تيانشان تورى   ›   جاڭالىقتار   ›   وقۋ-اعارتۋ

كوڭىل توعىستىرىپ، سىرلاسىپ، ناعىز سۇيىسپەنشىلىكتى ايگىلەدى

− رايونىمىز وقۋ - اعارتۋ جۇيەسىنىڭ ”ۇشكە كىرۋ، ەكىمەن بايلانىس ورناتۋ، بىرمەن دوستاسۋ“ قيمىلىن ورىستەتۋىنەن ەستەلىك

□ انار بۇلت / شينجياڭ گازەتىنىڭ ءتىلشىسى جاۋ شييا

  9 - ايدىڭ 3 - كۇنى ءبىر كۇندىك قاربالاستىقتان كەيىن ءۇرىمجى كاسىپتىك داشۋەسىنىڭ 3 - جىلدىق وقۋشىسى ءاشىراپ مامەت ياڭ دىشين مۇعالىمعا تەلەفون جالعاپ، وعان ءوزىنىڭ جۋىقتان بەرگى پراكتيكا جاعدايىن باياندادى. ”مەكتەپكە قايتقاننان كەيىن ەڭ الدىمەن ياڭ مۇعالىمدى كورگىم كەلەدى“، - دەدى ءاشىراپ.

  بىلتىر ءاشىراپ شۇعىل سوقىر ىشەك ناۋقاسىنا اياق استىنان شالدىعىپ، تۇندەلەتە شيپاحاناعا جەتكىزىلىپ ەمدەلەدى، ونىڭ وتباسىنداعىلاردىڭ ۇرىمجىدە ەمەس ەكەندىگىن ەسكەرگەن ياڭ دىشين وپەراتسيادان كەيىن شيپاحانادا جاتىپ ەمدەلگەن 23 كۇندە ىرىقتى تۇردە ونىڭ ىشەر اسى مەن ءجۇرىپ - تۇرۋىنا قارايلاسۋ جاۋاپكەرشىلىگىن ۇستىنە الادى. دەنەسىن ءسۇرتۋ، باسىن جۋۋ، كيىم - كەشەگىن جۋۋ... ناۋقاس توسەگىنىڭ الدىنان، كىر جۋۋ ۇيىنەن ءار كۇنى دەرلىك قاربالاس جۇرگەن ياڭ دىشيندى كورۋگە بولادى.

  وقۋشىمەن دوستاسىپ، وقۋشىنى جاقىنىنا بالادى، وقىتۋشى ياڭ دىشين مەن وقۋشى ءاشىراپتىڭ حيكاياسى رايونىمىز وقۋ - اعارتۋ جۇيەسىنىڭ ”ۇشكە كىرۋ، ەكىمەن بايلانىس ورناتۋ، بىرمەن دوستاسۋ“ (ياعني ”كلاسقا كىرۋ، جاتاققا كىرۋ، اسحاناعا كىرۋ، وقۋشىمەن بايلانىس ورناتۋ، اتا - انامەن بايلانىس ورناتۋ، وقۋشىمەن دوستاسۋ“) قيمىلىن ورىستەتۋىنىڭ اسەرلى بەينەسى.

  جۋىق جىلداردان بەرى رايونىمىزدىڭ وقۋ - اعارتۋ جۇيەسى ”ۇشكە كىرۋ، ەكىمەن بايلانىس ورناتۋ، بىرمەن دوستاسۋ“ قيمىلىن جاپپاي ورىستەتتى، رايون، ايماق، اۋدان ءۇش دارەجەلى باسشى كادرلار باستاماشىلدىقپەن مەكتەپتەرمەن بايلانىس جاساپ، جەتەكشىلىك ەتتى، وقۋ - اعارتۋ جۇيەسىندەگى كادرلار، وقىتۋشىلار تۇگەل ات سالىستى، ”ۇشكە كىرۋ، ەكىمەن بايلانىس ورناتۋ، بىرمەن دوستاسۋ“ قيمىلى ”ۇلتتار ىنتىماعىنىڭ بەرەكەلى شاڭىراعى“ قيمىلىن ىشكەرىلەي ىلگەرىلەتۋدەگى، ءار ۇلت وقىتۋشى - وقۋشىلارىنىڭ ارالاسۋ، ىشتەسۋ، توعىسۋىن جەبەۋدەگى ماڭىزدى دانەكەرىنە اينالدى.

