14 ايماق، وبلىس، قالا، 40تان استام مادەنيەت - ساياحات كاسىپورنى كورمەگە قاتىناستى
انار بۇلت / شينجياڭ گازەتىنىڭ ءتىلشىسى ۋاڭ جيڭجيڭ 9 - ايدىڭ 23 - كۇنى شىنجىننان حابارلايدى. 9 - ايدىڭ 23 - كۇنى 17 - كەزەكتى جۇڭگو (شىنجىن) حالىقارالىق مادەنيەت شارۋاشىلىعى كورمە - ساۋدا جينالىسى اشىلدى، ءساندى شينجياڭ زالى قالىڭ مەيمانداردى وزىنە باۋرادى.
شىنجىن مادەنيەت شارۋاشىلىعى كورمە - ساۋدا جينالىسى مەملەكەت دارەجەلى حالىقارالىق، امبەباپ مادەنيەت شارۋاشىلىعى كورمە - ساۋدا جينالىسى بولىپ، شينجياڭ ءۇرتىس 14 جىل بويى ۇيىرمە ۇيىمداستىرىپ كورمەگە قاتىناسىپ كەلدى.
سول كۇنى ساعات 11دە قىزۋ سۇيىسپەنشىلىككە تولى شينجياڭ ءان - بيىنە ىلەسە، 10 - ءنومىرلى نەگىزگى كورمە سارايى − مادەنيەت شارۋاشىلىعى امبەباپ سارايىنىڭ ىشىندەگى شينجياڭ زالى رەسمي اشىلدى. تۇتاس كورمە زالى ”اناردى“ جاسامپازدىق جوباسى ەتكەن، توبەسىنەن قاراعاندا تورسيعان انارعا ۇقسايدى، بۇيىرىنەن قاراعاندا جىبەك جولىنىڭ ۇزاق تاريحىن استارلاپ كورسەتكەندەي، رەڭدەرى قىزىل، سارى، اق ءتۇستى نەگىز ەتىپ، قىزۋ ارىندى ايگىلەۋمەن بىرگە، تىڭ زامانا تىنىسىن دا بايقاتادى.
بيىل شينجياڭ كورمەگە قاتىناسۋ كولەمى جاعىندا سەرپىلىس جاساپ، جەر اۋدانى بۇرىنعى 240 شارشى مەتردەن 600 شارشى مەترگە كەڭەيتىلدى، شينجياڭ زالى مەن ءۇرىمجى زالى بىرلەسىپ كورمە اشىپ، اۆتونوميالى رايوننىڭ مادەنيەت جانە ساياحات كاسىپ سالاسىنىڭ دامۋ جەتىستىكتەرى مەن زاماناۋي ءسان ۇلگىسى ارقىلى ورتالىق قالانىڭ مادەنيەت - ساياحات وبرازىن كورنەكتىلەندىرىپ، ”شينجياڭ جاقسى جەر“ تانىمال ماركا وبرازىن جالپى بەتتىك كۇشەيتتى.
شينجياڭ كورمە زالى نەگىزىنەن امبەباپ جەتىستىكتەر كورمە رايونىنا، مادەنيەت - ساياحات توعىسپالى كورمە رايونىنا، جىبەك جولىنداعى اسىلدار كورمە رايونىنا، مادەنيەت، عىلىم - تەحنيكا كورمە رايونىنا، مادەنيەت - ساياحات تۇتىنۋ كورمە رايونىنا ءبولىنىپ، شينجياڭداعى 14 ايماق، وبلىس، قالا جانە 40تان استام مادەنيەت - ساياحات كاسىپورنى كورمەگە قاتىناستى.
