تيانشان تورى   ›   جاڭالىقتار   ›   شينجياڭ حابارلارى

قىزمەت ورىندارىنان تاپجىلماي، مەرەيلى مەرەكەنى تويلادى

□ انار بۇلت / شينجياڭ گازەتىنىڭ تىلشىلەرى سۇن فاڭتيڭ، ما بەي، سۋ رۇڭجى، ەرىكتى تىلشىلەر لي كاڭچياڭ، شان ۋىنبيڭ

  مەرەيلى جۇڭچيۋ مەرەكەسى، بارشا وتباسىندا جاقىندار باس قوسىپ قاۋىشاتىن ءسات. ادامداردىڭ جانۇياعا دەگەن ەڭ ىستىق ساعىنىشىن ارقالاعان وسى كۇنى تيانشان الابىندا، قالا مەن اۋىل - قىستاقتا باس قوسىپ قاۋىشۋدىڭ سان ساناقسىز اڭگىمەلەرى شەرتىلىپ، باقىتتىڭ جىلى شۋاعى ەسىپ جاتادى. وزگە سان مىڭ وتباسىنىڭ جاقىندارىمەن قاۋىشۋى ءۇشىن قىزمەت ورىندارىنان تاپجىلماعان سول ءبىر ادامدار باس قوسۋعا ەڭ ىقىلاستى تۇسىنىكتەرىن ءوز ساعىنىشتارىمەن جازدى.

  ”وتاعاسى: بۇل جازۋلاردان ءوزىمدى كورگەندەي بول! قازىر وزعان ءداۋىر، وزىق زامان بولسا دا، مەن ساعان دەگەن ساعىنىشىمدى حات جازۋ تاسىلىمەن جەتكىزسەم دەيمىن، مەيلى مەنەن قانشاما قاشىقتا بولساڭ دا، ايرىلعانىمىزعا قانشاما ۇزاق بولسا دا، ۇيدە سەنى كۇتىپ ءبىر شام قاشاندا جانىپ تۇرادى...“.

  ايەلى ما تيڭنەن كەلگەن حاتتى كورگەندە تەڭىز دەڭگەيىنەن 5200 مەتر بيىك قارلى ۇستىرتتە تۇرىپ جاتتىعىپ جاتقان شينجياڭ اسكەري رايونى بەلگىلى لۇيىنىڭ جەتەكشىسى جاڭ جىن كوڭىل تۇكپىرىندەگى ساعىنىشتىڭ تولقىنىن استە باسا الماي، كوز جاسىنا ىرىق بەردى.

  جاڭ جىن ۇستىرتتە تۇرىپ جاتتىعۋ مىندەتىنە اتتانعان كەزدە بالاسى جارتى جاسقا دا تولماعان ەدى، مىنە ەندى بالاسى 2 جاسقا تاياپ قالعان. بالانىڭ نازارىندا اكەسىنىڭ ءتۇر - ءتۇسى تەك قول تەلەفوننىڭ بەتىندەگى اكە سۋرەتىنەن ارىعا بارمايدى.

  ”ۇيدەگىلەرگە وتە كوپ بورىشتىمىن، ولاردى قاتتى ساعىنامىن، ءبىراق ۇستىمدەگى مىنا اسكەري كيىم ءبىزدى، ءسوز جوق، شاعىن وتباسىن قويا تۇرىپ، كوپتىڭ قامىن ويلاۋىمىزدى بەلگىلەگەن“، - دەيدى جاڭ جىن، - ايەلىم ءبىزدىڭ جىلى شۋاقتى شاعىن وتباسىمىزدىڭ ءتۇتىنىن ءتۇزۋ ۇشىرىپ، مەنىڭ ەڭ مىعىم ارتقى تىرەگىم بولىپ وتىر، مەن دە كىرشىكسىز ادالدىقپەن وتانىمىزدىڭ جەر - سۋىن ويداعىداي كۇزەتەمىن.

  ”اكە، مىناۋ شەشەم جاساعان اي كۇلشە!“، 9 - ايدىڭ 19 - كۇنى تۇستە كەزەكشىلىك جۇمىستان قايتقان حالىق ساقشىسى لي شينپىڭ ايەلىمەن، 2 بالاسىمەن قاۋىشتى. ولار ءبىر ايدان استام ۋاقىت جۇزدەسپەگەن ەدى، ۇلكەن ۇلى لي حايفىڭ اكەسىنىڭ قولىنا جالما - جان ءبىر ايكۇلشە ۇستاتا قويدى.

