەمىر جولى 1 - مەكەمەسى چارقىلىقتان نيەگە دەيىنگى جوعارى جىلدامدىقتى تاس جول قۇرىلىسى 5 - توقتام بولىگى نىسانىنىڭ جاۋاپتىسى داڭ جياڭتاۋ.
G7 بەيجيڭ - شينجياڭ جوعارى جىلدامدىقتى تاس جولىنىڭ ۋتۇڭ داچۋاننان موريعا دەيىنگى بولىگى، S20 ۋگۇڭتايدان قارامايلىعا دەيىنگى 1 - دارەجەلى وزگەرتىلگەن جوعارى جىلدامدىقتى تاس جول سياقتى نىسانداردىڭ سالىنىپ بولىپ اۆتوكولىك قاتىناۋىنا ساي، بۇكىل شينجياڭداعى جوعارى جىلدامدىقتى تاس جولدىڭ جالپى ۇزىندىعى 6000 كيلومەتردەن اسىپ، جول تورى قۇرىلىمى اناعۇرلىم كەمەلدەنىپ، ”شينجياڭنىڭ ءىشىن اينالدىرا تۇتاستىرۋ، شينجياڭنان كىرىپ - شىعۋدى تەزدەتۋ“ نىساناسى جەدەل جۇزەگە اسۋدا.
الدىڭعى جارتى جىلدا بۇكىل رايونداعى 56 جالعاستىرىپ سالىنعان مەملەكەت، ولكە جولى نىساندارىنىڭ قۇرىلىسى تۇگەلدەي قالپىنا كەلىپ، جاڭادان باستالعان 9 نىساننىڭ 8ىنىڭ جۇمىسى باستالىپ، تاس جول قۇرىلىسىنا قارجى قوسۋ سوماسىن جەبەۋدىڭ ”نەگىزگى كۇشىنە“ اينالدى.
اۆتونوميالى رايوندىق قاتىناس - تاسىمال مەڭگەرمەسىنىڭ ورىنباسار مەڭگەرمە باستىعى دارەجەلى كادرى جىڭ ميڭچۋان بىلاي دەدى: بيىل رايونىمىزدىڭ ءار دارەجەلى قاتىناس - تاسىمال باسقارۋ تاراۋلارى، قۇرىلىس ورىندارى، جۇمىس جۇرگىزۋ ورىندارى كۇش قوسىپ سايكەسىپ، نىسان قۇرىلىستارىنىڭ قادامىن جەدەل ىلگەرىلەتتى. الدىڭعى جارتى جىلدا بۇكىل رايونداعى تاس جول قۇرىلىسى نىساندارىنا جيىنى 24 ميلليارد 814 ميلليون يۋان قارجى سالىنىپ، سايكەس مەزگىلدەگىدەن ％27.2 ارتىپ، تۇتاس جىلدىق نىسانانى ورىنداۋعا تاماشا نەگىز قالادى.
جول قۇرىلىسى شاپشاڭ جەدەلدەتىلۋدە، تەمىر جول قۇرىلىس نىساندارى دا ورنىقتى ىلگەرىلەدى. لانجوۋ - شينجياڭ لەنياسى جيجيساۋزىدان ءۇرىمجى وڭتۇستىك ۆوكزالىنا، ءۇرىمجى باتىس ۆوكزالىنا دەيىنگى بولىگىنىڭ كىشى راديۋستىق قيسىق سىزىعىن وزگەرتۋ نىسانى 4 ايدا سالىنىپ بولىپ ىسكە قوسىلدى؛ بيىل 4 - ايدا ءۇرىمجى سولتۇستىك ۆوكزالىنان جياڭجۇنمياۋعا دەيىنگى تەمىر جولدىڭ تاسىمال قۋاتىن كەڭەيتۋ ينجەنەرياسى مەن ناۋماۋحۋدان جياڭجۇنمياۋعا دەيىنگى تەمىر جول نىسانى باستالدى. 7 - ايدىڭ 30 - كۇنىنە دەيىن ءۇرىمجى سولتۇستىك ۆوكزالىنان جياڭجۇنمياۋعا دەيىنگى تەمىر جولدىڭ تاسىمال قۋاتىن كەڭەيتۋ ينجەنەرياسىنىڭ تۇتاس لەنياسىنداعى جول تاعاندارىن تولتىرۋدىڭ جوباداعى جالپى مولشەرىنىڭ ％60ى ورىندالدى، كوپىر وتكىنى ينجەنەريالارىنىڭ جوباداعى جالپى مولشەرىنىڭ ％60ى ورىندالدى. بۇل ەكى تەمىر جول نىسان ينجەنەرياسى اياقتالعاننان كەيىن، رايونىمىزدىڭ جالپىلىق زاتتار تاسىمال ارناسى ءتىپتى دە ىركىلىسسىزدەنىپ، شينجياڭنىڭ شىعىس بولىگىندە تەمىر جول تاسىمالىنىڭ اينالما لەنياسى قالىپتاسىپ، ءتىپتى دە كوپ زاتتىق ماتەريال تەمىر جول اينالما لەنياسى ارقىلى تەز تاسىلىپ شىعارىلاتىن بولادى؛ 7 - ايدىڭ 13 - كۇنى حوتان - چارقىلىق تەمىر جولىنىڭ تۇتاس لەنياسىنداعى 9 جولاۋشىلار ۆوكزال ۇيلەرىنىڭ توبەسى تۇگەلدەي جابىلدى، سونىمەن بىرگە، تەمىر جولعا رەليس جاتقىزۋ قىزمەتى دە بار كۇشپەن ىلگەرىلەتىلدى. قازىر حوتان - چارقىلىق تەمىر جولىندا 722 كيلومەترگە رەليس جاتقىزىلدى، مەجەمەن رەليس جاتقىزۋ قىزمەتى 9 - ايدا ورىندالادى.
اۋەجاي نىساندارى كوپ تۇيىندە باستالدى. قازىر ءۇرىمجى اۋەجايىن كەڭەيتىپ سالۋ ينجەنەرياسى دابىرالى جۇرگىزىلۋدە. ءۇرىمجى اۋەجايىن كەڭەيتىپ سالۋ ينجەنەرياسىنان سىرت، بيىل شينجياڭ اۋەجاي توبى قاشقار، تۇرپان، موڭعۇلكۇرە، تاشقورعان 4 اۋەجايدى جالعاستىرىپ سالۋ ينجەنەرياسىن ۇزدىكسىز ىلگەرىلەتتى ءارى شونجى، بايىنبۇلاق، باركول 3 اۋەجايدى جاڭادان سالۋ نىسانىنىڭ قۇرىلىسىن باستايدى، بۇلارعا 2 ميلليارد 453 ميلليون يۋان قارجى سالىناتىنى جوسپارلاندى.
الدىڭعى جارتى جىلدا قاشقار اۋەجايى مەن تۇرپان اۋەجايىن كەڭەيىپ سالۋ ينجەنەرياسىنىڭ، موڭعۇلكۇرە اۋەجايى مەن تاشقورعان اۋەجايىن جاڭادان سالۋ ينجەنەرياسىنىڭ جۇمىسى ءساتتى تۇردە قالپىنا كەلدى. ءتۇيىندى قاتىناس نىساندارىنىڭ باستالۋىنا، اياقتاۋىنا ىلەسە، رايونىمىزدىڭ جوعارى ساپالى كەشەندى، ستەرەولدى قاتىناس تورى ءتىپتى دە كەمەلدەنە ءتۇستى.
