□ حوۋ حۇي
8 - ايدىڭ 21 - كۇنى «شينجياڭ گازەتىنىڭ» 1 - بەتىنە باسىلعان ءبىر حاباردى حالىق گازەتى، شينحۋا اگەنتتىگى سياقتى ورتالىق اقپارات قۇرالدارىنىڭ ۋيچات الەۋمەتتىك تۇعىرلارى، زاڭدىق تۇلعا ميكروبلوكتەرى دەرەۋ جالعاپ تاراتتى. سالماقتى تۇردەگى بۇلشىق ەت السىزدىگى اۋرۋىنا شالدىققان حوتاندىق بويجەتكەن تالاي ادامنىڭ كوزىنە جاس الدىرىپ، تالاي ادامنىڭ كوڭىلىن تولقىتتى. مياۋ يانيان ەسىمدى 28 جاستاعى بۇل بويجەتكەن كوپتىڭ اقشا قۇراۋىمەن 2 جىل ەمدەلگەننەن كەيىن 3565 ىزگى نيەتتى جاننىڭ جىلۋ اقشاسىن قايتارىپ بەردى. ونىڭ حيكاياسى دۇنيەنى ءدۇر سىلكىندىرمەگەنىمەن، ءمورالدىڭ كۇشىمەن ىزگىلىك بيىگىن تۇلعالادى.
مياۋ يانيان 16 جاسىندا سالماقتى تۇردەگى بۇلشىق ەت السىزدىگى اۋرۋىنا شالدىققاندىعى انىقتالعان ءارى بىرتىندەپ سويلەۋ قابىلەتىنەن ايرىلعان. وسى جىلدارى 5 رەت حالى ناشارلاعان ول تاعدىردىڭ ادىلەتسىزدىگىنە بولا نالىماي، اۋرۋ دەرتىمەن الىسا ءجۇرىپ تۇرمىستاعى ەڭ قۋاتتى اۋەندى ءۇن - ءتۇنسىز ءجۇرىپ شىعانداتتى. 20 جاسىنان باستاپ، ول ينتەرنەتتە دۇكەن اشىپ شينجياڭنىڭ ەرەكشە اۋىل شارۋاشىلىق ونىمدەرىن ساتۋ ارقىلى ءوز كۇشىنە سۇيەنىپ ءومىر ءسۇردى ءارى سۇلۋلىقتى سۇيەتىن بارلىق بويجەتكەندەر سياقتى دوستار شەڭبەرىنە ۇنامدى دا ءداستۇرلى اسەم سۋرەتتەرىن جولداپ وتىردى. قانات سىنسا دا، جۇرەك اسپاندا قالىقتاي ۇشتى! ومىردەگى ساتسىزدىك الدىنداعى مياۋ يانياننىڭ ۇمىتكەرلىگى، قايسارلىعى ادامنىڭ كوزىنە جاس الدىردى، بارەكەل ايتتىرىپ ءسۇيىندىردى.
مياۋ يانياننىڭ ءومىر جولى جىگەرگە تولى ەدى، ال بۇل حيكايانىڭ شارىقتاۋ شەگى ءبىر ىزگى نيەتتى جاننىڭ وعان كومەكتەسىپ كوپتەن اقشا قۇراپ بەرۋىنەن باستالدى. 2019 - جىلى مياۋ يانيان ەمدەلىپ جاتىپ كەنەتتەن تىنىس الۋ قىزمەتى السىرەگەندە، كوپتىڭ اقشا قۇراۋىمەن قاتەردەن قۇتىلادى. سول كەزدە ناۋقاس توسەگىندە جاتقان مياۋ يانيان ”بۇل اقشانى مەن، ءسوز جوق، قايتارامىن“ دەگەن بولاتىن. ارادا 2 جىل وتكەندە، ياعني بيىل 8 - ايدىڭ 9 - كۇنى مياۋ يانيان اۋرۋىنا شىداي ءجۇرىپ تاپقان 120 مىڭ يۋان اقشاسىن كەزىندە ءوزى ءۇشىن اقشا قۇراعان 3565 ىزگى نيەتتى جانعا قايتارىپ بەرۋ ءىسىن باستادى. تۇرمىسى قيىنشىلىقتا بولعانىمەن، ءوزىن قورسىنباعان مياۋ يانيان قالىپتان تىس قايسارلىقپەن ۋادەسىن ورىنداپ، قايىسپاس قايراتىمەن كوڭىل تۇكپىرىندەگى تەرەڭ العىسىن بەينەلەدى.