”مەن شىنجىن مادەنيەت شارۋاشىلىعى كورمە - ساۋدا جينالىسىنا 5 - رەت قاتىناسىپ وتىرمىن، ءبىز ’شينجياڭ ساياحات سومكەسىن‘ نەگىزگى تاقىرىپ ەتكەن جەلىلەس مادەنيەت جاسامپازدىعى ونىمدەرىن الا كەلدىك“. شينجياڭ داشۋەسى شينجياڭ مادەنيەتىنىڭ دامۋىن زەرتتەۋ ورتالىعىنداعى ۋاڭ مين پروفەسسور ءوزى مەن اسپيرانتتارىنىڭ شينجياڭنىڭ كوپتەگەن جەرىندەگى بەيزاتتىق مادەنيەت مۇرالارىن جالعاستىرۋشىلار جاساعان سومكەلەردى مادەنيەت شارۋاشىلىعى كورمە - ساۋدا جينالىسىنا اكەلگەندىگىن ايتىپ: ”وتكەن بىرنەشە كەزەكتى مادەنيەت شارۋاشىلىعى كورمە - ساۋدا جينالىسىندا ءبىز بەيزاتتىق مادەنيەت مۇرالارىن جالعاستىرۋشىلارعا تاپسىرىس الىپ قايتىپ، ەگىنشى - مالشىلاردىڭ كىرىستەرىن ارتتىرۋىنا كومەكتەستىك. بيىل ءبىز ءىشىنارا حالىقارالىق ماركالارمەن سەلبەستىك جاساسۋدان ۇمىتتەنىپ وتىرمىز، شينجياڭنىڭ بەيزاتتىق مادەنيەت مۇرالارى جاسامپازدىق ونىمدەرىن ءتىپتى دە ۇلكەن ساحنالارعا شىعارساق دەيمىز“، - دەدى. مادەنيەت جاسامپازدىعى ونىمدەرىنەن، كەستە قولونەر بۇيىمدارىنان جانە شينجياڭنىڭ اۋىل شارۋاشىلىق ەرەكشە ونىمدەرىنەن سىرت، شينجياڭ كورمە زالى تاعى حى جياۋلۇڭ قاتارلى ينتەرنەت جۇلدىزدارىن تىكە تاراتىلىمدا زات تانىستىرۋعا ۇسىنىس ەتىپ، ءتىپتى دە كوپ توراپتاستاردى شينجياڭنىڭ مادەنيەت - ساياحات بايلىعىن تۇسىنۋگە مۇمكىندىك جاسادى.
اۆتونوميالى رايوندىق مادەنيەت جانە ساياحات مەڭگەرمەسى پارتيا باسشىلىق گرۋپپاسىنىڭ شۋجيى، ورىنباسار مەڭگەرمە باستىعى حۋ حانمين بىلاي دەدى: بيىل شينجياڭ كورمە زالى توقىماشىلىق، كيىم - كەشەك، نان، ءجۇزىم اراعى، ساياحات سياقتى مادەنيەتپەن ىشكەرىلەي توعىسقان جاڭا ونىمدەردى، جاڭا كاسىپ كۇيىن تولىق كورمەگە قويىپ، بۇرىنعى ”كورمەگە قويۋ + ساتۋ“ ۇلگىسىندە جاڭالىق اشىپ، بەرىلە تاماشالاۋ رايى، سيفرلانعان سەزىنۋ، ەلەكتروندى ساۋدا تۇعىرىندا تانىستىرۋ، ينتەرنەت جۇلدىزدارى تىكە تاراتۋ سياقتى تاسىلدەردەن پايدالانىپ، ەكسكۋرسيالاۋشىلارعا ”كورۋگە، ەستۋگە، ءدامىن تاتۋعا بولاتىن، ىقپالداساتىن“ سان قىرلى شينجياڭدى كورسەتىپ، شينجياڭنىڭ مادەنيەت ىستەرىنىڭ، مادەنيەت كاسىپ سالاسىنىڭ جانە ساياحات ىستەرىنىڭ جوعارى ساپالى دامىعان تاماشا جاعدايىن جالپى بەتتىك ايگىلەدى.
