تيانشان تورى
تيانشان تورى   ›   جاڭالىقتار   ›   شينجياڭ حابارلارى

حوتاندىق جىگىت ايران قياق كۇرىشىنىڭ حوش ءيىسىن شار تاراپقا تاراتتى

□ انار بۇلت / شينجياڭ گازەتىنىڭ ءتىلشىسى جىڭ جو

  بۋى بۇرقىراعان قياق كۇرىشتى الىپ شىعىپ، اعاش قاسىقپەن ونى مىقتاپ باسىپ نىعىزداپ، ونان سوڭ ايراننىڭ بەتىن جاۋىپ قويعان اق كەزدەمەنى الىپ، قويۋ، اپپاق ايراندى قياق كۇرىشتىڭ بەتىنە جاعىپ، ودان كەيىن ءبىر قاسىق جەمىس توسابىن جاقسا، بار - جوعى ءبىر - ەكى مينۋتتا حوتان ەرەكشە ايران قياق كۇرىشى دايىندالىپ بولادى.

  مۇنداي جۇمىس ءتارتىبىن حوتاندىق جىگىت قايسار تۇرسۇنتوحتى ءار كۇنى 100 نەشە رەت قايتالاپ جاتادى. مەيماندار ايران قياق كۇرىشتى قولىنا الىپ، ويىپ ءبىر قاسىعىن اۋزىنا سالعاندا، جۇمساق تا جابىسقاق قياق كۇرىش، ءدامدى ايران مەن ءتاتتى جەمىس توسابىنىڭ ءدامى بىرىگىپ ءتىل ۇيىرەدى. تامسانا جەگەن قاريدارلارىن كورگەندە، قايسار ماقتانىشپەن: ”بۇكىل ەلدىڭ جەر - جەرىندەگى قاريدارلاردىڭ بارىنە حوتاننىڭ ەرەكشە ايران قياق كۇرىشىنىڭ ءدامىن تاتقىزۋ مەنىڭ ەڭ ۇلكەن ارمانىم“، - دەدى.

  حوتان قالاسىنان كەلگەن قايسار بيىل 26 جاستا، حوتاننىڭ كەشكى بازارىنداعى ايران قياق كۇرىش دۇكەنىنىڭ قوجايىنى. ۇكىمەتتىڭ كومەگىندە ول بەلسەندىلىكپەن شارۋاشىلىق قۇرىپ، حوتان ايران قياق كۇرىشى بولىمشە دۇكەنىن ءۇرىمجى، شي - ان، چيڭداۋ قاتارلى جەرلەردە اشىپ، حوتاننىڭ ءدامدى تاعامىن جالپىلاستىرۋمەن بىرگە، ءوز تۇرمىسىن دا شالقىتا ءتۇستى.

  قايسار بالا كەزىنەن ايران قياق كۇرىشىنە ەرەكشە ىقىلاس قويدى. باستاۋىش مەكتەپ وقىعان شاعىندا، مەكتەپ قاقپاسىنىڭ الدىندا كۇندە ارباسىن يتەرىپ ايعايلاپ ءجۇرىپ ايران قياق كۇرىش ساتاتىن اعاي بولۋشى ەدى، قايسار مەن كىشكەنتاي دوستارى ۇنەمى جيناعان تيىن - تەبەنىن جۇمساپ ودان ايران قياق كۇرىش ساتىپ الاتىن، قىشقىلتىم سول ءدام ونىڭ بالا كەزىندەگى ەڭ تاماشا ەستەمەسى ەدى.

  2014 - جىلى ورتا تەحنيكۋمنان وقۋ تاۋىسقان سوڭ، قايسار بىرنەشە جۇمىس تاپسا دا كوڭىلى كونشىمەدى. ءبىر جولى ول كورشىسى مامەت ابدوللا اعايدىڭ ايران قياق كۇرىش ساتىپ جۇرگەنىن كوزى شالادى. اعاي شەبەر بولعاندىقتان، قاريدارى كوپ، شاعىن دۇكەننەن ايىنا 4000 نەشە يۋان كىرىس تاباتىن، بۇنى كورگەن قايسار جايما جايىپ ايران قياق كۇرىش ساتۋ ويىنا كەلەدى.