ءىستىڭ قاعيداسىن ءبىلۋ، ءوزىن تىنباي الۋەتتەندىرۋ، ۋادەسىندە بەرىك تۇرۋ، قايىرىمدى ءبىلىپ العىس ايتۋ، وسى تاڭداۋلى قاسيەتتەردىڭ ءبارى ەرەكشە كوز تارتادى، الايدا وسىلاردىڭ بارلىعى بىردەي ءبىر سالماقتى ناۋقاسقا شالدىققان بويجەتكەننىڭ بويىنان تابىلعاندا وسى نازىك جاننان كوڭىل تەبىرەنتەرلىك كۇش - قۋات شىعاردى، مىنە بۇل رۋحتىڭ كۇشى، ءمورالدىڭ كۇشى، وعان تالاي ادامدار ىنتىعا، قۇرمەتپەن قاراپ كوزىنە ىستىق جاس الدى، ال ەندى بىرەۋلەر ونان ءوزىنىڭ قوراشتىعىن سەزىنىپ، قىنجىلدى.
جاسىرارى جوق، جاقىنداعى جىلداردان بەرى كەيبىر ينتەرنەتتە جىلۋ اتاعان ”قايىرىمدىلىق“ ”جۇرەكتى مۇزداتتى“، ءىشىنارا بىرەۋلەردىڭ باسقالاردىڭ قايىرىمدىلىق اقشاسىن ءوز مالىنداي توگىپ - شاشقان نەمەسە قايىرىمدىلىق جىلۋ اقشاسىنىڭ قالدىعى داۋ - شارعا اينالعان، ءتىپتى، ”جىلۋ اقشانى الدامشىلىقپەن الۋ“، ”جىلۋ اقشانى قىمقىرۋ“ وقيعالارى دا اۋىق - اۋىق تۋىلدى.
ىزگىلىك پەن مۇددە تارتىسىندا ءبىز وزىمىزدەن مىنانى سۇراپ كورەيىك: قانشا ادام ادام بويىنداعى السىزدىكتى جەڭە الدى؟ اسىلىندە قايتارۋى قاجەتسىز 120 مىڭ يۋاننىڭ الدىندا، مياۋ يانيان ءۇنسىز تاڭداۋ جاسادى.
اسقاق ءمورال ادامگەرشىلىك كوركىنىڭ ەڭ قويۋ ءتۇپ بوياۋى. مياۋ يانياننىڭ ارەكەتى ەڭ كەمەلدى ءمورال دەڭگەيىن ءتۇسىندىرىپ، ادامگەرشىلىك نۇر شۇعىلاسىن جارقىراتتى، سوندىقتان دا الەۋمەتتىك تۇعىرلاردا سان مىڭداعان ينتەرنەت قولدانۋشىلار توبىمەن بارەكەلدى ايتتى، وسى ارقىلى ادامدار ءوز جانىنىڭ تەرەڭىنە ءۇڭىلىپ ويعا باتتى.
مياۋ يانياننىڭ حيكاياسى ءمورالدىق جەتەنىڭ، ادامگەرشىلىك شۇعىلاسىنىڭ قاشاندا جۇرت تىلەگىن ۇيىستىراتىن كۇش - قۋاتقا يە ەكەندىگىن پارمەندى تۇردە دالەلدەدى. ءبىزدىڭ ءبىر جاندى ۇلگى رەتىندەگى وسىنداي حيكايانىڭ ءتىپتى دە كوپ ادامدى قايتپاس قايسارلىققا، ءمورالدى اسقاقتاتىپ ىزگىلىككە تالپىنۋعا شابىتتاندىرۋىن، ءمورال شۇعىلاسىمەن جاڭا داۋىردە ەكپىندەي ىلگەرىلەۋدىڭ رۋحاني كۇشىن ۇيىستىرۋىن كۇتۋگە قاقىمىز بار!