  جۋىردا عانا اياقتالعان جازعى دەمالىس قاشقار داشۋەسى قۇرىلىس ينجەنەرياسى شۋەيۋانىنىڭ وقۋشىسى داناقىز يۇسۇپجانعا تەرەڭ اسەر قالدىردى. 7 - ايدىڭ 21 - كۇنى ونىڭ ۇيىنە ءبىر توپ ەرەكشە قوناق − قاشقار داشۋەسى پارتكومىنىڭ شۋجيى شۋە جيحاي مەن قاشقار داشۋەسى قۇرىلىس ينجەنەرياسى شۋەيۋانىنىڭ وقىتۋشىسى كەلگەن ەدى. ولار اۆتوكولىگىمەن 2 ساعاتتان ارتىق جول ءجۇرىپ اقتاۋ اۋدانىنداعى داناقىزدىڭ ۇيىنە كەلىپ حال - جاعداي سۇراسىپ، ونىڭ جازعى دەمالىس تۇرمىسىن ۇعىستى، ونىڭ وتباسىنىڭ تۇرمىس قيىنشىلىعىن سۇراستىرىپ، اتا - اناسىنىڭ مەكتەپكە دەگەن ۇسىنىس - پىكىرىن تىڭدادى.

  ”مەكتەپ باسشىسى مەن وقىتۋشىمنىڭ ۇيىمە كەلەرىن ويلاماپپىن، ايرىقشا تەبىرەندىم! وقىتۋشىلار وقۋشىلاردى، راسىندا، ءوز بالاسىنداي قارايدى ەكەن“، - دەدى داناقىزدىڭ شەشەسى تەبىرەنىپ.

  بيىل جازعى دەمالىستا قاشقار داشۋەسى جالپى 26 وتباسىن ارالاپ جاعداي ۇعىسۋ گرۋپپاسىن قۇرىپ، 200دەن استام وقۋشىنىڭ وتباسىن ارالاپ جاعداي ۇعىستى. سونىمەن بىرگە، كاسىپورىندارعا، ءىسورىندارعا بارىپ ىشكەرىلەي تەكسەرۋ - زەرتتەۋ جۇرگىزىپ، بيىل وقۋ تاۋىسىپ جۇمىستانباعان وقۋشىلاردىڭ ەرتەرەك جۇمىستانۋىنا كومەكتەسىپ، ءاربىر وقۋشىنىڭ جۇرەگىنە قامقورلىق پەن مەيىرىمدىلىكتى شىن مانىندە ۇيالاتتى.

  حىجيڭ اۋداندىق جوعارى دارەجەلى ورتا مەكتەبىندە ”ۇشكە كىرۋ، ەكىمەن بايلانىس ورناتۋ، بىرمەن دوستاسۋ“ قيمىلى ارقىلى وقىتۋشىلار مەن وقۋشىلاردىڭ جۇرەكتەرى ءتىپتى دە توعىستى. تولىق ورتا 3 - جىلدىق 15 - كلاسىنىڭ كلاس جەتەكشىسى باي ليلي 37 وقۋشىعا جەتەكشىلىك ەتتى، بالالار تۇگەلدەي مەكتەپتە جاتىپ وقيتىن، مەكتەپتە ول بالالاردىڭ ”باستى اتا - اناسىنداي“بولدى. ءار جولعى دۋان - ۋ، جۇڭچيۋ سياقتى مەرەكە كۇندەرىندە باي ليلي ىلعي دا ءوز قالتاسىنان اقشا جۇمساپ ايكۇلشە، قياق كۇرىش، قانت - كامپيت سياقتىلاردى ساتىپ الىپ، مەرەكەنى بالالارمەن بىرگە تويلايتىن. وقۋشىلاردىڭ تاماشا ۇيرەنۋ ادەتىن قالىپتاستىرۋىنا كومەكتەسۋ ءۇشىن باي ليلي وقۋشىلاردى ءار كۇنى دەرلىك ەسەيۋ كۇندەلىگىن جازۋعا باستادى ءارى كۇندەلىك ارقىلى وقۋشىنىڭ ۇيرەنۋ جاعدايى مەن يدەيالىق وزگەرىسىن دەر كەزىندە يگەرىپ وتىردى.

