تيانشان تورى   ›   جاڭالىقتار   ›   سپورت الەمى

”كىشكەنە بەك“ بوكستان اعا جۇلدەگەر بولدى، شينجياڭ قۇراماسى تاعى ءبىر التىن مەدال الدى

  انار بۇلت / شينجياڭ گازەتىنىڭ ءتىلشىسى دۇڭ لياڭ 9 - ايدىڭ 21 - كۇنى شي - اننان حابارلايدى. جۇڭچيۋ مەرەكەسىندە شينجياڭ التىن مەدال الدى. 9 - ايدىڭ 21 - كۇنى مەملەكەتتىك 14 - كەزەكتى سپورت جارىسىنىڭ بوكس ءتۇرى اياقتادى، شينجياڭدىق ساڭلاق توقتاربەك تاڭاتقان 0گە قارسى 5 ۇپايمەن بەيجيڭدىك ساڭلاق ۇلپار قارقىندى جەڭىپ، ەرلەردىڭ 75 كيلوگرامدىق دارەجەسىنىڭ اعا جۇلدەگەرلىگىن جەڭىپ الىپ، شينجياڭ قۇراماسىنا تاعى ءبىر التىن مەدال الىپ بەردى.

  ۇلپار رايونىمىزدان سىرتقا اۋىسقان ەلىمىز ىشىندەگى بوكس سالاسىنىڭ ايتۋلى ساڭلاعى، مەملەكەتتىك جارىستاردىڭ تالاي مارتە اعا جۇلدەگەرى بولعان. 2020 - جىلدىڭ سوڭىندا وتكىزىلگەن مەملەكەتتىك اعا جۇلدەگەرلىككە تالاسۋ جارىسىندا قۇراماداعى دوستارى ”كىشكەنە بەك“ اتاپ كەتكەن توقتاربەك ونىمەن شەرىك شەشۋشى جارىستا قولعاپ ءتۇيىستىرىپ، 0گە قارسى 3 ۇپايمەن قارسىلاسىن جەڭىپ كەلەسى اينالىمعا جولداما العان بولاتىن. وسى كەزەكتى مەملەكەتتىك سپورت جارىسىنىڭ دايىندىق جارىسىندا ”كىشكەنە بەك“ توكيو وليمپياداسىنا تاڭدالعانى ءۇشىن مەملەكەتتىك سپورت جارىسىنا قاتىناسۋ تولىمدىلىعىنا تابيعي تۇردە يە بولدى؛ ۇلپار دايىندىق جارىستىڭ اعا جۇلدەگەرلىگىن جەڭىپ الىپ، مەملەكەتتىك 14 - كەزەكتى سپورت جارىسىنىڭ شەشۋشى جارىس ساتىسىندا وسى دارەجەدەگى 1 - ءنومىرلى ساڭلاققا اينالعان.

  بۇل شەشۋشى جارىس وسى كەزەكتى مەملەكەتتىك سپورت جارىسى بوكس ءتۇرىنىڭ سىرگە جيار باسەكەسى بولدى، سوندىقتان جارىس مايدانىنداعى بارلىق كورەرمەندەر مەن جارىسقا قاتىناسقان ۋاكىلدەر ۇيىرمەسىندەگىلەردىڭ جاپپاي نازارىن اۋداردى.

  ۇلپار العاشقى كەزدەسۋدە ىرىقتىلىقپەن شابۋىل جاسادى، ”كىشكەنە بەك“ بەرىك قورعانىس جاساۋ ارقىلى وعان مۇلدە ەرىك بەرمەدى. قارسىلاسىنىڭ بىرنەشە رەتكى شابۋىلىن قايتارعاننان كەيىن ”كىشكەنە بەك“ بويىنىڭ بيىك، بىلەگىنىڭ ۇزىن بولۋ ارتىقشىلىعىنان پايدالانىپ، ىركەس - تىركەس قورعانىس جاساعاننان كەيىن قارسىلاسىنا كۇشتى قايتارما سوققى بەرىپ، مايداندا ىرىقتىلىققا ءوتتى.

  كەلەسى كەزدەسۋدە ”كىشكەنە بەك“ ەندىگارى اۋەلگى قالپىن ساقتاماي، تەز ريتىممەن، جوعارى جيىلىكپەن جۇدىرىق سىلتەپ قارسىلاسىنا تىنباي شابۋىل جاسادى. الدىڭعى مايدان جارتىلاي شەشۋشى جارىستىڭ ەڭ سوڭعى ساتىندە ”كىشكەنە بەكتىڭ“ سول قاباعى جارىلىپ كەتكەن بولاتىن. وسى رەتكى جارىس بارىسىندا جاراقاتىنىڭ اۋزى تاعى دا اشىلىپ كەتتى، ءبىراق بۇل ”كىشكەنە بەكتىڭ“ بابى مەن ريتىمىنە ەشقانداي ىقپال ەتە المادى. ”كىشكەنە بەكتىڭ“ سۇراپىل سوققىسى الدىندا، ۇلپاردىڭ جاسقانىپ قالعانى بايقالىپ، مايداندا سايىسا ءجۇرىپ شەگىنىس جاسادى.

  ءۇشىنشى كەزدەسۋدەن كەيىن جارىس اياقتادى، ”كىشكەنە بەك“ 0گە قارسى 5 ۇپايلىق مۇلدەم باسىمدىقپەن جەڭىسكە جەتىپ، اعا جۇلدەگەر بولدى.

  سيلىق بەرۋ سالتىندا ”كىشكەنە بەك“ قولىنداعى التىن مەدالدى كوتەرىپ، سۇيىنە يىسكەپ قويدى، بۇل ونىڭ مەملەكەتتىك سپورت جارىسىندا العان تۇڭعىش التىن مەدالى. الدىڭعى كەزەكتى مەملەكەتتىك سپورت جارىسىندا 21 جاستاعى ”كىشكەنە بەك“ جاڭا تۋعان بۇزاۋ جولبارىستان قورىقپايدى دەيتىن كۇش - جىگەرمەن ارىنداعان بەتى شەشۋشى جارىسقا كىرىپ، ەڭ سوڭىندا حۋبەيلىق ايگىلى ساڭلاق ۋىن يىنحاڭنان جەڭىلىپ، ەكىنشى جۇلدەگەر بولعان ەدى.

  ”الدىڭعى كەزەكتى مەملەكەتتىك سپورت جارىسىنان كەيىن، توقتاربەك جۇڭگو بوكس قۇراماسىنا قابىلدانىپ، حالىقارالىق ۇلكەن جارىستاردىڭ تاجىريبەلەرىن مولىنان جيناقتادى. توكيو وليمپياداسىندا ەكى بىردەي جوعارى ورەلى ساڭلاقپەن ايقاسىپ، ءوزىنىڭ بوكس سپورتى جونىندەگى تانىمىن اناعۇرلىم جوعارلاتتى ءارى سەنىمىن كۇشەيتتى. ءدال وسىنداي تاجىريبە مەن سەنىمگە يە بولعاندىقتان وسى رەتكى مەملەكەتتىك سپورت جارىسىنداعى 4 مايدان باسەكەنىڭ بارلىعىندا مۇلدەم باسىمدىقپەن جەڭىسكە جەتىپ، ەڭ سوڭىندا اعا جۇلدەگەر بولدى“، - دەدى اۆتونوميالى رايوندىق دەنە تاربيە مەكەمەسى بوكس سپورتىن باسقارۋ ورتالىعىنىڭ مەڭگەرۋشىسى، شينجياڭ بوكس قۇراماسىنىڭ باس باپكەرى ابدۇشۇكىر ميجيت.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.