تيانجوۋ 3 - ءنومىرلى جۇك تاسىمال الەم كەمەسىن ۇشىرۋ مىندەتى ءساتتى ورىندالدى

　　9 - ايدىڭ 20 - كۇنى تۇستەن كەيىن، تيانجوۋ 3 - ءنومىرلى جۇك تاسىمال الەم كەمەسىن ۇشىرۋ مىندەتى ءساتتى ورىندالدى.　□ سۋرەتتى شينحۋا اگەنتتىگىنىڭ ءتىلشىسى پۋ شياۋشۇي تۇسىرگەن

　　شينحۋا اگەنتتىگىنىڭ 9 - ايدىڭ 20 - كۇنى حايناننىڭ ۋىنچاڭىنان بەرگەن حابارى (تىلشىلەر لي گولي، لي يۇن، حۋاڭ يچىن). 9 - ايدىڭ 20 - كۇنى تۇستەن كەيىن تيانجوۋ 3 - ءنومىرلى جۇك تاسىمال الەم كەمەسىن ۇشىرۋ مىندەتى ءساتتى ورىندالدى.

　　سول كۇنى ساعات 15تەن 10 مينۋت وتكەندە تيانجوۋ 3 - ءنومىرلى جۇك تاسىمال الەم كەمەسىن تيەگەن چاڭجىڭ 7 - ءنومىرلى ياۋ 4 - تاسىمال زىمىرانى ەلىمىزدىڭ ۋىنچاڭ عارىش ايلاعىندا وت الدىرىلىپ، ۇشىرىلدى، شامامەن 597 سەكۋندتان كەيىن الەم كەمەسى زىمىراننان ءساتتى اجىراپ، بەلگىلەنگەن وربيتاعا ەندى، ساعات 15تەن 22 مينۋت وتكەندە الەم كەمەسىنىڭ كۇن ەنەرگيا تاقتاسى ءساتتى جايىلىپ، قالىپتى قىزمەت ىستەۋگە ءوتتى، ءسويتىپ، ۇشىرۋ ءساتتى ورىندالدى.

　　جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنا قاراعاندا، ەندىگى جەردە تيانجوۋ 3 - ءنومىرلى جۇك تاسىمال الەم كەمەسى وربيتادا جۇرگەن كەڭىستىك بەكەتىنىڭ قۇراما تۇلعاسىمەن تۇيىلىسەدى ەكەن.

　　بۇل ەلىمىزدىڭ عارىشقا ادام الىپ ۇشۋ ينجەنەرياسىنىڭ 20 - رەتكى ۇشىرۋ مىندەتى ءارى چاڭجىڭ تاسىمال زىمىراندارىنىڭ 389 - رەتكى ۇشىرىلۋى.