انار بۇلت / شينجياڭ گازەتىنىڭ ءتىلشىسى ليۋ مىڭمىڭ 9 - ايدىڭ 23 - كۇنى ۇرىمجىدەن حابارلايدى. ءتىلشىنىڭ اۆتونوميالى رايوندىق مادەنيەت جانە ساياحات مەڭگەرمەسىنىڭ مۇراجاي جانە توڭكەرىستىك مادەني ەسكەرتكىشتەر قىزمەتى باسقارماسىنان ۇعىسۋىنشا، 9 - ايدىڭ 22 - كۇنى شينجياڭ 2 - توپتاعى توڭكەرىستىك مادەني ەسكەرتكىشتەر ءتىزىمىن جاريالاعان، مۇندا جىلجىمايتىن توڭكەرىستىك مادەني ەسكەرتكىشتەردەن 31 ورىن جانە جىلجىمالى توڭكەرىستىك مادەني ەسكەرتكىشتەرىنەن 253ى قامتىلعان.
سونىمەن شينجياڭ جالپى 2 توپتاعى توڭكەرىستىك مادەني ەسكەرتكىشتەر ءتىزىمىن جاريالادى، مۇندا جالپى جىلجىمايتىن توڭكەرىستىك مادەني ەسكەرتكىشتەردەن 59 ورىن جانە جىلجىمالى توڭكەرىستىك مادەني ەسكەرتكىشتەردەن 336سى بار.
2 - توپتاعى توڭكەرىستىك مادەني ەسكەرتكىشتەر تىزىمىندەگى جىلجىمايتىن توڭكەرىستىك مادەني ەسكەرتكىشتەر مىنالاردى قامتيدى: شينجياڭ حالىق تەاترحاناسى، شينجياڭ ولكەلىك بانكەسىنىڭ بايىرعى ورنى، 1 - قىزدار شىفان مەكتەبىنىڭ بايىرعى ورنى، الاتاۋ ساعاسى وتكەلى شەكارا قورعانىس 1 - ليانىنىڭ بايىرعى ورنى، كۇڭ فانسىن ەسكەرتكىشى، ۇلانباي سۋ ەلەكتر ستانسياسى، دىڭتا مال فەرماسى زيالى جاستار ءتۇيىنىنىڭ بايىرعى ورنى سياقتىلار. مۇنىڭ ىشىندە مەملەكەتتىك ءتۇيىندى مادەني ەسكەرتكىشتەردى قورعاۋ ورنىنان ءبىر ورىن، اۆتونوميالى رايون دارەجەلى مادەني ەسكەرتكىشتەردى قورعاۋ ورنىنان 15 ورىن، قالا (اۋدان) دارەجەلى مادەني ەسكەرتكىشتەردى قورعاۋ ورنىنان 14 ورىن بار. جىلجىمالى مادەني ەسكەرتكىشتەر مىنالاردى قامتيدى: اۆتونوميالى رايوندىق مۇراجايدا ساقتالعان 1 - دارەجەلى مادەني ەسكەرتكىش ۋاڭ جىن جياڭجۇننىڭ شينجياڭعا كىرگەندە وتىرعان جيپ اۆتوكولىگى، يمپەرياليزمگە قارسى تۇرۋ قوعامىنىڭ قىزمەت جوسپارى، جەر - قورا - جاي يەلىگى كىناشقاسى، شينجياڭ حالىق ۇكىمەتىنىڭ حابارلاندىرۋى؛ قارامايلى قالالىق مادەني ەسكەرتكىش جانە مۇراجاي مەكەمەسىندە ساقتالعان 1 - دارەجەلى مادەني ەسكەرتكىش جاڭكاي گەولوگيا تەكسەرۋ ەستەلىگى، بەي - ۋ 40 تۇرپاتتى بۇرعىلاۋ ماشيناسى سياقتىلار.
