تيانشان تورى   ›   جاڭالىقتار   ›   سپورت الەمى

شينجياڭدىق 19 جاسار ”توسىن جەڭىمپاز“ جانبوتا كۇرەستەن كۇمىس مەدال الدى

  انار بۇلت / شينجياڭ گازەتىنىڭ ءتىلشىسى دۇڭ لياڭ 9 - ايدىڭ 23 - كۇنى يان - اننان حابارلايدى. 9 - ايدىڭ 23 - كۇنى 14 - كەزەكتى مەملەكەتتىك سپورت جارىسى كۇرەس ءتۇرىنىڭ ەرلەر ەركىن كۇرەسىنىڭ 74 كيلوگرامدىق سالماق دارەجەسىندەگى جارىستا شينجياڭدىق 19 جاسار جاس ساڭلاق جانبوتا جەكەن وتكەلدەردەن سۇرىنبەي ءوتىپ شەشۋشى جارىسقا كىرىپ، كۇمىس مەدال الدى.

  سول كۇنى كۇرەس ءتۇرى جارىسى يان - ان دەنە تاربيە ورتالىعىنىڭ سپورت سارايىندا شىمىلدىعىن اشىپ، ەرلەر ەركىن كۇرەسىنىڭ 4 دارەجەدەگى قيان - كەسكى سايىسى وتكىزىلدى. مۇنىڭ ىشىندە شينجياڭ كۇرەس قۇراماسى جىبەرگەن 5 ادام 3 دارەجەدەگى جارىستا مايدانعا شىقتى.

  بۋرىلتوعاي اۋدانىندا تۋعان جانبوتا نەبارى 19 جاستا، بيىل ەندى عانا ەرەسەكتەر گرۋپپاسىنداعى جارىسقا كىرىپ، ءساتى ءتۇسىپ مەملەكەتتىك سپورت جارىسىنا قاتىناسۋ تولىمدىلىعىنا يە بولعان.

  ونىڭ العاش بەلدەسكەنى 2018 - جىلعى مەملەكەتتىك اعا جۇلدەگەر، ىشكى موڭعۇل ساڭلاعى ءولزابايىر بولدى. الدىڭعى جارتى مايداندا 0:1 ۇپايمەن ارتتا قالعانىمەن، جانبوتا سوڭعى جارتى مايداندا ءۇرتىس 12 ءنومىر الىپ، 1گە قارسى 12 ۇپايمەن قارسىلاسىن جەڭىپ، كەلەسى اينالىمعا جولداما الدى.

  وسىدان كەيىن جانبوتا ىلگەرىندى - كەيىندى گۋاڭشي قۇراماسىنداعى لي يدى، چۇڭچيڭ قۇراماسىنداعى شيا شىڭسۇڭدى جانە الاڭ يەسى شانشيدىڭ ساڭلاعى الدىرت سياقتى ساڭلاقتاردى دومالاتىپ، شەشۋشى جارىسقا ەكپىنمەن كىردى.

  شەشۋشى جارىستا جۇڭگو قۇراماسى اتىنان ريودە جانە يرو وليمپياداسىنا قاتىناسقان ىشكى موڭعۇل ساڭلاعى موڭكىساعانمەن كۇرەسكەندە جانبوتا باتىلدىقپەن ارپالىستى. الدىڭعى جارتى مايداندا ەكى جاق ءبىرىن - ءبىرى جەڭە الماي، 0:0 ۇپايمەن تەڭەستى. سوڭعى جارتى مايدان 2 مينۋت 22 سەكۋند وتكەندە، موڭكىساعان قۇشاقتاپ لاقتىرماق بولعاندا جانبوتا ونى ىڭعايىنا قاراي الىپ ۇرىپ، دومالاتىپ جىبەرىپ، 2:0 ۇپايمەن الدىعا شىقتى. الايدا تاجىريبەسى مول موڭكىساعان ۇزدىكسىز ءنومىر الدى ءارى ەڭ سوڭعى 20 سەكۋندتا ۇپايىن اسىرىپ ۇلگەردى.

  ”جانبوتانىڭ ۇلكەن جارىستان تاجىريبەسى جوق، سولاي بولا تۇرا بۇگىنگى جارىس الاڭىنداعى ’توسىن جەڭىمپاز‘ ەكەندىگىندە داۋ جوق“، - دەدى اۆتونوميالى رايوندىق دەنە تاربيە مەكەمەسى كۇرەس، رۋداۋ سپورتىن باسقارۋ ورتالىعى پارتكومىنىڭ شۋجيى ادىل بارات.

  مۇنان تىس، سول كۇنى شينجياڭ كۇرەس قۇراماسىنداعى بەگزات نۇرلاش ەرلەر ەركىن كۇرەسىنىڭ 65 كيلوگرامدىق سالماق دارەجەسىندەگى جارىسقا قاتىناسىپ، الدىڭعى 8 ورىنعا كىرە الماي قالدى. اباي جۇمابەك، ارعىن جۇماباي جانە ابدۋاقاپ كۇمىسجان قاتارلى 3 ساڭلاق ەرلەر ەركىن كۇرەسىنىڭ 86 كيلوگرامدىق سالماق دارەجەسىندەگى جارىسىندا يىق تىرەسە مايدانعا شىقتى. ابدۋاقاپ قايتالاي وتكىزىلگەن جارىس ارقىلى كەلەسى اينالىمداعى مىس مەدالعا تالاسۋ جارىسىنا قاتىناستى، دەسەدە جەڭە المادى، ەڭ سوڭىندا 5 - ورىندى يەلەدى؛ ارعىن وسى تۇردەگى جارىستىڭ 8 - ورنىن الدى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.