  ”كلاستا الدىڭعى ماۋسىمدا اۋىسىپ كەلگەن ءبىر وقۋشى بار ەدى، جاڭادان كەلگەندە جازۋى تىم سيىقسىز بولاتىن. ونىڭ ەسەيۋ كۇندەلىگىنە مەن ءار جولى شابىتتاندىرىپ، قامشىلاپ وتىراتىن باعا سوزدەرىن جازاتىنمىن، بۇل ماۋسىمدا ونىڭ العا باسۋى كورنەكتى بولدى“، - دەدى وقۋشىلاردىڭ ەسەيگەندىگىن، العا باسقاندىعىن كورىپ شاتتانعان باي ليلي.

  شينجياڭ داشۋەسى ”وقۋشىلاردىڭ ەسەيۋىنە كومەكتەسىپ سۇيەمەلدەۋ جوسپارىن“ ۇزدىكسىز 5 جىل اتقارىپ، تۇرمىستىق قامقورلىق جەتكىزۋ، وقۋىنا كومەكتەسۋ، عىلمي زەرتتەۋ جاتتىعۋى، تۇرمىس جوباسى، پسيحيكالىق تاربيە جاقتارىندا وقۋشىلارعا كومەكتەسىپ سۇيەمەلدەۋ جەتەكشىلىگىن جۇرگىزىپ، جىلىنا ورتا ەسەپپەن 400 مىڭ يۋاننان استام قارجىلاي كومەك بەرىپ، ءىس جۇزىندىك قيىنشىلىقتان 3000 نەشەسىن شەشتى. وسى جوسپار اتقارىلعاننان بەرى مەكتەپ سالتى كورنەكتى جاقسارىپ، وقۋشىلاردىڭ ەمتيحاننان ءوتۋ سالىستىرماسى، اسپيرانتۋراعا ەمتيحان تاپسىرۋ سالىستىرماسى، جۇمىستانۋ سالىستىرماسى سياقتىلار ورنىقتى قاداممەن جوعارىلادى. ”ساباقحانا ءىشى - سىرتىنداعى وقىتۋشىلار وتباسىندا قيىنشىلىعى بار وقۋشىلاردىڭ وقۋى، ەمدەلۋى، جۇمىستانۋى سياقتى ماسەلەلەرىن شەشۋىنە قۇلشىنا كومەكتەسىپ، ءار ۇلت وقۋشىلارىنىڭ پارتيا مەن ۇكىمەتتىڭ قامقورلىعى مەن مەيىرىمدىلىگىن شىنايى سەزىنۋىنە مۇمكىندىك جاساپ، دەسە دەگەندەي وقۋشىلاردىڭ تاماشا ۇستازىنا، تاتىمدى دوسىنا اينالدى“، - دەدى شينجياڭ داشۋەسى پارتكومى وقۋشىلار قىزمەتى ءبولىمىنىڭ قاتىستى جاۋاپتىسى.

  قازىرگە دەيىن رايونىمىزدا جالپى 383 مىڭ كادر، وقىتۋشى 11 مىڭ مەكتەپپەن بايلانىس ورناتىپ، 4 ميلليون 510 مىڭ ءار ۇلت وقۋشىلارىمەن جۇپ قۇراپ دوستاستى. قالىڭ كادرلار، وقىتۋشىلار جۇپ قۇراپ دوستاسقان وقۋشىلاردىڭ جانە ولاردىڭ وتباسىنىڭ قيىنشىلىقتارى مەن تالاپتارىن ىرىقتى تۇردە ۇعىسىپ، مۇمكىندىگىنشە كومەكتەسىپ، ءار ۇلت بۇقاراسىنىڭ القاۋىنا بولەندى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.