  سول كۇنى جۇڭچيۋ مەرەكەسى دەمالىسىنىڭ العاشقى كۇنى ەدى، ساقشىنىڭ ايەلى جيڭ ياتيڭ 2 بالاسىن جەتەلەپ، كوكتوعاي قۋ ەرتىس قالاشىعىنان كوكتوعاي قالاشىعىنا كەلىپ، مەرەكە كەزىندە دە كورىنىس اۋماعىنىڭ ساقشى ىستەرى پۋنكتىندەگى جۇمىس ورنىنان تاپجىلماعان كۇيەۋى لي شينپىڭدى ارنايى ىزدەپ كەلدى. بۇل لي شينپىڭنىڭ ۇدايى 13 - جىل بويى جۇڭچيۋ مەرەكەسىن ۇيىندە وتكىزە الماۋى ەدى.

  بيىل 31 جاستاعى لي شينپىڭ 2007 - جىلى 12 - ايدا قوسىنعا كىرگەن، وسىنىڭ الدىندا حاينان قوعام حاۋىپسىزدىگى شەكارا قورعانىس باس پۋنكتىندە اسكەرلىك مىندەتىن وتەپ، 2018 - جىلدىڭ سوڭىندا اسكەري ءبولىم رەفورما جاساپ، قاراستىلىق وزگەرتكەن كەزدە، ول مەملەكەتتىك قىزمەتكەر ەمتيحانىنان ءوتىپ، شينجياڭ شەكارادان كىرۋ - شىعۋ شەكارا قورعانىسى تەكسەرۋ باس پۋنكتىنە قابىلدانعان بولاتىن، قازىر شينجياڭ التاي شەكارا باسقارۋ تارماق اترەتى تۇرعىن شەكارالىق ساقشى بولىمشەسىنە حالىق ساقشىسى بولىپ اۋىسقان. سول جىلى ايەلى جيڭ ياتيڭ كۇيەۋىنىڭ قىزمەتىن قولداۋ ءۇشىن، حاينانداعى قىزمەتىن تاستاپ، 2 بالاسىن جەتەلەپ، وعان ىلەسىپ شينجياڭعا كەلگەن - دى.

  ”بۇگىن عانا جاسالعان ايكۇلشە بازاردان ساتىپ العانداعىداي ادەمى، ءدامدى بولماسا دا، ءبىزدىڭ اۋىلىمىزدىڭ ءدامى - عوي، بارلىعىڭىز تاتىپ كورىڭىزدەر!“، - دەدى جيڭ ياتيڭ كوپشىلىككە ايكۇلشە ۇلەستىرىپ جاتىپ.

  ”مەرەكە - مەيرام بولعان سايىن، كورىنىس اۋماعىنا كەلەتىن ساياحاتشىلار جايشىلىقتاعىدان كوبەيەدى، ءبىز ءۇي ىشىمىزبەن قاۋىشىپ، باس قوسا الماعانىمىزبەن، وسىندا كەلگەن ءاربىر ساياحاتشىنىڭ امان - ەسەن، قۋانىشتى بەينەدە قايتىپ جاتقانىن كورىپ، قانشاما ارىپ - شارشاساق تا تاتيدى دەپ بىلەمىز!“، − دەدى لي شينپىڭ.

  ”قاۋىشقان ساتىمىزدەن بىرگە بولماعان كەزىمىز كوپ بولعانىمەن، مەن ونىڭ ارتقى شەبىن جاقسى كۇزەتىپ، ونىڭ الدىڭعى شەپتە شەكارا لەنياسىن الاڭسىز كۇزەتۋىنە مۇمكىندىك جاساۋىم كەرەك!“، − دەدى جيڭ ياتيڭ. الداعى جول ءالى ۇزاق، ول اۋەلگىدەي كۇيەۋىنىڭ مىعىم ارتقى تىرەگى بولا بەرمەك، ويتكەنى كۇيەۋى تۇرعان جەر ولاردىڭ وتباسى!

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.