  ”العاشىندا ۇيدە سىناق رەتىندە جاساپ، اكە - شەشەمە، كورشى - قولاڭدارىما جانە دوس - جاراندارىما ءدامىن تاتقىزىپ، ولاردىڭ پىكىرىن الدىم“، - دەدى قايسار، ۇزدىكسىز جەتىلدىرۋ ارقىلى ونىڭ شەبەرلىگى دە سوڭىندا كوپشىلىكتىڭ تۇراقتاندىرۋىنا يە بولدى.

  دۇكەندى قايدان اشقانىم ءجون؟ قايساردىڭ ويىنا الدىمەن حوتان كەشكى بازارى ءتۇستى. حوتان كەشكى بازارى ءتۇرلى ەرەكشە ءدامدى تاعامدارىمەن ءتورت توڭىرەكتەن كەلگەن ساياحاتشىلاردى باۋراپ، اتاعى اسپانداپ تۇرعان. قايسار ىشتەي ايران قياق كۇرىشتى وسىندا ساتسام، ءسوزسىز، ءوتىمدى بولادى دەپ ويلادى.

  2015 - جىلى قايسار حوتان كەشكى بازارىنداعى شاعىن دۇكەنىنىڭ ساۋداسىن باستادى. ونىڭ دۇكەنىنىڭ ايران قياق كۇرىشى جوعارى سورتتى دۇڭبەي جابىسقاق كۇرىشى، حوتان شىلانى، وعان قوسا ءوزى ۇيىتقان ايران، بال جانە ءتۇرلى جەمىس - جيدەك توسابى، قانت سۇيىعىنان جاسالعان، بۇعان قوسا جىگىتتىڭ ءوزى اق جارقىن، مەيماندوس بولعاندىقتان، تەز ارادا قاريدارى مولايىپ، ءار ايداعى كىرىسى 5000 يۋاننان استى.

  كىرىسى ورنىقتى بولعان سوڭ، قايسار ماحابباتىن دا تاپتى. سول كەزدە دۇكەنگە كەلىپ ايران قياق كۇرىش جەيتىن ءبىر بويجەتكەن ءوزى جەگەن ەڭ ءدامدى قياق كۇرىش ەكەندىگىن ايتىپ ماقتاپ جۇرەتىن. بىرتىندەپ ەكەۋى تانىسىپ ماحابباتتاستى ءارى 2018 - جىلى ۇيلەندى.

  ماحابباتتان جولى بولعان قايساردىڭ شارۋاشىلىعى شالقي ءتۇستى. جاقىنعى بىرنەشە جىلدا بۇكىل ەلدىڭ جەر - جەرىنەن حوتانعا ساياحاتتاي كەلگەندەر بارعان سايىن كوبەيدى، سىرتتان كەلگەن ساياحاتشىلار ايران قياق كۇرىشتى جەگەن سوڭ اۋىز جاپپاي القاپ، ونى باسقا قالاعا بارىپ بولىمشە دۇكەن اشۋعا شابىتتاندىردى.

  ۇيىندەگىلەرمەن اقىلداسقاننان كەيىن، بيىل 5 - ايدا قايسار مەن سەرىكتەسۋشىسى ۇرىمجىدەن ايران قياق كۇرىش دۇكەنىن اشتى، ساۋداسى كۇسەت بولىپ، ءبىر ايدا 10 مىڭ يۋاننان استام اقشا تاپتى. ىلە - شالا، ول تاعى شاۋەشەك، بۇراتالا، التاي، شي - ان، چيڭداۋ سياقتى قالالاردان ىركەس - تىركەس ايران قياق كۇرىش ۇلاسپالى دۇكەندەرىن اشتى.

  قازىر قايساردىڭ ايران قياق كۇرىش ساتاتىن 7 دۇكەنىنىڭ دە ساۋداسى كۇسەت، ول تاعى ۇرىمجىدەن ءۇي ساتىپ الدى. بۇدان بىلاي قايسار بۇكىل ەلدىڭ جەر - جەرىنەن اناعۇرلىم كوپ ۇلاسپالى دۇكەن اشىپ، حوتان ايران قياق كۇرىشى سياقتى حوتاننىڭ ءتۇرلى ەرەكشە تاعامدارىن جالپىلاستىرىپ، اناعۇرلىم كوپ ادامنىڭ ناعىز حوتان ءدامىن تاتۋىنا مۇمكىندىك جاساۋدى جوسپارلاپ وتىر.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.